1، 2.‏ صدوق کون سی؟ (‏1-‏تواریخ 12:‏22،‏ 26-‏28‏)‏

 ذرا اوس واقعے بارے سوچو جدوں پورے اِسرائیل چوں 3 لکھ 40 ہزار توں زیادہ بندے داؤد نُوں بادشاہ بنان لئی کٹھے ہوئے سن۔ تِن دن تک ایہہ بندے حبرون دے نیڑے پہاڑاں تے رہے۔ ایس دوران اوہناں نے آپس چ ہنسی مذاق کیتا، اِک دُوجے نال بوہت ساریاں گلاں کیتیاں تے یہوواہ خدا دی وڈیائی کرن لئی مِل کے گیت گائے۔ (‏1-‏تواریخ 12:‏39‏)‏ ایس وڈی بِھیڑ چ صدوق ناں دا اِک نوجوان وی سی جدے تے بوہت سارے لوکاں دا دھیان وی نئیں گیا ہونا۔ پر یہوواہ نے اوہنوں ویکھیا تے اوہ چاہندا اے کہ سانوں وی پتہ ہوئے کہ صدوق اوتھے موجود سی۔ ‏(‏1-‏تواریخ 12:‏22،‏ 26-‏28 نُوں پڑھو۔)‏ پر صدوق ہے کون سی؟‏

² صدوق اِک کاہن سی تے اوہ وڈے کاہن ابیاتر نال مِل کے کم کردا سی۔ صدوق نُوں یہوواہ نے بڑی سمجھداری دِتی سی نالے ایہہ صلاحیت دِتی سی کہ اوہ اوہدی مرضی نُوں سمجھ سکے۔ (‏2-‏سموئیل 15:‏27‏)‏ لوک صدوق کولوں صلاح مشورہ لین آندے سن۔ اوہ بڑا دلیر وی سی۔ ایس مضمون چ اَسی اوہدی ایسے خوبی تے گل کراں گے۔‏

3.‏ (‏الف)‏یہوواہ دے بندیاں نُوں دلیری دی لوڑ کیوں اے؟ (‏ب)‏ایس مضمون چ اَسی کیہڑیاں گلاں تے غور کراں گے؟‏

³ ایس آخری زمانے چ شیطان یہوواہ دے بندیاں دے ایمان نُوں کمزور کرن لئی پہلے توں کِتے زیادہ حملے کر رہیا اے۔ (‏1-‏پطرس 5:‏8‏)‏ اَسی اوس وقت دا اِنتظار کر رہے آں جدوں یہوواہ شیطان تے اوہدی بُری دُنیا نُوں ختم کر دَوے گا۔ (‏زبور 31:‏24‏)‏ پر جدوں تک اوہ وقت نئیں آندا، سانوں یہوواہ دا وفادار رہن لئی دلیری دی لوڑ اے۔ ایس مضمون چ اَسی تِن معاملیاں تے غور کراں گے جنہاں چ اَسی صدوق ورگی دلیری وکھا سکنے آں۔‏

 خدا دی بادشاہی دی حمایت کرو

4.‏ یہوواہ دے بندیاں نُوں اوہدی بادشاہی دی حمایت کرن لئی دلیری دی لوڑ کیوں اے؟ (‏تصویر نُوں وی ویکھو۔)‏

⁴ یہوواہ دے بندیاں دے طور تے اَسی پورے دل نال اوہدی بادشاہی دی حمایت کرنے آں۔ پر اِنج کرن لئی سانوں اکثر دلیری دی لوڑ ہوندی اے۔ (‏متی 6:‏33‏)‏ مثال لئی، ایس بھیڑی دُنیا چ سانوں یہوواہ دے معیاراں مطابق زندگی گزارن تے بادشاہی دی خوش خبری دی مُنادی کرن لئی دلیری دی لوڑ اے۔ (‏1-‏تھسلُنیکیوں 2:‏2‏)‏ ایہدے علاوہ اَج لوک فرق فرق سیاسی پارٹیاں دی حمایت کردے نیں۔ (‏یوحنا 18:‏36‏)‏ ایس لئی سیاسی معاملیاں چ کسے دی طرف‌داری نہ کرن لئی سانوں دلیری دی لوڑ اے۔ یہوواہ دے بوہت سارے بندیاں نُوں سیاست تے جنگ چ حصہ نہ لین دی وجہ توں پیسے دھیلے دی تنگی دا سامنا کرنا پیا، اوہناں نُوں ماریا کُٹیا گیا تے جیل چ پا دِتا گیا۔‏

5.‏ صدوق نُوں داؤد دی مدد کرن لئی دلیری دی لوڑ کیوں سی؟‏

⁵ صدوق صرف ایس لئی حبرون نئیں گیا سی کیونکہ اوہ داؤد دے بادشاہ بنن دا جشن منانا چاہندا سی۔ (‏1-‏تواریخ 12:‏38‏)‏ سگوں اوہ اوتھے اپنے ہتھیار لے کے گیا سی تاکہ ضرورت پین تے داؤد لئی لڑ سکے۔ اوہ داؤد نال جنگ چ جان لئی تے بنی‌اِسرائیل دے دُشمناں نال لڑن لئی تیار سی۔ صدوق دے کول شاید جنگ لڑن دا ایناں تجربہ نئیں سی پر اوہ فیر وی اِنج کرن لئی تیار سی۔ واقعی اوہ بڑا دلیر سی۔‏

6.‏ داؤد نے دلیر بنن بارے صدوق لئی چنگی مثال کیویں قائم کیتی؟ (‏زبور 138:‏3‏)‏

⁶ صدوق کاہن چ اینی زیادہ دلیری کتھوں آ گئی؟ اوہدے سامنے ایہو جہے بوہت سارے لوکاں دِیاں مثالاں سن جیہڑے بڑے مضبوط تے دلیر سن۔ اوہنے ضرور اوہناں لوکاں توں بوہت کجھ سکھیا ہوئے گا۔ مثال لئی، داؤد اِک دلیر پیشوا سی تے بڑی بہادری نال جنگاں لڑدا ہوندا سی۔ ایس وجہ توں ہر اِسرائیلی اوہنوں بادشاہ بنانا چاہندا سی۔ (‏1-‏تواریخ 11:‏1، 2‏)‏ داؤد ہمیشاں اپنے دُشمناں نال لڑن لئی یہوواہ دی مدد تے بھروسا کردا سی۔ (‏زبور 28:‏7؛‏ زبور 138:‏3 نُوں پڑھو۔)‏ صدوق نے ہور وی دلیر بندیاں دِیاں مثالاں توں سکھیا جیویں کہ یہویدع تے اوہدے پُتر بنایاہ کولوں۔ تے 22 ہور سرداراں کولوں  وی جنہاں نے داؤد دا ساتھ دِتا سی۔ (‏1-‏تواریخ 11:‏22-‏25؛‏ 12:‏26-‏28‏)‏ ایہناں سرداراں نے داؤد نُوں اپنا بادشاہ بنان تے اوہدی حفاظت کرن دا عزم کیتا ہویا سی۔‏

7.‏ (‏الف)‏اَسی اپنے زمانے دے کیہڑے لوکاں دِیاں مثالاں توں دلیر بننا سکھ سکنے آں؟ (‏ب)‏تُسی ویڈیو چ بھرا ا ینگے نسیلو دی مثال توں کیہہ سکھیا اے؟‏

⁷ سانوں وی یہوواہ دے اوہناں بندیاں دِیاں مثالاں تے غور کر کے دلیری تے ہمت مِل سکدی اے جنہاں نے یہوواہ تے اوہدی بادشاہی دا وفادار رہن لئی دلیری وکھائی۔ جدوں ساڈا بادشاہ یسوع زمین تے سی تے اوہنے شیطان دی دُنیا دے سیاسی نظام چ حصہ لین توں سختی نال اِنکار کیتا۔ (‏متی 4:‏8-‏11؛‏ یوحنا 6:‏14، 15‏)‏ یسوع مسیح نے ہمیشاں ہمت تے دلیری لئی یہوواہ تے آس لائی۔ ساڈے سامنے ایہو جہے بوہت سارے دلیر بھراواں دِیاں مثالاں نیں جنہاں نے یہوواہ دا وفادار رہن لئی سیاست تے جنگ چ جان توں اِنکار کر دِتا۔ تُسی ساڈی ویب‌سائٹ jw.org توں ایہناں بھراواں دے تجربے پڑھ سکدے او۔‏ a

بھین بھراواں دی مدد کرو

8.‏ کلیسیا دے بزرگاں نُوں بھین بھراواں دی مدد کرن لئی دلیری دی لوڑ کدوں پے سکدی اے؟‏

⁸ یہوواہ دے بندیاں نُوں اِک دُوجے دی مدد کرنا بوہت پسند اے۔ (‏2-‏کُرنتھیوں 8:‏4‏)‏ پر کدی کدار اِنج کرن لئی ہمت تے دلیری دی لوڑ ہوندی اے۔ مثال لئی، جدوں کِتے جنگ شروع ہو جاندی اے تے اوس علاقے دے بزرگاں نُوں پتہ ہوندا اے کہ اوتھوں دے بھین بھراواں نُوں حوصلے، مدد تے روحانی تے جسمانی کھانے دی لوڑ اے۔ اپنے بھین بھراواں نال محبت دی وجہ توں ایہہ بزرگ اپنیاں زندگیاں نُوں خطرے چ پا کے اوہناں بھین بھراواں نُوں ضرورت دِیاں چیزاں دیندے نیں۔ (‏یوحنا 15:‏12، 13‏)‏ اِنج اوہ صدوق وانگوں دلیری ظاہر کر رہے ہوندے نیں۔‏

9.‏ 2-‏سموئیل 15:‏27-‏29 دے مطابق داؤد نے صدوق نُوں کیہہ کرن لئی کہیا؟ (‏تصویر نُوں وی ویکھو۔)‏

⁹ داؤد دی جان خطرے چ سی۔ اوہدے پُتر ابی‌سلوم دے سِر تے داؤد دے تخت تے قبضہ جمان دا جنون سوار سی۔ (‏2-‏سموئیل 15:‏12، 13‏)‏ داؤد نُوں فوراً یروشلم توں بھجنا سی۔ اوہنے اپنے خادماں نُوں کہیا:‏ اُٹھو ایتھوں  بھجئے، نئیں تے ساڈے وچوں کوئی وی ابی‌سلوم دے ہتھوں نئیں بچے گا۔ (‏2-‏سموئیل 15:‏14‏)‏ جدوں داؤد دے خادم بھج رہے سن تے اوہنے سوچیا کہ کسے نہ کسے نُوں ضرور پچھے رہنا چاہی دا اے تاکہ اوہ اوہناں نُوں ابی‌سلوم دے منصوبیاں دی خبر دیندا رہوے۔ ایس لئی اوہنے صدوق کاہن تے دُوجے کاہناں نُوں واپس شہر گھلیا تاکہ اوہ اوہناں نُوں اِک اِک منٹ دی خبر دے سکن۔ ‏(‏2-‏سموئیل 15:‏27-‏29 نُوں پڑھو۔)‏ ایہناں بندیاں لئی ضروری سی کہ اوہ بڑی احتیاط تے سمجھداری نال کم لین۔ داؤد نے ایہناں کاہناں نُوں بڑا ای خطرناک کم کرن لئی کہیا تے ایہدے چ اوہناں دی جان وی جا سکدی سی۔ ذرا سوچو کہ جے ابی‌سلوم ورگے آکڑ باز،غصے والے تے چالاک بندے نُوں پتہ لگ جاندا کہ صدوق تے دُوجے کاہن اوہدی جاسوسی کر رہے نیں تے داؤد دی حفاظت کر رہے نیں تے اوہ اوہناں دا کیہہ حشر کردا۔‏

10.‏ صدوق تے اوہدے ساتھیاں نے داؤد دی حفاظت کیویں کیتی؟‏

¹⁰ داؤد نے اِک منصوبہ بنایا جدے چ اوہنے صدوق کاہن تے اپنے اِک ہور وفادار دوست کولوں مدد منگی جدا ناں حُوسی سی۔ (‏2-‏سموئیل 15:‏32-‏37‏)‏ ایس منصوبے دے مطابق حُوسی نے ابی‌سلوم دا بھروسا جتیا تے اوہنوں مشورہ دِتا کہ اوہ داؤد تے کیویں حملہ کرے۔ (‏2-‏سموئیل 17:‏8-‏16‏)‏ اِنج داؤد نُوں ابی‌سلوم وَلّوں ہون والے حملے لئی تیاری کرن دا وقت مِل گیا۔ فیر صدوق تے ابیاتر نے داؤد نُوں ابی‌سلوم دے منصوبے بارے دَسیا۔ (‏2-‏سموئیل 17:‏17‏)‏ یہوواہ دی مدد نال صدوق تے باقی کاہناں نے داؤد نُوں بچان چ بڑا اہم کردار ادا کیتا۔—‏2-‏سموئیل 17:‏21، 22‏۔‏

11.‏ اپنے بھین بھراواں دی مدد کردے ویلے اَسی صدوق وانگوں دلیری کیویں وکھا سکنے آں؟‏

¹¹ اَسی صدوق وانگوں اوس ویلے کیویں دلیری وکھا سکنے آں جدوں ساڈے بھین بھراواں دی جان خطرے چ ہوندی اے تے سانوں اوہناں دی مدد کرن لئی کہیا جاندا اے؟ ‏(‏1)‏ہدیتاں نُوں منو۔‏ خطرناک حالات چ ایہہ بوہت ضروری ہوندا اے کہ اَسی فرمانبردار رہیے تاکہ اَسی اپنے بھین بھراواں نال اِک مُٹھ رہ سکئے۔ ایس لئی توانوں برانچ وَلّوں جیہڑیاں ہدیتاں مِلدیاں نیں، اوہناں تے عمل کرو۔ (‏عبرانیوں 13:‏17‏)‏ کلیسیا دے بزرگاں نُوں باقاعدگی نال اوہناں ہدیتاں نُوں ویکھنا چاہی دا اے جنہاں چ دَسیا گیا اے کہ اَسی اپنے آپ نُوں آفت لئی کیویں تیار کر سکنے آں تے فیر جدوں کوئی آفت آندی اے تے اَسی اوس ویلے کیہہ کر سکنے آں۔ (‏1-‏کُرنتھیوں 14:‏33،‏ 40‏)‏ ‏(‏2)‏دلیر بنو پر احتیاط نال وی کم لوو۔‏ (‏اَمثال 22:‏3‏)‏ کجھ وی کرن توں پہلاں سوچو تے  کسے وی غیرضروری خطرے چ پین توں بچو۔ ‏(‏3)‏یہوواہ تے بھروسا کرو۔‏ یاد رکھو کہ یہوواہ صرف ایہہ نئیں چاہندا کہ تواڈے بھین بھرا ای محفوظ رہن سگوں اوہ چاہندا اے کہ تُسی وی محفوظ رہوو۔ یہوواہ تے بھروسا رکھو کیونکہ اوہ تواڈی مدد کر سکدا اے تاکہ تُسی محفوظ طریقے نال اپنے بھین بھراواں دی مدد کر سکو۔‏

12، 13.‏ تُسی بھرا وِکٹر تے بھرا وتالی دی مثال توں کیہہ سکھیا اے؟ (‏تصویر نُوں وی ویکھو۔)‏

¹² ذرا بھرا وِکٹر تے بھرا وتالی دی مثال تے غور کرو۔ ایہناں دونواں بزرگاں نے یوکرین چ اپنے بھین بھراواں تک کھانا تے پانی پونچایا۔ بھرا وِکٹر نے اپنے تے بھرا وتالی بارے دَسیا:‏ ”‏اَسی ہر جگہ توں کھانا لبھن دی کوشش کیتی۔ ایس دوران اکثر سانوں ساڈے آلے دَوالے گولیاں چلن دی آواز آندی سی۔ فیر اِک بھرا نے اپنی دکان چوں کھان پین دِیاں شیواں دِتیاں۔ اِنج بوہت سارے مبشراں نُوں کجھ وقت گزارا کرن لئی شیواں مِل گئیاں۔ جدوں اَسی اپنے ٹرک چ ایہہ شیواں رکھ رہے ساں تے تقریباً 20 میٹر (‏66 فٹ)‏ دُور اِک بم ڈِگیا۔ اوس پورے دن دے دوران مَیں یہوواہ کولوں اِلتجا کردا رہیا کہ اوہ مینوں دلیری دَوے تاکہ مَیں اپنے بھین بھراواں دی مدد کردا رہواں۔“‏

¹³ بھرا وتالی نے کہیا:‏ ”‏سانوں بوہت زیادہ دلیری دی لوڑ سی۔ اپنی پہلی منزل تک پونچن لئی مینوں 12 گھنٹے لگے۔ پورے سفر دے دوران مَیں یہوواہ کولوں دُعا کردا رہیا۔“‏ بھرا وتالی نے دلیری وکھائی پر نال نال اوہنے احتیاط نال وی کم لیا۔ اوہنے اَگے دَسیا:‏ ”‏مَیں وار وار یہوواہ کولوں دانش‌مندی تے خاکساری لئی دُعا کردا رہیا۔ مَیں صرف اوہناں سڑکاں تے ای گڈی چلائی جنہاں تے سفر کرن لئی حکومت نے اجازت دِتی ہوئی سی۔ جدوں مَیں ویکھیا کہ بھین بھرا کیویں مِل کے کم کر رہے نیں تے میرا ایمان بڑا مضبوط ہویا۔ اوہناں نے راہ چ پئیاں رُکاوٹاں نُوں ہٹایا نالے اوہناں نے کھان پین دِیاں شیواں، کپڑے تے کجھ ہور ضروری سامان کٹھا کیتا تے ٹرک چ لدیا۔ بھین بھراواں نے مینوں تے وِکٹر نُوں کھانا دِتا تے سفر دے دوران آرام کرن لئی جگہ وی دِتی۔“‏

یہوواہ دے وفادار رہوو

14.‏ جے ساڈا کوئی عزیز یہوواہ نال بے‌وفائی کردا اے تے ایہدا ساڈے تے کیہہ اثر ہو سکدا اے؟‏

¹⁴ وڈیاں مشکلاں وچوں اِک مشکل ایہہ ہوندی اے جدوں ساڈا کوئی رشتے‌دار یاں قریبی دوست یہوواہ نُوں چھڈ دیندا اے۔ (‏زبور 78:‏40؛‏ اَمثال 24:‏10‏)‏ جِنّی تکلیف سانوں ایس مشکل چوں لنگھدے ویلے ہو سکدی اے اونی تکلیف شاید ای کسے ہور مشکل چوں لنگھدے ویلے ہووے۔ جِنّاں زیادہ اوہ شخص ساڈے دل دے قریب ہوندا اے تے اَسی اوہدے نال پیار کرنے آں اوناں ای زیادہ ایہو جہی صورتحال نُوں برداشت کرنا ساڈے لئی مشکل ہو سکدا اے۔ جے توانوں ایس طرحاں دی کسے تکلیف دا سامنا ہویا اے تے تُسی صدوق دی مثال توں حوصلہ پا سکدے او۔‏

15.‏ صدوق نُوں یہوواہ دا وفادار رہن لئی دلیری دی لوڑ کیوں سی؟ (‏1-‏سلاطین 1:‏5-‏8‏)‏

¹⁵ صدوق اوہدوں وی یہوواہ دا وفادار رہیا جدوں اوہدے قریبی دوست ابیاتر نے داؤد نال بے‌وفائی کرن دا فیصلہ کیتا۔ جدوں داؤد بوہت وڈیرا ہو گیا تے مرن والا سی تے اوہدے پُتر ادُونیاہ نے بادشاہ بنن دی کوشش کیتی جد کہ یہوواہ سلیمان نُوں بادشاہ بنانا چاہندا سی۔ (‏1-‏تواریخ 22:‏9، 10‏)‏ ابیاتر نے ادُونیاہ دا ساتھ دین دا فیصلہ کیتا۔ ‏(‏1-‏سلاطین 1:‏5-‏8 نُوں پڑھو۔)‏ اِنج کرن نال اوہ نہ صرف داؤد نال سگوں یہوواہ نال وی بے‌وفائی کر رہیا سی۔ کیہہ تُسی سوچ سکدے او کہ ایہہ ویکھ کے صدوق نُوں کِنّاں دُکھ ہویا ہوئے گا تے اوہ کِنّاں بے‌حوصلہ ہو گیا ہوئے گا؟ تقریباً 40 سالاں توں اوہ تے ابیاتر مِل کے کاہناں دے طور تے کم کر رہے سن۔ (‏2-‏سموئیل 8:‏17‏)‏ اوہناں نے سچے خدا دے صندوق دی دیکھ بھال مِل کے کیتی سی۔ (‏2-‏سموئیل 15:‏29‏)‏ شروع شروع چ ایہناں دونواں نے ای اپنے بادشاہ داؤد دی حمایت کیتی سی تے یہوواہ دی خدمت چ ہور وی بوہت سارے کم کیتے سن۔—‏2-‏سموئیل 19:‏11-‏14‏۔‏

16.‏ کیہڑی چیز نے یہوواہ دا وفادار رہن چ صدوق دی مدد کیتی؟‏

¹⁶ بھانویں کہ ابیاتر نے داؤد نُوں دھوکھا دین نال یہوواہ نال بے‌وفائی کیتی پر صدوق یہوواہ دا وفادار رہیا۔ داؤد نے کدی وی صدوق دی وفاداری تے شک نئیں کیتا۔ اوہنوں یقین سی کہ اوہ ہمیشاں صدوق تے بھروسا کر سکدا اے۔ جدوں داؤد نُوں ادُونیاہ دی سازش بارے پتہ چلیا تے داؤد نے اپنے قابلِ‌بھروسا دوستاں نُوں یعنی صدوق، ناتن تے بنایاہ نُوں کہیا کہ اوہ سلیمان نُوں بادشاہ بنان۔ (‏1-‏سلاطین 1:‏32-‏34‏)‏ صدوق نُوں ناتن تے اوہناں لوکاں دی مثال توں بوہت ہمت تے حوصلہ مِلیا ہوئے گا جیہڑے یہوواہ دے وفادار سن تے بادشاہ داؤد دی حمایت کردے سن۔ (‏1-‏سلاطین 1:‏38، 39‏)‏  فیر جدوں سلیمان بادشاہ بنیا تے اوہنے صدوق کاہن نُوں ابیاتر دی جگہ رکھیا۔—‏1-‏سلاطین 2:‏35‏۔‏

17.‏ جے تواڈا کوئی رشتے‌دار یہوواہ نال بے‌وفائی کردا اے تے تُسی صدوق دی مثال تے کیویں عمل کر سکدے او؟‏

¹⁷ جے تواڈا کوئی رشتے‌دار یہوواہ نُوں چھڈن دا فیصلہ کردا اے تے تُسی صدوق دی مثال تے کیویں عمل کر سکدے او؟ ایہہ ثابت کرو کہ تُسی یہوواہ دے وفادار رہنا چاہندے او۔ (‏یشوع 24:‏15‏)‏ یہوواہ توانوں ایس فیصلے تے قائم رہن لئی طاقت تے ہمت دَوے گا۔ ایس لئی دُعا کرن نال یہوواہ تے اپنا بھروسا ظاہر کرو تے اوہناں لوکاں دے نیڑے رہوو جیہڑے یہوواہ دے وفادار نیں۔ یاد رکھو کہ یہوواہ تواڈی وفاداری دی بوہت قدر کردا اے تے ایہدے لئی اوہ توانوں اَجر وی دَوے گا۔—‏2-‏سموئیل 22:‏26‏۔‏

18.‏ تُسی بھرا مارکو تے بھین سِدسے دے تجربے توں کیہہ سکھیا اے؟‏

¹⁸ ذرا بھرا مارکو تے اوہدی بیوی سِدسے دی مثال تے غور کرو۔ اوہناں دِیاں دو دِھیاں نے وڈے ہو کے یہوواہ نُوں چھڈن دا فیصلہ کیتا۔ بھرا مارکو نے کہیا:‏ ”‏جدوں تواڈا بچہ پیدا ہوندا اے تے اوسے ویلے توں ای تُسی اوہدے نال بوہت زیادہ پیار کرنا شروع کر دیندے او۔ تُسی اوہنوں ہر طرحاں دے نقصان توں بچان لئی کسے وی حد تک جان لئی تیار رہندے او۔ تے جدوں تواڈا بچہ جدے نال تُسی بوہت زیادہ پیار کردے او، وڈا ہو کے یہوواہ نُوں چھڈن دا فیصلہ کردا اے تے تواڈا دل بڑی بُری طرحاں ٹُٹ جاندا اے۔ پر ایس دُکھ نُوں برداشت کرن لئی یہوواہ نے ساڈی بڑی مدد کیتی۔ اوہنے ایس گل دا خیال رکھیا کہ جدوں مَیں کمزور پواں تے میری بیوی مضبوط ہو کے مینوں سہارا دَوے تے جدوں اوہ کمزور پین لگے تے مَیں مضبوط ہو کے اوہنوں سہارا دَواں۔“‏ بھین سِدسے نے دَسیا:‏ ”‏جے یہوواہ نے سانوں ہمت تے طاقت نہ دِتی ہوندی تے اَسی کدی وی ایس تکلیف نُوں برداشت نہ کر پاندے۔ مَیں بوہت زیادہ دُکھی ساں تے مینوں اِنج لگ رہیا سی کہ جیویں ایس سب چ میری کوئی غلطی اے۔ ایس لئی مَیں یہوواہ نُوں دَسیا کہ مَیں کیہو جیہا محسوس کر رہی آں۔ کجھ وقت بعد اِک بھین میرے کول آئی جنہوں مَیں کئی سالاں توں نئیں مِلی ساں۔ اوہنے میرے موڈھے تے اپنا ہتھ رکھیا تے میریاں اَکھاں چ ویکھ کے مینوں کہیا:‏ ”‏سِدسے ایہدے چ تیری کوئی غلطی نئیں سی۔“‏ یہوواہ دی مدد نال مَیں ہُن فیر توں خوشی نال اوہدی خدمت کر رہی آں۔“‏

19.‏ تُسی کیہہ کرن دا عزم کیتا اے؟‏

¹⁹ یہوواہ چاہندا اے کہ اوہدے سارے بندے صدوق وانگوں دلیر ہون۔ (‏2-‏تیمُتھیُس 1:‏7‏)‏ پر اوہ ایہہ نئیں چاہندا کہ اَسی اپنی مدد نال دلیر بنئے۔ اوہ چاہندا اے کہ ایہدے لئی اَسی اوہدے تے آس لائیے۔ ایس لئی جدوں توانوں ایہو جہی صورتحال دا سامنا ہوندا اے جدے چ توانوں دلیری دی سخت لوڑ اے تے یہوواہ کولوں مدد منگو۔ تُسی ایس گل دا پکا یقین رکھ سکدے او کہ اوہ صدوق وانگوں توانوں وی دلیر بنائے گا۔—‏1-‏پطرس 5:‏10‏۔‏