1.‏ یسوع نے ساڈے لئی کیہہ کجھ کیتا اے؟‏

 اَج تک کسے وی انسان نے دُوجے انساناں لئی ایناں کجھ نئیں کیتا جِنّاں یسوع نے کیتا اے۔ جدوں اوہ زمین تے سی تے اوہنے دُوجیاں دی مدد کرن لئی معجزے کیتے۔ (‏لُوقا 9:‏12-‏17‏)‏ اوہنے اپنی جان قربان کر کے ساڈے لئی فدیہ دِتا جیہڑا ساڈے لئی سب توں وڈی نعمت اے۔ (‏یوحنا 15:‏13‏)‏ ایہدے علاوہ جدوں توں یسوع زندہ ہو کے اسمان تے گیا اے اوہدوں توں اوہ دل کھول کے ساڈی مدد کر رہیا اے۔ یسوع نے اپنے وعدے دے مطابق یہوواہ کولوں درخاست کیتی اے کہ اوہ سانوں اپنی پاک روح دَوے تاکہ اَسی اوہدے کولوں تلیم تے تسلی حاصل کر سکئے۔ (‏یوحنا 14:‏16، 17؛‏ 16:‏13‏)‏ نالے عبادتاں دے ذریعے یسوع سانوں تربیت دے رہیا اے تاکہ اَسی پوری دُنیا چ لوکاں نُوں بائبل توں تلیم دے سکئے تے شاگرد بنا سکئے۔—‏متی 28:‏18-‏20‏۔‏

2.‏ اِفسیوں 4:‏7، 8 دے مطابق جیہڑے ”‏آدمی نعمتاں دے طور تے بخشے“‏ گئے نیں، اوہناں وچ کون شامل نیں؟‏

² ذرا یسوع دی دِتی اِک ہور نعمت تے غور کرو۔ پولُس رسول نے اپنے خط چ لکھیا کہ جدوں یسوع اسمان تے گیا تے اوہنے سانوں کجھ ”‏آدمی نعمتاں دے طور تے بخشے۔“‏ ‏(‏اِفسیوں 4:‏7، 8 نُوں پڑھو۔)‏ پولُس نے ایہہ وی دَسیا کہ یسوع نے ایہہ آدمی نعمتاں دے طور تے ایس لئی بخشے تاکہ اوہ فرق فرق طریقیاں نال کلیسیا دی مدد کر سکن۔ (‏اِفسیوں 1:‏22، 23؛‏ 4:‏11-‏13‏)‏ اَج ایہناں آدمیاں چ خادم، بزرگ تے حلقے دے نگہبان شامل نیں۔‏ a سچ اے کہ ایہہ آدمی وی عیب‌دار نیں تے ایہناں کولوں وی غلطیاں ہوندیاں نیں۔ (‏یعقوب 3:‏2‏)‏ پر ساڈا مالک یسوع ایہناں دے ذریعے ساڈی مدد کردا اے تے ایہہ ساڈے لئی اوہدے وَلّوں اِک نعمت نیں۔‏

3.‏ اِک مثال دے کے دَسو کہ اَسی اوہناں بھراواں دا ساتھ کیویں دے سکنے آں جیہڑے سانوں ”‏نعمتاں دے طور تے بخشے“‏ گئے نیں۔‏

 ³ یسوع نے جیہڑے ”‏آدمی نعمتاں دے طور تے بخشے،“‏ اوہناں نُوں اوہنے کلیسیا نُوں مضبوط کرن دی ذمے‌داری دِتی اے۔ (‏اِفسیوں 4:‏12‏)‏ پر اَسی سارے ایس اہم ذمے‌داری نُوں نبھان چ اوہناں دا ساتھ دے سکنے آں۔ ایہدے لئی ذرا اِک مثال تے غور کرو۔ ساڈے وچوں کجھ بھین بھرا عبادت‌گاہواں دی تعمیر دے کم چ حصہ لیندے نیں۔ پر دُوجے بھین بھرا تعمیر دا کم کرن والیاں لئی کھانا بنان، سامان لیان لجان دا بندوبست کرن تے دُوجے طریقیاں نال اوہناں دا ساتھ دیندے نیں۔‏ ایسے طرحاں اَسی وی اپنیاں گلاں تے کماں نال خادماں، بزرگاں تے حلقے دے نگہباناں دا ساتھ دے سکنے آں۔ آؤ ویکھنے آں کہ ایہناں بھراواں دی سخت محنت دی وجہ توں سانوں کیہہ فائدہ ہوندا اے تے اَسی کیویں ظاہر کر سکنے آں کہ اَسی ایہناں بھراواں تے ایہناں نُوں مقرر کرن والے یسوع دے شکرگزار آں۔‏

کلیسیا چ خادم بڑی مدد کردے نیں

4.‏ پہلی صدی چ خادم کلیسیا چ کیس طرحاں مدد کردے سن؟‏

⁴ پہلی صدی چ کجھ بھراواں نُوں خادماں دے طور تے مقرر کیتا گیا سی۔ (‏1-‏تیمُتھیُس 3:‏8‏)‏ اِنج لگدا اے کہ ایہی اوہ بھرا سن جنہاں بارے پولُس نے 1-‏کُرنتھیوں 12:‏28 چ کہیا کہ کجھ نُوں دُوجیاں دی مدد کرن دی ذمے‌داری دِتی گئی اے۔ لگدا اے کہ خادم کجھ ہور ضروری کم کردے سن تاکہ بزرگ اپنا دھیان تلیم دین تے دُوجیاں دا حوصلہ ودھان تے رکھ سکن۔ مثال لئی، ہو سکدا اے کہ خادم پاک کلام دِیاں کاپیاں بنان چ مدد کردے ہون یاں کاپیاں بنان لئی ضروری سامان خرید کے لیاندے ہون۔‏

5.‏ اَج کلیسیاواں چ خادم کیہڑے کم کردے نیں؟‏

⁵ ذرا کجھ ایہو جہے کماں بارے سوچو جیہڑے خادم تواڈی کلیسیا چ کردے نیں۔ (‏1-‏پطرس 4:‏10‏)‏ شاید اوہناں نُوں کلیسیا چ پیسیاں دا حساب کتاب رکھن، مُنادی دے علاقیاں دا ریکارڈ رکھن، کتاباں تے رسالیاں دا آرڈر دین، ساؤنڈ سسٹم چلان، ویڈیو چلان، حاضرباشاں دے طور تے کم کرن یاں عبادت‌گاہ دی دیکھ‌بھال کرن دی ذمے‌داری دِتی جائے۔ ایہہ سارے کم بوہت اہم نیں کیونکہ ایہناں دی وجہ توں کلیسیا چ سب کجھ صحی طریقے نال ہو پاندا اے۔ (‏1-‏کُرنتھیوں 14:‏40‏)‏ ایہدے علاوہ کجھ خادم ‏”‏مسیحی زندگی تے خدمت“‏ والی عبادت چ حصے دیندے نیں تے عوامی تقریراں دیندے نیں۔ کسے خادم نُوں مُنادی دے گروپ دے نگہبان دی مدد کرن دی ذمے‌داری وی دِتی جا سکدی اے۔ کدی کدار بزرگ خادماں نُوں اپنے نال بھین بھراواں دا حوصلہ ودھان لئی وی لجاندے نیں۔‏

6.‏ اَسی کیہڑے کماں لئی خادماں دے شکرگزار آں؟‏

⁶ کلیسیا چ خادم جیہڑے کم کردے نیں، اوہناں توں بھین بھراواں نُوں کیہہ فائدہ ہوندا اے؟ بولیویا چ رہن والی بھین جینی b نے کہیا:‏ ”‏خادماں دے کم دی وجہ توں اَسی عبادت توں پورا فائدہ حاصل کر پانے آں۔ اوہناں دی محنت دی وجہ توں مَیں گیت گا سکنی آں، جواب دے سکنی آں، تقریراں سُن سکنی آں تے ویڈیوز تے تصویراں توں سکھ سکنی آں۔ اوہ ایس گل دا پورا خیال رکھدے نیں کہ عبادتاں تے آن والے لوک محفوظ رہن۔ اوہ اوہناں بھین بھراواں دی مدد وی کردے نیں جیہڑے ویڈیو کال دے ذریعے عبادتاں چ شامل ہوندے نیں۔ عبادت توں بعد اوہ عبادت‌گاہ دی صفائی کرن چ حصہ لیندے نیں، کلیسیا چ عطیات دا حساب کتاب کرن چ مدد کردے نیں تے ایس گل دا پورا خیال رکھدے نیں کہ ساڈے کول اوہ رسالے تے کتاباں ہون جنہاں دی سانوں لوڑ اے۔ مَیں ایہناں خادماں دی بڑی شکرگزار آں۔“‏ کولمبیا چ رہن والی بھین لیزلی دا شوہر کلیسیا چ اِک بزرگ اے۔ بھین لیزلی کہندی اے:‏ ”‏میرا شوہر بوہت سارے کماں چ خادماں دی مدد لیندا اے۔ جے خادم نہ ہوندے تے میرا شوہر ہور وی زیادہ مصروف ہوندا۔ مَیں ایس گل دی بڑی قدر کرنی آں کہ خادم مدد کرن لئی ہر ویلے تیار رہندے نیں۔“‏ اَسی وی اپنی کلیسیا چ خادماں دی محنت دی بڑی قدر کرنے آں۔—‏1-‏تیمُتھیُس 3:‏13‏۔‏

7.‏ اَسی خادماں لئی قدر کیویں وکھا سکنے آں؟ (‏تصویر نُوں وی ویکھو۔)‏

⁷ بھانویں ساڈے دل چ خادماں لئی بوہت زیادہ شکرگزاری ہوئے پر بائبل چ سانوں کہیا گیا اے کہ ‏”‏وکھاؤ کہ تُسی شکرگزار او۔“‏ (‏کُلسّیوں 3:‏15‏)‏ فن‌لینڈ چ رہن والے اِک بزرگ نے دَسیا کہ اوہ خادماں لئی قدر کیویں وکھاندا اے۔ اوہنے کہیا:‏ ”‏مَیں اوہناں نُوں کوئی کارڈ یاں میسج گھلنا واں جدے چ مَیں کوئی ایت لکھنا واں تے اوہناں دے اوس خاص کم دا ذکر کرنا  واں جدے توں میرا حوصلہ ودھیا اے یاں ایہہ لکھنا واں کہ مَیں اوہناں دے کم دی قدر کیوں کرنا واں۔“‏ نیو کیلی ڈونیا چ رہن والے بھرا پاسکل تے بھین جاعیل خادماں لئی خاص طور تے دُعا کردے نیں۔ بھرا پاسکل نے کہیا:‏ ”‏کجھ چِر توں اَسی خادماں لئی بوہت زیادہ دُعا کر رہے آں۔ اَسی اوہناں لئی یہوواہ دا شکر کرنے آں تے اوہنوں کہنے آں کہ اوہ اوہناں دی ہور زیادہ مدد کرے۔“‏ یہوواہ ایہو جہیاں دُعاواں نُوں سُن دا اے تے ایس وجہ توں پوری کلیسیا نُوں فائدہ ہوندا اے۔—‏2-‏کُرنتھیوں 1:‏11‏۔‏

کلیسیا دے بزرگ سخت محنت کردے نیں

8.‏ پولُس رسول نے ایہہ کیوں کہیا کہ بزرگ سخت محنت کردے نیں؟ (‏1-‏تھسلُنیکیوں 5:‏12، 13‏)‏

⁸ پہلی صدی چ بزرگاں نے کلیسیا لئی سخت محنت کیتی۔ ‏(‏1-‏تھسلُنیکیوں 5:‏12، 13 نُوں پڑھو؛‏ 1-‏تیمُتھیُس 5:‏17‏)‏ اوہ عبادتاں چ پیشوائی کردے سن تے بزرگاں دی جماعت دے طور تے فیصلے لیندے سن۔ اوہ بڑے پیار نال بھین بھراواں نُوں نصیحت کردے سن تاکہ کلیسیا محفوظ رہوے۔ (‏1-‏تھسلُنیکیوں 2:‏11، 12؛‏ 2-‏تیمُتھیُس 4:‏2‏)‏ ایہدے علاوہ ایہہ بزرگ اپنے گھر والیاں دِیاں ضرورتاں نُوں پورا کرن تے اوہناں نُوں یہوواہ دے نیڑے رکھن لئی وی سخت محنت کردے سن۔—‏1-‏تیمُتھیُس 3:‏2،‏ 4؛‏ طِطُس 1:‏6-‏9‏۔‏

9.‏ اَج بزرگ کلیسیا چ کیہڑیاں ذمے‌داریاں نبھاندے نیں؟‏

⁹ اَج وی بزرگ بڑے مصروف نیں۔ اوہ بادشاہی دی خوش‌خبری سُناندے نیں۔‏ (‏2-‏تیمُتھیُس 4:‏5‏)‏ اوہ جوش نال مُنادی کر کے چنگی مثال قائم کردے نیں، مُنادی دے کم نُوں منظم کر دے نیں تے سانوں تلیم تے تربیت دیندے نیں تاکہ اَسی چنگی طرحاں مُنادی کر سکئے۔ اوہ کلیسیا چ فیصلے وی کردے نیں تے اِنج کردے ویلے اوہ رحم تے اِنصاف نال کم لیندے نیں۔ جدوں کلیسیا چ کسے کولوں کوئی بوہت وڈا گُناہ ہو جاندا اے تے بزرگ اوس بندے دی مدد کردے نیں تاکہ اوہ فیر توں یہوواہ نال دوستی کر سکے۔ پر ایہدے نال نال اوہ ایس گل دا وی خیال رکھدے نیں کہ کلیسیا پاک رہوے۔ (‏1-‏کُرنتھیوں 5:‏12، 13؛‏ گلتیوں 6:‏1‏)‏ سب توں ودھ کے بزرگ چرواہیاں وانگوں ساڈی دیکھ‌بھال کردے نیں۔ (‏1-‏پطرس 5:‏1-‏3‏)‏ اوہ بڑی چنگی تیاری کر کے بائبل چوں تقریراں دیندے نیں، کلیسیا دے ہر بھین بھرا نُوں جانن دی کوشش کردے نیں تے اوہناں دا حوصلہ ودھان لئی اوہناں نُوں مِلدے نیں۔ کجھ بزرگ اپنیاں ذمے‌داریاں نبھان دے نال نال عبادت‌گاہواں دی تعمیر تے مرمت دے کم چ حصہ لیندے نیں، کنونشناں دا اِنتظام کردے نیں، ہسپتال رابطہ کمیٹی تے مریضاں نال مِلن والے گروپ چ کم کردے نیں۔ واقعی بزرگ کِنّی سخت محنت کردے نیں۔‏

10.‏ اَسی اپنے محنتی بزرگاں دی قدر کیوں کرنے آں؟‏

¹⁰ یہوواہ نے پہلے توں ای دَس دِتا سی کہ ساڈے چرواہے یعنی بزرگ ساڈی دیکھ‌بھال کرن گے۔ ایس لئی اَسی نہ تے ڈراں گے تے نہ ای گھبراواں گے۔ (‏یرمیاہ 23:‏4‏)‏ جدوں فن‌لینڈ چ رہن والی بھین یوہانہ دی امی بوہت بیمار ہو گئی تے اوہنے ویکھیا کہ واقعی بزرگ ساڈا کِنّاں خیال رکھدے نیں۔ اوہنے کہیا:‏ ”‏مینوں دُوجیاں نُوں اپنے جذبات بارے دَسنا بوہت مشکل لگدا اے۔ میری کلیسیا چ اِک بزرگ سی جنہوں مَیں چنگی طرحاں نئیں جان دی ساں۔ پر فیر وی اوہ بڑے صبر نال میری گل سُن دا سی، میرے نال مِل کے دُعا کردا سی تے مینوں یقین دَواندا سی کہ یہوواہ میرے نال بڑا پیار کردا اے۔ مینوں ایہہ تے نئیں یاد کہ اوہنے مینوں اوس ویلے کیہہ کہیا سی۔ پر مینوں ایہہ ضرور یاد اے کہ اوس ویلے مَیں کِنّاں محفوظ محسوس کر رہی ساں۔ مینوں یقین اے کہ یہوواہ نے میری مدد کرن لئی اوس بزرگ نُوں صحی وقت تے گھلیا سی۔“‏ تواڈی کلیسیا دے بزرگاں نے تواڈی مدد کیویں کیتی اے؟‏

11.‏ اَسی بزرگاں لئی قدر کیویں وکھا سکنے آں؟ (‏تصویر نُوں وی ویکھو۔)‏

¹¹ یہوواہ چاہندا اے کہ اَسی بزرگاں دی محنت لئی قدر وکھائیے۔ (‏1-‏تھسلُنیکیوں 5:‏12، 13‏)‏ فن‌لینڈ چ رہن والی بھین انیتا کہندی اے:‏ ”‏بزرگ دُوجیاں دی مدد کرن لئی تیار رہندے نیں۔ پر ایہدا مطلب ایہہ نئیں اے کہ اوہناں کول دُوجیاں نالوں بوہتا وقت تے طاقت ہوندی اے یاں اوہناں نُوں مشکلاں دا سامنا نئیں ہوندا۔ کدی کدار مَیں اوہناں نُوں بس ایہہ کہنی آں:‏ ”‏توانوں پتہ اے کہ تُسی کِنّے چنگے بزرگ او۔“‏ تُرکیہ c چ رہن والی بھین سارہ کہندی اے:‏ ”‏بزرگاں نُوں وی اپنی خدمت جاری رکھن لئی حوصلے دی لوڑ ہوندی اے۔ ایس لئی اَسی اوہناں نُوں کوئی کارڈ دے سکنے آں، اپنے گھر کھانے تے بلا سکنے آں یاں اوہناں نال مِل کے مُنادی کر سکنے  آں۔“‏ کیہہ تواڈی کلیسیا چ کوئی ایہو جیہا بزرگ ہے وے جدی محنت دی تُسی بوہت قدر کردے او؟ سوچو کہ تُسی کیہڑے کماں دے ذریعے اوہدے لئی قدر ظاہر کر سکدے او۔—‏1-‏کُرنتھیوں 16:‏18‏۔‏

حلقے دے نگہبان کلیسیا نُوں مضبوط کردے نیں

12.‏ پہلی صدی چ کلیسیاواں نُوں مضبوط کرن لئی کیہڑا بندوبست کیتا گیا سی؟ (‏1-‏تھسلُنیکیوں 2:‏7، 8‏)‏

¹² یسوع مسیح نے جیہڑے آدمی ”‏نعمتاں دے طور تے بخشے“‏ نیں اوہ اِک ہور طریقے نال وی کلیسیاواں دی مدد کردے نیں۔ یسوع دی رہنمائی چ یروشلم دے بزرگاں نے پولُس، برنباس تے کجھ ہور بھراواں نُوں حلقے دے نگہباناں دے طور کلیسیاواں چ گھلیا۔ (‏اعمال 11:‏22‏)‏ پر کیوں؟ ایس لئی تاکہ خادماں تے بزرگاں وانگوں اوہ وی کلیسیاواں نُوں مضبوط کرن۔ (‏اعمال 15:‏40، 41‏)‏ ایہناں آدمیاں نے دُوجیاں نُوں تلیم دین تے اوہناں دا حوصلہ ودھان لئی اپنی آرام‌دہ زندگی قربان کر دِتی، ایتھوں تک کہ اپنی جان وی خطرے چ پا دِتی۔‏‏—‏1-‏تھسلُنیکیوں 2:‏7، 8 نُوں پڑھو۔‏

13.‏ حلقے دے نگہباناں دِیاں کیہڑیاں ذمے‌داریاں نیں؟‏

¹³ حلقے دے نگہباناں نُوں بوہت زیادہ سفر کرنا پیندا اے۔ کجھ حلقے دے نگہبان تے اِک کلیسیا توں دُوجی کلیسیا چ جان لئی کئی سو میل دا سفر کردے نیں۔ ہر ہفتے حلقے دے نگہبان کئی تقریراں دیندے نیں، بھین بھراواں دا حوصلہ ودھان لئی اوہناں نُوں مِلدے نیں، پہل‌کاراں تے بزرگاں نال اجلاس کردے نیں تے مُنادی دے گروپ لیندے نیں۔ اوہ تقریراں تیار کردے نیں تے کنونشن دے پروگرام نُوں منظم کردے نیں۔ اوہ پہل‌کاراں لئی سکول چ تربیت دیندے نیں تے اوہناں لئی اِک خاص اجلاس دا بندوبست کردے نیں۔ کدی کدار برانچ حلقے دے نگہباناں نُوں کجھ ایہو جہے معاملیاں نُوں حل کرن دی ذمے‌داری دیندی اے جیہڑے بوہت اہم ہوندے نیں یاں جنہاں نُوں فوراً حل کرن دی لوڑ ہوندی اے۔‏

14.‏ اَسی حلقے دے نگہباناں دی قدر کیوں کرنے آں؟‏

¹⁴ حلقے دے نگہباناں دے کم دی وجہ توں کلیسیاواں نُوں کیویں فائدہ ہوندا اے؟ ایس بارے تُرکیہ چ رہن والے اِک بھرا نے کہیا:‏ ”‏جدوں  وی حلقے دا نگہبان ساڈی کلیسیا چ آندا اے تے میرے دل چ اپنے بھین بھراواں دی مدد کرن دی خواہش ودھ جاندی اے۔ مَیں بوہت سارے حلقے دے نگہباناں نُوں مِلیا واں۔ پر اوہناں وچوں کدی وی کسے نے مینوں ایہہ محسوس نئیں کرایا کہ اوہ میرے نال گل نئیں کرنا چاہندے یاں اوہ بڑے مصروف نیں۔“‏ بھین یوہانہ جدا پہلے وی ذکر ہویا اے، اوہنے اِک حلقے دے نگہبان نال مِل کے مُنادی کیتی۔ پر اوہناں نُوں کوئی وی بندہ گھر نئیں مِلیا۔ اوہ کہندی اے:‏ ”‏اوہ دن مینوں کدی نئیں بُھلے گا۔ کجھ چِر پہلاں میریاں دو بھیناں اِک ہور علاقے چ شفٹ ہو گئیاں سن تے مَیں اوہناں نُوں بوہت یاد کرنی ساں۔ پر حلقے دے نگہبان نے میرا حوصلہ ودھایا تے ایہہ سمجھن چ میری مدد کیتی کہ بھانویں اَج یہوواہ دی خدمت کرن لئی شاید سانوں اپنے گھر والیاں تے دوستاں توں دُور رہنا پیندا اے پر نوِیں دُنیا چ ساڈے کول اوہناں نال وقت گزارن دے بے‌شمار موقعے ہون گے۔“‏ ساڈے وچوں بوہت سارے بھین بھراواں کول حلقے دے نگہباناں نال گزارے وقت دِیاں بڑیاں چنگیاں یاداں ہون گیاں۔—‏اعمال 20:‏37–‏21:‏1‏۔‏

15.‏ (‏الف)‏3-‏یوحنا 5-‏8 دے مطابق اَسی حلقے دے نگہباناں لئی قدر کیویں وکھا سکنے آں؟ (‏تصویر نُوں وی ویکھو۔)‏ (‏ب)‏سانوں خادماں، بزرگاں تے حلقے دے نگہباناں دِیاں بیویاں لئی قدر کیوں وکھانی چاہی دی اے تے اَسی اِنج کیویں کر سکنے آں؟ (‏ایس بکس نُوں ویکھو:‏ ‏”‏ ذمے‌دار بھراواں دِیاں بیویاں لئی قدر وکھاؤ۔‏‏“‏‏)‏

¹⁵ یوحنا رسول نے گیسُ نُوں ہلاشیری دِتی کہ اوہ اپنی کلیسیا چ آن والے بھراواں لئی مہمان‌نوازی وکھائے تے ”‏اوہناں لئی سفر دا ایہو جیہا اِنتظام کرے جدے توں خدا خوش ہووے۔“‏ ‏(‏3-‏یوحنا 5-‏8 نُوں پڑھو۔)‏ اَج اَسی وی حلقے دے نگہبان نُوں کھانے تے بلا سکنے آں۔ ایہدے علاوہ اَسی حلقے دے نگہبان دے دورے دے دوران مُنادی دے گروپاں چ جا سکنے آں۔ بھین لیزلی جدا پہلے وی ذکر ہویا سی، اوہ کجھ ہور طریقیاں نال وی حلقے دے نگہباناں لئی قدر وکھاندی اے۔ اوہ کہندی اے:‏ ”‏مَیں حلقے دے نگہباناں لئی دُعا کرنی آں کہ یہوواہ اوہناں دِیاں ضرورتاں نُوں پورا کرے۔ میرا شوہر تے مَیں اکثر حلقے دے نگہباناں نُوں خط لکھنے آں تے اوہناں نُوں دَسنے آں کہ اوہناں دے آن توں سانوں کِنّاں حوصلہ مِلیا سی۔“‏ یاد رکھو کہ حلقے دے نگہبان وی ساڈے ورگے انسان نیں۔ اوہناں نُوں وی مشکلاں، پریشانیاں  تے بیماری دا سامنا کرنا پیندا اے، ایتھوں تک کہ کدی کدار اوہ وی مایوس ہو جاندے نیں۔ ایس لئی تواڈیاں حوصلہ ودھان والیاں گلاں تے چھوٹے چھوٹے تحفیاں دے ذریعے یہوواہ اوہناں دِیاں دُعاواں دا جواب دے سکدا اے۔—‏اَمثال 12:‏25‏۔‏

سانوں ایہو جہے بھراواں دی ضرورت اے جیہڑے نعمت ثابت ہون

16.‏ اَمثال 3:‏27 نُوں ذہن چ رکھدے ہوئیاں اِک بھرا اپنے آپ کولوں کیہڑے سوال پچھ سکدا اے؟‏

¹⁶ پوری دُنیا چ سانوں ہور ایہو جہے بھراواں دی ضرورت اے جیہڑے نعمتاں ثابت ہون۔ جے تُسی اِک بپتسمہ‌یافتہ بھرا او تے کیہہ تُسی اِنج کرن لئی کوشش کر سکدے او؟ ‏(‏اَمثال 3:‏27 نُوں پڑھو۔)‏ کیہہ تُسی خادم بنن لئی ہور زیادہ محنت کر سکدے او؟ جے تُسی خادم او تے کیہہ تُسی بزرگ بنن لئی ہور زیادہ محنت کر سکدے او؟‏ d کیہہ تُسی بادشاہی دے مُناداں لئی سکول چ جان لئی اپنی زندگی چ کجھ تبدیلیاں کر سکدے او؟ ایس سکول چ توانوں تربیت ملے گی تاکہ تُسی یسوع دے ہور زیادہ کم آ سکو۔ جے توانوں لگدا اے کہ حالے تُسی ایہہ سب کجھ کرن دے لائق نئیں او تے یہوواہ کولوں دُعا کرو۔ اوہدے کولوں پاک روح منگو تاکہ تُسی اپنی اوس ذمے‌داری نُوں چنگی طرحاں پورا کر سکو جیہڑی توانوں دِتی جاندی اے۔—‏لُوقا 11:‏13؛‏ اعمال 20:‏28‏۔‏

17.‏ یسوع نے کجھ آدمیاں نُوں ”‏نعمتاں دے طور تے“‏ بخشن نال کیہہ ثابت کیتا اے؟‏

¹⁷ یسوع نے جیہڑے بھرا نعمتاں دے طور تے بخشے نیں، اوہ ایس گل دا ثبوت نیں کہ یسوع ایس آخری زمانے چ ساڈی رہنمائی کر رہیا اے۔ (‏متی 28:‏20‏)‏ اَسی ایس گل لئی بڑے شکرگزار آں کہ ساڈا اِک ایہو جیہا بادشاہ اے جیہڑا بوہت پیار کرن والا تے مدد کرن والا اے۔ اوہنوں پتہ اے کہ سانوں کیس چیز دی ضرورت اے۔ ایس لئی اوہنے سانوں ایہو جہے بھرا دِتے نیں جیہڑے ساڈا خیال رکھدے نیں۔ فیر آؤ، اَسی ایہناں محنتی بھراواں لئی قدر وکھان دے موقعے لبھدے رہیے تے یہوواہ دا شکر کرنا وی نہ بُھلئیے جیہڑا سانوں ”‏ہر شاندار نعمت تے ہر ودھیا تحفہ“‏ دیندا اے۔—‏یعقوب 1:‏17‏۔‏