کجھ لوک ایہو جہے ماحول چ جمے پلے نیں جتھے عورتاں نُوں مرداں توں گھٹ سمجھیا جاندا اے۔ مثال لئی بھرا ہینز جیہڑا بولیویا چ حلقے دے نگہبان دے طور تے خدمت کردا اے، کہندا اے:‏ ”‏کجھ مرداں دے ذہن چ بچپن توں ای ایہہ پا دِتا جاندا اے کہ اوہ عورتاں نالوں بہتر نیں۔ ایہہ گل اوہناں دے دل چ بہہ جاندی اے۔ ایس لئی اوہناں نُوں اپنی ساری زندگی عورتاں دی عزت کرنا مشکل لگدا اے۔“‏ تائیوان چ خدمت کرن والا اِک بزرگ جدا ناں شینگزین اے، کہندا اے:‏ ”‏مَیں جیہڑے علاقے چ رہنا واں، اوتھے لوک سمجھدے نیں کہ عورتاں نُوں مرداں دی گل چ نئیں بولنا چاہی دا۔ جے کوئی بندہ کسے معاملے بارے کسے عورت دی رائے نُوں اہمیت دیندا اے تے دُوجے لوک سوچدے نیں کہ ایہہ کیہو جیہا مرد اے۔“‏ کئی ہور مرد ہور طریقیاں نال ظاہر کردے نیں کہ اوہ عورتاں نُوں اپنے توں گھٹ سمجھدے نیں۔ مثال لئی، اوہ اوہناں بارے ایہو جہے لطیفے سناندے نیں جنہاں توں اوہناں دی بے‌عزتی ہوندی اے۔‏

پر خوشی دی گل اے کہ بھانویں اِک بندہ جیہڑی وی ثقافت یاں ماحول چ جمیا پلیا ہووے، اوہ بدل سکدا اے۔ اوہ اپنی ایس سوچ نُوں بدل سکدا اے کہ مرد عورتاں نالوں بہتر نیں۔ (‏اِفِسیوں 4:‏22-‏24)‏ اِنج کرن لئی اوہ یہوواہ دی مثال تے عمل کر سکدا اے۔ ایس مضمون چ اَسی ویکھاں گے کہ یہوواہ عورتاں نال کیویں پیش آندا اے، ایس معاملے بارے بھرا یہوواہ دی مثال توں کیہہ سکھدے نیں تے بزرگ بھیناں لئی عزت وکھان چ پہل کیویں کر سکدے نیں۔‏

یہوواہ عورتاں نال کیویں پیش آندا اے؟‏

عورتاں نال پیش آن دے معاملے چ یہوواہ نے اِک بڑی ودھیا مثال قائم کیتی اے۔ اوہ اِک پیار کرن والا اسمانی باپ اے جیہڑا سارے انساناں نال پیار کردا اے۔ (‏یوحنا 3:‏16‏)‏ تے وفادار بھیناں اوہدے لئی پیاریاں دِھیاں وانگوں نیں۔ آؤ ویکھنے آں کہ یہوواہ کیہڑے طریقیاں نال عورتاں لئی عزت ظاہر کردا اے۔‏

یہوواہ مرداں تے عورتاں نال اِکو طرحاں پیش آندا اے۔‏ یہوواہ نے مرد تے عورت دونواں نُوں اپنی صورت تے بنایا اے۔ (‏پیدائش 1:‏27‏)‏ اوہنے مرداں نُوں عورتاں نالوں بوہتا ذہین تے قابل نئیں بنایا تے نہ ای اوہ اوہناں نُوں عورتاں  نالوں بوہتی اہمیت دیندا اے۔ (‏2-‏تواریخ 19:‏7‏)‏ یہوواہ نے مرداں تے عورتاں دونواں نُوں ایہہ صلاحیت دِتی اے کہ اوہ اوہدے کلام دِیاں سچائیاں نُوں سکھن تے اوہدے ورگیاں خوبیاں ظاہر کرن۔ اوہ مرداں تے عورتاں دونواں دی وفاداری دی قدر کردا اے۔ اوہنے اوہناں دونواں نُوں ایہہ امید دِتی اے کہ اوہ زمین تے ہمیشاں دی زندگی حاصل کرن یاں اسمان تے بادشاہواں تے کاہناں دے طور تے خدمت کرن۔ (‏2-‏پطرس 1:‏1‏)‏ ایہہ گل صاف ظاہر اے کہ یہوواہ عورتاں نال فرق نئیں کردا۔‏

اوہ اوہناں دی گل سُن‌دا اے۔‏ یہوواہ نُوں ایس گل دی پرواہ اے کہ عورتاں نُوں کیہڑے مسئلیاں دا سامنا اے تے اوہ کیہہ محسوس کردیاں نیں۔ مثال لئی، اوہنے راخل تے حنّہ دِیاں دُعاواں نُوں سنیا تے اوہناں دا جواب دِتا۔ (‏پیدائش 30:‏22؛‏ 1-‏سموئیل 1:‏10، 11،‏ 19، 20‏)‏ یہوواہ نے بائبل چ اوہ واقعے وی لکھوائے جنہاں چ مرداں نے عورتاں دی گل سنی۔ مثال لئی، اوہنے ابراہام نُوں کہیا کہ اوہ اپنی بیوی دی گل منے تے ابراہام نے اِنج ای کیتا۔ (‏پیدائش 21:‏12-‏14‏)‏ بادشاہ داؤد نے نہ صرف ابیجیل دی گل سنی سگوں ایہہ وی محسوس کیتا کہ اوہنوں یہوواہ نے گھلیا اے۔ (‏1-‏سموئیل 25:‏32-‏35‏)‏ جدوں یسوع زمین تے سی تے اوہنے اپنی ماں مریم دی گل سنی۔ اِنج اوہنے ظاہر کیتا کہ یہوواہ عورتاں بارے کیہو جہی سوچ رکھدا اے۔ (‏یوحنا 2:‏3-‏10‏)‏ ایہناں مثالاں توں پتہ چلدا اے کہ یہوواہ عورتاں دی گل سنن نال اوہناں نُوں عزت دیندا اے۔‏

اوہ اوہناں تے بھروسا کردا اے۔‏ مثال لئی، اوہنے حوا تے بھروسا کیتا کہ اوہ زمین دی دیکھ‌بھال کرن چ آدم دی مدد کر سکدی اے۔ (‏پیدائش 1:‏28‏)‏ اِنج کرن نال اوہنے ظاہر کیتا کہ اوہ اوہنوں اوہدے شوہر آدم نالوں گھٹ نئیں سمجھدا سگوں اوہدا چنگا مددگار سمجھدا اے۔ یہوواہ نے دبورہ تے خلدہ نبِیّہ نُوں ایہہ کم دِتا کہ اوہ اوہدے بندیاں نُوں صلاح دین جنہاں چ اِک قاضی تے اِک بادشاہ وی شامل سی۔ اِنج اوہنے اوہناں تے بھروسا ظاہر کیتا۔ (‏قُضاۃ 4:‏4-‏9؛‏ 2-‏سلاطین 22:‏14-‏20‏)‏ اَج وی یہوواہ نے عورتاں نُوں ذمے‌داری دِتی اے کہ اوہ اوہدا کم کرن۔ ایہہ وفادار بھیناں مبشراں، پہل‌کاراں تے مشنریاں دے طور تے خدمت کردیاں نیں۔ اوہ ساڈیاں عبادت‌گاہواں تے تنظیم دِیاں دُوجیاں عمارتاں دا ڈیزائن تیار کرن، اوہناں نُوں بنان تے اوہناں دی ویکھ بھال کرن چ مدد کردیاں نیں۔ کجھ بھیناں بیت‌ایل تے ترجمے دے دفتراں چ کم کردیاں نیں۔ ایہہ بھیناں اِک وڈی فوج وانگوں نیں جنہاں نُوں یہوواہ اپنی مرضی نُوں پورا کرن لئی استمال کر رہیا اے۔ (‏زبور 68:‏11‏)‏ ایہہ گل صاف ظاہر اے کہ یہوواہ عورتاں نُوں کمزور نئیں سمجھدا یاں اوہ ایہہ نئیں سمجھدا کہ اوہ کجھ کرن دے لائق نئیں نیں۔‏

بھرا یہوواہ وانگوں عورتاں دی عزت کرنا کیویں سکھ سکدے نیں؟‏

بھراوو، جے تُسی جاننا چاہندے او کہ تُسی یہوواہ وانگوں عورتاں دی عزت کیویں کر سکدے او تے ایہدے لئی توانوں اپنی سوچ تے اپنے رویے دا جائزہ لینا پووے گا۔ پر اِنج کرن لئی توانوں مدد دی لوڑ اے۔ جیویں ایکسرا کران نال سانوں ایہہ جانن چ مدد مِلدی اے کہ کیہہ ساڈا دل صحی طرحاں کم کر رہیا اے یاں نئیں، اوسے طرحاں خدا دا کلام تے چنگے دوست ساڈی ایہہ جانن چ مدد کر سکدے نیں کہ اَسی عورتاں بارے کیہو جہی سوچ رکھنے آں۔ اَسی ایہہ مدد حاصل کرن لئی کیہہ کر سکنے آں؟‏

اپنے کسے چنگے دوست نال گل کرو۔‏ (‏اَمثال 18:‏17‏)‏ اَسی اپنے کسے ایہو جہے دوست نال گل کر سکنے آں جدے تے اَسی بھروسا کرنے آں، جیہڑا مہربان اے تے معاملیاں بارے مناسب سوچ رکھدا اے۔ اَسی اوہدے کولوں پچھ سکنے آں:‏”‏تواڈے خیال چ مَیں بھیناں نال کیویں پیش آنا واں؟ کیہہ بھیناں نُوں لگدا اے کہ مَیں اوہناں دی عزت کرنا واں؟ مَیں کیہہ کر سکنا واں تاکہ مَیں اوہناں نال ہور عزت نال پیش آواں؟“‏ جے تواڈا دوست ایہو جہیاں گلاں تے تواڈا دھیان دَواندا اے جنہاں چ توانوں بہتری لیان دی لوڑ اے تے اَگوں صفائیاں پیش نہ کرو سگوں تبدیلیاں کرن لئی تیار رہوو۔‏

خدا دے کلام دا مطالعیا کرو۔‏ جے اَسی جاننا چاہنے آں کہ اَسی بھیناں نال کیویں پیش آ رہے آں تے ایہدا بہترین طریقہ اے کہ اَسی ویکھئے کہ کیہہ ساڈی سوچ تے ساڈے کم خدا دے کلام دے مطابق ہے نیں۔ (‏عبرانیوں 4:‏12‏)‏ بائبل چ اَسی ایہو جہے لوکاں بارے پڑھنے آں جیہڑے عورتاں نال چنگی طرحاں پیش آئے تے ایہو جہے لوکاں بارے وی جنہاں نے اوہناں لئی عزت ظاہر نئیں کیتی۔ اَسی اوہناں دے کماں دا مقابلہ اپنے کماں نال کرسکنے آں۔ ایہدے علاوہ، توانوں بائبل دی کسے اِک ایت دی بنیاد تے عورتاں بارے غلط سوچ قائم نئیں کر لینی چاہی دی سگوں دُوجیاں ایتاں دا وی جائزہ لینا چاہی دا اے۔ مثال لئی، 1-‏پطرس 3:‏7 چ دَسیا گیا اے کہ اِک شوہر نُوں اپنی بیوی دا لحاظ ایس لئی کرنا چاہی دا اے کیونکہ اوہ نازک برتن اے۔‏ b کیہہ ایہدا مطلب ایہہ وے کہ اوہ مرد نالوں گھٹ ذہین اے تے اوہدے چ گھٹ صلاحیتاں نیں؟ ذرا ایہناں ایتاں دا جائزہ گلتیوں 3:‏26-‏29 نال لوو جنہاں توں پتہ چلدا اے کہ  یہوواہ نے مرداں دے نال نال عورتاں نُوں وی چُنیا اے تاکہ اوہ اسمان تے مسیح دے نال حکمرانی کرن۔ جدوں اَسی خدا دے کلام دا مطالعیا کرنے آں تے اپنے کسے چنگے دوست کولوں مدد لینے آں تے اَسی ایہہ سکھ جانے آں کہ اَسی بھیناں لئی عزت کیویں وکھا سکنے آں۔‏

بزرگ بھیناں لئی عزت کیویں ظاہر کردے نیں؟‏

کلیسیا چ بھرا جدوں ویکھدے نیں کہ بزرگ بھیناں نال کِنّی عزت نال پیش آ رہے نیں تے اوہ وی بھیناں دی عزت کرنا سکھدے نیں۔ بزرگ بھیناں دی عزت کرن چ پہل کیویں کردے نیں؟‏

اوہ بھیناں دے چنگے کماں دی تعریف کردے نیں۔‏ ایس معاملے چ بزرگ پولُس رسول دی مثال تے عمل کر سکدے نیں۔ اوہنے روم دی کلیسیا دے ناں جیہڑا خط لکھیا، اوہدے چ اوہنے کئی بھیناں دے چنگے کماں دا ذکر کیتا تے اوہناں دا ناں لے کے اوہناں نُوں سلام دِتا۔ (‏رومیوں 16:‏12‏)‏ ذرا سوچو کہ جدوں کلیسیا چ اوہ خط پڑھیا گیا ہوئے گا تے اوہناں بھیناں نُوں کِنّی خوشی ہوئی ہوئے گی۔ ایسے طرحاں بزرگ وی بھیناں دِیاں خوبیاں تے اوہناں دی خدمت لئی اوہناں دی تعریف کردے نیں۔ اِنج بھیناں نُوں محسوس ہوندا اے کہ کلیسیا چ اوہناں دی قدر تے عزت کیتی جاندی اے۔ بزرگاں دِیاں حوصلہ ودھان والیاں گلاں توں بھیناں نُوں ہلاشیری مِلدی اے کہ اوہ وفاداری نال یہوواہ دی خدمت کردیاں رہن۔—‏اَمثال 15:‏23‏۔‏

بزرگ اُتوں اُتوں نئیں سگوں دلوں بھیناں دی تعریف کردے نیں تے اوہناں نُوں دَسدے نیں کہ اوہ اوہناں دے کیہڑے خاص کم توں خوش نیں۔ پر کیوں؟ اِک بھین جدا ناں جیسیکا اے، اوہنے کہیا:‏ ”‏جدوں بھرا کسے بھین نُوں کہندے نیں ”‏شاباش“‏ تے اوہنوں اچھا لگدا اے، پر جدوں اوہ اوہنوں دَسدے نیں کہ اوہ کیہڑے کم لئی اوہنوں شاباش دے رہے نیں تے اوہنوں زیادہ اچھا لگدا اے۔ مثال لئی، جدوں اوہ کسے بھین نُوں کہندے نیں کہ ”‏تُسی اپنے بچیاں دی بڑی چنگی تربیت کیتی اے تے اوہ بڑی خاموشی نال عبادت چ بیٹھدے نیں“‏ یاں فیر ”‏تُسی مشکل دے باوجود وی بائبل کورس کرن والے بندے نُوں اپنے نال عبادت تے لیائے او“‏ تے ایس طرحاں دِیاں گلاں سُن کے بھیناں نُوں بڑی خوشی ہوندی اے۔“‏ جدوں بزرگ بھیناں دے کسے خاص کم لئی اوہناں  دی تعریف کردے نیں تے اوہناں نُوں بڑا اچھا لگدا اے تے اوہناں نُوں محسوس ہوندا اے کہ کلیسیا چ اوہناں دی اِک جگہ اے تے اوہناں دی قدر کیتی جاندی اے۔‏

اوہ بھیناں دی گل سُن‌دے نیں۔‏ خاکسار بزرگ ایہہ تسلیم کردے نیں کہ صرف اوہی چنگے مشورے نئیں دے سکدے سگوں اوہ بھیناں نُوں وی اپنی رائے دین لئی کہندے نیں تے جدوں بھیناں اپنی رائے دے رہیاں ہوندیاں نیں تے اوہ اوہناں دی گل دھیان نال سُن‌دے نیں۔ اِنج کرن نال بھیناں دا حوصلہ ودھدا اے تے بزرگاں نُوں آپ وی بڑا فائدہ ہوندا اے۔ پر کیویں؟ بیت‌ایل چ خدمت کرن والا اِک بزرگ جدا ناں ہیرارڈو اے، اوہ کہندا اے:‏ ”‏مَیں ویکھیا اے کہ بھیناں دے مشوریاں نُوں سنن نال مَیں اپنے کم نُوں زیادہ چنگی طرحاں کر سکیا واں۔ کئی واری بھیناں کول بھراواں نالوں بوہتا تجربہ ہوندا اے۔“‏ کلیسیاواں چ بوہت ساریاں بھیناں پہل‌کاراں دے طور تے خدمت کردیاں نیں ایس لئی اوہ اپنے علاقے دے لوکاں بارے زیادہ چنگی طرحاں جان دِیاں نیں۔ اِک بزرگ جدا ناں برائن اے، اوہنے کہیا:‏ ”‏بھیناں کول جیہڑا تجربہ ہوندا اے، اوہ تنظیم دے بڑے کم آ سکدا اے۔ ایس لئی اوہناں دے تجربے توں فائدہ حاصل کرو۔“‏

سمجھ‌دار بزرگ بھیناں دے مشوریاں نُوں فوراً رد نئیں کر دیندے۔ ایہدی کیہہ وجہ اے؟ اِک بزرگ جدا ناں ایڈورڈ اے، اوہنے کہیا:‏”‏اِک بھین دی رائے تے تجربے دی وجہ توں اِک بزرگ نُوں مدد مِلدی اے کہ اوہ پورے معاملے نُوں تے دُوجیاں دے جذبات نُوں چنگی طرحاں سمجھ سکے۔“‏ (‏اَمثال 1:‏5‏)‏ بھانویں کہ اِک بزرگ نُوں لگدا اے کہ کسے بھین دے مشورے تے عمل نئیں کیتا جا سکدا پر فیر وی اوہ اوہدے مشورے لئی اوہنوں شکریہ کہہ سکدا اے۔‏

اوہ بھیناں نُوں تربیت دیندے نیں۔‏ سمجھ‌دار بزرگ بھیناں نُوں فرق فرق کماں دی تربیت دیندے نیں۔ مثال لئی، اوہ بھیناں نُوں سکھا سکدے نیں کہ جدوں کوئی بپتسمہ‌یافتہ بھرا نئیں ہوندا تے اوہ مُنادی دا گروپ کیویں لے سکدیاں نیں۔ تے جدوں بھیناں تنظیم دِیاں عمارتاں دی تعمیر تے مرمت دے کم چ مدد کر رہیاں ہوندیاں نیں تے بھرا اوہناں نُوں اوزار تے مشیناں چلانا سکھا سکدے نیں۔ بیت‌ایل چ جیہڑے بھرا چیزاں دی دیکھ‌بھال کرن والے شعبے، خر یداری، حساب کتاب، کمپیوٹر تے دُوجے شعبیاں دی نگہبانی کردے نیں؛ اوہ اپنے شعبے چ کم کرن والیاں بھیناں نُوں تربیت دیندے نیں۔ اِنج بزرگ ظاہر کردے نیں کہ اوہ بھیناں تے بھروسا کردے نیں تے ایس گل نُوں تسلیم کردے نیں کہ بھیناں کم کرن دے لائق نیں۔‏

بوہت ساریاں بھیناں اوس تربیت نُوں دُوجیاں دے فائدے لئی استمال کردیاں نیں جیہڑی اوہناں نُوں بزرگاں وَلّوں ملی ہوندی اے۔ مثال لئی، تعمیر دے کم دی تربیت لین والیاں بھیناں اوہناں بھین بھراواں دے گھراں نُوں بنان چ مدد کردیاں نیں جنہاں نُوں کسے قدرتی آفت دا سامنا ہوندا اے۔ جیہڑیاں بھیناں نُوں عوامی تھانواں تے مُنادی کرن دی تربیت مِلدی اے، اوہ دُوجیاں بھیناں نُوں وی اِنج کرنا سکھا سکدیاں نیں۔ ایہہ بھیناں اوہناں بزرگاں بارے کیہو جیہا محسوس کردیاں نیں جنہاں نے اوہناں نُوں تربیت دِتی ہوندی اے؟ اِک بھین جدا ناں جینیفر اے، اوہ کہندی اے:‏ ”‏جدوں مَیں اِک عبادت‌گاہ دی تعمیر دے کم چ حصہ لے رہی ساں تے تعمیر دے کم دی نگرانی کرن والے بھرا نے مینوں ایس کم دی تربیت دین لئی وقت کڈھیا، اوہنے میرے کم نُوں ویکھیا تے ایہدے لئی میری تعریف کیتی۔ مینوں اوہدے نال کم کر کے بڑا چنگا لگیا کیونکہ مینوں محسوس ہویا کہ میری قدر کیتی جاندی اے تے میرے تے بھروسا کیتا جاندا اے۔“‏

بھیناں لئی عزت وکھان دے فائدے

یہوواہ وانگوں اَسی کلیسیا دِیاں بھیناں نال بوہت پیار کرنے آں ایس لئی اَسی اوہناں نال اُنج ای پیش آنے آں جیویں اوہ ساڈیاں سکیاں بھیناں نیں۔ (‏1-‏تیمُتھیُس 5:‏1، 2‏)‏ اوہناں نال مل کے کم کرنا ساڈے لئی بڑے مان دی گل اے۔ سانوں ایس گل دی بڑی خوشی اے کہ بھیناں وی ایہہ محسوس کر سکدیاں نیں کہ اَسی اوہناں نُوں پیار کرنے آں تے اوہناں دی مدد کرنا چاہنے آں۔ اِک بھین جدا ناں ونیسا اے، اوہ کہندی اے:‏ ”‏مَیں یہوواہ دی بڑی شکرگزار آں کہ اوہنے مینوں اپنی تنظیم دا حصہ بنایا اے کیونکہ ایہدے چ ایہو جہے بھرا نیں جیہڑے میرا بوہت حوصلہ ودھاندے نیں۔“‏ تائیوان چ رہن والی اِک بھین کہندی اے:‏ ”‏مَیں یہوواہ تے اوہدی تنظیم دی بڑی شکرگزار آں کہ اوہ عورتاں نُوں اینی اہمیت دیندی اے تے اوہناں دے جذبات دا خیال رکھدی اے۔ ایہدے توں میرا ایمان مضبوط ہوندا اے تے میرے دل چ ایس اعزاز لئی قدر ہور ودھدی اے کہ مَیں یہوواہ دی تنظیم دا حصہ واں۔“‏

جدوں یہوواہ ایہہ ویکھدا اے کہ کلیسیا چ بھرا بھیناں نال اُنج ای پیش آن دی کوشش کر رہے نیں، جیویں اوہ پیش آندا اے تے یہوواہ دا دل بوہت خوش ہوندا اے۔ (‏اَمثال 27:‏11‏)‏ سکاٹ‌لینڈ چ خدمت کرن والا اِک بزرگ جدا ناں بینجمین اے، اوہ کہندا اے:‏ ”‏دُنیا چ عورتاں دی کوئی عزت نئیں کیتی جاندی پر جدوں بھیناں عبادت تے آندیاں نیں تے اَسی چاہنے آں کہ اوہ فرق محسوس کرن۔“‏ آؤ اَسی یہوواہ وانگوں بھیناں نُوں اوہ پیار تے عزت دیندے رہیے جدی اوہ حق‌دار نیں۔—‏رومیوں 12:‏10‏۔‏