Rom 1:1-32
1 Pohl, ladun Krais Sises, me malipe ie en wiahla wahnpoaron men oh idihiehda pwe I en kalohki rongamwahu en Koht,
2 me Koht ketin inoukidahr mahs nan Nting Sarawi kan sang rehn sapwellime soukohp ako.
3 Rongamwahwo kin pid duwen Sapwellimeo, me ipwidi nin duwen kadaudok en Depit,*
4 me iasada sang rehn me melahr akan sang ni roson en sapwellimen Koht manaman,* oh met kasalehda me ih Sapwellimen Koht. Memenet iei Sises Krais atail Kaun.
5 Se alehdi sang reh kadek sapan oh doadoahk en wahnpoaron pwe aramas en wehi koaros en kak kasalehda arail pwoson oh peikiong ih pwe ren kalinganahda mware,
6 oh Koht pil ketin malipe kumwail sang nanpwungen wehi pwukat koaros pwe kumwail en wiahla sapwellimen Sises Krais.
7 I ntingwohng irail koaros me mi nan Rom nin duwen aramas me Koht ketin poakohng oh malipe pwe ren wiahla aramas sarawi kei:
Samatail Koht oh Kaun Sises Krais en ketikihong kumwail kadek sapan oh popohl.
8 Mwohn mehkoaros I kin kalahngankihong ei Koht ni mwaren Sises Krais duwen kumwail koaros, pwehki amwail pwoson kin lohkseli wasa koaros nin sampah.
9 Pwe Koht me I kin papahki ei mohngiong unsek* me pid duwen rongamwahu en Sapwellimeo, iei ei sounkadehde me I sohte kin uhdihsang koasoia kumwail ahnsou koaros nan ei kapakap kan,
10 oh kin peki I en kohwei rehmwail, ma iei met kupwuren Koht ong ie.
11 Pwe I uhdahn men tuhwong kumwail pwe I en kak kihong kumwail kisakis sang rehn Koht pwe kumwail en tengeteng nan pwoson;
12 de kitail en kangoange emenemen sang ni atail pwoson, amwail oh pil ahi.
13 Ahpw riei ko, I men kumwail en ese me pak tohto I men kohwei rehmwail pwe I en kilang imwila mwahu sang ei kalohk wasahn duwehte nan wehi teikan. Ahpw ehuehu pak mehkot kin kerempwa ie lel met I en kohwei rehmwail.
14 I kin pwukoahki irail koaros, mehn Krihs kan oh mehn liki kan,* me loalokong oh me sohte sukuhl kan;
15 ihme kahrehda I pil ngoangki lohki rongamwahu ong kumwail me kin kousoan nan Rom.
16 Pwe I sohte kin namenengki rongamwahwo; ni mehlel, rongamwahwo iei kadehdepen roson en Koht oh e kak komourala koaros me ahneki pwoson, mehn Suhs mahs oh pil mehn Krihs.
17 Pwe irail me ahneki pwoson kin kilang me Koht ketin kasalehda sapwellime pwung sang ni rongamwahwo oh met kin kakehlaka arail pwoson, nin duwen me ntingdier: “Ahpw me pwung men pahn momour pwehki eh pwoson.”
18 Pwe engieng en Koht kin sansalda sang nanleng ong aramas me kin sapeikiong ih oh me sohte pwung kan. Re kin wia soahng suwed kan pwe ren kerempwahsang aramas akan en esehla me mehlelo.
19 Konehng ren eselahr Koht, pwehki e ketin kasalehiongirailehr soahng tohto.
20 Pwe sapwellime irair soh sansal kan me iei sapwellime roson poatopoat oh eh uhdahn Koht kin sansalda sang ahnsou me sampah kapikipikda, pwehki mepwukat kin sansalkihda soahng kan me wiawihda, kahrehda re sohte kak kihda kahrepen arail sohte kamehlele Koht.
21 Mendahki arail ese Koht, re sohte kin kalinganahda ih nin duwen Koht emen oh re pil sohte kin kalahnganohng ih, ahpw arail madamadau sohla katepe oh arail mohngiong pweipwei rotorotala.
22 Mendahki arail kin nda me re loalokong, ahpw re pweipweila
23 oh wekidohng lingan en Koht me poatopoat* ong mehkot me duwehte sansal en aramas me kin sohrala,* menpihr kan, mahn me neh pahpwoat, oh sineik oh kieil kan.*
24 Eri, pwehki re men idawehn ineng en arail mohngiong, Koht ketin mweidohng irail en wia soahng kan me kasaut oh kin kamwamwahlihala paliwararail kan.
25 Re kin kawiliankihda mehlel en Koht ong likamw oh kin pwongih* oh papah kepikipik kan a kaidehn Sounkapikada, me kaping kin kohwong kohkohlahte. Amen.
26 Ihme kahrehda Koht ketin mweidohng irail en mi pahn manaman en ineng suwed oh kasaut kan, pwe lih akan kin wia soahng kan me sohte pwung mendahki Koht sohte ketin kapikirailda en kin wia met;
27 pil duwehte, ohl akan kin pwilikihdi arail ineng pwung ong lih oh kin mwasimwasingki arail ineng suwed nanpwungarail, ohl akan kin wiapene soahng kanamenek kan nanpwungarail oh kin ale kalokeparail unsek me konehng arail wiewia suwed kan.
28 Pwehki re sohte kin kilang katepen en esehla Koht,* Koht ketin mweidala irail en mi nan soangen madamadau me e sohte kupwurki, pwe ren wia soahng kan me sohte konehng.
29 Oh re kin direkihla soangen sapwung koaros, mwersuwed koaros, noahrok koaros, oh suwed koaros, oh diren peirin, kamaramas, pei, widing, ineng en kauwehla meteikan, re kin lipahned,*
30 kauwe meteikan, re kin kailongki Koht, serekeileng, aklapalap, aksuwei, kin medewehda soahng suwed kan, sohte kin peikiong pahpa oh nohno,
31 sohte men wehwehki, inou soupwei, sempoak oh soh mahk.
32 Mendahki arail uhdahn ese koasoandi pwung en Koht—me irail me kin wia soahng pwukat konehng mehla—re kin usehlahte wia mepwukat oh pil kin pwungki irail kan me kin wia mepwukat.
Footnote kan
^ De “ipwidi sampah nin duwen emen kadaudok en Depit.”
^ LK, pneuʹma. Kilang KLL.
^ LK, “ei pneuʹma.” Kilang KLL.
^ De “kaidehn mehn Krihs kan.”
^ LK, “sohte kak mwerpeseng.”
^ LK, “kak mwerpeseng.”
^ De “mahn kerep kan.”
^ De “kaudokiong.”
^ De “re sohte kin men esehla Koht ni pwung.”
^ LK, “mwenginingin.”
