Madiu 22:1-46
22 Sises pil pwurehng mahseniong irail ni karasaras, mahsanih:
2 “Wehin nanleng rasehng nanmwarki men me wiahda kamadipw en kapwopwoud ehu ong nah pwutak.
3 Oh e kadarala eh ladu kan pwe ren eker irail me ale luhk en iang kamadipw en kapwopwoudo, ahpw re sohte men iang towehda.
4 E pil kadarala ekei ladu oh nda, ‘Ndaiong irail me aleier luhk: “Kilang! I kaunopadahr mwenge, nei kou kan oh mahn wih ko kamalahr oh mehkoaros kaunopadahr. Kumwail kohdo iang kamadipw en kapwopwoud.”’
5 Ahpw irail sohte nsenohki ahpw kohla wia soahng teikan, emen kohla nan eh mwahto, a emen kohla wia eh pesines;
6 ahpw meteiko poarehng eh ladu ko, wiakauweirailla oh kemehla.
7 “Nanmwarkio ahpw lingeringerda kowahlap oh kadarala nah karis en sounpei kan oh kemehla sounkam aramas ako oh isikala arail kahnimwo.
8 Ih eri ndaiong eh ladu ko, ‘Kamadipw en kapwopwoud kaunopadahr, ahpw irail me ale luhk sohte warohng towehda.
9 Ihme kahrehda, kumwail kohla ni ahl akan me kohieisang nan kahnimwo, oh lukehdo aramas sohte lipilipil me kumwail diar ong kamadipw en kapwopwoud wet.’
10 Eri, ladu ko kohieila nanial akan oh kapokonepene koaros me re diar, me suwed oh me mwahu; oh wasahn kamadipw en kapwopwoudo ahpw direkihla irail me iang mwenge.*
11 “Ni ahnsou me nanmwarkio pedolong pwe en tehk irail me lukodo ko, e kilangada ohl emen me sohte likawih kapwat en kapwopwoud.
12 E ahpw ndaiong, ‘Nahn, ia duwen omw pedolongodo met ahpw sohte kapwat en kapwopwoud?’ Ohlo ahpw sohte lokaia.
13 Nanmwarkio ahpw ndaiong eh ladu ko, ‘Kumwail salihpene peh oh neh kan oh kesehieila likio nan rotorot. Ih wasa me e pahn sengiseng oh ngih kan tehtehrek.’
14 “Pwe me tohto me aleier luhk, ahpw me malaulau me pilipilda.”
15 Parisi ko ahpw kohla oh kapwungada oh pwungkipene pwe ren lidipiheki sapwellime mahsen.
16 Irail ahpw kadarala neirail tohnpadahk ko reh, iangahki pwihn me kin uhpalihki Erod oh patohwan: “Maing Sounpadahk, se patohwan ese me komw kin mehlel oh kin ketin padahngki elen Koht ni mehlel, oh komw sohte kin ketin ale keniken rehn aramas, pwe komw sohte kin ketin kilang maslikin aramas.
17 Komw mahsanihong kiht mahs. Ia omwi madamadau? E konehng* en pwainohng Sihsar daksis en moahng de soh?”
18 Ahpw Sises mwahngih arail mwersuwed oh mahsanih: “Mwalaun amwailen, dahme kahrehda kumwail kasonge ie?
19 Kasalehiong ie mwohni en daksisen.” Irail ahpw patohwanohng ih denari* ehu.
20 E mahsanihong irail: “Ahn ihs sansal oh nting met?”
21 Irail patohwan: “Ahn Sihsar.” E ahpw mahsanihong irail: “Eri, kumwail pwainohng Sihsar mehkan me ahn Sihsar, a ong Koht mehkan me sapwellimen Koht.”
22 Ni arail rongada met, irail ahpw pwuriamweikihla oh kohkohlahsang.
23 Ni rahnohte Sadusi ko me kin nda me sohte kaiasada, patohdo oh patohwan idek reh:
24 “Maing Sounpadahk, Moses kin nda: ‘Ma ohl emen mehla ahpw sohte naineki seri, rie pwutak uhdahn pahn pwoudikihda eh pwoudo oh wiahda kadaudok en rieo.’
25 Eri mie pirien ehu, irail ohl isimen. Me keieu laudo pwopwoudida oh mehla oh pwehki sohte kadaudoke, rie pwutako uhd pwoudikihda eh pwoudo.
26 Soahngohte pil wiawihong me keriemeno oh pil me kesilimeno, lao lel me keisimeno.
27 Mwuhr, liho ahpw mehla.
28 Eri, ni rahnen iasada, ihs rehn me isimeno me pahn wia eh pwoud, pwehki irail koaros wiahla eh pwoud?”
29 Sises ahpw ketin sapeng irail mahsanih: “Kumwail sapwung pwe kumwail sohte wehwehki Nting Sarawi kan oh roson en Koht;
30 pwe ni rahnen iasada, ohl oh lih akan sohte pahn pwopwoud, ahpw re pahn duwehte tohnleng kan nanleng.
31 Kumwail sou kin wadek dahme Koht ketin mahsanihong kumwail me pid iasadahn me melahr akan, me mahsanih:
32 ‘Ngehi me Koht en Eipraam oh Koht en Aisek oh Koht en Seikop’? Ih me Koht, kaidehn Koht en me melahr akan, ahpw Koht en me momour akan.”
33 Ni pokono ar rongada met, re ahpw pwuriamweikihla sapwellime padahk.
34 Mwurin Parisi ko ar rongada me e ketin katokehdi Sadusi ko, re ahpw pokonpene nin duwen pwihn ehu.
35 Oh emen rehrail, me samanih Kosonnedo ahpw kasonge ih ni eh patohwan:
36 “Maing Sounpadahk, mehnia kehkehlik me keieu kesempwal nan Kosonnedo?”
37 E mahsanihong ih: “‘Ke anahne poakohng Siohwa* omw Koht ni omw mohngiong unsek oh omw mour* unsek oh omw lamalam unsek.’
38 Met me keieu kesempwal oh ih keieun kehkehlik.
39 Me keriauo me rasehngete met iei: ‘Ke anahne poakohng mehn mpomw duwen omw kin poakohng pein uhk.’
40 Kehkehlik riau pwukat kin wia poahsoanpen Kosonnedo pwon oh padahk en Soukohp ako.”
41 Ni Parisi ko ar pokonpene, Sises ahpw keinemwe rehrail:
42 “Dahme kumwail medewehki Krais? Nein ihs ih?” Irail ahpw patohwanohng: “Nein Depit.”
43 E keinemwe rehrail: “Eri dahme kahrehda Depit me mi pahn sapwellimen Koht manaman* kin ekerki ih Kaun, oh nda,
44 ‘Siohwa* ketin mahsanihong ei Kaun: “Mwohndiong ni palimauni I lao pahn kihdiong omw imwintihti kan pahn nehmw kan”’?
45 Eri ma Depit kin ekeriki ih Kaun, ia duwen eh wia nah pwutak?”
46 Eri sohte emen me kak sapengki ih mehkot, oh sang ni rahno kohla, sohla emen kak idek reh mehkot.
Footnote kan
^ De “mwohd oh irekek ni tehpel.”
^ De “pwung.”
^ Kilang KLL.
^ Kilang KLL.
^ LK, psy·kheʹ. Kilang KLL.
^ LK, pneuʹma. Kilang KLL.
^ Kilang KLL.
