یوحنا دی اِنجیل 15:1-27
15 ”مَیں انگور دی اصلی ویل آں جیہڑی میرے باپ نے لائی اے۔
2 اوہ میرے نال لگی ہر اوس ٹاہنی نُوں وڈھ دیندا اے جیہڑی پھل نئیں لیاندی۔ تے جیہڑی ٹاہنی پھل لیاندی اے، اوہ اوہنوں چنگی طرحاں چھانٹ کے صاف کردا اے تاکہ اوہ ہور وی پھل لیائے۔
3 تُسی اوہناں گلاں دی وجہ توں پہلاں ای پاک صاف او جیہڑیاں مَیں توانوں دَسیاں نیں۔
4 میرے نال اِک مُٹھ رہوو تے مَیں تواڈے نال اِک مُٹھ رہواں گا۔ جے اِک ٹاہنی انگور دی ویل نال نہ لگی ہوئے تے اوہ پھل نئیں دے سکدی۔ ایسے طرحاں جے تُسی میرے نال اِک مُٹھ نئیں رہوو گے تے تُسی وی پھل نئیں دے سکو گے۔
5 مَیں انگور دی ویل آں تے تُسی ٹاہنیاں او۔ جیہڑا بندہ میرے نال اِک مُٹھ رہندا اے تے مَیں اوہدے نال اِک مُٹھ رہنا واں، اوہ بوہت زیادہ پھل دیندا اے کیونکہ میرے بغیر تُسی کجھ وی نئیں کر سکدے۔
6 جیہڑا بندہ میرے نال اِک مُٹھ نئیں رہندا، اوہنوں سُٹ دِتا جائے گا جیویں اِک ٹاہنی نُوں سُٹیا جاندا اے تے اوہ سُک جاندی اے۔ تے لوک ایہناں سُکیاں ٹاہنیاں نُوں کٹھا کر کے اَگ چ ساڑ دیندے نیں۔
7 جے تُسی میرے نال اِک مُٹھ رہوو گے تے میریاں گلاں تواڈے دل چ رہن گیاں تے تُسی جو وی منگو گے، توانوں دِتا جائے گا۔
8 جے تُسی بوہت زیادہ پھل دَوو گے تے اپنے آپ نُوں میرے شاگرد ثابت کرو گے تے میرے باپ دی وڈیائی ہوئے گی۔
9 جیویں میرے باپ نے میرے نال پیار کیتا اے اونویں ای مَیں تواڈے نال پیار کیتا اے۔ تُسی میرے نال پیار دے ایس بندھن چ بجھے رہوو۔
10 جے تُسی میرے حکماں تے عمل کرو گے تے تُسی میرے نال پیار دے بندھن چ بجھے رہوو گے جیویں مَیں باپ دے حکماں تے عمل کرکے اوہدے نال پیار دے بندھن چ بجھیا رہنا واں۔
11 مَیں توانوں ایہہ گلاں ایس لئی دَسیاں نیں تاکہ توانوں وی اوہی خوشی ملے جیہڑی مینوں ملی اے تے تُسی خوشی نال بھر جاؤ۔
12 میرا حکم اے کہ تُسی اِک دُوجے نال اوسے طرحاں پیار کرو جیویں مَیں تواڈے نال پیار کیتا اے۔
13 ایس توں بوہتا پیار ہور کوئی نئیں کر سکدا کہ اوہ اپنے دوستاں لئی اپنی جان دے دَوے۔
14 جے تُسی میرے حکماں نُوں منو گے تے تُسی میرے دوست ہووو گے۔
15 ہُن توں مَیں توانوں غلام نئیں کہواں گا کیونکہ غلام نُوں نئیں پتہ ہوندا کہ اوہدا مالک کیہہ کردا اے سگوں مَیں توانوں دوست کہیا اے کیونکہ مَیں توانوں اوہ ساریاں گلاں دَس دِتیاں نیں جیہڑیاں مَیں اپنے باپ کولوں سُنیاں نیں۔
16 تُسی مینوں نئیں چُنیا سگوں مَیں توانوں چُنیا اے۔ مَیں توانوں ایس لئی چُنیا اے تاکہ تُسی ودھدے جاؤ تے پھل دیندے رہوو تے تواڈا پھل ہمیشاں قائم رہوے تاکہ تُسی میرے ناں توں باپ کولوں جو وی منگو، اوہ توانوں دَوے۔
17 مَیں توانوں ایہناں گلاں دا حکم ایس لئی دِتا اے تاکہ تُسی اِک دُوجے نال پیار کرو۔
18 جے دُنیا تواڈے نال نفرت کردی اے تے یاد رکھو کہ ایہنے تواڈے توں پہلاں میرے نال نفرت کیتی اے۔
19 جے تُسی دُنیا دے ہوندے تے دُنیا توانوں اپنیاں وانگوں پیار کردی۔ پر تُسی دُنیا دے* نئیں او سگوں مَیں توانوں دُنیا چوں چُن لیا اے۔ ایس لئی دُنیا تواڈے نال نفرت کردی اے۔
20 یاد رکھو کہ مَیں توانوں کہیا سی کہ غلام اپنے مالک توں وڈا نئیں ہوندا۔ جے لوکاں نے میرے اُتے ظلم کیتا اے تے اوہ تواڈے اُتے وی ظلم کرن گے۔ جے اوہناں نے میریاں گلاں تے عمل کیتا اے تے اوہ تواڈیاں گلاں تے وی عمل کرن گے۔
21 اوہ میرے ناں دی وجہ توں تواڈے خلاف ایہہ سب کجھ کرن گے کیونکہ اوہ اوہنوں نئیں جان دے جنہے مینوں گھلیا اے۔
22 جے مَیں آ کے اوہناں نُوں ایہہ گلاں نہ دَسدا تے اوہناں دا کوئی قصور نہ ہوندا۔ پر ہُن اوہناں کول اپنے گُناہ لئی کوئی بہانہ نئیں۔
23 جیہڑا میرے نال نفرت کردا اے، اوہ میرے باپ نال وی نفرت کردا اے۔
24 مَیں اوہناں دے سامنے اوہ کم کیتے جیہڑے کسے ہور نے نئیں کیتے۔ جے مَیں اِنج نہ کیتا ہوندا تے اوہناں دا کوئی قصور نہ ہوندا۔ پر اوہناں نے میرے کم ویکھ لئے نیں۔ فیر وی اوہ میرے نال تے باپ نال نفرت کردے نیں۔
25 پر ایہہ ایس لئی ہویا تاکہ اوہناں دی شریعت چ لکھی ایہہ گل پوری ہوئے: ”اوہناں نے بِلاوجہ میرے نال نفرت کیتی۔“
26 جدوں اوہ مددگار آئے گا جیہڑا مَیں اپنے باپ وَلّوں بھیجاں گا یعنی سچائی دی روح جیہڑی باپ وَلّوں آندی اے تے اوہ میرے بارے گواہی دے گی۔
27 تُسی وی میرے بارے گواہی دینی اے کیونکہ تُسی شروع توں میرے نال او۔“
فٹ نوٹ
^ یاں، ”دُنیا دا حصہ۔“
