1.‏ ایس مضمون چ اَسی کیس بارے گل کراں گے؟‏

 یعقوب دے پُتر اوہدے آلے دوالے کٹھے ہوئے سن تے بڑے دھیان نال اوہدیاں گلاں سُن رہے سن۔ جیویں کہ اَسی پچھلے مضمون چ ویکھیا سی، یعقوب نے رُوبِن، شمعون، لاوی تے یہوداہ دے مستقبل بارے کجھ ایہو جہیاں گلاں دَسیاں جنہاں بارے اوہناں نے سوچیا وی نئیں سی۔ یقیناً اوہ چارے ہُن سوچ رہے ہون گے کہ پتہ نئیں ہُن اوہناں دا پیو اوہناں دے باقی اَٹھ بھراواں بارے کیہہ دَسے گا۔ آؤ ویکھنے آں کہ اَسی یعقوب دِیاں اوہناں گلاں توں کیہہ سکھ سکنے آں جیہڑیاں اوہنے زِبُولون، اِشّکار، دان، جد، آشر، نفتالی، یوسف تے بِنیامین بارے کہیاں۔‏ a

زِبُولون

2.‏ یعقوب نے زِبُولون بارے کیہڑی پیشین‌گوئی کیتی تے ایہہ پیشین‌گوئی کیویں پوری ہوئی؟ (‏پیدائش 49:‏13‏)‏ (‏ بکس نُوں وی ویکھو۔)‏

² پیدائش 49:‏13 نُوں پڑھو‏۔ یعقوب نے دَسیا کہ زِبُولون دا قبیلہ سمندر دے کنارے تے وَسے گا تے اوہدی میراث وعدہ کیتے ہوئے ملک دے شمال وَل ہوئے گی۔ ایس پیشین‌گوئی دے تقریباً 200 سال بعد زِبُولون دے قبیلے نُوں میراث دے طور تے جیہڑا علاقہ ملیا، اوہ گلیل دی جھیل تے بحیرۂ‌روم دے وچکار سی۔ موسیٰ نے اوہدے بارے ایہہ پیشین‌گوئی کیتی:‏ اَے زِبُولون، تُوں باہر جاندے ویلے خوش رہ۔ (‏اِستثنا 33:‏18‏)‏ شاید موسیٰ دی گل دا مطلب ایہہ سی کہ زِبُولون دا قبیلہ اوہناں علاقیاں چ اسانی نال سفر کر سکے گا جیہڑے گلیل دی جھیل تے بحیرۂ‌روم دے کناریاں تے نیں نالے ایتھے رہن والے لوکاں نال کاروبار کر سکے گا۔ بھانویں  موسیٰ دی گل دا مطلب جو وی ہوئے، ایس پیشین‌گوئی دی وجہ توں زِبُولون دا قبیلہ خوش ہو سکدا سی۔‏

3.‏ کیہڑی چیز خوش تے مطمئن رہن چ ساڈی مدد کر سکدی اے؟‏

³ اَسی کیہہ سکھنے آں؟‏ بھانویں اَسی جتھے وی رہندے ہوئیے یاں ساڈے حالات جیہو جہے وی ہون، اَسی خوش رہ سکنے آں۔ خوش رہن لئی ضروری اے کہ اَسی اوہناں چیزاں تے راضی رہیے جیہڑیاں ساڈے کول نیں۔ (‏زبور 16:‏6؛‏ 24:‏5‏)‏ کدی کدار ساڈا دھیان بڑی اسانی نال اوہناں چیزاں تے چلا جاندا اے جیہڑیاں ساڈے کول نئیں ہوندیاں۔ ایس لئی اپنا دھیان اوہناں چنگیاں چیزاں تے رکھن دی کوشش کرو جیہڑیاں تواڈے کول نیں تے جنہاں توں توانوں خوشی مِلدی اے۔—‏گلتیوں 6:‏4‏۔‏

اِشّکار

4.‏ یعقوب نے اِشّکار بارے کیہڑی پیشین‌گوئی کیتی تے ایہہ کیویں پوری ہوئی؟ (‏پیدائش 49:‏14، 15‏)‏ (‏ بکس نُوں وی ویکھو۔)‏

⁴ پیدائش 49:‏14، 15 نُوں پڑھو۔‏ محنتی ہون دی وجہ توں یعقوب نے اِشّکار دی تعریف کیتی۔ اوہنے اِشّکار بارے کہیا کہ اوہ اِک طاقت‌ور گدھے وانگوں اے جیہڑا بوہت زیادہ بھار چُک سکدا اے۔ یعقوب نے اوہدے بارے ایہہ وی کہیا کہ اوہنوں چنگا تے خوب‌صورت علاقہ ملے گا۔ اوہدی ایہہ گل سچ ثابت ہوئی۔ اِشّکار دے قبیلے نُوں دریائے یردن دے کنارے اِک ایہو جیہا علاقہ ملیا جدی زمین بڑی پھل‌دار سی۔ (‏یشوع 19:‏22‏)‏ ایہدے چ کوئی شک نئیں کہ اِشّکار دے قبیلے دے لوکاں نے زمین نُوں تیار کرن تے ایہدے چ فصلاں اُگان لئی بڑی محنت کیتی ہوئے گی پر اوہناں نے دُوجیاں دے فائدے لئی وی بڑا کم کیتا۔ (‏1-‏سلاطین 4:‏7،‏ 17‏)‏ مثال لئی، جدوں قاضی برق تے دبورہ نبِیّہ نے سیسرا نال لڑن لئی بنی‌اِسرائیل کولوں مدد منگی تے اِشّکار دا قبیلہ اوہناں قبیلیاں وچوں اِک سی جنہاں نے اپنے آپ نُوں مدد کرن لئی پیش کیتا۔ ایس قبیلے نے کئی ہور موقعیاں تے وی جنگ لڑن چ خوشی نال خدا دے بندیاں دا ساتھ دِتا۔—‏قُضاۃ 5:‏15‏۔‏

5.‏ سانوں محنتی کیوں ہونا چاہی دا اے؟‏

⁵ اَسی کیہہ سکھنے آں؟‏ اَسی یہوواہ دی خدمت کرن لئی جو محنت کرنے آں، یہوواہ اوہدی بڑی قدر کردا اے بالکل اوسے طرحاں جیویں اوہنے اِشّکار دے قبیلے دی محنت دی قدر کیتی۔ (‏واعظ 2:‏24‏)‏ مثال لئی، ذرا اوہناں بھراواں بارے سوچو جیہڑے کلیسیا دی ویکھ بھال کرن لئی بڑی محنت کردے نیں۔ (‏1-‏تیمُتھیُس 3:‏1‏)‏ بھانویں کہ ایہناں بھراواں نُوں اصل چ کوئی جنگ نئیں لڑنی پیندی پر اوہ بھین بھراواں نُوں اوہناں خطریاں توں بچان لئی بڑی محنت کردے نیں جنہاں دی وجہ توں اوہ یہوواہ توں دُور ہو سکدے نیں۔ (‏1-‏کُرنتھیوں 5:‏1،‏ 5؛‏ یہوداہ 17-‏23‏)‏ ایہہ بھرا کلیسیا دا حوصلہ ودھان لئی بڑی محنت نال تقریراں وی تیار کردے نیں۔—‏1-‏تیمُتھیُس 5:‏17‏۔‏

دان

6.‏ دان دے قبیلے نُوں کیہڑی اہم ذمے‌داری دِتی گئی سی؟ (‏پیدائش 49:‏17، 18‏)‏ (‏ بکس نُوں وی ویکھو۔)‏

⁶ پیدائش 49:‏17، 18 نُوں پڑھو۔‏ یعقوب نے دان نُوں اِک ایہو جہے سپ وانگوں کہیا جیہڑا اپنے توں زیادہ طاقت‌ور دُشمن نُوں ہرا دیندا اے جیویں کہ جنگی گھوڑے تے اوہدے سوار نُوں۔ واقعی، دان دا قبیلہ بنی‌اِسرائیل دے دُشمناں لئی ایناں ای خطرناک ثابت ہویا۔ جدوں اِسرائیلی ملک کنعان وَل جا رہے سن تے دان دا قبیلہ اِسرائیلیاں دے سارے قبیلیاں توں پچھے چلدا سی تاکہ اوہ پچھوں ہون والے حملیاں توں باقی قبیلیاں دی حفاظت کر سکے۔ (‏گنتی 10:‏25‏)‏ بھانویں کہ باقی قبیلے اوہناں سارے کماں نُوں نئیں ویکھ سکدے سن جیہڑے دان دا قبیلہ اوہناں دی حفاظت کرن لئی کردا سی، پر اوہدی ذمے‌داری واقعی بڑی اہم سی۔‏

7.‏ اَسی یہوواہ دی خدمت چ جیہڑیاں ذمے‌داریاں نبھانے آں، اوہناں بارے سانوں کیہڑی گل یاد رکھنی چاہی دی اے؟‏

⁷ اَسی کیہہ سکھنے آں؟‏ کیہہ تُسی کدی یہوواہ دی خدمت چ کوئی ایہو جہی ذمے‌داری نبھائی اے جدے بارے کسے نُوں نئیں پتہ؟ شاید تُسی عبادت‌گاہ دی صفائی تے مرمت کرن چ مدد کیتی ہوئے، کسے کنونشن تے رضاکار دے طور تے کم کیتا ہوئے یاں فیر کوئی ہور ایہو جہی ذمے‌داری نبھائی ہوئے۔ جے تُسی ایہناں کماں چ حصہ لیا سی تے تُسی تعریف دے لائق او۔ ہمیشاں یاد رکھو کہ بھانویں کوئی تواڈی محنت نُوں ویکھے یاں نہ ویکھے، یہوواہ ایہنوں ضرور ویکھدا اے تے ایہدی بڑی قدر کردا اے۔ اوہ خاص طور تے اوہدوں بڑا خوش ہوندا اے جدوں تُسی دُوجیاں کولوں تعریف حاصل کرن لئی نئیں سگوں اوہدے نال محبت کرن دی وجہ توں کجھ کردے او۔—‏متی 6:‏1-‏4‏۔‏

 جد

8.‏ بنی‌اِسرائیل دے دُشمناں لئی جد دے قبیلے تے حملہ کرنا ایناں اسان کیوں سی؟ (‏پیدائش 49:‏19‏)‏ (‏ بکس نُوں وی ویکھو۔)‏

⁸ پیدائش 49:‏19 نُوں پڑھو۔‏ یعقوب نے جد بارے پیشین‌گوئی کیتی کہ اوہدے تے لُٹیرے حملہ کراں گے۔ ایہدے تقریباً 200 سال بعد جد دے قبیلے نُوں میراث دے طور تے دریائے یردن دے مشرق دا علاقہ ملیا۔ ایہہ اِک ایہو جیہا علاقہ سی جدی سرحد تے اوہناں دے دُشمن رہندے سن تے اوہ بڑی اسانی نال اوہناں تے حملہ کر سکدے سن۔ پر ایس خطرے دے باوجود جد دے قبیلے دے لوک اوسے علاقے چ رہنا چاہندے سن کیونکہ اوتھے اوہناں دے مال ڈنگر نُوں بڑی اسانی نال چارہ مل سکدا سی۔ (‏گنتی 32:‏1،‏ 5‏)‏ ایہدے چ کوئی شک نئیں کہ جد دے قبیلے دے لوک بوہت زیادہ بہادر سن۔ پر ایس توں زیادہ اہم گل ایہہ سی کہ اوہ یہوواہ تے بھروسا رکھدے سن کہ اوہ ایس علاقے دی حفاظت کرن تے دُشمناں نال لڑن چ اوہناں دی مدد کرے گا۔ اوہ تے کئی سالاں تک اپنے فوجیاں نُوں بنی‌اِسرائیل دے دُوجے قبیلیاں دی مدد کرن لئی بھیج دے رہے تاکہ اوہ دریائے یردن دے مغرب دے علاقیاں تے قبضہ کر سکن۔ (‏گنتی 32:‏16-‏19‏)‏ جدوں جد دے قبیلے دے آدمی جنگ لڑن لئی جاندے سن تے اوہ ایس گل تے بھروسا رکھدے سن کہ پچھوں یہوواہ اوہناں دے بیوی بچیاں دی حفاظت کرے گا۔ یہوواہ نے اوہناں نُوں ایس قربانی تے دلیری دی وجہ توں برکت دِتی۔—‏یشوع 22:‏1-‏4‏۔‏

9.‏ جے اَسی یہوواہ تے بھروسا کرنے آں تے اَسی کیہو جہے فیصلے کراں گے؟‏

⁹ اَسی کیہہ سکھنے آں؟‏ جے اَسی مشکلاں چ وی یہوواہ دی خدمت نُوں جاری رکھنا چاہنے آں تے سانوں اوہدے تے بھروسا رکھن دی لوڑ اے۔ (‏زبور 37:‏3‏)‏ اَج ساڈے بوہت سارے بھین بھرا اِنج کر وی رہے  نیں۔ اوہ بڑی محنت نال ساڈیاں عبادت‌گاہواں تے تنظیم دِیاں دُوجیاں عمارتاں نُوں بنان چ حصہ لیندے نیں، اوہ ایہو جہے علاقیاں چ جا کے خدمت کر رہے نیں جتھے زیادہ مبشراں دی لوڑ اے یاں فیر اوہ کجھ ہور ذمے‌داریاں نبھا رہے نیں۔ بھانویں کہ اِنج کردے ویلے اوہناں نُوں بوہت ساریاں قربانیاں دینیاں پیندیاں نیں پر اوہ ایس گل تے پورا بھروسا رکھدے نیں کہ یہوواہ ہمیشاں اوہناں دِیاں ضرورتاں دا خیال رکھے گا۔—‏زبور 23:‏1‏۔‏

آشر

10.‏ آشر دے قبیلے نُوں کیہہ کرنا چاہی دا سی؟ (‏پیدائش 49:‏20‏)‏ (‏ بکس نُوں وی ویکھو۔)‏

¹⁰ پیدائش 49:‏20 نُوں پڑھو۔‏ یعقوب نے پیشین‌گوئی کیتی کہ آشر دا قبیلہ بڑا مال‌دار ہو جائے گا تے بالکل اِنج ای ہویا۔ آشر دے قبیلے نُوں جیہڑا علاقہ میراث دے طور تے ملیا، اوہدی زمین پورے ملک اِسرائیل چوں پیداوار لئی سب توں اچھی سی۔ (‏اِستثنا 33:‏24‏)‏ ایہدی سرحد تے بحیرۂ‌روم سی تے ایہدے چ مال‌دار فینیکیاں دے شہر صیدا دی بندرگاہ وی شامل سی جیہڑی کاروبار لئی بڑی ودھیا سی۔ پر افسوس دی گل اے کہ آشر نے اپنے علاقے چ وَسن والے کنعانیاں نُوں نئیں کڈھیا۔ (‏قُضاۃ 1:‏31، 32‏)‏ شاید کنعانیاں دے بُرے اثر تے بوہت زیادہ امیر ہون دی وجہ توں وی آشر دے قبیلے دا یہوواہ دی عبادت لئی جوش ٹھنڈا پے گیا سی۔ مثال دے طور تے جدوں قاضی برق نے کنعانی فوجاں نال لڑن لئی مدد منگی تے آشر دا قبیلہ مدد کرن لئی اَگے نئیں ودھیا۔ ایس لئی اوہ ایہہ ویکھن دا موقع گنوا بیٹھا کہ یہوواہ نے مجدو دے چشمیاں دے کول کِنّے شاندار طریقے نال اِسرائیلیاں نُوں جتایا۔ (‏قُضاۃ 5:‏19-‏21‏)‏ یقیناً آشر دے قبیلے نُوں اوہدوں بڑی شرمندگی ہوئی ہوئے گی جدوں اوہناں نے برق تے دبورہ دے گیت چ ایہہ بول سُنیا ہوئے گا:‏ آشر سمندر دے کنارے ہتھ تے ہتھ رکھ کے بیٹھا رہیا۔—‏قُضاۃ 5:‏17‏۔‏

11.‏ سانوں پیسے تے چیزاں بارے مناسب سوچ کیوں رکھنی چاہی دی اے؟‏

 ¹¹ اَسی کیہہ سکھنے آں؟‏ اَسی اپنا وقت تے طاقت یہوواہ دی خدمت چ استمال کرنا چاہنے آں۔ پر اِنج کرن لئی سانوں ایس گل دا خیال رکھنا ہوئے گا کہ اَسی دُنیا دے لوکاں وانگوں زیادہ توں زیادہ پیسہ کمان تے زیادہ توں زیادہ چیزاں حاصل کرن نُوں اپنی زندگی چ حد توں زیادہ اہمیت نہ دَئیے۔ (‏اَمثال 18:‏11‏)‏ ایہدے چ کوئی شک نئیں کہ سانوں پیسے دی ضرورت ہوندی اے پر سانوں ایہدے بارے مناسب سوچ رکھنی چاہی دی اے۔ (‏واعظ 7:‏12؛‏ عبرانیوں 13:‏5‏)‏ سانوں اپنے وقت تے طاقت نُوں فضول چیزاں نُوں حاصل کرن چ ضائع نئیں کرنا چاہی دا کیونکہ ایہہ گل یہوواہ دی خدمت کرن دی راہ چ رُکاوٹ بن سکدی اے۔ ایہدی بجائے سانوں لگن نال یہوواہ لئی اوہ سب کجھ کرن دی ضرورت اے، جو اَسی کر سکنے آں۔ اَسی جاننے آں کہ جے اَسی یہوواہ دے وفادار رہواں گے تے اوہ سانوں مستقبل چ ایہو جہی زندگی دَوے گا جیہڑی واقعی پر سکون تے محفوظ ہوئے گی۔—‏زبور 4:‏8‏۔‏

نفتالی

12.‏ یعقوب نے نفتالی بارے جیہڑی پیشین‌گوئی کیتی، اوہ کیویں پوری ہوئی؟ (‏پیدائش 49:‏21‏)‏ (‏ بکس نُوں وی ویکھو۔)‏

¹² پیدائش 49:‏21 نُوں پڑھو۔‏ یعقوب نے نفتالی بارے کہیا کہ اوہدیاں گلاں دل نُوں خوش کردیاں نیں۔ ایہہ گل یسوع دے تلیم دین دے انداز تے پوری ہوئی۔ زمین تے خدمت کردے ویلے یسوع نے زیادہ‌تر وقت شہر کفرنحوم چ گزاریا جیہڑا نفتالی دے قبیلے دے علاقے چ سی۔ ایس لئی کفرنحوم نُوں یسوع دا اپنا شہر کہیا گیا اے۔ (‏متی 4:‏13؛‏ 9:‏1؛‏ یوحنا 7:‏46‏)‏ ایہدے علاوہ یسعیاہ نبی نے یسوع بارے پیشین‌گوئی کردے ویلے کہیا سی کہ زِبُولون تے نفتالی دے لوک بڑی روشنی ویکھن گے۔ (‏یسعیاہ 9:‏1، 2‏)‏ واقعی، یسوع اپنی تلیم دے ذریعے اوہ ”‏اصلی روشنی“‏ ثابت ہویا ”‏جیہڑی ہر طرحاں دے لوکاں نُوں روشنی دیندی اے۔“‏—‏یوحنا 1:‏9‏۔‏

13.‏ اَسی کیہڑیاں گلاں توں یہوواہ دا دل خوش کر سکنے آں؟‏

¹³ اَسی کیہہ سکھنے آں؟‏ یہوواہ دی نظر چ ایہہ گل بڑی اہم اے کہ اَسی دُوجیاں نال کیہڑیاں گلاں کرنے آں تے کیہو جہے انداز چ کرنے آں۔ اَسی کیہڑیاں گلاں توں یہوواہ تے دُوجیاں دا دل خوش کر سکنے آں؟ ایہدے لئی ضروری اے کہ اَسی ہمیشاں سچ بولیئے۔ (‏زبور 15:‏1، 2‏)‏ ایہدے علاوہ سانوں دُوجیاں نال ایہو جہیاں گلاں کرنیاں چاہی دِیاں نیں جنہاں توں اوہناں دا حوصلہ ودھے۔ مثال لئی اَسی اوہناں دے چنگے کماں لئی اوہناں دی تعریف کر سکنے آں نالے سانوں چاہی دا اے کہ اَسی اوہناں چوں نقص نہ کڈھیے تے اوہناں بارے شکایتاں نہ کرئیے۔ (‏اِفسیوں 4:‏29‏)‏ چنگیاں گلاں کرن چ ایہہ وی شامل اے کہ اَسی لوکاں نال چنگی طرحاں گل بات شروع کرنا سکھیے تاکہ اَسی اوہناں نُوں گواہی دے سکئے۔‏

یوسف

14.‏ یوسف بارے کیتی گئی پیشین‌گوئی کیویں پوری ہوئی؟ (‏پیدائش 49:‏22،‏ 26‏)‏ (‏ بکس نُوں وی ویکھو۔)‏

¹⁴ پیدائش 49:‏22،‏ 26 نُوں پڑھو۔‏ ایہدے چ کوئی شک نئیں کہ یعقوب نُوں یوسف تے بڑا فخر سی۔ یہوواہ نے یوسف نُوں اوہدے بھراواں وچوں چُنیا سی تاکہ اوہ اوہنوں اِک خاص مقصد لئی استمال کر سکے۔ یعقوب نے یوسف نُوں اِک پھلدار درخت دی ٹاہنی وانگوں کہیا۔ یعقوب درخت سی تے یوسف اوہدی ٹاہنی سی۔ یوسف یعقوب دی پیاری بیوی راخل دا پہلوٹھا پُتر سی۔ یعقوب نے پیشین‌گوئی کیتی کہ رُوبِن دی بجائے یوسف نُوں پہلوٹھے پُتر دے طور تے دُگنی میراث ملے گی۔ رُوبِن یعقوب تے لیاہ دا پہلوٹھا پُتر سی پر اوہنے اپنے پہلوٹھے ہون دا حق گنوا دِتا سی۔ (‏پیدائش 48:‏5، 6؛‏ 1-‏تواریخ 5:‏1، 2‏)‏ یوسف بارے کیتی گئی ایہہ پیشین‌گوئی اوہدوں پوری ہوئی جدوں اوہدے دونویں پُتر یعنی اِفرائیم تے منسّی اِسرائیل دے دو فرق قبیلے بنے تے دونواں قبیلیاں نُوں اپنی اپنی میراث ملی۔—‏پیدائش 49:‏25؛‏ یشوع 14:‏4‏۔‏

15.‏ جدوں یوسف نُوں نااِنصافی دا سامنا کرنا پیا تے اوہنے کیہہ کیتا؟‏

¹⁵ یعقوب نے ایہہ وی کہیا کہ تیر انداز یوسف توں نفرت کردے رہے تے اوہدے تے حملے کردے رہے۔ (‏پیدائش 49:‏23‏)‏ اوہ تیرانداز یوسف دے بھرا سن جیہڑے اوہدے توں سڑدے سن۔ اوہناں نے اوہدے نال بڑا بھیڑا سلوک کیتا سی تے اوہناں دی وجہ توں یوسف نُوں اپنی زندگی چ بڑیاں تکلیفاں سہنیاں پئیاں۔ پر ایس سب دے باوجود یوسف نے اپنے دل چ اپنے بھراواں لئی نفرت پیدا نئیں ہون دِتی تے نہ ای یہوواہ تے کوئی اِلزام لایا۔ جیویں کہ یعقوب نے کہیا، یوسف دی کمان اپنی جگہ توں نئیں ہلی تے اوہدے ہتھ مضبوط رہے تے پھرتی نال چلدے رہے۔ (‏پیدائش 49:‏24‏)‏ اِک لحاظ نال یوسف نے اپنی شفقت تے مہربانی دی کمان نال اپنے بھراواں دی  نفرت نُوں مار سُٹیا تے مشکل وقت چ یہوواہ تے اپنے بھروسے نُوں ڈولن نہ دِتا۔ (‏پیدائش 47:‏11، 12‏)‏ یوسف نے مشکلاں چ بے‌حوصلہ ہون دی بجائے اپنی شخصیت نُوں نکھاریا۔ (‏زبور 105:‏17-‏19‏)‏ اِنج یہوواہ نے اوہنوں بڑے زبردست طریقے نال اپنے مقصد نُوں پورا کرن لئی استمال کیتا۔‏

16.‏ مشکلاں دا سامنا کردے ویلے اَسی یوسف دی مثال تے کیویں عمل کر سکنے آں؟‏

¹⁶ اَسی کیہہ سکھنے آں؟‏ جدوں تُسی مشکلاں دا سامنا کردے او تے یہوواہ تے اپنے بھین بھراواں لئی محبت نُوں گھٹ نہ ہون دَوو تے نہ ای اوہناں توں دُور ہووو۔ یاد رکھو کہ جدوں اَسی اپنے ایمان دی وجہ توں مشکلاں چوں لنگھ رہے ہنے آں تے ایس دوران یہوواہ بڑے زبردست طریقے نال ساڈی تربیت کردا اے۔ (‏عبرانیوں 12:‏7‏، فٹ‌نوٹ)‏ ایس تربیت دی وجہ توں اَسی اپنے اندر اوہ خوبیاں پیدا کر سکنے آں جیہڑیاں یہوواہ چ نیں جیویں کہ رحم تے معاف کرن دی خوبی۔ (‏عبرانیوں 12:‏11‏)‏ اَسی ایس گل دا پکا یقین رکھ سکنے آں کہ جیویں یہوواہ نے یوسف نُوں اجر دِتا، اوہ سانوں وی دَوے گا۔‏

بِنیامین

17.‏ بِنیامین بارے کیتی گئی پیشین‌گوئی کیویں پوری ہوئی؟ (‏پیدائش 49:‏27‏)‏ (‏ بکس نُوں وی ویکھو۔)‏

¹⁷ پیدائش 49:‏27 نُوں پڑھو۔‏ یعقوب نے بِنیامین بارے پیشین‌گوئی کردے ویلے کہیا کہ اوہدا قبیلہ بھیڑیے وانگوں ہوئے گا تے جنگ لڑن چ ماہر ہوئے گا۔ (‏قُضاۃ 20:‏15، 16؛‏ 1-‏تواریخ 12:‏2‏)‏ اِسرائیل دا پہلا بادشاہ ساؤل بِنیامین دے قبیلے چوں سی۔ اوہ بڑا زبردست جنگجو سی تے اوہنے بڑی دلیری نال فلسطینیاں دے خلاف جنگاں لڑیاں۔ (‏1-‏سموئیل 9:‏15-‏17،‏ 21‏)‏ ایہدے بوہت سالاں بعد بِنیامین دے قبیلے نال تعلق رکھن والے وزیراعظم مردکی تے ملکہ آستر نے اِسرائیلیاں دا ناں نشان مِٹن توں بچا لیا۔—‏آستر 2:‏5-‏7؛‏ 8:‏3؛‏ 10:‏3‏۔‏

18.‏ بِنیامین دے قبیلے دی وفاداری توں اَسی کیہہ سکھنے آں؟‏

¹⁸ اَسی کیہہ سکھنے آں؟‏ بِنیامین دا قبیلہ اوس ویلے بڑا خوش سی جدوں اوہناں دے قبیلے دا اِک شخص اِسرائیل دا پہلا بادشاہ بنیا۔ پر بعد چوں جدوں یہوواہ نے یہوداہ دے قبیلے چوں داؤد نُوں بادشاہ دے طور تے چُنیا تے بِنیامین دے قبیلے نے اوہدا پورا ساتھ دِتا۔ (‏2-‏سموئیل 3:‏17-‏19‏)‏ ایہدے کئی سالاں بعد جدوں اِسرائیل دے 10 قبیلیاں نے یہوداہ دے قبیلے دے خلاف بغاوت کیتی تے بِنیامین دا قبیلہ یہوداہ دے قبیلے تے بادشاہ داؤد دے گھرانے دا وفادار رہیا۔ (‏1-‏سلاطین 11:‏31، 32؛‏ 12:‏19،‏ 21‏)‏ بِنیامین دے قبیلے وانگوں سانوں وی اوہناں لوکاں دے وفادار رہنا چاہی دا اے جنہاں نُوں یہوواہ نے اپنے بندیاں دی پیشوائی کرن لئی مقرر کیتا اے۔—‏1-‏تھسلُنیکیوں 5:‏12‏۔‏

19.‏ یعقوب دِیاں پیشین‌گوئیاں توں سانوں کیویں فائدہ ہو سکدا اے؟‏

¹⁹ یعقوب دِیاں پیشین‌گوئیاں تے غور کرن نال سانوں واقعی بوہت فائدہ ہو سکدا اے۔ ایہہ پیشین‌گوئیاں جیویں پوریاں ہوئیاں، اوہدے توں ایس گل تے ساڈا بھروسا ہور ودھ گیا اے کہ خدا دے کلام چ لکھیاں دُوجیاں پیشین‌گوئیاں وی ضرور پوریاں ہون گیاں۔ ایہدے علاوہ جیس طرحاں یعقوب دے پُتراں نُوں یہوواہ کولوں برکت ملی، اوہدے توں اَسی سکھیا اے کہ سانوں یہوواہ نُوں خوش کرن لئی کیہہ کرنا چاہی دا اے۔‏