1.‏ جدوں پطرس نے اِک معجزے دے ذریعے بوہت ساریاں مچھیاں پھڑیاں تے اوہنوں کیہو جیہا لگیا؟‏

 پطرس نے تقریباً ساری رات مچھیاں پھڑن چ گزار دِتی پر اوہدے ہتھ کجھ نہ آیا۔ فیر یسوع نے اوہنوں کہیا کہ کشتی نُوں ڈونگے پانی وَل لے چل تے اوتھے مچھیاں پھڑن لئی جال سُٹ۔ (‏لُوقا 5:‏4‏)‏ پطرس نُوں لگ رہیا سی کہ اوتھے وی اوہناں دے ہتھ کجھ نئیں آئے گا پر اوہنے اوہی کیتا جو یسوع نے اوہنوں کرن لئی کہیا سی۔ اوتھے اوہناں دے جال چ اینیاں مچھیاں آگئیاں کہ اوہناں دے وزن نال جال پاٹن لگ پیا۔ پطرس تے اوہدے نال کم کرن والے بندے یسوع دے ایس معجزے نُوں ویکھ کے ہکے بکے رہ گئے۔ پطرس نے یسوع نُوں کہیا:‏ مالک، مَیں تواڈے نال رہن دے لائق نئیں کیونکہ مَیں بڑا گناہ گار آں۔ (‏لُوقا 5:‏6-‏9‏)‏ پطرس نُوں لگ رہیا سی کہ اوہ ایس قابل نئیں اے کہ اوہ یسوع دے نال رہ سکے۔‏

2.‏ پطرس دی مثال تے غور کرن نال سانوں کیہہ فائدہ ہوئے گا؟‏

² پطرس نے بالکل صحی کہیا سی کہ مَیں بڑا گناہ گار آں۔ بائبل توں پتہ چلدا اے کہ اوہنے اکثر ایہو جہیاں گلاں کہیاں تے ایہو جہے کم کیتے جنہاں دے بعد اوہنوں پچھتانا پیا۔ کیہہ تُسی وی پطرس وانگوں محسوس کردے او؟ کیہہ توانوں وی لمے عرصے توں اپنی کسے خامی نال لڑنا پے رہیا اے؟ جے ہاں تے پطرس دی مثال تے غور کرن نال توانوں بوہت فائدہ ہو سکدا اے۔ پر کیوں؟ ذرا سوچو، جے یہوواہ چاہندا تے اوہ پطرس دِیاں غلطیاں تے خامیاں بارے بائبل چ نہ لکھواندا پر اوہنے اِنج ایس لئی کیتا تاکہ اَسی اوہدے توں سبق حاصل کر سکئے۔ (‏2-‏تیمُتھیُس 3:‏16، 17‏)‏ جدوں سانوں پتہ چلدا اے کہ پطرس نُوں وی ساڈے وانگوں اپنیاں خامیاں تے کمزوریاں نال لڑنا پیندا سی تے اَسی سمجھ جانے آں کہ یہوواہ ساڈے توں ایہہ توقع نئیں کردا کہ اَسی کدی کوئی غلطی نئیں کراں گے۔ اوہ تے بس ایہہ چاہندا اے کہ اَسی اپنیاں خامیاں دے باوجود وی وفاداری نال اوہدی خدمت کردے رہیے۔‏

3.‏ سانوں ہمت کیوں نئیں ہارنی چاہی دی؟‏

 ³ اکثر کہیا جاندا اے کہ مشق کرن نال اِک بندہ اپنے کم چ ماہر بن جاندا اے۔ ذرا ایس مثال تے غور کرو۔ ہو سکدا اے کہ کسے بندے نُوں کوئی ساز وجان چ ماہر بنن لئی بوہت سالاں تک محنت کرنی پووے۔ ایس دوران شاید اوہدے کولوں بوہت ساریاں غلطیاں وی ہون پر جے اوہ مشق کردا رہوے گا تے اِک دن اوہ ساز وجان چ ماہر بن جائے گا۔ پر ماہر بنن توں بعد وی شاید اوہدے کولوں غلطیاں ہون۔ فیر وی اوہ ہمت نئیں ہاردا سگوں اوہ اپنے کم چ ہور زیادہ ماہر بنن لئی محنت کردا رہندا اے۔ ایسے طرحاں ہو سکدا اے کہ سانوں لگے کہ اَسی اپنی کسے خامی تے قابو پا لیا اے پر شاید اَسی کدی کدار فیر توں اوہی کم کرئیے جیہڑا اَسی نئیں کرنا چاہندے۔ ایس لئی سانوں اپنے اندر بہتری لیان دی کوشش کردے رہنا چاہی دا اے۔ اَسی سارے ای کدی نہ کدی کوئی ایہو جہی گل کہہ دینے آں یاں کوئی ایہو جیہا کم کر دینے آں جدی وجہ توں سانوں پچھتانا پیندا اے۔ پر جے اَسی ہمت نئیں ہاردے تے یہوواہ ساڈی مدد کردا اے تاکہ اَسی اپنے اندر بہتری لیاندے رہیے۔ (‏1-‏پطرس 5:‏10‏)‏ آؤ پطرس دی مثال تے غور کریئے جنہے اپنیاں خامیاں دے باوجود وی ہمت نئیں ہاری۔ اوہدیاں خامیاں دے باوجود وی یسوع نے اوہدے لئی جیہڑی ہمدردی وکھائی، اوہدے توں ساڈے دل چ ایہہ خواہش پیدا ہوندی اے کہ اَسی یہوواہ دی خدمت کردے رہیے۔‏

4.‏ لُوقا 5:‏5-‏10 چ پطرس نے اپنے بارے کیہہ کہیا پر یسوع نے اوہنوں کیس گل دا یقین دَوایا؟‏

⁴ بائبل چ ایہہ تے نئیں دَسیا گیا کہ پطرس نے اپنے آپ نُوں گُناہ‌گار کیوں کہیا یاں اوہدے ذہن چ اپنے کیہڑے گُناہ سن۔ ‏(‏لُوقا 5:‏5-‏10 نُوں پڑھو۔)‏ پر ہو سکدا اے کہ اوہدے کولوں بوہت وڈیاں غلطیاں ہوئیاں ہون۔ یسوع نُوں پتہ سی کہ پطرس ڈریا ہویا اے کیونکہ شاید اوہ اپنے آپ نُوں بے‌کار سمجھ رہیا سی۔ یسوع نُوں ایہہ وی پتہ سی کہ پطرس اوہدا وفادار رہ سکدا اے۔ ایس لئی اوہنے بڑے پیار نال پطرس نُوں کہیا کہ نہ ڈر۔ یسوع نُوں پطرس تے بڑا بھروسا سی تے ایس وجہ توں پطرس دی پوری زندگی بدل گئی۔ بعد چوں پطرس تے اوہدے بھرا اندریاس نے مچھیاں پھڑن دا کاروبار چھڈ دِتا تے یسوع نال مِل کے سارا وقت منادی کرن لگ پئے۔ اوہناں دے ایس فیصلے دی وجہ توں یہوواہ نے اوہناں نُوں بوہت برکتاں دِتیاں۔—‏مرقس 1:‏16-‏18‏۔‏

5.‏ پطرس نُوں اپنے ڈر تے قابو پان تے یسوع دا شاگرد بنن دی وجہ توں کیہڑیاں برکتاں ملیاں؟‏

⁵ جدوں پطرس یسوع دا شاگرد بنیا تے اوہنوں بوہت ای شاندار تجربے ہوئے۔ اوہنے یسوع نُوں بیماراں نُوں ٹھیک کردیاں، لوکاں چوں بُرے فرشتیاں نُوں کڈھدیاں، ایتھوں تک کہ مُردیاں نُوں زندہ کردیاں وی ویکھیا۔‏ b (‏متی 8:‏14-‏17؛‏ مرقس 5:‏37،‏ 41، 42‏)‏ اوہنے تے اِک رویا چ یسوع نُوں خدا دی بادشاہی دے بادشاہ دے طور تے وی ویکھیا۔ ایہہ اِک ایہو جیہا واقعہ سی جنہوں اوہ ساری زندگی نئیں بُھلیا ہوئے گا۔ (‏مرقس 9:‏1-‏8؛‏ 2-‏پطرس 1:‏16-‏18‏)‏ جے پطرس یسوع دا شاگرد نہ بن‌دا تے اوہ اینے  زبردست واقعیاں نُوں نہ ویکھ پاندا۔ یقیناً اوہ ایس گل توں بوہت خوش ہویا ہوئے گا کہ اوہنے اپنے ڈر تے قابو پایا تے اینیاں شاندار برکتاں پان دا موقع نئیں گنوایا۔‏

6.‏ کیہہ پطرس نے اپنیاں خامیاں تے فوراً قابو پا لیا سی؟ وضاحت کرو۔‏

⁶ ایناں کجھ ویکھن تے سُنن دے باوجود وی پطرس نے فوراً اپنیاں خامیاں تے قابو نئیں پایا سگوں اوہنوں ایہناں نال لڑنا پیا۔ ذرا کجھ مثالاں تے غور کرو۔ جدوں یسوع نے اپنے رسولاں نُوں دَسیاکہ پیشین‌گوئی دے مطابق اوہنوں اذیت سہنی پووے گی تے مرنا پووے گا تے اوہدوں پطرس نے یسوع نُوں ٹوکیا تے کہیا کہ اوہدے نال اِنج بالکل نئیں ہوئے گا۔ (‏مرقس 8:‏31-‏33‏)‏ پطرس تے دُوجے رسول وار وار ایس گل تے بحث کردے سن کہ اوہناں وچوں وڈا کون اے۔ (‏مرقس 9:‏33، 34‏)‏ یسوع دی موت توں تھوڑی دیر پہلاں، پطرس نے بغیر سوچے سمجھے اِک بندے دا کن وڈھ دِتا۔ (‏یوحنا 18:‏10‏)‏ اوسے رات پطرس نے لوکاں دے ڈر دی وجہ توں تِن وار اپنے دوست یسوع نُوں جانن توں اِنکار کر دِتا۔ (‏مرقس 14:‏66-‏72‏)‏ ایس وجہ توں پطرس پُھٹ پُھٹ کے رون لگ پیا۔—‏متی 26:‏75‏۔‏

7.‏ یسوع دے جی اُٹھن توں بعد پطرس نُوں کیہڑا موقع ملیا؟‏

⁷ یسوع نے اپنے ایس بے‌حوصلہ رسول توں مونہہ نئیں موڑیا۔ جدوں یسوع زندہ ہو گیا تے اوہنے پطرس نُوں ایہہ ثابت کرن دا موقع دِتا کہ اوہ ہُن وی یسوع نال محبت کردا اے۔ یسوع نے پطرس نُوں ایہہ ذمے‌داری دِتی کہ اوہ اوہدیاں بھیڈاں دی دیکھ‌بھال کرے۔ (‏یوحنا 21:‏15-‏17‏)‏ پطرس اوہ سب کجھ کرن لئی تیار سی جو یسوع نے اوہنوں کہیا سی۔ اوہ عیدِپنتِکُست تے یروشلیم چ موجود سی تے اوس پہلے گروہ چ شامل سی جنہوں یہوواہ نے اپنی پاک روح نال مسح کیتا سی۔‏

8.‏ شہر انطاکیہ چ پطرس کولوں کیہڑی غلطی ہوئی؟‏

⁸ پاک روح نال مسح ہون توں بعد وی پطرس نُوں اپنیاں خامیاں نال لڑنا پیا۔ 36 عیسوی چ خدا نے پطرس نُوں کُرنیلیُس کول گھلیا جیہڑا اِک غیریہودی سی تے فیر خدا نے اوہنوں پاک روح نال مسح کیتا۔ ایہدے توں ایہہ ثابت ہو گیا کہ خدا طرف‌داری نئیں کردا تے غیریہودی وی مسیحی کلیسیا دا حصہ بن سکدے نیں۔ (‏اعمال 10:‏34،‏ 44، 45‏)‏ اوہدوں توں پطرس نے غیریہودیاں نال مِل کے کھانا پینا شروع کر دِتا۔ اِنج اوہنے پہلاں کدی نئیں کیتا سی۔ (‏گلتیوں 2:‏12‏)‏ پر جیہڑے مسیحی یہودی سن، اوہناں نُوں لگدا سی کہ اِنج نئیں ہونا چاہی دا۔ جدوں ایہناں مسیحیاں وچوں کجھ انطاکیہ آئے تے پطرس نے اپنے غیریہودی بھین بھراواں نال کھانا پینا چھڈ دِتا۔ شاید پطرس ڈر رہیا سی کہ کِتے اوہ اپنے یہودی بھین بھراواں نُوں ناراض نہ کر دَوے۔ پولُس رسول نے ایس ریاکاری نُوں ویکھیاتے فیر اوہنے ساریاں دے سامنے پطرس دی درستی کیتی۔ (‏گلتیوں 2:‏13، 14‏)‏ اپنی ایس غلطی دے باوجود وی پطرس نے ہمت نئیں ہاری۔ پر کیہڑی چیز نے اِنج کرن چ اوہدی مدد کیتی؟‏

9.‏ یوحنا 6:‏68، 69 توں کیویں پتہ چلدا اے کہ پطرس یسوع دا وفادار سی؟‏

⁹ پطرس یسوع دا وفادار سی۔ اوہنے کسے چیز نُوں ایہہ اجازت نئیں دِتی کہ اوہ اوہنوں یسوع دی خدمت کرن توں روکے۔ اِک موقعے تے جدوں یسوع نے اپنے شاگرداں نُوں اِک ایہو جہی گل دَسی جیہڑی اوہناں نُوں سمجھ نئیں آئی تے اوس ویلے پطرس نے یسوع لئی اپنی وفاداری ظاہر کیتی۔ ‏(‏یوحنا 6:‏68، 69 نُوں پڑھو۔)‏ بوہت سارے لوکاں نے یسوع دی گل دا مطلب سمجھے بغیر ای اوہدی خدمت کرنا چھڈ دِتا۔ پر پطرس نے اِنج نئیں کیتا سگوں اوہ یسوع دا وفادار رہیا۔ اوہ جان‌دا سی کہ یسوع کول ای ہمیشاں دی زندگی دِیاں گلاں نیں۔‏

10.‏ یسوع نے کیویں ثابت کیتا کہ اوہنوں پطرس تے بھروسا اے؟ (‏تصویر نُوں وی ویکھو۔)‏

¹⁰ یسوع نے پطرس نُوں نئیں چھڈیا۔اوہنوں پتہ سی کہ جدوں زمین تے اوہدی آخری رات ہوئے گی تے پطرس تے اوہدے باقی رسول اوہنوں کلّا چھڈ دین گے۔ پر یسوع نے ثابت کیتا کہ اوہنوں پطرس تے بھروسا اے کہ اوہ اوہدے وَل واپس مُڑ آئے گا تے اوہدا وفادار رہوے گا۔ (‏لُوقا 22:‏31، 32‏)‏ یسوع جان‌دا سی کہ اوہدا دل تے تیار اے، پر جسم کمزور اے۔ (‏مرقس 14:‏38‏)‏ بھانویں کہ پطرس نے تِن وار یسوع نُوں جانن توں اِنکار کیتا پر فیر وی یسوع نے اپنے ایس رسول توں مونہہ نئیں موڑیا۔ زندہ ہون توں بعد یسوع پطرس نُوں کلّا ملیا۔ (‏مرقس 16:‏7؛‏ لُوقا 24:‏34؛‏ 1-‏کُرنتھیوں 15:‏5‏)‏ ذرا سوچو کہ ایس گل توں پطرس نُوں کِنّی ہمت ملی ہوئے گی کیونکہ اوہنے جو کجھ کیتا سی، اوہدی وجہ توں اوہ بوہت شرمندہ سی۔‏

11.‏ یسوع نے پطرس نُوں ایس گل دا یقین کیویں دَوایا کہ یہوواہ اوہدیاں لوڑاں نُوں پورا کرے گا؟‏

 ¹¹ یسوع نے پطرس نُوں ایس گل دا یقین دَوایا کہ یہوواہ اوہدیاں لوڑاں نُوں پورا کرے گا۔ زندہ ہون توں بعد یسوع نے پطرس تے دُوجے رسولاں دی اِک ہور معجزے دے ذریعے مچھیاں پھڑن چ مدد کیتی۔ (‏یوحنا 21:‏4-‏6‏)‏ یقیناً ایس معجزے توں پطرس نُوں ایس گل دا یقین ہو گیا ہوئے گا کہ یہوواہ اوہدیاں لوڑاں نُوں پورا کر سکدا اے۔ ہو سکدا اے کہ پطرس دے ذہن چ یسوع دی ایہہ گل آئی ہووے کہ جیہڑے لوک خدا دی بادشاہی نُوں ہمیشاں اپنی زندگی چ سب توں زیادہ اہمیت دیندے نیں، یہوواہ اوہناں دِیاں لوڑاں دا خیال رکھدا اے۔ (‏متی 6:‏33‏)‏ ایس گل نُوں ذہن چ رکھدے ہوئیاں پطرس نے مچھیاں پھڑن دے اپنے کاروبار نُوں نئیں سگوں مُنادی دے کم نُوں اپنی زندگی چ سب توں زیادہ اہمیت دِتی۔ اوہنے 33 عیسوی دی عیدِپنتِکُست تے بڑی دلیری نال دُوجیاں نُوں خدا دی بادشاہی دا پیغام دِتا تے ایس وجہ توں ہزاراں لوکاں نے اوہدے پیغام نُوں قبول کیتا۔ (‏اعمال 2:‏14،‏ 37-‏41‏)‏ ایس توں بعد اوہنے سامریاں تے غیریہودیاں دی وی مسیح بارے سکھن چ مدد کیتی۔ (‏اعمال 8:‏14-‏17؛‏ 10:‏44-‏48‏)‏ ایہدے چ کوئی شک نئیں کہ یہوواہ نے پطرس دے ذریعے ہر طرحاں دے لوکاں نُوں اپنی کلیسیا چ شامل کیتا۔‏

12.‏ پطرس دی مثال نُوں ذہن چ رکھدے ہوئیاں دَسو کہ جے اَسی اپنی کسے خامی نال لگاتار لڑ رہے آں تے سانوں کیہڑی گل یاد رکھنی چاہی دی اے؟‏

¹² یہوواہ ساڈی مدد کر سکدا اے تاکہ اَسی ہمت نہ ہاریئے۔ ہو سکدا اے کہ ساڈے لئی اِنج کرنا اسان نہ ہووے، خاص طور تے اوس ویلے جدوں اَسی اپنی کسے خامی نال بڑے لمے عرصے توں لڑ رہے ہوئیے۔ کدی کدار شاید سانوں اپنیاں خامیاں اوہناں خامیاں نالوں وی وڈیاں لگن جیہڑیاں پطرس چ سن۔ پر یہوواہ ساڈی مدد کر سکدا اے تاکہ اَسی ہمت نال کم لئیے۔ (‏زبور 94:‏17-‏19‏)‏ مثال لئی، ساڈا اِک بھرا یہوواہ دا گواہ بنن توں پہلاں کئی سال تک ہم‌جنس‌پرست سی۔ پر فیر اوہنے فیصلہ کیتا کہ اوہ اپنے آپ نُوں بدل لے گا تے یہوواہ دے معیاراں دے مطابق زندگی گزارے گا۔ پر اوہدے بعد وی اوہنوں کدی کدی اپنیاں غلط خواہشاں نال لڑنا پیندا سی۔ کیہڑی چیز نے اوہدی مدد کیتی تاکہ اوہ ہمت نہ ہارے؟ اوہنے کہیا:‏ ”‏یہوواہ مینوں ہمت دیندا اے۔ یہوواہ دی پاک روح دی مدد نال مَیں اوس طرحاں زندگی گزارنا سکھ لیا اے جیویں یہوواہ چاہندا اے۔ مَیں یہوواہ دے کم آ سکنا واں تے میری خامیاں دے باوجود وی یہوواہ مینوں ہمت دیندا رہندا اے۔“‏

13.‏ اعمال 4:‏13،‏ 29،‏ 31 دے مطابق اَسی پطرس دی مثال تے کیویں عمل کر سکنے آں؟ (‏تصویر نُوں وی ویکھو۔)‏

¹³ جیویں کہ اَسی ایس مضمون چ ویکھیا اے، پطرس نے لوکاں دے ڈر دی وجہ توں بوہت وڈیاں غلطیاں کیتیاں۔ پر دُعا چ یہوواہ کولوں ہمت منگن دی وجہ توں اوہ دلیر بن گیا۔ ‏(‏اعمال 4:‏13،‏ 29،‏ 31 نُوں پڑھو۔)‏ اَسی  وی اپنے ڈر تے قابو پا سکنے آں۔ ذرا غور کرو کہ بھرا ہورسٹ دے نال کیہہ ہویا۔ جدوں اوہ جوان سی تے اوہنوں دُوجی عالمی جنگ دے دوران جرمنی چ رہنا پیا۔ اوس ویلے سارے اِک دُوجے نُوں سلام کردے ہوئیاں ”‏ہائل ہٹلر“‏ کہندے سن جدا مطلب اے:‏ ”‏نجات ہٹلر وَلّوں اے۔“‏ بھرا ہورسٹ جان‌دا سی کہ اِنج کہنا غلط اے۔ پر کدی کدار اپنے نال پڑھن والے بچیاں تے اپنے استاداں دے دباؤ چ آ کے اوہ اِنج کہہ دیندا سی۔ بھرا ہورسٹ دے امی‌ابو نے اوہدے تے غصہ کرن دی بجائے اوہدے نال مِل کے دُعا کیتی تے یہوواہ کولوں دلیری منگی۔ اپنے امی‌ابو دی مدد تے یہوواہ تے بھروسا رکھن دی وجہ توں بھرا ہورسٹ نُوں اپنے عزم تے قائم رہن چ مدد ملی۔ بعد چوں اوہنے کہیا:‏ ”‏یہوواہ نے کدی وی مینوں کلّا نئیں چھڈیا۔“‏ c

14.‏ شفیق چرواہے اپنیاں اوہناں بھیڈاں دا حوصلہ کیویں ودھا سکدے نیں جیہڑیاں بے‌حوصلہ ہو جاندیاں نیں؟‏

¹⁴ یہوواہ تے یسوع ساڈے توں کدی مونہہ نئیں موڑن گے۔ جدوں پطرس نے یسوع نُوں جانن توں اِنکار کیتا تے ایہدے بعد اوہنے اِک اہم فیصلہ لینا سی۔ تے فیصلہ ایہہ سی کہ کیہہ اوہ یسوع دا شاگرد رہوے گا یاں نئیں۔ یسوع نے دُعا چ یہوواہ کولوں اِلتجا کیتی کہ پطرس دا ایمان کدی کمزور نہ پووے۔ اوہنے پطرس نُوں اپنی ایس دُعا بارے دَسیا سی تے اوہدے تے بھروسا رکھدے ہوئیاں کہیا سی کہ پطرس بعد چ اپنے بھراواں دا حوصلہ ودھائے گا۔ (‏لُوقا 22:‏31، 32‏)‏ جدوں پطرس یسوع دِیاں ایہناں گلاں بارے سوچدا ہوئے گا تے اوہنوں کِنّی ہمت مِلدی ہوئے گی!‏ جدوں سانوں وی اپنی زندگی چ کوئی اہم فیصلہ لینا پیندا اے تے شاید یہوواہ کلیسیا دے بزرگاں دے ذریعے ایہو جیہا فیصلہ لین چ ساڈی مدد کرے تاکہ اَسی اوہدے وفادار رہ سکئے۔ (‏اِفسیوں 4:‏8،‏ 11‏)‏ بھرا پال جیہڑا کئی سالاں توں کلیسیا چ بزرگ اے، دُوجیاں نُوں حوصلہ دین دی پوری کوشش کردا اے۔ جیہڑے بھین بھراواں دی ہمت ٹُٹ رہی ہوندی اے، اوہ اوہناں نُوں کہندا اے کہ یاد کرو یہوواہ کیویں توانوں اپنے نیڑے لیایا سی۔ اوہ اوہناں نُوں ایس گل دا یقین دَواندا اے کہ یہوواہ ساڈے نال اٹل محبت دی وجہ توں سانوں کدی کلّا نئیں چھڈے گا۔ بھرا پال نے کہیا:‏ ”‏مَیں ویکھیا  اے کہ یہوواہ دی مدد نال اوہ بھین بھرا وی ہمت نال کم لیندے نیں جیہڑے بے‌حوصلہ ہو گئے ہوندے نیں۔“‏

15.‏ پطرس تے بھرا ہورسٹ دی مثال توں ایہہ کیویں پتہ چلدا اے کہ متی 6:‏33 چ لکھی گل بالکل سچ اے؟‏

¹⁵ جے پطرس تے دُوجے رسولاں وانگوں اَسی وی اپنی زندگی چ مُنادی دے کم نُوں سب توں زیادہ اہمیت دَواں گے تے یہوواہ ساڈیاں لوڑاں نُوں پورا کرے گا۔ (‏متی 6:‏33‏)‏ بھرا ہورسٹ نے دُوجی عالمی جنگ دے بعد سوچیا کہ اوہ پہل‌کار دے طور تے خدمت کرے گا۔ پر اوہ بوہت غریب سی ایس لئی اوہ سوچ رہیا سی کہ کیہہ اوہ اینے پیسے کما سکے گا تاکہ اوہ سارا وقت مُنادی کر سکے۔ بھرا نے کیہہ کیتا؟ اوہنے سوچیا کہ میں ویکھنا واں کہ یہوواہ میری مدد کردا اے یاں نئیں۔ ایس لئی جدوں حلقے دے نگہبان دا دورہ سی تے اوہنے پورا ہفتہ مُنادی کیتی۔ ہفتے دے آخر چ حلقے دے نگہبان نے اوہنوں اِک لفافہ دِتا جدے تے کسے دا ناں نئیں لکھیا ہویا سی۔ اوس لفافے چ اینے پیسے سن کہ بھرا ہورسٹ کئی مہینیاں تک پہل‌کار دے طور تے خدمت کر سکدا سی۔ ایس تحفے دی وجہ توں اوہنوں یقین ہو گیا کہ یہوواہ اوہدیاں لوڑاں نُوں پورا کر سکدا اے۔ تے ایسے یقین دی وجہ توں اوہ خدا دی بادشاہی نُوں اپنی ساری زندگی سب توں زیادہ اہمیت دیندا رہیا۔—‏ملاکی 3:‏10‏۔‏

16.‏ پطرس دی مثال تے اوہدے لکھے ہوئے خطاں تے غور کرن نال سانوں کیہہ فائدہ ہوئے گا؟‏

¹⁶ پطرس ایس گل تے کِنّاں خوش ہویا ہوئے گا کہ یسوع نے اوہنوں نئیں چھڈیا، بھانویں کہ اوہدی ایہہ سوچ سی کہ اوہ یسوع دے نال رہن دے لائق نئیں۔ یسوع پطرس دی تربیت کردا رہیا تاکہ اوہ اِک چنگا مسیحی بن سکے تے دُوجے مسیحیاں لئی وی اِک چنگی مثال قائم کر سکے۔ یسوع نے پطرس نُوں جیہڑی تربیت دِتی، اوہدے توں اَسی بوہت ای خاص گلاں سکھنے آں۔ ایہناں وچوں بوہت ساریاں گلاں پطرس نے اوہناں دو خطاں چ لکھیاں جیہڑے اوہنے پہلی صدی عیسوی دِیاں کجھ کلیسیاواں نُوں لکھے سن۔ ایہہ خط اَج بائبل دا حصہ نیں۔ اگلے مضمون چ اَسی ایہناں خطاں وچوں کجھ خاص گلاں تے غور کراں گے تے ویکھاں گے کہ اَج اَسی ایہناں تے کیویں عمل کر سکنے آں۔‏