تیمُتھیُس دے ناں دُوجا خط 4:1-22
4 جدوں مسیح یسوع ظاہر ہوئے گا تے بادشاہ دے طور تے آئے گا تے اوہ زندہ لوکاں تے مُردیاں دی عدالت کرے گا۔ مَیں تینوں یسوع تے خدا دے حضور حکم دینا واں کہ ایہناں اہم گلاں تے عمل کرِیں:
2 دل لا کے* خدا دے کلام دی مُنادی کرِیں فیر بھانویں حالات چنگے ہون یاں بھیڑے۔ صبر تے مہارت نال تلیم دے کے دُوجیاں دی درستی کرِیں، اوہناں نُوں خبردار کرِیں تے نصیحت کرِیں
3 کیونکہ اِک وقت آئے گا جدوں لوک صحی* تلیم دی بجائے اپنیاں خواہشاں مطابق چلن گے۔ اوہ اوہناں لوکاں نُوں اپنا اُستاد بنان گے جیہڑے اوہناں نُوں ایہو جہیاں گلاں دَسن جیہڑیاں اوہ سُننا چاہندے نیں۔
4 اوہ سچائی توں مُونہہ موڑ لین گے تے جھوٹھیاں کہانیاں تے دھیان دین گے۔
5 پر تُوں ہر معاملے چ اپنے ہوش قائم رکِھیں، مصیبتاں نُوں صبر نال برداشت کرِیں، خوشخبری سُناندا رہوِیں تے چنگی طرحاں خدا دی خدمت کردا رہوِیں۔
6 مینوں مے دے نذرانے وانگوں پوری طرحاں ڈولھیا جا رہیا اے* تے میرے چھٹکارے* دا وقت نیڑے آ گیا اے۔
7 مَیں چنگی لڑائی لڑی اے۔ مَیں دوڑ پوری کر لئی اے۔ مَیں ایمان تے قائم رہیا واں۔
8 اِنصاف نال عدالت کرن والے ساڈے مالک نے میرے لئی انعام دے طور تے نیکی دا تاج رکھیا ہویا اے جیہڑا اوہ مینوں اوس دن دَوے گا جدوں اوہ ظاہر ہوئے گا۔ اوہ ایہہ تاج صرف مینوں ای نئیں سگوں اوہناں سارے نیک لوکاں نُوں دَوے گا جیہڑے اوہدے ظاہر ہون دا بےتابی نال اِنتظار کر رہے نیں۔
9 میرے کول چھیتی توں چھیتی آن دی کوشش کرِیں۔
10 دیماس نے مینوں کلّا چھڈ دِتا اے کیونکہ اوہ ایس دُنیا نال پیار کرن لگ پیا اے تے اوہ تھسلُنیکے چلا گیا اے جد کہ کریسکنس گلتیہ نُوں تے طِطُس دلمتیہ نُوں چلا گیا اے۔
11 صرف لُوقا ای میرے نال اے۔ تُوں اپنے نال مرقس نُوں وی لے آئیں کیونکہ اوہ خدا دی خدمت کرن چ میری بڑی مدد کردا اے۔
12 پر مَیں تخِکُس نُوں اِفسس گھل دِتا اے۔
13 جدوں تُوں آئیں تے اوہ چوغہ لیندا آئیں جیہڑا مَیں تروآس چ کرپس کول چھڈیا سی۔ نالے کتاباں تے چمڑے دے طومار* وی لیندا آئیں۔
14 تانبے دے کاریگر سکندر نے مینوں بڑا نقصان پونچایا اے۔ یہوواہ اوہنوں اوہدے کماں دا بدلہ دَوے گا۔
15 تُوں وی اوہدے توں خبردار رہوِیں کیونکہ اوہنے ساڈے پیغام دی بڑی مخالفت کیتی اے۔
16 میرے مُقدمے دی پہلی پیشی دے ویلے کسے نے وی میرا ساتھ نئیں دِتا سگوں ساریاں نے مینوں بےسہارا چھڈ دِتا۔ دُعا اے کہ خدا اوہناں کولوں ایہدا حساب نہ لوے۔
17 پر مالک نے میرا ساتھ دِتا تے مینوں طاقت بخشی تاکہ میرے ذریعے مُنادی دا کم چنگی طرحاں پورا ہوئے تے ساریاں قوماں دے لوک خوشخبری سُنن۔ اوہنے مینوں شیر دے مُونہہ توں بچا لیا۔
18 اوہ مینوں ہر طرحاں دی بُرائی توں بچا کے اپنی اسمانی بادشاہی چ لے جائے گا۔ اوہدی وڈیائی ہمیشاں ہمیشاں تک ہوندی رہوے۔ آمین۔
19 پرِسکہ* تے اکوِلہ نُوں میرا سلام دوِیں۔ نالے اُنیسِفرس دے گھر والیاں نُوں وی۔
20 اِراستُس، کُرنتھس چ ای ٹھہر گیا تے تروفیمس نُوں مَیں میلیتُس چ ای چھڈ دِتا کیونکہ اوہ بیمار سی۔
21 سردیاں دا موسم شروع ہون توں پہلاں میرے کول پونچن دی پوری کوشش کرِیں۔
یُوبولُس، پُودینس، لینُس، کلودیہ تے ایتھوں دے سارے بھین بھراواں وَلّوں تینوں سلام۔
22 مالک تیرے نیک جذبے دی وجہ توں تینوں برکت دَوے۔ مالک توانوں ساریاں نُوں عظیم رحمت بخشے۔
فٹ نوٹ
^ یاں، ”وقت دی اہمیت نُوں سمجھ کے۔“
^ یاں، ”فائدےمند۔“
^ پولُس دا مطلب اے کہ اوہ اپنے ہمایماناں دی خاطر اپنا سارا کجھ قربان کرن لئی تیار سی۔
^ یاں، ”موت۔“
^ کتاب تے طومار دا اشارہ عبرانی صحیفیاں یاں اوہناں گلاں وَل ہو سکدا اے جیہڑیاں پولُس نے لکھیاں سن۔
^ پرِسکِلّہ دا اِک ہور ناں۔
