Luk 9:1-62
-
Ehk Riemeno ale kaweid ong kalohk (1-6)
-
Erod pwonopwonkihda Sises (7-9)
-
Sises ketin kamwenge meh 5,000 (10-17)
-
Piter nda ihs Sises (18-20)
-
Pwoulahn Sises kokohpda (21, 22)
-
Kilelepen tohnpadahk mehlel (23-27)
-
Sises ketin wekila (28-36)
-
Pwutak me ngehn suwed tiada powe mwahula (37-43a)
-
Pwoulahn Sises pwurehng kokohpda (43b-45)
-
Tohnpadahk kan akamaiki ihs me lapalap (46-48)
-
Mehmen me sohte kin uhwong kitail kin uhpalihkin kitail (49, 50)
-
Kisin kahnimw en mehn Sameria ehu soikala Sises (51-56)
-
Duwen idawehn Sises (57-62)
9 E ahpw malipepene me Ehk Riemeno oh ketikihong irail manaman oh pwuhng en powehdi ngehn suwed koaros oh kamwahwihala soumwahu kan.
2 Ih eri poaronehla irail en kalohki Wehin Koht oh en kamwahwihala aramas akan,
3 e ahpw mahsanihong irail: “Kumwail dehpa wa mehkot nan seiloak wet, sohte sokon, sohte edin mwenge, sohte pilawa, sohte mwohni;* oh pil sohte likou riau.*
4 Ahpw sohte lipilipil wasa me kumwail pedolong nan ihmw ehu, mihmihte mwo lao kumwail mweselsang wasao.
5 Oh sohte lipilipil wasa ehu me aramas sohte kin kasamwo kumwail, ni amwail kohieisang kahnimwo, sipedasang pwelpar ni nehmwail kan pwe en wia kadehde ehu ong irail.”
6 Irail ahpw mweselda, kakahnseli nan kisin kahnimw koaros, kalokalohki rongamwahu oh kamwakamwahwihala aramas akan wasa koaros.
7 Erod,* kaunen wehin Kalili rongada duwen mehkoaros me wiawi, e ahpw pwonopwonkihda laud pwehki ekei kin nda me Sohn iasadasangehr rehn me melahr akan,
8 ahpw ekei kin nda me Elaisa me pwarodohr, a pil ekei kin nda me emen soukohp en kawa ko me iasadahr.
9 Erod ahpw nda: “I lupukasangehr moangen Sohn. Eri, ihs ohl menet pwe I rong soahng tohto duwe?” Eri e kin songosong en tuhwong.
10 Ni wahnpoaron ko ar pwurodo, re ahpw patohwanohng Sises mehkoaros me re wiadahr. E ahpw ketin kahreirailda pwe ren ketilahng kalapwukala nan kahnimw ehu me adaneki Pedsaida.
11 Ni pokono ar esehda met, irail ahpw idawehnla. Ih eri ketin kasamwo irail ni kadek oh tepida mahsanihong irail duwen Wehin Koht oh ketin kamwahwihala irail ko me soumwahu.
12 Rahno ahpw kereniongehr imwisekla. Me Ehk Riemeno ahpw keiong mpe oh patohwanohng ih: “Komw ketin kadarpeseng pokonet pwe ren kohla nan kisin kahnimw oh kousapw keren kan oh diarada wasahn pweidi oh kanarail mwenge, pwehki wasaht me doh.”
13 E ahpw mahsanihong irail: “Kumwail kihong irail mehkot ren kang.” Irail patohwan: “Sohte mehkot reht, ahpw lopwon en pilawahte limau oh mwahmw riemen, ihte ma se pahn pein kohla pwainda mwenge ong aramas pwukat koaros.”
14 Ni mehlel, ohl mpen 5,000 me mi wasao. E ahpw mahsanihong sapwellime tohnpadahk ko: “Kamwohdangiraildi ni pwihn kei wad mpen 50.”
15 Irail eri wiahda oh kamwohdangiraildi koaros.
16 Ih eri ketikihda lopwon en pilawa limauo oh mwahmw riemeno, e mahsendalahng nanleng oh kapingkalahnganki. E ahpw ketin pilitikihpeseng mepwukat oh tepida ketikihong sapwellime tohnpadahk ko pwe ren kihdiong mwohn pokono.
17 Irail koaros eri mwenge oh medla, oh re deukada luhwe ko wiahda kopwou 12.
18 Mwuri, ni eh kalapwuk wie loulou, tohnpadahk ko patohdo reh oh e keinemwe rehrail, mahsanih: “Ihs me pokono kin wiahkin ie?”
19 Irail ahpw sapeng patohwan: “Sohn Sounpapidais, a ekei kin nda Elaisa, a pil ekei kin nda emen soukohp en kawa ko me iasadahr.”
20 Ih eri mahsanihong irail: “A kumwail, ihs me kumwail kin wiahkin ie?” Piter ahpw sapeng patohwan: “Sapwellimen Koht Krais.”
21 Ih eri ketin padahkihong irail ren dehpa ndaiong emen met,
22 e ahpw mahsanih: “Nein-aramas anahne lelohng lokolok tohto oh ohl mah kan, kaunen samworo kan oh sounkawehwehn Kosonnedo kan pahn soikala, e ahpw pahn kamakamala oh iasada ni kesiluhwen rahn.”
23 E ahpw pousehlahte mahsanihong irail koaros: “Ma mehmen men idawehniehdo, a en tounmeteikihla pein ih oh kapaikada eh tuhkehn kalokolok* rahn koaros oh kin ideidawehn ie.
24 Pwe mehmen me men doarehla eh mour* pahn katihasang, ahpw mehmen me katihasang eh mour* pwehki ngehi, iei ih me pahn doarehla eh mour.
25 Ni mehlel, ia pahn katepehiong emen ma e ahnekihla sampah pwon ahpw katihasang eh mour de kauwehla pein ih?
26 Pwe mehmen me kin namenengkin ie oh ei mahsen, Nein-aramas pahn ketin namenengki aramas meno ni ahnsou me e pahn ketido nan eh lingan oh lingan en Sahmo oh tohnleng sarawi kan.
27 Ahpw I ndaiong kumwail ni mehlel, ekei me kesikesihnen wasaht sohte mwahn pahn mehla lao re pahn kilang mahs Wehin Koht.”
28 Ni mehlel, mpen rahn waluh mwurin eh mahsanih mepwukat, e ketin kahrehda Piter, Sohn, oh Seims, oh ketidahla pohn nahna ehu pwehn loulou.
29 A nindoken eh wie loulou, mwomwen silangi wekila oh sapwellime likou pwetepwetala oh melengilengla.
30 A kilang! ohl riemen koasoakoasoiong Sises; ira iei Moses oh Elaisa.
31 Ira pwarodo ni lingan oh tepida koasoia duwen eh pahn mweseldahr, me e pahn kereniongehr ketin kapwaiada nan Serusalem.
32 A Piter oh ienge ko toutoukilahr ar men meir, ahpw ni arail piridahr, re kilangada sapwellime lingan oh ohl riemen me kesikesihnen reho.
33 Oh ni ara patopatohla sang reh, Piter patohwanohng Sises: “Maing Sounpadahk, e mwahu ong kiht sen mihmi wasaht. Eri mweidohng kiht sen kauwada impwal siluh, ehu ong komwi, ehu ong Moses oh ehu ong Elaisa.” E ahpw sohte wehwehki dahme e ndinda.
34 Ahpw ni eh patopatohwan mepwukat, depwek ehu pwarada oh kipeiraildi. Irail ahpw masepwehkada ni arail mihla nan depweko.
35 Ngihl ehu eri peido sang nan depweko, mahsanih: “Iet nei Pwutak me pilipildahr. Kumwail rong ih.”
36 Ni arail rongada ngihlo, re ahpw kilangada me Sises kalakalapwuk. Irail ahpw sohte mweseiseiki mehkan me re kilangada oh sohte ndaiong emen erein rahn ako.
37 Mandahn rahno, ni ar ketiket kohdi sang pohn nahnao, lapalahn pokon ehu ahpw tuhwong ih.
38 A iet! ohl emen likwer sang nan pokono, patohwan: “Maing Sounpadahk, I patohwan peki komwi en mahsanih ei tungoal pwutak, pwe ihete nei serien met.
39 Oh kilang! ni ngehn emen eh kin powehdi ih, e kin pwururdahte wer, oh ngehno kin kahrehiong ih en rerada oh dengila oh nan ewe kin pwudopwudida, oh ngehno sohte men pedoisang ahpw ihte mwurin eh kin kamedekihala.
40 I peki sapwellimomwi tohnpadahk ko ren kausasang, ahpw re sohte kak.”
41 Sises ketin sapeng mahsanih: “Kumwail dih seupwoson oh dipan, ia uwen werei ei pahn mihmi rehmwail oh kanengamahiong kumwail? Wahdo noumw pwutaken wasaht.”
42 A nindoken eh patopatohdo, ngehn suwedo ahpw kesepwekehdiong nanpwel oh kahrehiong eh rerrer laud oh dengila. Sises ahpw ketin lipwoarehda ngehn sauto oh ketin kamwahwihala pwutako, ih eri ketin kapwurehiong semeo.
43 Irail koaros ahpw pwuriamweikihla roson lapalap en Koht.
Nindoken koaros ar pwuriamweikihla mehkoaros me e ketin wiadahr, e ahpw mahsanihong sapwellime tohnpadahk ko:
44 “Kumwail rong kanahieng oh tamataman mahsen pwukat, pwe Nein-aramas pahn pengpengla rehn aramas akan.”
45 Ahpw re sohte wehwehki dahme e mahmahsanih. Ni mehlel, e ekiekla sang irail pwe re sohte kak wehwehki oh re masak kalelapak reh duwen mahsen wet.
46 Mwuri, akamai ehu ahpw pwarada nanpwungarail duwen ihs rehrail me keieu lapalap.
47 Sises mwahngihada dahme mi nan mohngiongirail, ih eri ketin ale kisin seri men oh ketin kasihnenihada mpe,
48 oh mahsanihong irail: “Mehmen me kin kasamwo kisin seri menet pwehki mwarei pil kin kasamwo ie; oh mehmen me kin kasamwo ie pil kin kasamwo Ih me ketin poaroneiehdo. Pwe mehmen me kin wiahki pein ih me tikitik men nanpwungamwail koaros, iei ih me lapalap.”
49 Sohn ahpw sapeng patohwan: “Maing Sounpadahk, se kilangada aramas emen me kin kausasang ngehn suwed kan sang ni eh kin doadoahngki mwaromwi oh se song kauhdi ih pwehki eh sohte iang kitail.”
50 Sises ahpw mahsanihong: “Kumwail dehr kauhdi ih, pwe mehmen me sohte kin uhwong kumwail kin uhpalihkin kumwail.”
51 Pwehki ahnsoun eh pahn ketidahla nanleng eh kerendohr,* e ketin koasoanedier teng en ketila Serusalem.
52 Ih eri poaronehla meninkeder kei mwowe. Oh re kohla oh pedolong nan kisin kahnimw en mehn Sameria ehu pwe ren kaunopada ong ih.
53 Ahpw irail sohte kasamwo ih pwehki eh ketin koasoanedier* en ketila Serusalem.
54 Ni tohnpadahk Seims oh Sohn ara kilangada met, ira patohwan: “Maing Kaun, komw kupwurki sen patohwan peki pwe kisiniei en mweredi sang nanleng oh kamwomwirailla?”
55 Ahpw e ketin sohpeiong ira oh ketin lipwoareirahda.
56 Irail eri ketila ni ehu kisin kahnimw tohrohr.
57 Ni arail ketiket kohla nanialo, aramas emen ahpw patohwanohng: “I pahn idawehn komwi wasa koaros me komw pahn ketila ie.”
58 Ahpw Sises mahsanihong: “Kidien wel kan* mie dewerail oh menpihr en pahnlahng kan mie pasarail, ahpw Nein-aramas sohte wasa en kaulewei ie tapwi.”
59 Mwuri e mahsanihong pil emen: “Idawehniehla.” Ohlo patohwan: “Maing Kaun, komw ketin mweidohng ie mahs I en kohla oh sarepedi semeio.”
60 E ahpw mahsanihong: “Mweidohng irail kan me melahr en sarepedi arail mehla, ahpw kowe kohla oh lohkiseli wasa koaros Wehin Koht.”
61 A pil emen patohwan: “Maing Kaun, I pahn idawehnla komwi, ahpw komw ketin mweidohng ie mahs I en kamwurala tohn imweio.”
62 Sises ahpw mahsanihong: “Mehmen me kolokol mehn deipwel ehu ahpw kilenglahng soahng kan me mi mwuri sohte warohng Wehin Koht.”
Footnote kan
^ LK, “silper.”
^ De “pil ehu likou.”
^ Me iei, Erod Antipas. Kilang KLL.
^ Kilang KLL.
^ LK, psy·kheʹ. Kilang KLL.
^ LK, psy·kheʹ. Kilang KLL.
^ LK, “kohkohlahng ididier.”
^ LK, “meseo kilenglahngete.”
^ Ni lokaiahn Krihs, e wehwehki “fox,” mahn me mwomwen kidi nan Israel oh sahpw kan me kapilpene.
