1.‏ آفتاں لئی تیار رہنا سمجھداری دی گل کیوں اے؟‏

 پہلاں توں تیار رہن نال زندگیاں بچ سکدیاں نیں۔ مثال لئی، جیہڑے لوک کسے آفت لئی پہلے توں تیار ہوندے نیں، اوہ نہ صرف آپ بچ جاندے نیں سگوں دُوجیاں دی وی مدد کر پاندے نیں۔ دُوجیاں دی مدد کرن والی اِک یورپی تنظیم نے کہیا:‏ ”‏چنگی تیاری زندگیاں بچا سکدی اے۔“‏

2.‏ سانوں وڈی مصیبت لئی کیوں تیار رہنا چاہی دا اے؟ (‏متی 24:‏44‏)‏

² ”‏وڈی مصیبت“‏ اچانک شروع ہو جاوے گی۔ (‏متی 24:‏21‏)‏ دُوجیاں آفتاں دَس کے نئیں آندیاں پر وڈی مصیبت بارے سانوں پتہ اے کہ ایہہ آن والی اے۔ تقریباً 2 ہزار سال پہلاں یسوع نے اپنے پیروکاراں نُوں دَسیا سی کہ اوہ ایس دن لئی تیار رہن۔ ‏(‏متی 24:‏44 نُوں پڑھو۔)‏ جے اَسی پہلاں توں تیار رہواں گے تے اَسی اوس مشکل ویلے چ ثابت‌قدم رہ سکاں گے نالے دُوجیاں دی وی اِنج کرن چ مدد کر سکاں گے۔—‏لُوقا 21:‏36‏۔‏

3.‏ وڈی مصیبت لئی تیار ہون چ ثابت‌قدمی، ہمدردی تے محبت ساڈی مدد کیویں کرے گی؟‏

³ ذرا اوہناں تِن خوبیاں تے غور کرو جیہڑیاں وڈی مصیبت لئی تیار ہون چ ساڈے بڑے کم آن گیاں۔ مثال لئی، غور کرو کہ اَسی اوس ویلے کیہہ کراں گے جدوں سانوں لوکاں نُوں اولیاں ورگا پیغام سُنانا پووے گا تے اوہناں دی مخالفت سہنی پووے گی۔ (‏مکاشفہ 16:‏21‏)‏ اوس ویلے سانوں ثابت‌قدمی دی لوڑ ہوئے گی تاکہ اَسی یہوواہ دا کہنا منیے تے ایس گل تے بھروسا رکھیئے کہ اوہ ساڈی حفاظت کرے گا۔ جے ساڈے بھین بھراواں دا گھر بار تباہ ہو جائے تے اوہدوں اَسی کیہہ کراں گے؟ (‏حبقوق 3:‏17، 18‏)‏ اوس ویلے ہمدردی دی خوبی ساڈی مدد کرے گی کہ اَسی اوہناں دِیاں ضرورتاں دا خیال رکھیئے۔ ایہدے علاوہ جدوں قوماں دے حملے دی وجہ توں سانوں اپنے بھین بھراواں نال اِک جگہ تے رہنا پووے گا تے اوہدوں اِسی کیہہ کراں گے؟ (‏حِزقی‌ایل 38:‏10-‏12‏)‏ اوس ویلے بھین بھراواں لئی گُوڑھی محبت ساڈی مدد کرے گی کہ اَسی مِل کے اوس اوکھے ویلے دا سامنا کریئے۔‏

4.‏ بائبل توں کیویں پتہ چلدا اے کہ سانوں اپنے اندر ثابت‌قدمی، ہمدردی تے محبت نُوں پیدا کرن لئی کوشش کردے رہنا چاہی دا اے؟‏

⁴ خدا دے کلام چ سانوں ہلاشیری دِتی گئی اے کہ اَسی اپنے اندر ثابت‌قدمی، ہمدردی تے محبت نُوں  پیدا کرن لئی کوشش کردے رہیے۔ جیویں کہ لُوقا 21:‏19 چ لکھیا اے:‏ ثابت قدم رہن نال تُسی اپنیاں جاناں بچاؤ گے۔ کُلسّیوں 3:‏12 چ لکھیا اے:‏ ہمدردی دا لباس پاؤ۔ 1-‏تھسلُنیکیوں 4:‏9، 10 چ لکھیا اے:‏ خدا نے توانوں سکھایا اے کہ اِک دُوجے نال پیار کرو۔ پر بھراوو، اَسی تواڈے کولوں اِلتجا کرنے آں کہ اِک دُوجے نال ہور زیادہ پیار کرو۔ ایہہ ساریاں گلاں پہلی صدی دے مسیحیاں نُوں کہیاں گئیاں سن جیہڑے پہلے ای ثابت‌قدمی، ہمدردی تے محبت ظاہر کر رہے سن۔ پر فیر وی اوہناں نُوں ایہناں خوبیاں نُوں نکھاردے رہن دی لوڑ سی۔ سانوں وی اِنج ای کرنا چاہی دا اے۔ پر اَسی ایہناں خوبیاں نُوں کیویں نکھار سکنے آں؟ ایہدے لئی سب توں پہلاں اَسی ویکھاں گے کہ پہلی صدی دے مسیحیاں نے ایہناں خوبیاں نُوں کیویں ظاہر کیتا۔ فیر اَسی ویکھاں گے کہ اَسی اوہناں مسیحیاں وانگوں کیویں بن سکنے آں تے ثابت کر سکنے آں کہ اَسی وڈی مصیبت لئی تیار آں۔‏

5.‏ پہلی صدی دے مسیحی مشکلاں دے باوجود ثابت‌قدم کیویں رہے؟‏

⁵ پہلی صدی دے مسیحیاں نُوں ثابت‌قدم رہن دی لوڑ سی۔ (‏عبرانیوں 10:‏36‏)‏ ایہدی وجہ ایہہ سی کہ اوہناں نُوں نہ صرف اوہناں مشکلاں دا سامنا کرنا پے رہیا سی جیہڑیاں سارے لوکاں تے آندیاں نیں سگوں اوہناں نُوں مسیحی ہون دی وجہ توں وی مسئلیاں دا سامنا کرنا پے رہیا سی۔ اوہناں وچوں بوہت سارے نہ صرف یہودی مذہبی رہنماواں تے رومی حکومت وَلّوں ظلم دا سامنا کر رہے سن سگوں اوہناں دے گھر والے وی اوہناں دے خلاف ہو گئے سن۔ (‏متی 10:‏21‏)‏ ایہدے علاوہ اوہناں نُوں کلیسیا دے اندر وی ایہو جہے لوکاں دی جھوٹھی تلیم توں بچن دی کوشش کرنی پے رہی سی جیہڑے یہوواہ توں دُور ہو گئے سن تے کلیسیا چ پُھٹ پا رہے سن۔ (‏اعمال 20:‏29، 30‏)‏ ایہناں ساریاں مشکلاں دے باوجود اوہ مسیحی ثابت‌قدم رہے۔ (‏مکاشفہ 2:‏3‏)‏ پر کیویں؟ اوہناں نے پاک کلام چوں ایہو جہے لوکاں دِیاں مثالاں تے غور کیتا جیہڑے ثابت‌قدم رہے سن جیویں کہ ایوب۔ (‏یعقوب 5:‏10، 11‏)‏ ایہدے نال نال اوہناں نے یہوواہ کولوں دُعا چ طاقت منگی۔ (‏اعمال 4:‏29-‏31‏)‏ نالے اوہناں نے ایس گل تے وی غور کیتا کہ جے اوہ ثابت‌قدم رہن گے تے ایہدے کِنّے چنگے نتیجے نِکلن گے۔—‏اعمال 5:‏41‏۔‏

6.‏ بھین میریٹا نے مشکلاں چ ثابت‌قدم رہن لئی جو کجھ کیتا، اوہدے توں تُسی کیہہ سکھیا اے؟‏

⁶ جے اَسی خدا دے کلام تے ساڈیاں کتاباں تے رسالیاں وچوں ایہو جہے لوکاں دِیاں مثالاں تے غور کراں گے جیہڑے ثابت‌قدم رہے سن تے اَسی وی مشکلاں چ ثابت‌قدم رہ سکاں گے۔ البانیہ چ رہن والی اِک بھین جدا ناں میریٹا اے، اوہنے وی اِنج ای کیتا تے ایس وجہ توں اوہ اپنے خاندان وَلّوں ہون والی مخالفت نُوں برداشت کر سکی۔ اوہ کہندی اے:‏ ”‏جدوں مَیں بائبل چ ایوب بارے پڑھیا تے میرا بڑا حوصلہ ودھیا۔ اوہدے تے بوہت مشکلاں آئیاں نالے اوہنوں ایہہ وی نئیں پتہ سی کہ اوہدے تے ایہہ مشکلاں کیوں آ رہیاں نیں۔ پر فیر وی اوہنے کہیا:‏ مَیں مردے دم تک اپنی راستی نُوں نئیں چھڈاں گا۔ (‏ایوب 27:‏5‏)‏ مَیں سوچیا کہ میریاں مشکلاں تے ایوب دِیاں مشکلاں اَگے کجھ وی نئیں نیں۔ نالے مینوں تے ایہہ وی پتہ اے کہ میریاں مشکلاں پچھے کِدا ہتھ اے۔“‏

7.‏ جے سانوں فی‌الحال کسے وڈے مسئلے دا سامنا نئیں اے تے فیر وی اَسی ہُن توں ای کیہہ کرنا سکھ سکنے آں؟‏

⁷ اَسی ثابت‌قدمی دی خوبی نُوں نکھارن لئی باقاعدگی نال یہوواہ کولوں دُعا کر سکنے آں تے کُھل کے اوہنوں اپنیاں فکراں بارے دَس سکنے آں۔ (‏فِلپّیوں 4:‏6؛‏ 1-‏تھسلُنیکیوں 5:‏17‏)‏ شاید توانوں فی‌الحال کسے وڈے مسئلے دا سامنا نئیں اے۔ پر فیر وی جدوں تُسی اُداس ہوندے او، اُلجھن دا شکار ہوندے او یاں توانوں سمجھ نئیں آ رہیا ہوندا کہ توانوں کیہہ کرنا چاہی دا اے تے کیہہ تُسی اوہدوں یہوواہ کولوں دُعا کردے او؟ جے تُسی اپنے چھوٹے چھوٹے مسئلیاں لئی وی باقاعدگی نال یہوواہ کولوں مدد منگو گے تے فیر تُسی اوہدوں وی اِنج کرن توں نئیں جھکو گے جدوں توانوں وڈے مسئلیاں دا سامنا ہوئے گا۔ ایس طرحاں توانوں پکا یقین ہو جائے گا کہ یہوواہ نُوں پتہ اے کہ اوہنے کدوں تے کیویں تواڈی مدد کرنی اے۔—‏زبور 27:‏1،‏ 3‏۔‏

8.‏ بھین میرہ دی مثال توں کیویں پتہ چلدا اے کہ اَج مشکلاں چ ثابت‌قدم رہن نال سانوں مستقبل چ وی ثابت‌قدم رہن چ مدد ملے گی؟ (‏یعقوب 1:‏2-‏4‏)‏ (‏تصویر نُوں وی ویکھو۔)‏

⁸ جے اَسی اَج مشکلاں چ یہوواہ دے وفادار رہواں گے تے اَسی وڈی مصیبت چ وی ثابت‌قدم رہ سکاں گے۔ (‏رومیوں 5:‏3‏)‏ اَسی ایہہ گل کیوں  کہہ سکنے آں؟ بوہت سارے بھین بھراواں نے ایس گل دا تجربہ کیتا اے کہ ہر واری جدوں اوہناں نے ثابت قدمی نال کسے مشکل دا مقابلہ کیتا تے فیر اوہ آن والی مشکل لئی وی تیار ہو گئے۔ ثابت‌قدمی نے اوہناں دی شخصیت نُوں ہور نکھاریا تے ایس گل تے اوہناں دے ایمان نُوں مضبوط کیتا کہ یہوواہ اوہناں دی مدد کرنا چاہندا اے تے ایہدے لئی ہر ویلے تیار اے۔ اوہناں دے ایس ایمان نے اوہناں نُوں اگلی مشکل چ ثابت‌قدم رہن لئی تیار کر دِتا۔ ‏(‏یعقوب 1:‏2-‏4 نُوں پڑھو۔)‏ البانیہ چ رہن والی اِک پہل‌کار بھین جدا ناں میرہ اے، اوہنے ویکھیا اے کہ ماضی چ ثابت‌قدم رہن دی وجہ توں اوہ اوہناں مشکلاں نُوں وی برداشت کرن دے قابل ہوئی اے جنہاں دا اوہنوں اَج سامنا کرنا پے رہیا اے۔ بھین کہندی اے کہ کدی کدار اوہنوں لگدا اے کہ صرف اوہنوں ای اینیاں ساریاں مشکلاں دا سامنا کرنا پے رہیا اے۔ پر فیر اوہ ایس گل نُوں یاد کردی اے کہ پچھلے 20 سالاں چ یہوواہ نے اوہدی کِنّی مدد کیتی اے تے اوہ اپنے آپ نُوں کہندی اے:‏ ”‏یہوواہ دی وفادار رہ۔ اوہنے اینے سالاں تک ثابت‌قدمی نال مشکلاں نُوں برداشت کرن چ تیری مدد کیتی اے۔ ایس لئی ہُن اوہدی خدمت کرنا نہ چھڈیں۔“‏ تُسی وی ایس گل تے غور کر سکدے او کہ یہوواہ ہُن تک ثابت‌قدم رہن چ تواڈی مدد کیویں کردا آیا اے۔ ایس گل دا یقین رکھو کہ ہر واری جدوں تُسی کسے مشکل چ ثابت‌قدم رہندے او تے یہوواہ ایہنوں ویکھدا اے تے اوہ توانوں ایہدا اَجر ضرور دَوے گا۔ (‏متی 5:‏10-‏12‏)‏ ایس طرحاں وڈی مصیبت دے شروع ہون تک تُسی پہلے ای سکھ چُکے ہووو گے کہ تُسی ثابت‌قدم کیویں رہ سکدے او تے تواڈا عزم مضبوط ہوئے گا کہ تُسی اَگے وی ثابت‌قدم رہوو۔‏

9.‏ سُوریہ دے شہر انطاکیہ دی کلیسیا دے بھین بھراواں نے اپنے ہم‌ایماناں لئی ہمدردی کیویں وکھائی؟‏

⁹ غور کرو کہ اوس ویلے کیہہ ہویا جدوں یہودیہ چ رہن والے مسیحیاں نُوں سخت کال دا سامنا کرنا پیا۔ جدوں ایس بارے سُوریہ دے شہر انطاکیہ دی کلیسیا دے بھین بھراواں نُوں پتہ چلیا تے اوہناں نے یہودیہ چ رہن والے اپنے بھین بھراواں لئی ہمدردی محسوس کیتی۔‏ پر اوہناں نے صرف اِنج محسوس ای نئیں کیتا سگوں اپنے کماں توں ہمدردی وکھائی۔‏ اوہناں نے ایہہ فیصلہ کیتا کہ ہر اِک اپنی مالی حیثیت دے مطابق کجھ نہ کجھ دَوے تاکہ یہودیہ چ رہن والے بھراواں لئی اِمداد بھیجی جائے۔ (‏اعمال 11:‏27-‏30‏)‏ انطاکیہ دے مسیحی یہودیہ دے مسیحیاں توں کافی دُور رہندے سن۔ پر فیر وی اوہناں نے اپنے بھین بھراواں دی مدد کرن لئی قدم چُکیا۔—‏1-‏یوحنا 3:‏17، 18‏۔‏

10.‏ اَسی اوہناں بھین بھراواں لئی کیہڑے طریقیاں نال ہمدردی وکھا سکنے آں جنہاں نُوں کسے آفت دا سامنا کرنا پیندا اے؟ (‏تصویر نُوں وی ویکھو۔)‏

¹⁰ اَسی وی اوہناں بھین بھراواں لئی ہمدردی وکھا سکنے آں جنہاں نُوں کسے آفت دا سامنا کرنا پیندا اے۔ اِنج کرن لئی اَسی بزرگاں کولوں پچھ سکنے آں کہ کیہہ اَسی اِمدادی کم چ اوہناں دی کوئی مدد کر سکنے آں۔ ایہدے علاوہ اَسی عطیات دے سکنے آں یاں آفت دا سامنا کرن والے بھین بھراواں لئی دُعا کر سکنے آں۔‏ b (‏امثال 17:‏17‏)‏ غور کرو کہ 2020 چ پوری دُنیا چ کورونا توں متاثر ہون والے بھین بھراواں لئی 950 توں زیادہ اِمدادی کمیٹیاں بنائیاں گئیاں۔ اَسی اوہناں بھین بھراواں دے بڑے شکرگزار آں جنہاں نے ایہناں کمیٹیاں چ کم کیتا۔ اوہناں نے ہمدردی دی وجہ توں اپنے بھین بھراواں نُوں ضرورت دِیاں شیواں پونچائیاں تے یہوواہ دے نیڑے رہن چ اوہناں دی مدد کیتی۔ ایہدے علاوہ اوہناں نے کئی عبادت‌گاہواں تے بھین بھراواں دے گھراں دی یاں تے مرمت کیتی یاں فیر نویں سِرے توں بنایا۔—‏2-‏کُرنتھیوں 8:‏1-‏4 تے غور کرو۔‏

11.‏ ہمدردی ظاہر کرن نال ساڈے اسمانی باپ دی وڈیائی کیویں ہوندی اے؟‏

¹¹ جدوں اَسی کسے آفت توں بعد اپنے بھین بھراواں لئی ہمدردی وکھانے آں تے دُوجے لوک ایہہ ویکھ سکدے نیں کہ ساڈے دل چ اِک دُوجے لئی کِنّی محبت اے۔ مثال لئی، جدوں 2019 چ بہاماس چ سمندری طوفان ڈورین دی وجہ توں ساڈی اِک عبادت‌گاہ تباہ ہو گئی تے بھراواں نے ایہنوں فیر توں بنانا شروع کیتا۔ جدوں اوہناں نے عبادت‌گاہ چ ہون والے کماں لئی اِک ٹھیکے‌دار نال گل کیتی تے اوہنے کہیا:‏ ”‏مینوں ایہہ ویکھ کے بڑا چنگا لگیا اے کہ تُسی اپنے ہم‌ایماناں دی کِنّی فکر کردے او۔ ایس لئی مَیں کم چ  استمال ہون والے اوزار، سامان تے مزدوراں لئی پیسے نئیں لواں گا سگوں ایہہ میرے وَلّوں تواڈی تنظیم لئی عطیہ نیں۔“‏ دُنیا چ بوہت سارے لوک یہوواہ نُوں نئیں جان‌دے۔ پر اوہناں وچوں کئی نے یہوواہ دے گواہواں نُوں اِک دُوجے دی مدد کردیاں ضرور ویکھیا اے۔ ایہہ ساڈے لئی کِنّے مان دی گل اے کہ اَسی اپنے بھین بھراواں لئی ہمدردی وکھان نال دُوجیاں نُوں یہوواہ وَل کِھچ سکنے آں جیہڑا بوہت رحم کرن والا خدا اے۔—‏اِفسیوں 2:‏4‏۔‏

12.‏ اَج اپنے اندر ہمدردی دی خوبی پیدا کرن نال اَسی وڈی مصیبت لئی کیویں تیار ہو سکاں گے؟ (‏مکاشفہ 13:‏16، 17‏)‏

¹² وڈی مصیبت دے دوران سانوں اِک دُوجے لئی ہمدردی وکھان دی لوڑ کیوں ہوئے گی؟ بائبل چ دَسیا گیا اے کہ جیہڑے لوک دُنیا دِیاں حکومتاں دی حمایت نئیں کردے اوہناں نُوں نہ صرف اَج سگوں وڈی مصیبت چ وی مشکلاں دا سامنا کرنا پووے گا۔ ‏(‏مکاشفہ 13:‏16، 17 نُوں پڑھو۔)‏ ہو سکدا اے کہ ساڈے بھین بھراواں نُوں اپنیاں بنیادی ضرورتاں نُوں پورا کرن لئی وی ساڈی مدد دی لوڑ ہووے۔ اَسی چاہنے آں کہ جدوں ساڈا بادشاہ یسوع مسیح عدالت کرن لئی آئے تے اوہ سانوں اپنے بھین بھراواں لئی ہمدردی ظاہر کردے ہوئیاں ویکھے تے سانوں کہوے کہ ”‏بادشاہی نُوں حاصل کرو۔“‏—‏متی 25:‏34-‏40‏۔‏

13.‏ رومیوں 15:‏7 دے مطابق پہلی صدی دے مسیحیاں نے اِک دُوجے لئی اپنی محبت نُوں کیویں ودھایا؟‏

¹³ پہلی صدی چ ہر کوئی جان‌دا سی کہ مسیحی اِک دُوجے نُوں کِنّاں پیار کردے نیں۔ پر کیہہ اوہناں لئی اِک دُوجے لئی محبت وکھانا اسان سی؟ ذرا غور کرو کہ روم دی کلیسیا چ کِنّے فرق فرق بھین بھرا سن۔ اوہناں وچوں کجھ پہلے یہودی سن جنہاں دی پرورش شریعت دے مطابق ہوئی سی تے کجھ غیریہودی سن جنہاں دی پرورش بالکل فرق طریقے نال ہوئی سی۔ کجھ مسیحی غلام سن تے کجھ آزاد سن۔ کجھ دے تے اپنے غلام سن۔ ایہناں ساریاں گلاں دے باوجود مسیحی اِک دُوجے لئی اپنے دل چ محبت نُوں کیویں ودھا سکدے سن؟ پولُس رسول نے اوہناں نُوں ہلاشیری دِتی کہ اوہ اِک دُوجے نُوں قبول کرن۔ ‏(‏رومیوں 15:‏7 نُوں پڑھو۔)‏ ایس گل دا کیہہ مطلب سی؟ پولُس دے کہن دا مطلب سی کہ اوہ اِک دُوجے نُوں پیار نال مِلن، اپنے دوستاں دے طور تے قبول کرن تے اِک دُوجے نُوں اپنے گھر بلا‌ن۔ مثال لئی، اوہنے فلیمون نُوں کہیا کہ اوہ اپنے غلام اُنیسمس نُوں پیار نال ملے جیہڑا اوہدے کولوں بھج گیا سی۔ (‏فلیمون 17‏)‏ ایسے طرحاں اکوِلہ تے پرِسکِلّہ، اپلّوس نُوں اپنے نال لے گئے جیہڑا مسیح دی تلیم بارے زیادہ نئیں جان‌دا سی۔ اِنج اوہناں نے ظاہر کیتا کہ اوہناں نے اپلّوس نُوں خوشی نال قبول کیتا اے۔ (‏اعمال 18:‏26‏)‏ اوہناں مسیحیاں نے اِک دُوجے توں فرق ہون دی وجہ توں اپنے درمیان مسئلے پیدا نئیں ہون دِتے سگوں اِک دُوجے نُوں قبول کیتا۔‏

14.‏ بھین اینا تے اوہدے شوہر نے بھین بھراواں لئی محبت کیویں ظاہر کیتی؟‏

¹⁴ اَسی وی بھین بھراواں نال دوستی کرن تے اوہناں نال وقت گزارن نال اوہناں لئی محبت ظاہر کر سکنے آں۔ اِنج اوہ وی ساڈے لئی محبت ظاہر کرن گے۔ (‏2-‏کُرنتھیوں 6:‏11-‏13‏)‏ ذرا بھین اینا تے اوہدے شوہر دے تجربے تے غور کرو۔ جدوں اوہ مشنری دے طور تے مغربی افریقہ پونچے تے تھوڑے ای عرصے بعد کورونا دی وبا پھیل گئی۔ اوہ کلیسیا دے بھین بھراواں نُوں مِل نئیں سکدے سن۔ ایس لئی اوہناں لئی بھین بھراواں نُوں جاننا اسان نئیں سی۔ ایہناں حالاتاں چ بھین اینا تے اوہدے شوہر نے بھین بھراواں لئی محبت کیویں ظاہر کیتی؟ اوہ اوہناں نال ویڈیو کال دے ذریعے رابطے چ رہے تے اوہناں نُوں دَسدے رہے کہ اوہ اوہناں نُوں جاننا چاہندے نیں تے اوہناں نال دوستی کرنا چاہندے نیں۔ اوہناں دی ایس محبت دا بھین بھراواں دے دل تے بڑا گُوڑھا اثر ہویا۔ بھین بھرا وی اوہناں نُوں فون تے میسج کرن لگ پئے۔ ایس مشنری جوڑے نے ایہہ سب کرن لئی اینی محنت کیوں کیتی؟ بھین کہندی اے:‏ ”‏میرے دل چ اَج وی اوس محبت دِیاں یاداں تازہ نیں جیہڑی بھین بھراواں نے چنگے ماڑے وقت چ میرے لئی تے میرے خاندان لئی وکھائی سی۔ ایس وجہ توں میرا وی دل کردا اے کہ مَیں وی بھین بھراواں لئی محبت وکھاواں۔“‏

15.‏ بھین وِنیسا دی مثال توں ایہہ کیویں پتہ چلدا اے کہ سانوں اپنے سارے بھین بھراواں نال محبت کرنی چاہی دی اے؟ (‏تصویر نُوں وی ویکھو۔)‏

¹⁵ ساڈیاں کلیسیاواں چ ایہو جہے بھین بھرا نیں جنہاں دی شخصیت اِک دُوجے توں فرق اے۔ نالے اوہناں دی پرورش وی فرق فرق ماحول چ ہوئی اے۔ جے اَسی اوہناں دِیاں خوبیاں تے دھیان دَواں گے تے اَسی اپنے دل چ اوہناں لئی محبت نُوں ودھا سکاں گے۔ نیوزی‌لینڈ چ خدمت کرن  والی اِک بھین جدا ناں وِنیسا اے، اوہنوں اپنی کلیسیا دے کجھ بھین بھراواں نال گھلنا ملنا مشکل لگدا سی کیونکہ اوہنوں اوہناں دِیاں کجھ گلاں پسند نئیں سن۔ پر فیر اوہنے سوچیا کہ اوہ اوہناں بھین بھراواں توں دُور رہن دی بجائے اوہناں نال زیادہ وقت گزارے گی۔ اِنج کرن نال اوہ ایس گل تے دھیان دے سکی کہ یہوواہ اوہناں دِیاں کیہڑیاں خوبیاں دی وجہ توں اوہناں نُوں پیار کردا اے۔ بھین کہندی اے:‏ ”‏جدوں توں میرا شوہر حلقے دا نگہبان بنیا اے، سانوں فرق فرق بھین بھراواں نال وقت گزارن دا موقع مِلدا اے۔ تے ہُن مینوں اوہناں نال دوستی کرنا اسان لگدا اے۔ ہُن مینوں ایہہ گل بوہت چنگی لگدی اے کہ ساڈی تنظیم چ فرق فرق بھین بھرا نیں۔ یقیناً یہوواہ نُوں ایہہ گل پسند اے۔ ایسے لئی تے اوہ اوہناں نُوں اپنی تنظیم چ لیایا اے۔“‏ جدوں اَسی دُوجیاں نُوں اوس نظر نال ویکھنے آں جیس نظر نال یہوواہ اوہناں نُوں ویکھدا اے تے اَسی ثابت کرنے آں کہ اَسی اوہناں نُوں پیار کرنے آں۔—‏2-‏کُرنتھیوں 8:‏24‏۔‏

16.‏ وڈی مصیبت دے دوران بھین بھراواں لئی محبت ظاہر کرنا ضروری کیوں ہوئے گا؟ (‏تصویر نُوں وی ویکھو۔)‏

¹⁶ وڈی مصیبت دے دوران ایہہ بوہت ضروری ہوئے گا کہ اَسی اپنے بھین بھراواں لئی محبت ظاہر کریئے۔ جدوں وڈی مصیبت شروع ہوئے گی تے یہوواہ ساڈی حفاظت کیویں کرے گا؟ غور کرو کہ یہوواہ نے اپنے بندیاں نُوں اوس ویلے کیہڑی ہدیت دِتی جدوں بابل تے حملہ ہویا۔ یہوواہ نے کہیا:‏ اَے میرے لوکو، جاؤ، اپنیاں کوٹھڑیاں چ وڑھ جاؤ تے اپنے بوہے بند کر لوو۔ اپنے آپ نُوں تھوڑی دیر لئی لُکا لوو۔ جدوں تک کہ قہر ٹل نئیں جاندا۔ (‏یسعیاہ 26:‏20‏)‏ ہو سکدا اے کہ وڈی مصیبت دے دوران سانوں وی ایس ہدیت تے عمل کرنا پووے۔ شاید کوٹھڑیاں ساڈیاں کلیسیاواں وَل اشارہ کردیاں نیں۔ وڈی مصیبت دے دوران یہوواہ ساڈی حفاظت اوسے صورت چ کرے گا جے اَسی اپنے ہم‌ایماناں نال مِل کے اوہدی عبادت کردے رہواں گے۔ ایس لئی سانوں ہُن توں ای کوشش کرنی چاہی دی اے کہ اَسی اپنے دل چ اپنے بھین بھراواں لئی گُوڑھی محبت پیدا کریئے کیونکہ ایس محبت دے ذریعے وڈی مصیبت دے دوران ساڈی جان بچ سکے گی۔‏

17.‏ جے اَسی ہُن توں ای تیاری کراں گے تے اَسی وڈی مصیبت دے دوران کیہہ کرن دے قابل ہوواں گے؟‏

¹⁷ یہوواہ دے عظیم دن دے دوران سارے انساناں نُوں بڑیاں مشکلاں دا سامنا کرنا پووے گا۔ (‏صفنیاہ 1:‏14، 15‏)‏ یہوواہ دے بندیاں نُوں وی ایہناں مشکلاں چوں لنگھنا پووے گا۔ پر جے اَسی ہُن توں ای تیاری کراں گے تے اوس ویلے اَسی پُرسکون رہ سکاں گے تے دُوجیاں دی مدد کر سکاں گے۔ جدوں سانوں مشکلاں دا سامنا ہوئے گا تے اَسی ثابت‌قدم رہ سکاں گے۔ جدوں ساڈے ہم‌ایماناں نُوں مشکلاں دا سامنا ہوئے گا تے اَسی اوہناں دِیاں ضرورتاں نُوں پورا کرن دی کوشش کراں گے تے اِنج اوہناں لئی ہمدردی ظاہر کراں گے۔ جے ساڈے دل چ ہُن توں ای اپنے بھین بھراواں لئی محبت ہوئے گی تے اَسی مستقبل چ وی اوہناں لئی محبت ظاہر کر سکاں گے۔ فیر یہوواہ سانوں ایہو جہی دُنیا چ ہمیشاں دی زندگی دَوے گا جِتھے آفتاں تے مصیبتاں دا ناں نشان وی نئیں ہوئے گا۔—‏یسعیاہ 65:‏17‏۔‏