Luk 16:1-31
16 Ih eri pil mahsanihong tohnpadahk ko: “Ohl kepwehpwe men naineki sounapwalih men* me ale karaunepen eh kin wiakauwe eh kepwe kan.
2 Ih eri ekerodo oh nda, ‘Ia duwen rohng pwoatet duwen kowe? Kihdo ripoht en omw doadoahk pwe ke solahr pahn kak apwalih ihmwo.’
3 Sounapwaliho ahpw ndaiong pein ih, ‘Dahme I pahn wia, pwe ei soumaso pahn kihsang ei pwukoa doadoahk? I sohte nohn kehlail en weirada pwoahr oh I namenengki pekipekseli.
4 Ah! I ese dahme I pahn wia pwe ni ei pahn lekdeksang nan ei pwukoa doadoahk, aramas akan pahn kin kasamwoielong nan imwarail kan.’
5 Oh e ekerodo reh emenemen irail ko me pweipwand ong eh soumaso oh ndaiong me keieuo, ‘Ia uwen omw pweipwand ong ei soumaso?’
6 E sapengki, ‘Pahd* en lehn olip epwiki.’ E ahpw ndaiong, ‘Ale noumw doaropwehn lohnen, mwohndi oh mwadang ntingihedi meh 50.’
7 Mwuri, e pil ndaiong emen, ‘A kowe, ia uwen omw pweipwand?’ E ahpw nda, ‘Kor* en wihd epwiki.’ E ahpw ndaiong, ‘Ale noumw doaropwehn lohnen oh ntingihedi meh 80.’
8 A eh soumaso ahpw kapingahla sounapwaliho, pwe mendahki eh suwed, e mwekid ni loalokong, pwe serien mwehi wet* kin loalokong ong pein arail dih laudsang serien marain.
9 “I pil ndaiong kumwail: Wiahda kompoakepahmwail sang ni kepwehn sampah suwed wet pwe ni soahng pwukat ar pahn nekila, irail pahn kasamwolong kumwail nan wasahn kousoan kohkohlahte.
10 Aramas emen me kin lelepek ni mehkot tikitik pil kin lelepek ni mehkot laud, oh aramas emen me sohte kin lelepek ni mehkot tikitik pil sohte kin lelepek ni mehkot laud.
11 Eri, ma kumwail sohte kin kadehdehda amwail lelepek me pid kepwehn sampah suwed wet, ihs me pahn likihong kumwail dahme mehlel?
12 Oh ma kumwail sohte kin kadehdehda amwail lelepek me pid ahn emen kepwe, ihs me pahn kihong kumwail mehkot ong pein kumwail?
13 Sohte sounpapah men kak wia ladu ong soumas riemen, pwe e pahn kailongki emen ahpw poakohng meteio, de e pahn loalopwoatohng emen ahpw mwamwahliki meteio. Kumwail sohte kak wia ladu kei ong Koht oh Kepwe.”
14 A Parisi ko, me kin poakohng mwohni wie rongorong mepwukat koaros, re ahpw tepida kepikepitki ih.
15 Ih eri mahsanihong irail: “Kumwail me kin kasalehda me kumwail me pwung mwohn aramas akan, ahpw Koht ketin mwahngih mohngiongimwail. Pwe dahme aramas akan kin kesempwalki kin wia mehkot kasaut mwohn silangin Koht.
16 “Kosonnedo oh mahsen en Soukohp ako kin mihmi lel ni mwehin Sohn. Sang ni ahnsowo, Wehin Koht kin lohkseli nin duwen rongamwahu oh soangen aramas koaros kin nantihong laud pwe ren pedolong loale.
17 Ni mehlel, e pahn mengeiong nanleng oh sampah en sohrala sang ehu kisin mesen nting en Kosonnedo en sohte pweida.
18 “Mehmen me mweisang eh pwoud lih oh pwoudikihda emen tohrohr, e kamwahl, oh mehmen me pwoudikihda lih emen me mweisangehr eh pwoud, e kamwahl.
19 “Mie ohl kepwehpwe men me kin likawih likou pohn ntahnmwel oh likou linen, oh kin pereperenki mour nsenamwahu rahn koaros.
20 Ahpw ohl semwehmwe men* ede Lasarus me diren kens kin wisikdo ni wenihmwen eh kehlo,
21 oh e kin men kang soahng kan me pwupwudi sang en ohl kepwehpweo eh tehpel. Ei, pil kidi kan kin kohdo oh tamwe eh kens kan.
22 Kedekedeo, ohl semwehmweo ahpw mehla oh tohnleng kan wahla limwahn* Eipraam.
“Ohl kepwehpweo pil mehla oh seridi.
23 Oh nan Sousowo* ni eh weiweirek, e ahpw kilengdahla oh kilangada Eipraam sang wasa doh oh Lasarus me mi limwah.*
24 Ih eri eker oh ndaiong, ‘Semei Eipraam, poakeiehla mahs oh kadarodo Lasarus en kaduh imwin sendin peh nan pihl oh kalamwurehki loweiet pwe I weiweirek nan kisiniei mwehl wet.’
25 Eipraam ahpw nda, ‘Samwa, tamataman me ke aleier soahng mwahu kan erein omw mour, a Lasarus alehdi soahng suwed kan. Ahpw ahnsou wet, e nsenamwahu wasaht, a kowe wie weiweirek.
26 Oh likin mepwukat koaros, wahu kalaimwun ehu wiawihda nanpwungen kiht oh kowe, kahrehda irail me men kohwei rehmw sang wasaht, sohte kak, oh aramas akan pil sohte kak sipalodohng reht sang wasahn.’
27 E ahpw nda, ‘Eri, I peki rehmw, semei, kadarala ih nan imwen ei pahpao,
28 pwe mie riei pwutak limmen, pwe en kairehkin irail soahng koaros pwe re de pahn pil kohdo wasahn kalokolok wet.’
29 Eipraam ahpw nda, ‘Moses oh Soukohp ako mi rehrail; mweidohng irail en rong.’
30 E ahpw nda, ‘Soh, semei Eipraam, ahpw ma emen sang rehn me melahr akan kohla rehrail, re pahn koluhla.’
31 E ahpw ndaiong, ‘Ma re sohte kin rong Moses oh Soukohp ako, re pil sohte pahn rong emen me iasada sang rehn me melahr akan.’”
Footnote kan
^ De “emen me kin pwukoahki koasoandien ihmwo.”
^ Pahd ehu kin toutouki 22 L (5.81 gal).
^ Kor ehu kin pahrekiong 220 L (200 dry qt).
^ De “dih wet.” Kilang KLL.
^ Ohl menet kin peki mwohni oh dipwisou rehn aramas akan.
^ LK, “ni mwaremwaren Eipraam.”
^ LK, haiʹdes. Kilang KLL.
^ LK, “ni mwaremware.”
