شادی دے نال ای اِک نویں خاندان دی شروعات ہو جاندی اے۔ ایہہ سچ اے کہ تواڈے دل چ اپنے ماپیاں لئی عزت تے پیار کدی ختم نئیں ہو سکدا پر ویاہ توں بعد تواڈا جیون ساتھی ای تواڈے پیار دا سب توں زیادہ حق‌دار اے۔ شاید تواڈے کجھ رشتے‌داراں نُوں ایہہ گل مننی اوکھی لگے۔ پر جے تُسی بائبل دیاں ہدیتاں تے چلو گے تے نہ صرف تواڈا اپنے ساتھی نال رشتہ مضبوط ہووے گا سگوں تواڈی اپنے رشتے‌داراں نال وی بنی رہوے گی۔‏

پاک کلام دسدا اے:‏ اپنے ماں پیو دی عزت کرو۔ (‏اِفسیوں 6:‏2‏)‏ تُسی بھانویں جنے مرضی وڈے ہو جاؤ توانوں ہمیشاں اپنے ماں پیو نُوں عزت تے مان دینا چاہیدا اے۔ نالے یاد رکھو کہ تواڈا ساتھی وی کسے دا دھی پترُ اے ایس لئی اوہدا وی فرض بن دا اے کہ اوہ اپنے ماں پیو نُوں عزت تے پیار دَوے۔ پاک کلام چ لکھیا اے کہ محبت کسے توں سڑ دی نئیں ایس لئی جے تواڈے ساتھی دا اپنے ماپیاں نال بڑا پیار اے تے ایس گل توں نہ سڑو۔—‏1-‏کُرنتھیوں 13:‏4؛‏ گلتیوں 5:‏26‏۔‏

تُسی کیہہ کر سکدے او؟‏

• اپنے سوہریاں دیاں گلاں نُوں ودھا چڑھا کے نہ دسو جیویں کہ ”‏تیرے گھر والے تے ہمیشاں میری بے‌عزتی کردے رہندے نیں“‏ یاں ”‏مَیں جو کجھ مرضی کر لوَاں تیری ماں نے کدی خوش نئیں ہونا۔“‏

• معاملے نُوں اپنے جیون ساتھی دیاں نظراں نال ویکھن دی کوشش کرو۔‏

پاک کلام دسدا اے:‏ ایس لئی مرد اپنے ماں پیو نُوں چھڈے گا تے اپنی بیوی نال ملیا رہوے گا۔ (‏پیدایش 2:‏24‏)‏ تواڈی شادی توں بعد وی شاید تواڈے ماں پیو نُوں لگے کہ اوہناں دے موڈھیاں تے حالے وی تواڈی ذمے‌داری اے۔ ایس لئی ہو سکدا اے کہ اوہ تواڈی زندگی چ حد توں زیادہ دخل دین لگ پین۔‏

میاں بیوی دے طور تے ایہہ طے کرو کہ تُسی کِنہاں معاملیاں چ اپنے ماں پیو دی صلاح لوَو گے تے کِنہاں چ نئیں۔ فیر پیار نال اوہناں نُوں ایس بارے دسو۔ کُھل کے گل کرو پر رُکھے طریقے نال پیش نہ آؤ۔ (‏امثال 15:‏1‏)‏ جے تُسی اپنے رشتے‌داراں نال ہمدردی، مہربانی تے صبر نال پیش آؤ گے تے اوہناں نال تواڈا رشتہ بنیا رہوے گا۔ نالے محبت دی وجہ توں تُسی اِک دُوجے دی برداشت وی کر سکو گے۔—‏اِفسیوں 4:‏2‏۔‏

تُسی کیہہ کر سکدے او؟‏

• جے توانوں لگے کہ رشتے‌دار تواڈی زندگی چ کجھ زیادہ ای دخل دے رہے نیں تے اپنے ساتھی نال سکون بھرے ماحول چ گل کرو۔‏

• دونویں صلاح کرو کہ تُسی اِنج دے مسئلیاں نُوں کیویں حل کرو گے۔‏