کُرنتھیوں دے ناں پہلا خط 2:1-16
2 ایس لئی بھراوو، جدوں مَیں توانوں خدا دے مُقدس راز بارے دَسیا تے مَیں وڈے وڈے لفظ استمال نئیں کیتے یاں سمجھدار ہون دا دِکھاوا نئیں کیتا
2 سگوں مَیں فیصلہ کیتا کہ مَیں تواڈے نال صرف یسوع مسیح بارے تے ایس بارے گل کراں گا کہ اوہنوں سُولی تے چڑھا کے مار دِتا گیا سی۔
3 جدوں مَیں تواڈے کول آیا تے مَیں کمزور ساں تے ڈر دے مارے کمب رہیا ساں۔
4 نالے مَیں توانوں انسانی حکمت نال قائل کرن دی کوشش نئیں کیتی سگوں مَیں پاک روح دی طاقت نال گل کیتی
5 تاکہ تُسی انسانی حکمت دی بجائے خدا دی طاقت تے ایمان رکھو۔
6 اَسی اوہناں لوکاں نال خدا دی حکمت بارے گل کرنے آں جیہڑے پُختہ نیں۔ پر اَسی ایس دُنیا تے ایہدے حاکماں دی حکمت بارے گل نئیں کردے جیہڑے ختم ہو جان گے۔
7 اَسی خدا دی چھپی ہوئی حکمت یعنی مُقدس راز بارے گل کرنے آں۔ خدا نے صدیاں پہلاں ای* ایہہ طے کیتا سی کہ اوہ اپنی حکمت مطابق اپنا مقصد پورا کرے گا تاکہ سانوں شان ملے۔
8 ایس حکمت نُوں دُنیا دا کوئی وی حاکم نئیں سمجھ سکیا۔ جے اوہ سمجھ لیندے تے اوہ ساڈے عظیم مالک نُوں سُولی تے نہ چڑھاندے۔
9 جیویں کہ پاک کلام چ لکھیا اے: ”خدا نے اوہناں لوکاں لئی جیہڑے اوہدے نال پیار کردے نیں، ایہو جہیاں چیزاں دا اِنتظام کیتا جیہڑیاں نہ تے کسے نے ویکھیاں، نہ کسے نے سُنیاں* تے نہ ای کسے انسان نے اوہناں دا تصور کیتا۔“
10 پر خدا نے ایہہ گلاں اپنی پاک روح دے ذریعے ساڈے تے ظاہر کیتیاں کیونکہ پاک روح ساریاں گلاں نُوں ایتھوں تک کہ خدا دِیاں گہریاں گلاں نُوں وی ظاہر کردی* اے۔
11 کوئی وی انسان ایہہ نئیں جان سکدا کہ کسے دے دل چ کیہہ اے سگوں ہر انسان صرف اپنے دل دی گل جان دا اے۔ ایسے طرحاں کوئی وی انسان خدا دی سوچ نُوں نئیں جان سکدا سگوں صرف خدا دی پاک روح ای ظاہر کردی اے کہ اوہدی سوچ کیہہ اے۔
12 اَسی دُنیا دی سوچ مطابق نئیں چلدے سگوں خدا دی روح ساڈی رہنمائی کردی اے* تاکہ اَسی اوہناں گلاں نُوں سمجھ سکئے جیہڑیاں اوہنے ساڈے تے مہربانی کر کے سانوں سکھائیاں نیں۔
13 اَسی ایہہ گلاں دُوجیاں نُوں وی دَسنے آں۔ پر اَسی انسانی حکمت مطابق تلیم نئیں دیندے* سگوں اَسی پاک روح دے مطابق تلیم دینے آں* کیونکہ خدا دی روح نے سانوں سکھایا اے کہ اَسی خدا دِیاں گلاں کیویں سمجھائیے۔
14 جسمانی سوچ رکھن والا بندہ* اوہناں گلاں نُوں قبول نئیں کردا جیہڑیاں خدا دی روح نے ظاہر کیتیاں نیں کیونکہ ایہہ گلاں اوہدی نظر چ فضول نیں۔ اوہ بندہ ایہناں گلاں نُوں نئیں سمجھ سکدا کیونکہ ایہناں نُوں پَرکھن* لئی خدا دی پاک روح دی ضرورت ہوندی اے
15 جد کہ پاک روح دی رہنمائی مطابق چلن والا بندہ* ساریاں گلاں نُوں پَرکھدا* اے پر کوئی ہور بندہ اوہنوں نئیں پَرکھ* سکدا۔
16 جیویں کہ پاک کلام چ لکھیا اے کہ ”یہوواہ دی سوچ نُوں کون جان سکیا اے تاکہ اوہنوں تلیم دَوے؟“ پر اَسی مسیح ورگی سوچ رکھنے آں۔
فٹ نوٹ
^ یعنی شیطان دی بغاوت دے بعد۔
^ یونانی چ: ”نہ کسے اَکھ نے ویکھیاں، نہ کسے کن نے سُنیاں۔“
^ یونانی چ: ”جانچ دی۔“
^ یونانی چ: ”سانوں دُنیا دی روح نئیں سگوں خدا دی روح دِتی گئی اے۔“
^ یونانی چ: ”انسانی حکمت مطابق لفظ استمال نئیں کردے۔“
^ یاں، ”لفظ استمال کرنے آں۔“
^ یاں، ”اپنیاں خواہشاں مطابق چلن والا بندہ۔“
^ یاں، ”جانچن، سمجھن۔“
^ یاں، ”خدا دی سوچ رکھن والا بندہ۔“
^ یاں، ”چانچ دا، سمجھدا۔“
^ یاں، ”جانچ، سمجھ۔“
