میرے ماں پیو دی چنگی مثال

1960 توں پہلاں میرے امی‌ابو اِٹلی توں کینیڈا آ گئے۔ ایہدے تھوڑے چِر بعد ای اوہناں نے سچائی سکھی تے سچائی مطابق چلنا ساڈے خاندان لئی سب توں اہم بن گیا۔ مینوں یاد اے کہ جدوں مَیں چھوٹا ساں تے مَیں اپنے امی‌ابو نال سارا سارا دن مُنادی کرنا ساں۔ ایس لئی کدی کدی مَیں مذاق چ کہنا واں کہ”‏مَیں اَٹھ سال دی عمر چ مددگار پہل‌کار دے طور تے خدمت کیتی اے۔“‏

میرے ماں پیو غریب سن پر فیر وی اوہناں نے یہوواہ لئی قربانیاں دین دے معاملے چ ساڈے لئی بڑی ودھیا مثال قائم کیتی۔ مثال لئی، اوہناں نے 1963 چ امریکہ دی ریاست کیلیفورنیا چ ہون والی وڈی کنونشن تے جان لئی اپنیاں بوہت ساریاں چیزاں ویچ دِتیاں۔ 1972 چ اَسی 1000 کلومیٹر (‏تقریباً 620 میل)‏ سفر کر کے کینیڈا دے شہر ٹریل چلے گئے تاکہ اَسی اوتھے اٹالین بولن والے لوکاں چ مُنادی کر سکئے۔ میرے ابو اِک گھر دی رکھوالی تے دیکھ‌بھال کرن دا کم کردے سن۔ اوہناں نے ہور زیادہ ترقی کرن دے موقعے ٹھکرا دِتے کیونکہ اوہ اپنی زندگی چ یہوواہ دی خدمت نُوں سب توں زیادہ اہمیت دینا چاہندے سن۔‏

مَیں اپنے امی‌ابو دا بڑا شکرگزار آں کہ اوہناں نے میرے لئی تے میرے تِن بھین بھراواں لئی چنگی مثال قائم کیتی۔ اوہناں دی چنگی مثال توں مَیں اپنی زندگی دا پہلا سبق سکھیا جیہڑا مَیں کدی وی نئیں بُھلیا۔ اوہ سبق ایہہ وے کہ جے اَسی خدا دی بادشاہی نُوں اپنی زندگی چ سب توں زیادہ اہمیت دَواں گے تے اوہ ساڈا خیال رکھے گا۔—‏متی 6:‏33‏۔‏

کل وقتی خدمت دی شروعات

1980 چ میری ڈیبی نال شادی ہو گئی۔ اوہ بڑی خوب‌صورت سی تے اوہدا سارا دھیان یہوواہ دی خدمت تے سی۔ اَسی دونویں کل وقتی طور تے یہوواہ دی خدمت کرنا چاہنے ساں۔ ایس لئی ساڈی شادی دے تِن مہینے بعد ڈیبی نے پہل‌کار دے طور تے خدمت شروع کر دِتی۔ تے شادی دے اِک سال بعد ای اَسی اِک چھوٹی جہی کلیسیا چ چلے گئے جتھے زیادہ مبشراں دی لوڑ سی تے مَیں وی ڈیبی نال پہل‌کار دے طور تے خدمت شروع کر دِتی۔‏

کجھ عرصے بعد اَسی بے‌حوصلہ ہو گئے ایس لئی اَسی واپس جان دا فیصلہ کیتا۔ پر پہلاں اَسی حلقے دے نگہبان نال گل کیتی۔ اوہنے بڑے پیار نال پر صاف صاف  سانوں دَسیا کہ ”‏تُسی مسئلے نُوں ہور ودھا رہے او۔ تُسی صرف مایوس کرن والیاں گلاں تے غور کر رہے او پر جے تُسی چنگیاں گلاں تے دھیان دین دی کوشش کرو گے تے اوہ توانوں ضرور نظر آن گیاں۔“‏ سانوں واقعی ایس درستی دی لوڑ سی۔ (‏زبور 141:‏5‏)‏ اَسی فوراً بھرا دی گل تے عمل کیتا تے چھیتی ای سانوں محسوس ہو گیا کہ بوہت ساریاں چنگیاں گلاں ہے سن جنہاں تے سانوں دھیان دین دی لوڑ سی۔ مثال لئی، کلیسیا چ بوہت سارے بھین بھرا سن جیہڑے یہوواہ لئی بوہت کجھ کرنا چاہندے سن۔ ایہناں چ بچے تے اوہ بھین بھرا وی شامل سن جنہاں دے جیون ساتھی یہوواہ دے گواہ نئیں سن۔ ایس واقعے توں اَسی بڑا اہم سبق سکھیا۔ اَسی سکھیا کہ سانوں چنگیاں گلاں تے دھیان دینا چاہی دا اے تے یہوواہ تے بھروسا رکھنا چاہی دا اے کہ اوہ آپ معاملیاں نُوں حل کرے گا۔ (‏میکاہ 7:‏7‏)‏ اِنج اَسی فیر توں خوش رہن لگ پئے تے حالات وی بہتر ہوندے گئے۔‏

اَسی پہلی واری پہل‌کاراں لئی جیہڑے سکول چ گئے، اوہدے چ تربیت دین والے بھرا دُوجے مُلکاں چ وی خدمت کر چُکے سن۔ اوہناں نے سانوں تصویراں وکھائیاں تے سانوں دَسیا کہ اوہناں نُوں اپنی خدمت چ کیہڑیاں مشکلاں دا سامنا ہویا تے کیہڑیاں کیہڑیاں برکتاں ملیاں۔ اِنج ساڈے دل چ وی مشنری دے طور تے خدمت کرن دا شوق پیدا ہویا۔ ایس لئی اَسی مشنری بنن دا فیصلہ کیتا۔‏

ایس منصوبے تے عمل کرن لئی اَسی 1984 چ ٹریل توں 4000 کلومیٹر (‏2485 میل)‏ دُور کیوبیک چلے گئے جتھے لوک فرانسیسی زبان بولدے نیں۔ اوتھے سانوں نوِیں ثقافت تے نوِیں زبان سکھنی پئی۔ اِک ہور مسئلہ ایہہ سی کہ اکثر ای ساڈے کول بوہت گھٹ پیسے ہوندے سن۔ اِک وار تے سانوں کجھ عرصے لئی آلو ای کھانے پئے جیہڑے سانوں اِک کسان نے اپنے کھیت چوں لین دی اجازت دِتی سی۔ ڈیبی نے آلواں توں فرق فرق کھانے بنائے تاکہ اَسی ایہناں نُوں کھا کھا کے اَک نہ جائیے۔ ایہناں مشکلاں دے باوجود وی اَسی اپنا دھیان خوشی نال یہوواہ دی خدمت کرن تے رکھیا۔ ایہدے نال نال اَسی ایہہ وی ویکھیا کہ یہوواہ ساڈا خیال رکھ رہیا سی۔—‏زبور 64:‏10‏۔‏

اِک دن سانوں اِک فون آیا تے سانوں پتہ چلیا کہ سانوں کینیڈا دے بیت‌ایل چ خدمت کرن لئی بلا‌یا گیا اے جدے بارے اَسی سوچیا وی نئیں سی۔ اصل چ اَسی گلئیڈ سکول چ جان لئی درخاست دِتی ہوئی سی۔ ایس لئی اَسی بیت‌ایل چ خدمت کرن لئی تھوڑے خوش تے تھوڑے اُداس ساں۔ پر فیر وی اَسی بیت‌ایل جان دا فیصلہ کیتا۔ جدوں اَسی اوتھے پونچے تے اَسی برانچ کمیٹی دے اِک بھرا کینتھ لٹل نُوں پچھیا:‏ ”‏جے سانوں گلئیڈ سکول چ بلا لیا گیا تے فیر کیہہ ہوئے گا؟“‏ بھرا نے جواب دِتا:‏ ”‏اوہدوں دی اوہدوں ویکھاں گے۔“‏

 اِک ہفتے بعد مینوں تے ڈیبی نُوں گلئیڈ سکول چ جان دی دعوت مِل گئی۔ ہُن سانوں فیصلہ کرنا سی کہ اَسی کیہہ کراں گے۔ بھرا کینتھ نے سانوں کہیا:‏ ”‏بھانویں تُسی جیہڑا وی فیصلہ کر لوو، پر کدی کدی توانوں ایہہ ضرور محسوس ہوئے گا کہ کاش تُسی دُوجی خدمت چُنی ہوندی۔ دونویں خدمتاں برابر نیں ایس لئی تُسی جیہڑا وی فیصلہ کرو گے، یہوواہ اوہدے تے برکت پائے گا۔“‏ آخرکار اَسی گلئیڈ جان دا فیصلہ کیتا تے اَسی ویکھیا اے کہ بھرا کینتھ دی گل بالکل صحی سی۔ بعد چوں اَسی بھرا دی ایہہ گل اوہناں لوکاں نُوں وی دَسنے ساں جنہاں نُوں دو وچوں کوئی اِک خدمت کرن دا فیصلہ کرنا پیندا سی۔‏

مشنریاں دے طور تے زندگی

سانوں گلئیڈ سکول دی کلاس نمبر 83 چ بلا‌یا گیا جدے چ 24 بھین بھرا سن۔ اَسی بڑے خوش ساں کہ اَسی وی اوہناں چ شامل ساں۔ ایہہ سکول اپریل 1987 چ بروکلن نیویارک چ ہویا۔ سانوں تربیت دین والے بھراواں چ خاص طور تے بھرا اولیسس گلاس تے بھرا جیک ریڈفرڈ شامل سن۔ سکول دے پنج مہینے کیویں گزر گئے، سانوں پتہ ای نئیں چلیا تے 6 ستمبر 1987 نُوں ساڈی گریجویشن دا دن آ گیا۔ سانوں تے بھرا جان تے بھین میری گوڈ نُوں ہیٹی گھلیا گیا۔‏

1962 چ ہیٹی چوں سارے مشنریاں نُوں کڈھ دِتا گیا سی۔ اوس توں بعد گلئیڈ توں تربیت پان والے کسے مشنری نُوں اوتھے نئیں گھلیا گیا سی۔ گریجویشن دے تِن ہفتیاں بعد اَسی ہیٹی دی اِک چھوٹی جہی کلیسیا چ چلے گئے جدے چ 35 مبشر سن تے ایہہ کلیسیا پہاڑاں چ سی۔ اَسی جوان ساں تے ساڈے کول کوئی تجربہ وی نئیں سی نالے اَسی اوس گھر چ کلّے ساں جتھے مشنری رہندے سن۔ اوتھوں دے لوک بوہت زیادہ غریب تے اَن‌پڑھ سن۔ ساڈی خدمت دے شروع دے دناں چ ای اوتھے دنگے فساد شروع ہو گئے۔ لوک حکومت دا تختہ اُلٹن دی کوشش کر رہے سن تے احتجاج کر رہے سن نالے اوس علاقے چ سانوں طوفاناں دا وی سامنا کرنا پیا۔‏

 اَسی ہیٹی دے بھین بھراواں کولوں بوہت کجھ سکھیا جیہڑے ایہناں مشکل حالاتاں چ وی مضبوط تے خوش رہندے سن۔ اوہناں وچوں کئیاں دی زندگی بڑی مشکل سی پر اوہ یہوواہ تے مُنادی دے کم نال بڑا پیار کردے سن۔ مثال لئی، اِک وڈیری بھین نُوں پڑھنا لکھنا نئیں آندا سی پر اوہنوں 150 ایتاں زبانی یاد سن۔ ملک چ جیہو جہے حالات چل رہے سن، اوہدے توں ساڈے دل چ ایہہ ہور زیادہ خواہش پیدا ہوئی کہ اَسی لوکاں نُوں دَسیئے کہ اوہناں دے مسئلیاں دا حل صرف خدا دی بادشاہی اے۔ اَسی شروع شروع چ جیہڑے لوکاں نُوں بائبل کورس کرایا اوہ بعد چوں پہل‌کار، خاص پہل‌کار تے بزرگ بن گئے۔ ایہہ ویکھ کے سانوں بڑی خوشی ہوئی۔‏

ہیٹی چ مَیں مورمن مذہب دے اِک جوان مشنری نُوں ملیا جدا ناں ٹریور سی تے ساڈی کئی وار بائبل چوں گل بات ہوئی۔ کئی سالاں بعد مینوں اوہدے وَلّوں اِک خط ملیا۔ اوس خط چ اوہنے ایہو جہی گل لکھی جدے بارے مَیں سوچیا وی نئیں سی۔ اوہنے لکھیا سی:‏ ”‏مَیں آن والی کنونشن تے بپتسمہ لین والا واں تے مَیں ہیٹی واپس جاکے خاص پہل‌کار دے طور تے خدمت کرنا چاہنا واں جتھے پہلے مَیں مورمن مذہب دا مشنری ہنا ساں۔“‏ اوہنے کئی سالاں تک واقعی ہیٹی چ اپنی بیوی نال مِل کے خاص پہل‌کار دے طور تے خدمت کیتی۔‏

پہلے یورپ تے فیر افریقہ چ

سانوں یورپ دے اِک ایہو جہے علاقے چ خدمت کرن لئی گھلیا گیا جتھے ساڈے مُنادی دے کم توں پابندیاں ہٹ رہیاں سن۔ 1992 چ اَسی سلووینیا دے علاقے لوجووِلی‌جانا پونچے۔ ایس علاقے دے نیڑے ای میرے ماں پیو اِٹلی جان توں پہلاں جمے پلے سن۔ اوس علاقے چ حالے وی جنگ چل رہی سی جیہڑا پہلاں ملک یوگوسلاویہ سی۔ آسٹریا چ ویانا دی برانچ تے کروشیا تے سربیا چ تنظیم دے دفتر ایہناں علاقیاں چ مُنادی دے کم دی دیکھ‌بھال کر رہے سن۔ پر ہُن ملک دے ٹُٹن توں بعد ہر نویں ملک چ اِک علیٰحدہ بیت‌ایل دی ضرورت سی۔‏

ہُن سانوں اِک نوِیں زبان نُوں سکھن تے اِک نوِیں ثقافت نُوں اپنان دی لوڑ سی۔ سلووینیا چ رہن والے لوک کہندے سن کہ ”‏ساڈی زبان بڑی مشکل اے۔“‏ تے اوہ واقعی صحی کہندے سن۔ اَسی اوہناں بھین بھراواں دی وفاداری نُوں ویکھ کے بڑے متاثر ہوئے جنہاں نے تنظیم وَلّوں ہون والیاں تبدیلیاں نُوں فوراً قبول کیتا۔ اَسی ایہہ وی ویکھیا کہ ایہدے بدلے چ یہوواہ نے اوہناں نُوں کِنّیاں برکتاں دِتیاں نیں۔ اِک واری فیر اَسی ایہہ ویکھیا کہ یہوواہ کیویں صحی وقت تے کِنّے پیار نال معاملیاں نُوں حل کردا اے۔ سلووینیا چ ساڈا اوہناں گلاں تے یقین ہور مضبوط ہویا جیہڑیاں اَسی پہلے سکھیاں سن نالے اَسی اوتھے نویں سبق وی سکھے۔‏

 حالے ساڈی زندگی چ ہور وی تبدیلیاں آن والیاں سن۔ 2000 چ سانوں مغربی افریقہ دے ملک آئیوری کوسٹ گھلیا گیا۔ فیر نومبر 2002 چ دنگے فساداں دی وجہ توں سانوں سیرا لیون گھل دِتا گیا۔ اوتھے اوہ دنگے فساد حالے ختم ای ہوئے سن جیہڑے 11 سالاں توں چل رہے سن۔ آئیوری کوسٹ نُوں اینی چھیتی چھڈ کے جانا بڑا مشکل سی۔ پر جیہڑے سبق اَسی پہلاں سکھے سن، اوہناں دی وجہ توں اَسی اپنی خوشی نُوں قائم رکھ سکے۔‏

اوتھے جا کے اَسی اوہناں علاقیاں چ زیادہ محنت کیتی جتھوں دے لوک سچائی سکھنا چاہندے سن نالے اَسی اپنے اوہناں بھین بھراواں نُوں وی کافی وقت دِتا جیہڑے کئی سالاں توں جنگ دا سامنا کر رہے سن۔ اوہ بڑے غریب سن پر اوہناں کول جو کجھ وی سی، اوہ دُوجیاں نال وَنڈنا چاہندے سن۔ اِک بھین نے ڈیبی نُوں کجھ کپڑے دِتے۔ ڈیبی اوہ کپڑے لین توں تھوڑا جھجک رہی سی ایس لئی اوس بھین نے کافی زور لایا تے ڈیبی نُوں کہیا:‏ ”‏جنگ دے دوران دُوجے مُلکاں چ رہن والے بھین بھراواں نے ساڈی بڑی مدد کیتی۔ ہُن ساڈی واری اے کہ اَسی دُوجیاں دی مدد کرئیے۔“‏ اَسی سوچیا کہ اَسی وی ایہناں بھین بھراواں ورگے بناں گے۔‏

آخر کار اَسی دُبارہ آئیوری کوسٹ چلے گئے پر اوتھے فیر توں حالات خراب ہو گئے۔ ایس لئی نومبر 2004 چ سانوں ہیلی کاپٹر دے ذریعے اوتھوں کڈھیا گیا۔ اَسی دونویں اپنے نال صرف10، 10 کلو دا اِک بیگ لے کے جا سکنے ساں۔ اَسی فرانس دے فوجی علاقے چ اِک رات فرش تے سُتے۔ اگلے دن سانوں جہاز چ سوئٹزرلینڈ لجایا گیا۔ اَسی اَدھی رات نُوں اوتھوں دی برانچ دے دفتر پونچے۔ پر جدوں اَسی اوتھے پونچے تے برانچ کمیٹی تے منسٹریل ٹریننگ سکول چ تربیت دین والے بھراواں تے اوہناں دِیاں بیویاں نے سانوں خوشی نال جی آیاں نُوں کہیا۔ اوہ سانوں گلے ملے، سانوں گرم گرم کھانا کھوایا تے ڈھیر ساریاں چاکلیٹاں دِتیاں۔ اوہناں دے پیار نے ساڈے دِلاں نُوں چُھو لیا۔‏

فیر سانوں وقتی طور تے گھانا چ خدمت کرن لئی گھل دِتا گیا تے جدوں آئیوری کوسٹ چ حالات بہتر ہو گئے تے سانوں اوتھے گھل دِتا گیا۔ جدوں سانوں کسے ملک توں بھج کے وقتی طور تے کِتے ہور خدمت کرن لئی جانا پیندا سی تے ایس دوران سانوں بھین بھراواں دی محبت توں بڑی مدد مِلدی سی۔ مَیں تے ڈیبی ایہہ مننے آں کہ یہوواہ دی تنظیم چ ایہہ محبت اِک عام جہی گل اے پر اَسی ایہنوں کدی وی عام نئیں سمجھاں گے سگوں ایہدی قدر کردے رہواں گے۔ سچ تے ایہہ وے کہ مشکل حالاتاں دا سامنا کردے ویلے وی اَسی بڑے ای اہم سبق سکھے۔‏

مشرقِ‌وسطیٰ چ

2006 چ سانوں اپنے ہیڈ کوارٹر وَلّوں اِک خط ملیا جدے چ دَسیا گیا سی کہ سانوں خدمت کرن لئی مشرقِ‌وسطیٰ گھلیا جا رہیا اے۔ اِک واری فیر ساڈے سامنے نویں تجربے، نوِیاں مشکلاں، نوِیں زبان تے نوِیں ثقافت سی۔ ایتھے لوک سیاست تے مذہب بارے بڑی کٹر سوچ رکھدے سن۔ پر ایس ماحول چ وی سانوں سکھن نُوں بوہت کجھ ملیا۔ سانوں ایہہ گل بڑی پسند سی کہ کلیسیاواں چ کِنّی فرق فرق زباناں بولن والے بھین بھرا نیں پر تنظیم وَلّوں ملن والیاں ہدیتاں دی وجہ توں اوہ سارے اِک مُٹھ نیں۔ اوہ بھین بھرا وی تعریف دے لائق سن جیہڑے بڑی دلیری نال اپنے گھر والیاں، سکول چ پڑھن والے بچیاں، اپنے نال کم کرن والے لوکاں تے اپنے گوانڈھیاں وَلّوں مخالفت دا سامنا کر رہے سن۔‏

2012 چ اَسی ملک اِسرائیل دے شہر تل‌ابیب چ ہون والی خاص کنونشن تے گئے۔ 33 عیسوی دی عیدِپنتِکُست دے بعد ایہہ پہلی وار سی کہ یہوواہ دے اینے زیادہ بندے ایس علاقے چ جمع ہوئے سن۔ ایہہ بڑا یادگار موقع سی۔‏

ایس خدمت دے دوران ای اِک واری سانوں اِک ایہو جہے ملک چ گھلیا گیا جتھے ساڈے کم تے پابندی اے۔ اَسی اوتھے اپنے نال کجھ کتاباں تے رسالے لے گئے  نالے اَسی اوتھے مُنادی کیتی تے چھوٹیاں چھوٹیاں کنونشناں تے وی گئے۔ اوتھے ہر جگہ تے فوجی کھلوتے سن جنہاں نے ہتھیار پھڑے سن۔ پر سانوں ڈر نئیں لگیا کیونکہ اَسی بڑی احتیاط نال کجھ ای بھین بھراواں نال ایدھر اودھر سفر کیتا۔‏

افریقہ واپسی

2013 چ سانوں اِک بڑی فرق ذمے‌داری دِتی گئی۔ سانوں کہیا گیا کہ اَسی ملک کانگو دے شہر کنشاسا چ برانچ چ خدمت کرئیے۔ ایہہ بوہت ای وڈا تے خوب‌صورت ملک اے۔ پر ایتھوں دے لوکاں نُوں غریبی تے جنگاں دا سامنا کرنا پیا اے۔ شروع چ اَسی سوچیا:‏ ”‏افریقہ ساڈے لئی انجان نئیں اے ایس لئی اَسی اوتھے جان لئی تیار آں۔“‏ پر سانوں پتہ چلیا کہ سانوں حالے وی بوہت کجھ سکھن دی لوڑ سی، خاص طور تے ایہہ کہ اَسی اوہناں علاقیاں چ سفر کیویں کر سکنے آں جتھے پکیاں سڑکاں نئیں نیں۔ کانگو چ اَسی بوہت ساریاں چنگیاں گلاں وی ویکھیاں جیویں کہ اَسی ویکھیا کہ بھین بھرا غریب ہون دے باوجود کِنّی خوشی نال یہوواہ دی خدمت چ لگے ہوئے نیں، اوہ مُنادی دے کم نال کِنّاں پیار کردے نیں تے کِنّیاں کوششاں کر کے عبادتاں تے کنونشناں تے آندے نیں۔ اَسی اپنی اَکھیں ویکھیا کہ یہوواہ اوتھے مُنادی دے کم تے کِنّی برکت پا رہیا سی۔ کانگو چ اَسی جِنّی دیر یہوواہ دی خدمت کیتی، اوہدا ساڈی زندگی تے بڑا گُوڑھا اثر ہویا تے سانوں بوہت سارے چنگے دوست ملے۔‏

2017 دے آخر تے ساڈی خدمت دُبارہ بدل گئی تے سانوں جنوبی افریقہ گھل دِتا گیا۔ اَسی جِنّیاں وی برانچاں چ خدمت کیتی، ایہہ اوہناں وچوں سب توں وڈی سی۔ اوتھے سانوں جیہڑا کم دِتا گیا، اوہ وی ساڈے لئی بالکل نواں سی۔ ہُن سانوں فیر توں بوہت کجھ سکھن دی لوڑ سی۔ پر جیہڑیاں گلاں اَسی ماضی چ سکھیاں سن، اوہ اِنج کرن چ ساڈے بڑے کم آئیاں۔ اَسی اوہناں بھین بھراواں نال بڑا پیار کرنے آں جیہڑے کئی سالاں توں وفاداری نال یہوواہ دی خدمت کر رہے نیں۔ سانوں ایہہ ویکھ کے وی بڑی حیرانی ہوندی اے کہ بیت‌ایل چ کئی نسلاں تے ثقافتاں دے بھین بھرا نیں پر اوہ سارے اِک مُٹھ ہو کے یہوواہ دی خدمت کر رہے نیں۔ اَسی ایہہ صاف طور تے ویکھ سکنے آں کہ یہوواہ دی برکت دی وجہ توں ای اوہدے بندیاں چ امن اے، اوہدے بندے نوِیں شخصیت پا رہے نیں تے اوہدے کلام چ دِتے اصولاں تے عمل کر رہے نیں۔‏

پچھلے کئی سالاں چ مینوں تے ڈیبی نُوں بڑیاں زبردست ذمے‌داریاں ملیاں نیں، اَسی فرق فرق ثقافتاں چ اپنے آپ نُوں ڈھالیا اے تے کئی نوِیاں زباناں سکھیاں نیں۔ اِنج کرنا ساڈے لئی ہمیشاں اسان نئیں ہوندا سی پر اَسی ویکھیا اے کہ ایہناں سالاں دے دوران یہوواہ اپنی تنظیم تے اپنے بندیاں دے ذریعے ساڈے لئی پیار وکھاندا رہیا۔ (‏زبور 144:‏2‏)‏ سانوں پورا یقین اے کہ اپنی کل وقتی خدمت دے دوران اَسی جیہڑیاں گلاں سکھیاں نیں، اوہناں دی وجہ توں اَسی یہوواہ دے چنگے خادم بن گئے آں۔‏

مَیں ایس گل لئی بڑا شکرگزار آں کہ میرے ماں پیو نے میری چنگی تربیت کیتی، میری پیاری بیوی ڈیبی نے میرا بڑا ساتھ دِتا تے بھین بھراواں نے اپنی چنگی مثال توں مینوں بوہت کجھ سکھایا۔ مَیں تے میری بیوی مستقبل چ وی اوہناں گلاں نُوں سکھدے رہواں گے جیہڑیاں ساڈا عظیم اُستاد یہوواہ سانوں سکھائے گا۔‏