برانچ وچ کم کرن والے فرق فرق شعبیاں چ خدمت کردے نیں۔‏ کجھ ترجمہ کردے نیں تے کجھ رسالے تے کتاباں چھاپ کے کلیسیاواں نُوں گھل دے نیں۔‏ کجھ آڈیو تے ویڈیو ریکارڈنگ کردے نیں تے کجھ اوہناں علاقیاں دیاں لوڑاں تے دھیان دیندے نیں جیہڑ‌ے برانچ دی نگرانی وچ آؤندے نیں۔‏ برانچ اِک یاں اِک توں زیادہ مُلکاں وچ منادی دے کم دی نگرانی کردی اے۔‏

برانچ اپنے علاقے چ منادی دے کم دی نگرانی کردی اے‏۔‏ گورننگ باڈی ہر برانچ دے کم دی دیکھ بھال کرن دی ذمےداری اِک برانچ کمیٹی نُوں سونپ دی اے جدے وچ تِن یاں ایس توں زیادہ بزرگ ہوندے نیں۔‏ ایہہ کمیٹی اپنی نگرانی وچ آؤن والے ہر مُلک بارے گورننگ باڈی نُوں ایہہ دسدی اے کہ اوتھے منادی دا کم کِنّاں ودھ رہیا اے تے ایس کم چ کیہڑیاں مشکلاں آ رہیاں نیں۔‏ ایس معلومات راہیں گورننگ باڈی ایہہ طے کردی اے کہ مستقبل وچ عبادتاں،‏ کنونشناں،‏ رسالیاں تے کتاباں وچ کیہڑے موضوعاں تے گل بات کرن دی لوڑ اے۔‏ گورننگ باڈی برانچاں دا دورہ کرن لئی ہر سال اپنے نمائندے گھل دی اے۔‏ ایہہ نمائندے برانچ کمیٹیاں نُوں صلاح دیندے نیں کہ اوہ اپنیاں ذمےداریاں ہور چنگی طرحاں کیویں نبھا سکدے نیں۔‏ (‏امثال 11:‏14‏)‏ گورننگ باڈی دے نمائندے پاک کلام وچوں اِک تقریر وی دیندے نیں جدے ذریعے بھین بھراواں دا حوصلہ ودھدا اے۔‏

برانچ کلیسیاواں دی دیکھ بھال کردی اے۔‏ برانچ وچ کجھ بھرا نویاں کلیسیاواں بناؤن دی منظوری دیندے نیں جد کہ کجھ بھرا پہل‌کاراں،‏ مشنریاں تے حلقے دے نگہباناں دی رہنمائی کردے نیں۔‏ ایس توں علاوہ اوہ کنونشناں دا انتظام کردے،‏ نویاں عبادت گاہواں دی تعمیر دی نگرانی کردے تے کلیسیاواں نُوں کتاباں تے رسالے گھلن دا انتظام کردے نیں۔‏ برانچ وچ ہون والے سارے کماں دے ذریعے منادی دا کم شاندار طریقے نال کیتا جاندا اے۔‏—‏1-‏کُرنتھیوں 14:‏33،‏ 40‏۔‏

• برانچ کمیٹیاں،‏ گورننگ باڈی دی مدد کیویں کردیاں نیں؟‏

• اِک برانچ وچ کیہڑے کیہڑے کم کیتے جاندے نیں؟‏