مطالعے دا مضمون نمبر 43
سچی حکمت زور نال پکار دی اے
حکمت گلیاں چ زور نال پکار دی اے۔ اوہدی آواز چونکاں چ گُونج دی اے۔—امثال 1:20۔
گیت نمبر 42: خدا دے خادم دی دُعا
مضمون تے اِک نظر a
1. اَج بوہت سارے لوک بائبل چ پائی جان والی حکمت نُوں کیہو جیہا خیال کردے نیں؟ (امثال 1:20، 21)
بوہت سارے مُلکاں چ ساڈے بھین بھرا اوہناں لوکاں نُوں ساڈیاں کتاباں تے رسالے وغیرہ دیندے نیں جیہڑے اوہناں نُوں راہواں یاں گلیاں چ مِلدے نیں۔ جے تُسی وی کدی اِنج مُنادی کیتی اے تے شاید تواڈے ذہن چ وی امثال دی کتاب چوں اوہ ایتاں آئیاں ہون گیاں جنہاں چ دَسیا گیا اے کہ حکمت راہواں چ اپنی آواز بلند کردی اے تاکہ لوک اوہدی گل سُنن۔ (امثال 1:20، 21 نُوں پڑھو۔) بائبل تے ساڈی تنظیم دِیاں کتاباں چ سچی حکمت یعنی یہوواہ دی حکمت پائی جاندی اے۔ ایس حکمت نُوں حاصل کر کے ای لوکاں نُوں ہمیشاں دی زندگی مِل سکدی اے۔ جدوں کوئی بندہ ساڈی کوئی کتاب یاں رسالہ لیندا اے تے سانوں بڑی خوشی ہوندی اے۔ پر سارے لوک اِنج نئیں کردے۔ کجھ لوکاں نُوں بائبل چ لکھیاں گلاں نُوں سکھن دا کوئی شوق نئیں ہوندا تے کجھ لوک اوس ویلے ساڈا مذاق اُڈاندے نیں جدوں اَسی ٹرالی دے ذریعے مُنادی کرنے آں۔ اوہناں نُوں لگدا اے کہ بائبل چ لکھیاں گلاں ہُن بوہت پرانیاں ہو گئیاں نیں۔ کجھ لوک اوس تلیم تے اِعتراض کردے نیں جیہڑی بائبل چ زندگی گزارن بارے دِتی گئی اے۔ اوہ سوچدے نیں کہ بس اوہی لوک ایس تلیم تے عمل کر سکدے نیں جیہڑے اپنے آپ نُوں بڑا نیک تے دُوجیاں نُوں بھیڑا سمجھدے نیں۔لوکاں دی ایس سوچ دے باوجود یہوواہ ساریاں نُوں بڑے پیار نال حکمت دے رہیا اے۔ اوہ اِنج کیہڑے کیہڑے طریقیاں نال کر رہیا اے؟
2. اَج اَسی سچی حکمت کتھوں حاصل کر سکنے آں، پر بوہت سارے لوک کیہہ کرن دا فیصلہ کردے نیں؟
2 اِک طریقہ جدے ذریعے یہوواہ حکمت دی آواز نُوں بلند کر رہیا اے اوہ اوہدا پاک کلام بائبل اے۔ ایہہ کتاب تقریباً ہر بندے دی پونچ وچ اے۔ ایناں ای نئیں اَسی یہوواہ دے بڑے شکرگزار آں کہ اوہدی تنظیم بائبل توں جیہڑیاں کتاباں، رسالے تے ویڈیوز تیار کردی اے اوہ اَج 1000توں وی زیادہ زباناں چ موجود نیں۔ جیہڑے لوک حکمت دی آواز نُوں سُن دے نیں یعنی بائبل نُوں پڑھ دے نیں تے ایہدے چ لکھیاں گلاں تے عمل کردے نیں اوہناں نُوں فائدہ ہوندا اے۔ پر زیادہتر لوک ایس آواز نُوں جان بجھ کے نئیں سُن دے۔ جدوں اوہناں نے زندگی چ کوئی فیصلہ کرنا ہوندا اے تے اوہ اپنے آپ تے بھروسا کردے نیں یاں فیر اوہ دُوجے انساناں دی گل سُن دے نیں۔ ایہو جہے کئی لوک سانوں بےوقوف سمجھ دے کیونکہ اَسی بائبل چ لکھیاں گلاں تے عمل کرن دا فیصلہ کیتا اے۔ ایس مضمون چ اَسی ویکھاں گے کہ لوک حکمت دی آواز کیوں نئیں سُن دے۔ پر آؤ پہلے اَسی ایس گل تے غور کرئیے کہ اَسی یہوواہ خدا توں حکمت کیویں حاصل کر سکنے آں۔
یہوواہ دی تلیم حکمت بخش دی اے
3. سچی حکمت چ کیہہ کجھ شامل اے؟
3 حکمت اِک ایہو جہی خوبی اے جدی وجہ توں اَسی چنگے فیصلے کر سکنے آں۔پر سچی حکمت چ کجھ ہور گلاں وی شامل ہوندیاں نیں۔ بائبل چ لکھیا اے: یہوواہ دا خوف حکمت دی شروعات اے تے سب توں مُقدس خدا دا علم ای سمجھداری اے۔ (امثال 9:10) جدوں اَسی کوئی اہم فیصلہ کرنا ہوندا اے تے سانوں سب توں مُقدس خدا دے علم یعنی یہوواہ دی سوچ نُوں ذہن چ رکھ کے فیصلہ کرنا چاہی دا اے۔ ایہدے لئی سانوں بائبل چوں تیار کیتاں گئیاں کتاباں تے رسالیاں چوں رہنمائی حاصل کرنی چاہی دی اے۔ اِنج اَسی سچی حکمت ظاہر کر رہے ہوواں گے۔—امثال 2:5-7۔
4. صرف یہوواہ ای سچی حکمت کیوں دے سکدا اے؟
4 صرف یہوواہ ای سانوں سچی حکمت دے سکدا اے۔ (رومیوں 16:27) اَسی ایہہ کیوں کہہ سکنے آں کہ یہوواہ ای حکمت دا سرچشمہ اے؟ پہلی وجہ ایہہ وے کہ یہوواہ نے ساریاں چیزاں نُوں بنایا اے ایس لئی اوہ ایہناں بارے ہر گل جان دا اے۔ (زبور 104:24) دُوجی وجہ ایہہ وے کہ یہوواہ جیہڑا وی کم کردا اے اوہدے توں اوہدی حکمت صاف نظر آندی اے۔ (رومیوں 11:33) تیجی وجہ ایہہ وے کہ یہوواہ وَلّوں مِلن والی حکمت توں سانوں ہمیشاں فائدہ ہوندا اے۔ (امثال 2:10-12) جے اَسی سچی حکمت حاصل کرنا چاہنے آں تے سانوں ایہناں خاص سچائیاں نُوں قبول کرنا چاہی دا اے تے ایہناں نُوں ذہن چ رکھ کے فیصلے کرنے چاہی دے نیں۔
5. جدوں لوک ایہہ قبول نئیں کردے کہ صرف یہوواہ ای سچی حکمت دا سرچشمہ اے تے ایہدے کیہہ نتیجے نکل دے نیں؟
5 جنہاں لوکاں نُوں اَسی مُنادی چ ملنے آں اوہناں وچوں بوہت سارے لوک ایہہ تے من دے نیں کہ قدرتی چیزاں دی بناوٹ بڑی زبردست اے۔ پر اوہ ایہہ قبول نئیں کردے کہ ایہناں نُوں خدا نے بنایا اے۔ اوہ من دے نیں کہ ساریاں چیزاں اپنے آپ بن گئیاں نیں۔ سانوں مُنادی چ کجھ ایہو جہے لوک وی مِلدے نے جیہڑے خدا دے وجود نُوں تے من دے نیں پر اوہ اوہدے کلام چ لکھے معیاراں بارے ایہہ سوچدے نیں کہ ایہہ پرانے زمانے لئی سن۔ ایس وجہ توں اوہ اپنی مرضی مطابق زندگی گزارن دا فیصلہ کردے نیں۔ پر ایہدا کیہہ نتیجہ نکلیا اے؟ کیہہ خدا دی حکمت تے چلن دی بجائے انساناں دی حکمت تے چلن نال دُنیا بہتر ہو گئی اے؟ کیہہ لوکاں نُوں سچی خوشی یاں مستقبل دے حوالے نال پکی اُمید مِل گئی اے؟ ساڈے آلے دوالے دے حالاتاں توں ایہہ گل ثابت ہو گئی اے کہ کوئی وی حکمت، کوئی وی صلاح تے کوئی وی مشورہ یہوواہ دے مقابلے چ ٹھہر نئیں سکدا۔ (امثال 21:30) ایس گل دی وجہ توں ساڈے دل چ یہوواہ دی حکمت دے مطابق چلن دی خواہش ودھدی اے۔ پر افسوس کہ زیادہتر لوکاں دے دل تے ایس گل دا کوئی اثر نئیں ہوندا۔ آؤ ویکھیے، کہ کیوں۔
کجھ لوک سچی حکمت نُوں قبول کیوں نئیں کردے؟
6. امثال 1:22-25 دے مطابق کیہڑے لوک سچی حکمت دی آواز نُوں جانبجھ کے نئیں سُن دے؟
6 جدوں حکمت چونکاں چ زور نال پکار دی اے تے بوہت سارے لوک اوہدی آواز نئیں سُن دے۔ بائبل دے مطابق تِن قسماں دے لوک سچی حکمت نُوں قبول نئیں کردے۔ نادان، ٹھٹھاباز تے احمق۔ (امثال 1:22-25 نُوں پڑھو۔) آؤ ویکھئے کہ اِنج دے لوک خدا دی حکمت نُوں قبول کیوں نئیں کردے تے اَسی ایہناں وانگوں بنن توں کیویں بچ سکنے آں۔
7. کجھ لوک نادان رہن دا فیصلہ کیوں کردے نیں؟
7 نادان اوہ لوک ہوندے نیں جیہڑے ہر گل دا یقین کر لیندے نیں تے کوئی وی اوہناں نُوں بڑی آسانی نال گمراہ کر سکدا اے۔ (امثال 14:15) مُنادی چ اَسی اکثر ایہو جہے لوکاں نُوں ملنے آں۔ مثال لئی، ذرا اوہناں لکھاں لوکاں بارے سوچو جنہاں نُوں مذہبی تے سیاسی رہنماواں نے گمراہ کیتا ہویا اے۔ کجھ لوکاں نُوں اوس ویلے بڑا صدمہ لگدا اے جدوں اوہناں نُوں پتہ چلدا اے کہ ایہناں رہنماواں نے اوہناں نُوں بےوقوف بنایا ہویا اے۔ پر امثال 1:22 چ جنہاں لوکاں دا ذکر ہویا اے اوہ نادان ای بنے رہنا چاہندے نیں۔ اوہ اپنی منمرضی کرنا چاہندے نیں۔ اوہ بائبل دے اصولاں مطابق زندگی نئیں گزارنا چاہندے۔ (یرمیاہ 5:31) بوہت سارے لوک شاید کینیڈا چ رہن والی اِک مذہبی عورت وانگوں محسوس کرن جنہے اِک گواہ نُوں کہیا: ”جے ساڈے پادری نے سانوں گمراہ کیتا اے تے ایہہ اوہدی غلطی اے ساڈی نئیں۔“ اَسی کدی وی اوہناں لوکاں وانگوں نئیں بننا چاہندے جیہڑے جانبجھ کے سچائی نُوں نظرانداز کردے نیں۔—امثال 1:32؛ 27:12۔
8. کیہڑی چیز سمجھدار بنن چ ساڈی مدد کر سکدی اے؟
8 بائبل چ لکھی ایہہ گل بالکل صحی اے کہ اَسی نادان نہ بنے رہیے سگوں سمجھ دے لحاظ نال بالغ بنئے۔ (1-کُرنتھیوں 14:20) ایہہ اوہدوں ای ہو سکدا اے جدوں اَسی بائبل چ لکھے اصولاں مطابق زندگی گزاراں گے۔ اِنج اَسی ایہہ سمجھ جاواں گے کہ ایہناں اصولاں تے عمل کر کے اَسی کِنّیاں تکلیفاں توں بچ گئے آں تے اَسی کِنّے چنگے فیصلے کیتے نیں۔ ایس لئی اوہناں فیصلیاں تے غور کرنا چنگا ہوئے گا جیہڑے اَسی اپنی زندگی چ کیتے نیں۔ مثال لئی، جے اَسی کجھ عرصے توں بائبل کورس کر رہے آں تے عبادتاں تے جا رہے آں تے اَسی سوچ سکنے آں کہ میں حالے تک اپنی زندگی یہوواہ دے ناں کرن تے بپتسمہ لین دا فیصلہ کیوں نئیں کیتا؟ جے اَسی بپتسمہ لے لیا اے تے کیہہ اَسی ہور چنگی طرحاں خوشخبری سُنان تے تلیم دین چ ماہر بنن دی کوشش کر رہے آں؟ کیہہ ساڈے فیصلیاں توں ایہہ نظر آندا اے کہ اَسی بائبل دے اصولاں دی رہنمائی چ چل رہے آں؟ کیہہ اَسی دُوجیاں نال پیش آندے ویلے مسیح ورگیاں خوبیاں ظاہر کرنے آں؟ جے سانوں لگدا اے کہ سانوں کسے معاملے چ بہتری لیان دی ضرورت تے سانوں یہوواہ دِیاں ہدیتاں تے گہرائی نال سوچوچار کرنا چاہی دا اے کیونکہ ایہہ ہدیتاں نادان نُوں حکمت بخش دِیاں نیں۔—زبور 19:7۔
9. ٹھٹھاباز لوک ایہہ کیویں ظاہر کردے نیں کہ اوہ سچی حکمت نُوں قبول نئیں کرنا چاہندے؟
9 ٹھٹھاباز یعنی خدا دے کلام دا مذاق اُڈان والے لوک وی یہوواہ وَلّوں مِلن والی حکمت نُوں قبول نئیں کردے۔ کدی کدار سانوں مُنادی چ وی اِنج دے لوک مِلدے نیں۔ اوہناں نُوں دُوجیاں دا مذاق اُڈان چ بڑا مزہ آندا اے۔ (زبور 123:4) پر بائبل چ سانوں پہلے ای دَس دِتا گیا سی کہ آخری زمانے چ بوہت سارے لوک ٹھٹھاباز ہون گے۔ (2-پطرس 3:3، 4) خدا دے بندے لُوط دے جوائیاں دی طرحاں اَج وی بوہت سارے لوک خدا وَلّوں مِلن والیاں آگاہیاں نُوں مذاق سمجھدے نیں۔ (پیدایش 19:14) ایہناں چوں بوہت سارے لوک اوہناں لوکاں تے ہسدے نیں جیہڑے خدا دے اصولاں مطابق زندگی گزاردے نیں۔ اوہ اِنج ایس لئی کردے نیں کیونکہ اوہ اپنیاں بھیڑیاں خواہشاں مطابق چلدے نیں۔ (یہوداہ 7، 17، 18) بائبل چ ٹھٹھاباز لوکاں بارے جیہڑیاں گلاں دَسیاں گئیاں نیں اوہ برگشتہ لوکاں تے اوہناں لوکاں تے پوریاں ہوندیاں نیں جنہاں نے یہوواہ توں موُنہہ پھیر لیا اے۔
10. زبور 1:1 دے مطابق اَسی اوہناں لوکاں وانگوں بنن توں کیویں بچ سکنے آں جیہڑے سچی حکمت دا مذاق اُڈاندے نیں؟
10 اَسی اوہناں لوکاں وانگوں بنن توں کیویں بچ سکے آں جیہڑے سچی حکمت دا مذاق اُڈاندے نیں؟ ایہدا اِک طریقہ ایہہ وے کہ اَسی اوہناں لوکاں نُوں ملناجلنا چھڈ دَئیے جیہڑے ہر گل چ نُقص کڈھدے نیں۔ (زبور 1:1 نُوں پڑھو۔) ایہدا مطلب اے کہ اَسی خدا توں برگشتہ لوکاں دی نہ تے گل سنئے تے نہ ای اوہناں دی لکھی ہوئی کوئی چیز پڑھئے۔ سانوں ہر گل چ نُقص کڈھن تے یہوواہ تے اوہدی تنظیم وَلّوں مِلن والیاں ہدیتاں تے شک کرن توں خبردار رہنا چاہی دا اے۔ ایہدے توں بچن لئی سانوں اپنے آپ کولوں ایہہ پچھنا چاہی دا اے: ”جدوں مینوں تنظیم وَلّوں کوئی نوِیں ہدیت یاں کوئی نوِیں وضاحت مِلدی اے تے کیہہ میں اوہدے وچوں نُقص کڈھنا شروع کر دینا واں؟ کیہہ میں اوہناں لوکاں چوں نُقص کڈھنا واں جیہڑے ساڈی پیشوائی کر رہے نیں؟“ جدوں ساڈے ذہن چ کوئی غلط سوچ آندی اے تے اَسی اوہنوں فوراً دُور کر دینے آں تے یہوواہ ساڈے توں خوش ہوندا اے۔—امثال 3:34، 35۔
11. احمق لوک یہوواہ دے معیاراں نُوں کیہو جیہا خیال کردے نیں؟
11 احمق لوک وی یہوواہ دی حکمت نُوں رد کر دیندے نیں۔ ایہہ لوک ایس لئی احمق نیں کیونکہ اوہ یہوواہ دے معیاراں مطابق نئیں چلنا چاہندے سگوں ایہو جہے کم کرنا چاہندے نیں جیہڑے اوہناں نُوں پسند نیں۔ (امثال 12:15) ایہو جہے لوک یہوواہ نُوں رد کر رہے ہوندے نیں جیہڑا حکمت دا سرچشمہ اے۔ (زبور 53:1) جدوں اَسی مُنادی دے دوران ایہو جہے لوکاں نُوں ملنے آں تے اوہ اکثر ایس لئی سختی نال ساڈے تے اِعتراض کردے نیں کیونکہ اَسی بائبل دے معیاراں دا احترام کرنے آں۔ پر کیہہ ایہو جہے لوک زندگی گزارن لئی سانوں کوئی چنگا مشورہ دے سکدے نیں؟ بالکل نئیں۔ بائبل چ لکھیا اے: حکمت اینی اُچی اے کہ احمق اوہنوں پا نئیں سکدا۔ جدوں بزرگ شہر دے دروازے تے فیصلہ کرن لئی جمع ہوندے نیں تے اوہ کجھ نئیں کہہ سکدا۔ (امثال 24:7) بےوقوفاں دے موُنہہ چوں عقلمندی دی گل نکل ای نئیں سکدی۔ ایس لئی یہوواہ نے سانوں خبردار کیتا اے کہ اَسی احمق توں دُور رہیے۔—امثال 14:7۔
12. اَسی احمقاں وانگوں بنن توں کیویں بچ سکنے آں؟
12 اَسی اوہناں لوکاں وانگوں نئیں بننا چاہندے جیہڑے یہوواہ دِیاں ہدیتاں توں نفرت کردے نیں۔ ایہدی بجائے اَسی یہوواہ دے معیاراں لئی اپنے دل چ محبت پیدا کرنے آں۔ ایہدے لئی ایہہ ویکھن دی ضرورت اے کہ یہوواہ دے حکماں تے عمل کرن تے عمل نہ کرن دے کیہہ نتیجے نکلدے نیں۔ ذرا اوہناں مشکلاں تے تکلیفاں بارے سوچو جیہڑیاں لوکاں نُوں اوہدوں چکنیاں پیندیاں نیں جدوں اوہ بےوقوفی نال یہوواہ دِیاں ہدیتاں نُوں رد کر دیندے نیں۔ فیر ایس گل بارے سوچو کہ یہوواہ دے حکماں تے عمل کرن نال ساڈی زندگی کِنّی بہتر ہو جاندی اے۔—زبور 32:8، 10۔
13. کیہہ یہوواہ سانوں ایس گل لئی مجبور کردا اے کہ اَسی اوہدیاں ہدیتاں نُوں منیے؟
13 یہوواہ وَلّوں مِلن والی حکمت سارے لوکاں لئی اے۔ پر اوہ کسے نُوں وی مجبور نئیں کردا کہ اوہ ایہنوں قبول کرے۔ پر اوہنے ایہہ ضرور دَسیا اے کہ جیہڑے لوک اوہدے وَلّوں مِلن والی حکمت دی آواز نُوں نئیں سُن دے اوہناں نال کیہہ ہوئے گا۔ (امثال 1:29-32) بائبل چ دَسیا گیا اے: ایہو جہے لوک اپنے کماں دا پھل کھاندے نیں۔ جیس طرحاں دی زندگی اوہناں نے گزاری ہوندی اے اوہدی وجہ توں اوہناں تے مشکلاں تے تکلیفاں ای آندیاں نیں۔ ایہو جہے لوکاں دا انجام موت ہوندی اے۔ پر جیہڑے لوک یہوواہ دیاں ہدیتاں نُوں سُن دے تے ایہناں تے عمل کردے نیں اوہناں نال یہوواہ نے ایہہ وعدہ کیتا اے: جیہڑا میری سُن دا اے اوہ محفوظ ہوئے گا تے آفت توں نڈر ہو کے اطمینان نال رہوے گا۔—امثال 1:33۔
سچی حکمت دے فائدے
عبادتاں تے جواب دین نال یہوواہ نال ساڈی دوستی مضبوط ہوندی اے۔ (پیراگراف نمبر 15 نُوں ویکھو۔)
14، 15. اَسی امثال 4:23 توں کیہہ سکھنے آں؟
14 خدا وَلّوں مِلن والی حکمت تے عمل کرن دے ہمیشاں فائدے ہوندے نیں۔ جیویں کہ اَسی سکھیا اے سچی حکمت ساریاں لئی اے۔ مثال لئی، امثال دی پوری کتاب چ سانوں ایہو جہیاں ہدیتاں دِتیاں گئیاں نیں جنہاں تے عمل کرن نال ساڈی زندگی بہتر ہو سکدی اے۔ آؤ ایہناں وچوں چار ہدیتاں تے غور کرئیے۔
15 اپنے دل دی حفاظت کرو۔ بائبل چ دَسیا گیا اے: اپنے دل دی خوب حفاظت کر کیونکہ زندگی دا سرچشمہ اوہی اے۔ (امثال 4:23) ذرا غور کرو کے اَسی اپنے حقیقی دل دی حفاظت کیویں کرنے آں۔ اَسی صحت بخش کھانا کھانے آں، ورزش کرنے آں تے اوہناں کماں توں دُور رہنے آں جنہاں دی وجہ توں ساڈی صحت تے بھیڑا اثر پیندا اے۔ اپنے علامتی دل دی حفاظت کرن لئی وی سانوں اِنج ای کرنا چاہی دا اے۔ سانوں ہر روز اپنے دل نُوں خدا دے کلام دِیاں گلاں نال بھرنا چاہی دا اے۔ سانوں عبادتاں دی تیاری کرنی چاہی دی اے تے ایہناں چ حصہ لینا چاہی دا اے۔ اَسی باقاعدگی نال مُنادی چ حصہ لین نال وی چوکس رہنے آں۔ ایہدے علاوہ سانوں اپنی سوچ نُوں محفوظ رکھن لئی بھیڑیاں گلاں توں وی دُور رہنا چاہی دا اے جیویں کہ بھیڑی تفریح تے بھیڑے دوست۔
پیسے بارے مناسب سوچ رکھن نال اَسی اوہناں چیزاں تے خوش تے راضی رہنے آں جیہڑیاں ساڈے کول نیں۔ (پیراگراف نمبر 16نُوں ویکھو۔)
16. امثال 23:4، 5 چ لکھی گل اَج وی اینی فائدےمند کیوں اے؟
16 اوہناں چیزاں تے راضی رہوو جیہڑیاں تواڈے کول نیں۔ بائبل چ سانوں ایہہ ہدیت دِتی گئی اے: مالدار ہون لئی پریشان نہ ہووو۔ کیہہ تُوں اوس چیز تے اَکھ لائیں گا جیہڑی ہے ای نئیں۔ دولت یقیناً عقاب وانگوں پَر لا کے اسمان وَل اُڈ جاندی اے۔ (امثال 23:4، 5) پیسہ تے چیزاں بڑی اسانی نال اِک انسان دے ہتھوں نکل جاندیاں نیں۔ پر فیر وی اَج امیر تے غریب دونواں تے ای پیسہ کمان دا جنون سوار اے۔ ایسے لئی اوہ اکثر ایہو جہے کم کردے نیں جدی وجہ توں اوہناں دا ناں، دُوجیاں نال اوہناں دا رشتہ تے ایتھوں تک کہ اوہناں دی صحت وی خراب ہو سکدی اے۔ (امثال 28:20؛ 1-تیمُتھیُس 6:9، 10) پر سچی حکمت دی وجہ توں اَسی پیسے بارے حدوں ودھ پریشان نئیں ہوندے۔ایس وجہ توں اَسی لالچی نئیں بن دے تے ہمیشاں خوش تے راضی رہنے آں۔—واعظ 7:12۔
سوچ سمجھ کے بولن نال اَسی اپنیاں گلاں توں دُوجیاں نُوں تکلیف پونچان توں بچ جانے آں۔ (پیراگراف نمبر 17 نُوں ویکھو۔)
17. امثال 12:18 دے مطابق اَسی عقلمنداں وانگوں گلاں کیویں کر سکنے آں؟
17 سوچ سمجھ کے بولو۔ جے اَسی اِنج نئیں کراں گے تے ساڈیاں گلاں دی وجہ توں دُوجیاں نُوں بوہت دُکھ پونچ سکدا اے۔ بائبل چ لکھیا اے: بِنا سوچے سمجھے بولن والے دِیاں گلاں تلوار وانگوں زخمی کردیاں نیں پر عقلمند دیاں گلاں شفا بخش دِیاں نیں۔ (امثال 12:18) جدوں اَسی دُوجیاں دِیاں چغلیاں نئیں کردے تے اوہناں نال ساڈا رشتہ بنیا رہندا اے۔ (امثال 20:19) جے اَسی چاہنے آں کہ دُوجیاں نُوں ساڈیاں گلاں توں تکلیف نہ پونچے سگوں شفا ملے تے سانوں اپنے دل نُوں خدا دے کلام دِیاں گلاں نال بھرنا چاہی دا اے۔ (لُوقا 6:45) جدوں اَسی بائبل چ لکھیاں ہدیتاں تے سوچوچار کراں گے تے ساڈیاں گلاں حکمت دے چشمے وانگوں ہون گیاں جدے توں دُوجیاں نُوں تازگی ملے گی۔—امثال 18:4۔
تنظیم دِیاں ہدیتاں تے عمل کرن دی وجہ توں اَسی مُنادی کرن تے تلیم دین دے کم چ بہتری لیا سکنے آں۔ (پیراگراف نمبر 18 نُوں ویکھو۔)
18. امثال 24:6 چ لکھی گل مُنادی کردے ویلے ساڈے کم کیویں آ سکدی اے؟
18 تنظیم دِیاں ہدیتاں تے علم کرو۔ بائبل چ سانوں ایہہ شاندار مشورہ دِتا گیا اے: تُوں نیک صلاح لے کے جنگ کر سکنا ایں تے صلاحکاراں دی کثرت چ سلامتی اے۔(امثال 24:6) غور کرو کہ ایس ایت چ دِتا گیا اصول مُنادی کرن تے تلیم دین دے کم چ ساڈی مدد کیویں کر سکدا اے۔ اپنے طریقے نال مُنادی کرن یاں تلیم دین دی بجائے سانوں اوہناں ہدیتاں تے عمل کرنا چاہی دا اے جیہڑیاں تنظیم سانوں دیندی اے۔ ایہہ ہدیتاں سانوں ساڈیاں عبادتاں تے مِلدیاں نیں جِتھے تقریراں تے فرق فرق حصیاں دے ذریعے ساڈی تربیت کیتی جاندی اے۔ایہدے علاوہ یہوواہ دی تنظیم نے سانوں تلیم دین لئی شاندار اوزار یعنی کتاباں، رسالے تے ویڈیوز وی دِتیاں نیں جنہاں دی مدد نال اَسی لوکاں نُوں بائبل چ لکھیاں گلاں سمجھا سکنے آں۔ کیہہ تُسی ایہناں اوزاراں نُوں چنگی طرحاں استمال کرنا سکھ رہے او؟
19. تُسی یہوواہ وَلّوں مِلن والی حکمت بارے کیہو جیہا محسوس کردے او؟ (امثال 3:13-18)
19 امثال 3:13-18 نُوں پڑھو۔ اَسی پاک کلام چ لکھیاں یہوواہ دِیاں ہدیتاں لئی اوہدے بڑے شکرگزار آں۔ ذرا سوچو کہ جے سانوں ایہہ ہدیتاں نہ ملیاں ہوندیاں تے ساڈا کیہہ بن دا۔ ایس مضمون چ اَسی امثال دی کتاب چ پائی جان والی حکمت دِیاں کجھ گلاں تے غور کیتا اے۔ ایہدے چ کوئی شک نئیں کہ پوری بائبل ای ایہو جہی گلاں نال بھری ہوئی اے۔ آؤ ایس گل دا پکا ارادہ کرئیے کہ اَسی ہمیشاں اوس حکمت مطابق چلاں گے جیہڑی یہوواہ سانوں دیندا اے۔ دُنیا ایس حکمت بارے جو کجھ وی سوچ دی اے سانوں اوہدے توں کوئی فرق نئیں پیندا۔ سانوں ایس گل دا پورا یقین اے کہ جے اَسی ایس حکمت نُوں پھڑی رکھاں گے تے اَسی خوش رہواں گے۔
گیت نمبر 36: اپنے دل دی حفاظت کریئے
a یہوواہ وَلّوں مِلن والی حکمت دُنیا دی حکمت نالوں کِتے زیادہ بہتر اے۔ ایس مضمون چ اَسی امثال دی کتاب چوں حکمت بارے اِک شاندار مثال تے غور کراں گے۔ ایس مثال چ حکمت نُوں اِک ایہو جیہا آدمی کہیا گیا اے جیہڑا راہواں چ اپنی آواز بلند کردا اے۔ ایہدے علاوہ اَسی ایہناں سوالاں تے وی گل کراں گے: اَسی سچی حکمت کیویں حاصل کر سکنے آں؟ کجھ لوک یہوواہ وَلّوں مِلن والی حکمت نُوں قبول کیوں نئیں کردے؟ تے جے اَسی ایہنوں قبول کرنے آں تے سانوں کیہڑے فائدے ہو سکدے نیں؟
