Wiewia 4:1-37
4 Eri ni meh riemeno ara koasoakoasoiong aramas ako, samworo ko, sounapwalih en tehnpas sarawio oh Sadusi ko* ahpw kohdo rehra.
2 Irail pwukat lingeringerda pwehki wahnpoaron ko kin padahkih aramas ako oh kin kalohki ni sansal duwen iasadahn Sises sang rehn me melahr akan.*
3 Irail eri kolirahdi* oh saliirahdi lao lel mandahn rahno, pwehki eh soutikpenehr.
4 Ahpw me tohto nanpwungen irail ko me rong dahme ira koasoia pwosonla oh ohl ako wie tohtohla lel mpen meh 5,000.
5 Mandahn rahno, arail kaun ako, ohl mah ko oh sounkawehwehn Kosonnedo ko ahpw pokonpene nan Serusalem,
6 iangahki kaunen samworo Anas, Kaiapas, Sohn, Aleksander oh pil koaros me peneineiki kaunen samworo.
7 Irail ahpw kahrehdo Piter oh Sohn nanpwungarail oh tepida idek rehra: “Ni manaman dahieu oh ni mwaren ihs me kumwa wiahki met?”
8 Piter ahpw direkihla sapwellimen Koht manaman* oh ndaiong irail:
“Kaun en aramas akan oh ohl mah kan,
9 ma se ale keseu rahnwet duwen wiewia mwahu me kohieng ohl neh mwoatoro oh kumwail men ese ihs me kamwahwihala ohl menet,
10 kumwail koaros oh aramas koaros en Israel en ese me ni mwaren Sises Krais mehn Nasaret me kumwail kemelahr nin tuhke pwoat, ahpw Koht ketin kaiasada sang rehn me melahr akan, oh pwehki ih, ohl menet me kesikesihnen mwohmwail mwahulahr.
11 Iei ih ‘takai me kumwail sounkou ihmw kan mwamwahlkilahr me wialahr takain pwukakeimw me keieu kesempwal.’*
12 Patehng met, sohte komour pahn kohsang rehn emen tohrohr, pwe sohte pil ehu mwar nin sampah me kohieng aramas akan me kitail pahn komourkihla.”
13 Eri, ni arail kilang Piter oh Sohn ara kin eimah koasoi, oh re wehwehkihda me ira sohte iang sukuhl* oh sohte wad, irail ahpw pwuriamweikihla. Oh re ahpwtehn esehda me ira kin iang Sises.
14 Ni arail kilikilang ohl me mwahulahro eh kesikesihnen rehra, irail sohte sapengki mehkot.
15 Irail ahpw ruwese irail en kohieila likin Sanedrino,* irail ahpw tepida koasoipene nanpwungarail,
16 ndinda: “Dahme kitail pahn wiahiong ohl pwukat? Pwe ni mehlel, ira wiahda mehkot me uhdahn kapwuriamwei me sansal ong tohn Serusalem koaros, oh kitail sohte kak kahmahmki.
17 Pwe met en dehr lohkseli nanpwungen aramas akan, kitail kamasakirahda oh ndaiong ira en dehier koasoiong emen ni eden aramas menet.”
18 Irail eri ekerirahdo oh ruwese irail en dehpa koasoia mehkot de padahk ni mwaren Sises.
19 Piter oh Sohn ahpw sapeng irail, nda: “Ma kumwail medewe me e pwung mwohn silangin Koht sen rong kumwail a kaidehn Koht, kumwail pein pilada.
20 Ahpw kiht, se sohte kak uhdihsang koasoia duwen soahng kan me se kilangehr oh rongehr.”
21 Eri mwurin arail pwurehng kamasak ira, irail lapwairahda pwehki re sohte diarada kahrepen arail pahn kaloke ira oh re masak aramas ako pwe irail koaros kin kalinganahkihda Koht duwen me wiawihero.
22 Pwe ohl me manaman* wet kamwahwihalahro sounpar 40 samwa.
23 Mwurin ara lapwada, ira ahpw kohla rehn pein ara aramas ako oh kairehkin irail dahme kaunen samworo ko oh ohl mah ko ndaiong ira.
24 Ni arail rongehr met, irail ahpw ehupene kapakapohng Koht, patohwan:
“Maing Kaun Wasa Lapalahpie, komwi iei Meno me ketin wiahda nanleng oh sampah oh nansed oh audeparail kan koaros,
25 oh ni omwi ketin doadoahngki sapwellimomwi manaman,* komw ketin mahsanih sang ni ewen sapwellimomwi ladu Depit, samat mehn mahso: ‘Dahme wehi kan mwoarongkihda oh aramas akan kin medemedewehki soahng soh katepe kan?
26 Nanmwarki kan en sampah onopadahr pein irail oh kaun akan pokonpenehr pwe ren ehupene pelianda Siohwa* oh sapwellime me keidio.’*
27 Pwe ni mehlel, koaros Erod oh Pontius Pailet iangahki mehn liki kan oh aramas en Israel kan pokonpene nan kahnimw wet pwe ren pelianda Sises, sapwellimomwi ladu sarawio, me komw ketin keiedier,
28 pwe ren wia dahme limomwi oh kupwuromwi ketin koasoanedier mwohn eh pahn wiawi.
29 A met, maing Siohwa,* komw ketin kalahngan oh karonge arail kin kamasak kiht oh ketin mweidohng sapwellimomwi ladu kan ren kin uhdahn eimah oh usehlahte kalohki sapwellimomwi mahsen,
30 ni omwi kin ketin kapahla limomwi pwe en ketin kamwahwihala me soumwahu kan, oh ni manaman akan oh soahng kapwuriamwei kan ar kin wiewiawi ni mwaren Sises, sapwellimomwi ladu sarawio.”
31 Oh ni arail wiahier arail kapakap ni ngidingid, wasa me re pokonpene ieo rerada, oh irail koaros ahpw direkihla sapwellimen Koht manaman* oh kalokalohki mahsen en Koht ni eimah.
32 Oh pil me tohto me pwosonlahr kin miniminpene ni mohngiong oh madamadau,* oh sohte emen rehrail kin nda me dahme e ahneki pein ah, ahpw irail koaros kin ahnekipene soahng koaros.
33 Oh ni manaman laud, wahnpoaron ko kin usehlahte wia kadehde duwen iasadahn Kaun Sises oh irail koaros ahpw paiekihda laud kadek sapan.
34 Ni mehlel, sohte emen nanpwungarail me semwehmwe, pwe irail koaros me ahneki mwaht akan de imwaneki ihmw akan kin netikihla oh wahdo pweinen dahme netila ko,
35 oh kihong wahnpoaron ko. Eri, wahnpoaron ko uhd kin nehkpeseng mwohni ko ong emenemen nin duwen eh anahn.
36 Eri, Sosep me wahnpoaron ko pil kin kahdaneki Parnapas (me wehwehki, “me kin kangoange meteikan”*), mehn Lipai men, pwilidak en Saiprus,
37 sapweniki sahpw ehu, e ahpw netikihla oh wahdo mwohnio oh kihong wahnpoaron ko.
Footnote kan
^ Kilang KLL.
^ De “iasada sang rehn me melahr akan me pid Sises.”
^ De “parokirahdi.”
^ LK, pneuʹma. Kilang KLL.
^ LK, “moangen keimw.”
^ Me iei, sohte iang sukuhl en rapai kan; met sohte wehwehki sehse wadawad oh nting.
^ Kilang KLL.
^ De “kilel.”
^ LK, pneuʹma. Kilang KLL.
^ Kilang KLL.
^ De “sapwellime Krais.”
^ Kilang KLL.
^ LK, pneuʹma. Kilang KLL.
^ LK, psy·kheʹ. Kilang KLL.
^ LK, “Nein Kansenamwahu Pwutak.”
