1.‏ تُسی بائبل لئی یہوواہ دے شکرگزار کیوں او؟‏

 اَسی یہوواہ دے بڑے شکرگزار آں کہ اوہنے سانوں بائبل دِتی اے۔ ایہدے چ اوہنے سانوں بوہت سارے ایہو جہے مشورے دِتے نیں جنہاں تے عمل کر کے اَسی اپنیاں مشکلاں نال نبڑ سکنے آں۔ ایہدے ذریعے اوہنے سانوں اِک چنگے مستقبل دی امید وی دِتی اے۔ سب توں ودھ کے یہوواہ نے بائبل دے ذریعے اپنیاں شان‌دار خوبیاں ظاہر کیتیاں نیں۔ ایہناں خوبیاں تے غور کر‌ن نال ساڈے دل تے گُوڑھا اثر ہوندا اے تے ساڈا دل کر‌دا اے کہ اَسی یہوواہ دے ہور نیڑے ہو جائیے تے اوہدے نال پکی دوستی کر لئیے۔—‏زبور 25:‏14‏۔‏

2.‏ یہوواہ نے کیہڑے طریقیاں نال انساناں نُوں اپنے بارے دَسیا اے؟‏

² یہوواہ چاہندا اے کہ اَسی اوہدے بارے جانئے۔ پرانے وقتاں چ اوہنے خواباں، رُویاواں تے فرشتیاں دے ذریعے انساناں نُوں اپنے بارے دَسیا۔ (‏گنتی 12:‏6؛‏ اعمال 10:‏3، 4‏)‏ پر جے خواباں، رُویاواں تے فرشتیاں دے ذریعے مِلن والے پیغام لکھے نہ جاندے تے اَسی کدی وی ایہناں دا مطالعیا نہ کر پاندے۔ ایس لئی یہوواہ نے اوہ ساریاں گلاں اِک کتاب چ لکھوا لئیاں جیہڑیاں اوہ سانوں دَسنا چاہندا سی۔ (‏یرمیاہ 30:‏2‏)‏ کیونکہ یہوواہ دے کم بالکل صحی ہوندے نیں، ایس لئی اَسی پورا یقین رکھ سکنے آں کہ اوہدا ساڈے نال گل کر‌ن دا ایہہ طریقہ وی بالکل صحی تے فائدہ‌مند اے۔—‏زبور 18:‏30‏۔‏

3.‏ یہوواہ نے ایس گل دا خیال کیویں رکھیا کہ بائبل محفوظ رہوے؟ (‏یسعیاہ 40:‏8‏)‏

³ یسعیاہ 40:‏8 نُوں پڑھو۔‏ ہزاراں سالاں توں خدا دا کلام اوہدے بندیاں نُوں بڑی چنگی رہنمائی دے رہیا اے۔ ایہہ کیویں ممکن ہویا؟ خدا دا کلام کئی سو سال پہلاں ایہو جہیاں چیزاں تے لکھیا گیا سی جیہڑیاں وقت دے نال نال خراب ہو جاندیاں نیں۔ پر یہوواہ نے ایس گل دا خیال رکھیا کہ اوہدے کلام دِیاں کاپیاں تیار ہوندیاں رہن۔ بھانویں کہ ایہناں کاپیاں نُوں تیار کر‌ن والے لوک عیب‌دار سن، پر فیر وی اوہناں  نے اپنی ایس ذمےداری نُوں بڑے دھیان نال پورا کیتا۔ عبرانی صحیفیاں بارے اِک عالم نے کہیا:‏ ”‏اَسی ایہہ گل پورے یقین نال کہہ سکنے آں کہ اینے صحی طریقے نال اوس زمانے دی کسے ہور کتاب دی کاپی نئیں تیار کیتی گئی۔“‏ سچ اے کہ بائبل کئی سو سال پہلاں لکھی گئی۔ نالے ایہنوں ایہو جہیاں چیزاں تے لکھیا گیا جیہڑیاں وقت دے نال نال خراب ہو جاندیاں نیں۔ تے جیہڑے لوکاں نے ایہدیاں کاپیاں تیار کیتیاں اوہ عیب‌دار سن۔ پر فیر وی اَسی ایس گل تے پورا یقین رکھ سکنے آں کہ اَج اَسی جیہڑی بائبل پڑھنے آں، اوہدے چ اوہی خیال نیں جیہڑے ایہدے لکھاری یہوواہ نے ایہدے چ لکھوائے سن۔‏

4.‏ ایس مضمون چ اَسی کیس بارے گل کر‌اں گے؟‏

⁴ ہر چنگی نعمت تے ہر کامل بخشش یہوواہ وَلّوں مِلدی اے۔ (‏یعقوب 1:‏17‏)‏ بائبل یہوواہ دِیاں سب توں ودھیا نعمتاں وچوں اِک اے۔ جدوں سانوں کوئی تحفہ دیندا اے تے ایہدے توں سانوں پتہ چلدا اے کہ اوہ بندہ ساڈے تے ساڈیاں ضرورتاں بارے کِنّاں جان دا اے۔ ایسے طرحاں جدوں اَسی بائبل تے غور کر‌نے آں تے سانوں یہوواہ بارے وی بوہت کجھ پتہ چلدا اے۔ سانوں پتہ چلدا اے کہ اوہ ساڈے تے ساڈیاں ضرورتاں بارے کِنّاں کجھ جان دا اے۔ ایس مضمون چ اَسی ویکھاں گے کہ بائبل توں یہوواہ دِیاں ایہہ تِن خوبیاں کیویں ظاہر ہوندیاں نیں:‏ اوہدی حکمت، اوہدا انصاف تے اوہدی محبت۔ آؤ سب توں پہلے ویکھنے آں کہ بائبل توں یہوواہ دی حکمت کیویں ظاہر ہوندی اے۔‏

5.‏ اوہ اِک طریقہ کیہڑا اے جدے ذریعے بائبل توں خدا دی حکمت ظاہر ہوندی اے؟‏

⁵ یہوواہ جان دا اے کہ سانوں اوہدیاں حکمت بھریاں ہدیتاں دی ضرورت اے تے بائبل اوہدی حکمت نال بھری ہوئی اے۔ ایہدے چ لکھیاں ہدیتاں تے عمل کر کے لوکاں نُوں بوہت فائدہ ہوندا اے تے ایہہ اوہناں دِیاں زندگیاں نُوں بدل دیندی اے۔ جدوں موسیٰ نے بائبل دِیاں پہلیاں کجھ کتاباں لکھیاں تے اوہنے بنی اِسرائیل نُوں کہیا:‏ ایہہ فالتو گلاں نئیں نیں سگوں ایہناں تے تواڈی زندگی ٹِکی اے۔ (‏اِستثنا 32:‏47‏)‏ جیہڑے لوکاں نے خدا دے کلام دِیاں گلاں تے عمل کر‌نا سی، اوہناں دی زندگی خوشیاں نال بھر جانی سی۔ (‏زبور 1:‏2، 3‏)‏ ایہہ سچ اے کہ خدا دے کلام نُوں کئی سو سال پہلاں لکھیا گیا سی، پر ایہدے چ حالے وی لوکاں دِیاں زندگیاں نُوں بدلن دی طاقت اے۔ مثال لئی jw.org تے دلچسپ مضمون ”‏پاک کلام دی تلیم زندگی سنوار دی اے‏“‏ چ اِنج دے بوہت سارے لوکاں دِیاں مثالاں نیں جنہاں دی زندگی توں پتہ چلدا اے کہ خدا دا کلام اوہناں لوکاں تے بڑے زبردست طریقے نال اثر کر رہیا اے جیہڑے ایہدیاں ہدیتاں تے عمل کر‌دے نیں۔—‏1-‏تھسلُنیکیوں 2:‏13‏۔‏

6.‏ اَسی ایہہ کیوں کہہ سکنے آں کہ بائبل باقی ساریاں کتاباں توں فرق اے؟‏

⁶ خدا دا کلام باقی ساریاں کتاباں توں فرق اے۔ اَسی ایہہ کیوں کہہ سکنے آں؟ کیونکہ ایہدا لکھاری یہوواہ اے جیہڑا کائنات دی سب توں طاقت‌ور ہستی اے تے ہمیشاں توں موجود اے نالے سب توں زیادہ حکمت والا اے۔ دُنیا چ ایہو جہیاں بوہت ساریاں کتاباں نیں جنہاں نُوں اوہناں دے لکھاریاں دے مرن دے بعد وی پڑھیا جاندا اے۔ پر وقت دے نال نال ایہناں کتاباں چ لکھے مشورے بےکار ہو جاندے نیں۔ پر خدا دے کلام چ لکھے اصول کدی وی بے کار نئیں ہوندے۔ ایہہ اصول ہر زمانے دے لوکاں لئی فائدےمند ثابت ہوئے نیں۔ جدوں اَسی بائبل نُوں پڑھنے آں تے ایہدے چ لکھیاں گلاں تے سوچ‌وچار کر‌نے آں تے ایہدا لکھاری یہوواہ اپنی پاک روح دے ذریعے ساڈی مدد کر‌دا اے تاکہ اَسی جان سکئے کہ اَسی ایہدے چ لکھیاں ہدیتاں تے کیویں عمل کر سکنے آں۔ (‏زبور 119:‏27؛‏ ملاکی 3:‏16؛‏ عبرانیوں 4:‏12‏)‏ یہوواہ ساڈی مدد کر‌ن دی شدید خواہش رکھدا اے۔ ایس وجہ توں ساڈے دل چ بائبل نُوں باقاعدگی نال پڑھن دی خواہش پیدا ہونی چاہی دی اے۔‏

7.‏ ماضی چ بائبل نے خدا دے بندیاں دی کیویں مدد کیتی کہ اوہ اِک مُٹھ رہن؟‏

⁷ اِک ہور طریقہ جدے ذریعے بائبل توں یہوواہ دی حکمت ظاہر ہوندی اے، اوہ ایہہ وے کہ ایہنے شروع توں خدا دے بندیاں دی مدد کیتی اے کہ اوہ اِک مُٹھ رہن۔ جدوں بنی اِسرائیل اوس ملک چ گئے جنہوں دین دا خدا نے وعدہ کیتا سی تے اوہ اوس ملک دے فرق فرق علاقیاں چ وس گئے۔ کجھ مچھیرے بن گئے، کجھ لوکاں نے مال ڈنگر رکھ لئے تے اوہناں وچوں کجھ کھیتی‌باڑی کر‌دے رہے۔ ایس لئی ہو سکدا سی کہ اِک علاقے چ  رہن والے اِسرائیلی دُوجے علاقے چ رہن والے اپنے ہم‌ایماناں دی پرواہ کر‌نا ای چھڈ دیندے۔ پر یہوواہ نے ایہہ بندوبست کیتا کہ بنی اِسرائیل اوہدے کلام چ لکھیاں گلاں نُوں سُنن تے سمجھن لئی فرق فرق موقعیاں تے کٹھے ہون۔ (‏اِستثنا 31:‏10-‏13؛‏ نحمیاہ 8:‏2،‏ 8،‏ 18‏)‏ ذرا سوچو کہ جدوں اِک اِسرائیلی یروشلیم پونچ کے دُوجے علاقیاں توں آئے اپنے ہم‌ایماناں نُوں ویکھدا ہوئے گا تے اوہنوں کِنّی خوشی ہوندی ہوئے گی۔ اِنج یہوواہ نے اپنے بندیاں دی مدد کیتی تاکہ اوہ اِک مُٹھ رہن۔ بعد چ جدوں مسیحی کلیسیا بنی تے ایہدے چ فرق فرق زباناں بولن والے لوک شامل سن۔ اوہناں وچوں کجھ امیر سن تے کجھ غریب، کجھ دا بڑا ناں سی تے کجھ ماڑے سن۔ پر خدا دے کلام نال محبت کر‌ن دی وجہ توں اوہ سچے خدا یہوواہ دی عبادت چ اِک مُٹھ سن۔ مسیحی بنن والے لوک اپنے ہم‌ایماناں دی مدد نال تے اِک دُوجے نال کٹھے ہو کے ای خدا دے کلام نُوں سمجھ سکدے سن۔—‏اعمال 2:‏42؛‏ 8:‏30، 31‏۔‏

8.‏ بائبل اَج خدا دے بندیاں دی اِک مُٹھ رہن چ مدد کیویں کر رہی اے؟‏

⁸ ساڈا حکمت والا خدا اپنے کلام بائبل دے ذریعے اپنے بندیاں نُوں تلیم دے رہیا اے تے اوہناں نُوں اِک مُٹھ کر رہیا اے۔ بائبل توں ای سارا روحانی کھانا تیار کیتا جاندا اے جنہوں حاصل کر کے سانوں بڑی خوشی مِلدی اے۔ اَسی باقاعدگی نال اپنیاں عبادتاں تے کنونشناں تے جانے آں جِتھے بائبل دِیاں ایتاں نُوں پڑھیا جاندا اے، اوہناں دی وضاحت کیتی جاندی اے تے اوہناں تے گل بات کیتی جاندی اے۔ اَج بائبل دی وجہ توں ای یہوواہ دا ایہہ مقصد پورا ہو رہیا اے کہ اوہدے بندے موڈھے نال موڈھا جوڑ کے اوہدی خدمت کر‌ن۔—‏صفنیاہ 3:‏9‏۔‏

9.‏ بائبل دے پیغام نُوں سمجھن لئی کیہڑی خوبی دا ہونا ضروری اے؟ (‏لُوقا 10:‏21‏)‏

 ⁹ ذرا یہوواہ دی حکمت دے اِک ہور ثبوت تے غور کر‌و۔ اوہنے اپنے کلام دے بوہت سارے حصیاں نُوں اِنج لکھوایا کہ اوہناں نُوں صرف اوہی لوک سمجھ سکن جیہڑے خاکسار نیں۔ ‏(‏لُوقا 10:‏21 نُوں پڑھو۔)‏ پوری دُنیا چ لوک بائبل نُوں پڑھدے نیں۔ اِک عالم نے کہیا:‏ ”‏بائبل کسے وی دُوجی کتاب نالوں زیادہ پڑھی جان والی کتاب اے تے لوک ایہنوں دُوجیاں کتاباں نالوں زیادہ دھیان نال پڑھدے نیں۔“‏ پر صرف خاکسار لوک ای ایہدے چ لکھیاں گلاں نُوں سمجھدے نیں تے ایہناں تے عمل کر‌دے نیں۔—‏2-‏کُرنتھیوں 3:‏15، 16‏۔‏

10.‏ بائبل توں ہور کیس طرحاں یہوواہ دی حکمت ظاہر ہوندی اے؟‏

¹⁰ بائبل توں اِک ہور طریقے نال وی یہوواہ دی حکمت ظاہر ہوندی اے۔ اوہ طریقہ ایہہ وے کہ ایہدے ذریعے یہوواہ سانوں ساریاں نُوں صرف کٹھے ای نئیں سگوں ساڈے وچوں ہر اِک نُوں علیٰحدہ علیٰحدہ وی تلیم تے تسلی دیندا اے۔ جدوں اَسی بائبل نُوں پڑھنے آں تے اَسی محسوس کر سکنے آں کہ یہوواہ نُوں ساڈے وچوں ہر اِک دی فکر اے۔ (‏یسعیاہ 30:‏21‏)‏ کِنّی واری اِنج ہویا اے کہ جدوں تُسی اپنی کسے مشکل دے حل لئی بائبل نُوں پڑھدے او تے توانوں کوئی ایہو جہی ایت مل جاندی اے جنہوں پڑھ کے تُسی سوچدے او کہ ایہہ تے بالکل تواڈے لئی اے۔ پر حیرانی دی گل اے کہ بائبل تے لکھاں لوکاں دے دل تے اثر کر‌دی اے تے فیر ایہہ کیویں ہو سکدا اے کہ ہر بندے نُوں ایہنوں پڑھ کے لگدا اے کہ ایہدے چ لکھیاں گلاں اوہدے لئی نیں؟ ایہدی وجہ اِکو ای اے کہ جنہے ایہنوں لکھوایا اے اوہ کائنات دی سب توں زیادہ حکمت والی ہستی اے۔—‏2-‏تیمُتھیُس 3:‏16، 17‏۔‏

11.‏ بائبل نُوں لکھواندے ویلے یہوواہ نے کیویں ثابت کیتا کہ اوہ کسے دا طرف‌دار نئیں اے؟‏

¹¹ یہوواہ دی اِک ہور خوبی ایہہ وے کہ اوہ انصاف دا خدا اے۔ (‏اِستثنا 32:‏4‏)‏ انصاف‌پسند بندہ طرف‌دار نئیں ہوندا تے یہوواہ وی کسے دا طرف‌دار نئیں اے۔ (‏اعمال 10:‏34، 35؛‏ رومیوں 2:‏11‏)‏ اوہدی ایہہ خوبی ایس گل توں نظر آندی اے کہ اوہنے بائبل نُوں ایہو جہیاں زباناں چ لکھوایا جیہڑیاں اوس زمانے دے لوکاں چ عام سن۔ یہوواہ نے بائبل دِیاں پہلی 39 کتاباں دا زیادہ‌تر حصہ عبرانی زبان چ لکھوایا جیہڑی اوس ویلے خدا دے بندے آسانی نال سمجھ سکدے سن۔ پر پہلی صدی تک یونانی زبان عام ہو گئی سی۔ ایس لئی بائبل دِیاں آخری 27 کتاباں دا زیادہ‌تر حصہ یونانی زبان چ لکھوایا گیا۔ یہوواہ نے اپنے کلام نُوں صرف اِک ای زبان چ لکھوان دا فیصلہ نئیں کیتا۔ اَج پوری دُنیا چ 8 ارب لوک فرق فرق زباناں بولدے نیں۔ تے فیر اینے سارے لوک یہوواہ بارے کیویں سکھ سکے نیں؟‏

12.‏ ایس آخری زمانے چ دانی‌ایل 12:‏4 چ لکھی گل کیویں پوری ہو رہی اے؟‏

¹² دانی‌ایل نبی دے ذریعے یہوواہ نے پیشین‌گوئی کیتی سی کہ آخری زمانے چ بائبل دِیاں سچائیاں دا علم بوہت ودھ جائے گا۔ بوہت سارے لوک بائبل چ لکھیاں گلاں نُوں سمجھ جان گے۔ ‏(‏دانی‌ایل 12:‏4 نُوں پڑھو۔)‏ اِک طریقہ جدے ذریعے لوک بائبل دی تلیم نُوں سمجھ رہے نیں، اوہ ایہہ وے کہ بائبل تے بائبل توں تلیم دین والیاں کتاباں دا ترجمہ کیتا جا رہیا اے، ایہناں نُوں شائع کیتا جا رہیا اے تے ایہناں نُوں بوہت سارے لوکاں تک پونچایا جا رہیا اے۔ بائبل دُنیا دی اوہ واحد کتاب اے جدا سب توں زیادہ زباناں چ ترجمہ کیتا جاندا اے تے جیہڑی سب توں زیادہ تقسیم ہوندی اے۔ بائبل دا جیہڑا ترجمہ دُنیا دِیاں کمپنیاں کر‌دیاں نیں، اوہ اکثر بڑا مہنگا ہوندا اے۔ پر یہوواہ دے بندیاں نے ہُن تک پوری بائبل یاں ایہدے کجھ حصیاں دا ترجمہ 240 توں زیادہ زباناں چ کیتا اے تے اوہ ایس ترجمے نُوں لوکاں نُوں مُفت دیندے نیں۔ ایس وجہ توں خاتمے توں پہلاں ساریاں قوماں چوں لوک بادشاہی دی خوش‌خبری نُوں سُن رہے نیں تے ایہنوں قبول کر رہے نیں۔ (‏متی 24:‏14‏)‏ ساڈا انصاف والا خدا چاہندا اے کہ زیادہ توں زیادہ لوک بائبل نُوں پڑھن تے ایہدے ذریعے اوہنوں جانن۔ اوہ ایہہ ایس لئی چاہندا اے کیونکہ اوہ سانوں ساریاں نُوں پیار کر‌دا اے۔‏

13.‏ اَسی ایہہ کیوں کہہ سکنے آں کہ بائبل توں یہوواہ دی محبت ظاہر ہوندی اے؟ (‏یوحنا 21:‏25‏)‏

¹³ بائبل توں یہوواہ دی محبت ظاہر ہوندی اے جیہڑی اوہدی سب  توں وڈی خوبی اے۔ (‏1-‏یوحنا 4:‏8‏)‏ ذرا غور کر‌و کہ یہوواہ نے بائبل چ کیہڑیاں گلاں لکھوائیاں تے کیہڑیاں نئیں لکھوائیاں۔ اوہنے بائبل چ اوہ ساریاں گلاں لکھوائیاں نیں جدے ذریعے اَسی اوہدے نال دوستی کر سکنے آں، اَج خوشیاں بھری زندگی گزار سکنے آں تے مستقبل چ ہمیشاں دی زندگی حاصل کر سکنے آں۔ کیونکہ یہوواہ سانوں پیار کر‌دا اے، ایس لئی اوہنے بائبل چ ایہو جہیاں گلاں نئیں لکھوائیاں جنہاں نُوں سمجھنا ساڈے وسوں باہر اے۔—‏یوحنا 21:‏25 نُوں پڑھو۔‏

14.‏ بائبل چ لکھیاں گلاں توں ہور کیس طرحاں یہوواہ دی محبت ظاہر ہوندی اے؟‏

¹⁴ ایس گل توں وی یہوواہ دی محبت ظاہر ہوندی اے کہ اوہ بائبل دے ذریعے ساڈے نال ایہو جہے انداز چ گل کر‌دا اے جدے توں سانوں عزت ملے۔ اوہنے بائبل چ سانوں زندگی دے ہر چھوٹے موٹے معاملے بارے حکماں دی کوئی لمی چوڑی لسٹ نئیں دِتی۔ ایہدی بجائے اوہنے بائبل چ لوکاں دی زندگی دے تجربے، پیشین‌گوئیاں تے فائدہ‌مند مشورے لکھوائے نیں تاکہ اوہناں نُوں پڑھ کے اَسی آپ چنگے فیصلے کر سکئے۔ ایہناں دے ذریعے خدا دا کلام ساڈے اندر ایہہ خواہش پیدا کر‌دا اے کہ اَسی اوہدے نال پیار کر‌یئے تے اوہدے فرمانبردار رہیے۔‏

15.‏ (‏الف)‏ بائبل توں ایہہ کیویں ظاہر ہوندا اے کہ یہوواہ نُوں ساڈی فکر اے؟ (‏ب)‏ تصویر چ اِک چھوٹی بچی، اِک بھرا تے اِک وڈیری بھین بائبل چوں کیہڑے لوکاں دِیاں مثالاں تے غور کر رہے نیں؟ (‏پیدایش 39:‏1،‏ 10-‏12؛‏ 2-‏سلاطین 5:‏1-‏3؛‏ لُوقا 2:‏25-‏38‏)‏

¹⁵ بائبل توں پتہ چلدا اے کہ یہوواہ نُوں ساڈی بڑی فکر اے۔ پر ایہہ گل کیویں ثابت ہوندی اے؟ خدا دے کلام چ ایہو جہے واقعے لکھے نیں جنہاں چ اوہدے بندیاں دے جذبات نظر آندے نیں۔ اَسی ایہناں نُوں چنگی طرحاں سمجھ سکنے آں کیونکہ اوہ لوک ساڈے ورگے جذبات رکھدے سن۔ (‏یعقوب 5:‏17‏)‏ سب توں ودھ کے جدوں اَسی غور کر‌نے آں کہ  ماضی چ یہوواہ اپنے بندیاں نال کیویں پیش آیا تے اَسی ایس گل نُوں ہور چنگی طرحاں سمجھ جانے آں کہ یہوواہ بوہت ای شفیق تے رحیم اے۔—‏یعقوب 5:‏11‏۔‏

16.‏ جدوں اَسی بائبل چوں ایہو جہے لوکاں بارے پڑھنے آں جنہاں نے غلطیاں کیتیاں تے ایہدے توں سانوں یہوواہ بارے کیہہ پتہ چلدا اے؟ (‏یسعیاہ 55:‏7‏)‏

¹⁶ بائبل توں پتہ چلدا اے کہ یہوواہ اِک ہور طریقے نال وی ساڈے لئی محبت وکھاندا اے۔ پاک کلام چ سانوں ایس گل دا یقین دَوایا گیا اے کہ بھانویں اَسی غلطیاں کر‌نے آں پر فیر وی یہوواہ سانوں رد نئیں کر‌دا۔ بنی‌اِسرائیل نے وار وار یہوواہ دے خلاف گُناہ کیتا۔ پر جدوں اوہ دلوں توبہ کر لیندے سن تے یہوواہ اوہناں نُوں معاف کر دیندا سی۔ ‏(‏یسعیاہ 55:‏7 نُوں پڑھو۔)‏ پہلی صدی دے مسیحی وی جان دے سن کہ یہوواہ اوہناں نُوں بوہت پیار کر‌دا اے۔ یہوواہ دی پاک روح دی رہنمائی چ پولُس رسول نے اپنے ہم‌ایماناں نُوں نصیحت کیتی کہ اوہ اوس بندے نُوں معاف کر دین تے اوہنوں تسلی دین جیہڑا پہلے گُناہ کر رہیا سی پر بعد چ اوہنے توبہ کر لئی سی۔ (‏2-‏کُرنتھیوں 2:‏6، 7؛‏ 1-‏کُرنتھیوں 5:‏1-‏5‏)‏ ایہہ کِنّی شان‌دار گل اے نا کہ یہوواہ نے اپنے بندیاں دِیاں غلطیاں دی وجہ توں اوہناں نُوں رد نئیں کیتا۔ ایہدی بجائے اوہنے پیار نال اوہناں دی مدد کیتی، اوہناں دی اِصلاح کیتی تے اوہناں نُوں فیر توں اپنے دوست بنن دی دعوت دِتی۔ اوہ وعدہ کر‌دا اے کہ اَج جیہڑے گُناہ‌گار لوک توبہ کر‌دے نیں، اوہ اوہناں نال وی اِنج ای پیش آئے گا۔—‏یعقوب 4:‏8-‏10‏۔‏

17.‏ اَسی ایہہ کیوں کہہ سکنے آں کہ بائبل ساڈے لئی یہوواہ دا اِک بڑا ای خاص تحفہ اے؟‏

¹⁷ بائبل یہوواہ دا اِک زبردست تحفہ اے۔ پر کیوں؟ جیویں کہ اَسی سکھیا اے بائبل توں یہوواہ دی حکمت، اوہدا انصاف تے اوہدی محبت ظاہر ہوندی اے۔ ایہہ ظاہر کر‌دی اے کہ یہوواہ چاہندا اے کہ اَسی اوہنوں جانیے تے اوہدے دوست بنئے۔‏

18.‏ اَسی کیویں ظاہر کر سکنے آں کہ اَسی بائبل لئی یہوواہ دے شکرگزار آں؟‏

¹⁸ بائبل خدا دی نعمت اے تے اَسی ایس نعمت دی بےقدری نئیں کر‌نا چاہندے۔ (‏یعقوب 1:‏17‏)‏ ایس لئی آؤ اَسی بائبل لئی اپنی شکرگزاری ظاہر کر‌دے رہیے۔ اِنج کر‌ن لئی اَسی ایہنوں پڑھن توں پہلاں دُعا کر سکنے آں تے ایہدے چ لکھیاں گلاں تے سوچ وچار کر سکنے آں۔ اَسی یقین رکھ سکنے آں کہ جدوں اَسی اِنج کر‌اں گے تے بائبل دا لکھاری یہوواہ ساڈیاں اوہناں کوششاں تے برکت پائے گا جیہڑیاں اَسی اوہدے علم نُوں حاصل کر‌ن لئی کر‌نے آں۔—‏امثال 2:‏5‏۔‏