گلتیوں دے ناں خط 4:1-31
4 ہُن مَیں توانوں کہنا واں کہ اِک وارث جدوں تک بچہ ہوندا اے، اوہ اِک غلام ورگا ہوندا اے۔ بھانویں کہ بچہ ساریاں چیزاں دا مالک ہوندا اے
2 پر اوہ اپنے پیو دے طے کیتے ہوئے دن تک اپنے نگراناں تے گھر دے مختاراں دے تابع رہندا اے۔
3 ایسے طرحاں جدوں اَسی بچے ساں، اَسی وی دُنیا دِیاں بنیادی گلاں دے غلام ساں۔
4 پر جدوں طے کیتا ہویا ویلا آ گیا تے خدا نے اپنے پُتر نُوں گھلیا جیہڑا اِک عورت توں شریعت دے تابع پیدا ہویا
5 تاکہ اوہ شریعت دے تابع لوکاں نُوں خرید کے ایہدے توں چھڈا سکے تے خدا سانوں اپنے پُتر بنا سکے۔
6 ہُن تُسی پُتر او، ایس لئی خدا نے اوہی پاک روح ساڈے دِلاں چ پائی اے جیہڑی اوہنے اپنے پُتر نُوں دِتی اے تے ایہی پاک روح سانوں خدا نُوں ”اَبا“ کہن دا حوصلہ دیندی اے۔
7 ایس لئی ہُن تُسی غلام نئیں سگوں پُتر او۔ جے تُسی پُتر او تے خدا نے توانوں وارث وی بنایا اے۔
8 جدوں تُسی خدا نُوں نئیں جان دے سو تے تُسی اوہناں دے غلام سو جیہڑے اصل چ خدا نئیں۔
9 پر ہُن تُسی خدا نُوں جان گئے او سگوں اوہ توانوں جان گیا اے تے فیر تُسی فضول، گھٹیا تے معمولی گلاں وَل واپس کیوں جا رہے او تے دُبارہ اوہناں دی غلامی کیوں کرنا چاہندے او؟
10 تُسی خاص دِناں، مہینیاں، موسمی تہواراں تے سالاں نُوں بڑی پابندی نال مناندے او۔
11 مینوں ڈر اے کہ مَیں تواڈے تے جیہڑی محنت کیتی اے، اوہ کِتے ضائع نہ ہو جائے۔
12 بھراوو، مَیں وی پہلاں تواڈے ورگا ساں۔ پر فیر مَیں بدل گیا۔ ایس لئی مَیں توانوں درخاست کرنا واں کہ تُسی وی میرے وانگوں بدل جاؤ۔ تُسی میرے نال کدی کجھ بُرا نئیں کیتا۔
13 پر توانوں پتہ اے کہ مینوں اپنی بیماری دی وجہ توں توانوں پہلی وار خوشخبری سُنان دا موقع ملیا۔
14 بےشک میری بیماری دی وجہ توں توانوں مشکلاں ہوئیاں۔ پر فیر وی تُسی میرے توں کرِیچ نئیں کھادی* تے نہ ای مینوں گھٹیا سمجھیا سگوں تُسی مینوں اِنج قبول کیتا جیویں تُسی خدا دے کسے فرشتے یاں مسیح یسوع نُوں قبول کردے۔
15 تواڈی اوہ خوشی ہُن کتھے گئی؟ مینوں پورا یقین اے کہ جے تواڈے لئی ممکن ہوندا تے تُسی مینوں اپنیاں اَکھاں کڈھ کے دے دیندے۔
16 پر کیہہ ہُن مَیں تواڈا دُشمن بن گیا واں کیونکہ مَیں توانوں سچ دَس رہیا واں؟
17 کجھ لوک توانوں اپنے وَل کِھچن دی کوشش کر رہے نیں۔ پر اوہناں دی نیت ٹھیک نئیں اے۔ اوہ توانوں میرے توں دُور کرنا چاہندے نیں تاکہ تُسی پورے دل نال اوہناں دے مغر ٹُرن لگ پووو۔
18 پر جے کوئی صرف میرے ہوندیاں ای نئیں سگوں میرے بعد وی صاف نیت نال توانوں اپنے وَل کِھچن دی کوشش کرے تے ایہہ چنگی گل اے۔
19 میرے پیارے بچیو، مَیں تواڈی خاطر اوہو جہیاں درداں محسوس کر رہیا واں جیہڑیاں اِک عورت نُوں بچہ پیدا کرن ویلے ہوندیاں نیں۔ مَیں ایہہ درداں اوہدوں تک سہندا رہواں گا جدوں تک تُسی مسیح ورگے نئیں بن جاندے۔
20 مَیں تواڈے لئی بوہت پریشان آں۔ کاش کہ مَیں ایس ویلے تواڈے نال ہوندا تے مینوں تواڈے نال اِنج گل نہ کرنی پیندی۔
21 تُسی جیہڑے شریعت دے تابع ہونا چاہندے او، کیہہ توانوں پتہ وی اے کہ شریعت چ کیہہ لکھیا اے؟
22 مثال لئی، ایہدے چ لکھیا اے کہ ابراہام دے دو پُتر سن۔ اِک غلام عورت توں پیدا ہویا تے اِک آزاد عورت توں۔
23 غلام عورت دا پُتر قدرتی طور تے پیدا ہویا سی۔ پر آزاد عورت دا پُتر خدا دے وعدے مطابق پیدا ہویا سی۔
24 ایہناں گلاں دا اِک ہور مطلب وی اے۔ ایہہ عورتاں دو عہداں وَل اشارہ کردیاں نیں۔ اِک عہد اوہ جیہڑا سینا دے پہاڑ تے کیتا گیا سی۔ ایہہ ہاجرہ وَل اشارہ کردا اے جدے توں پیدا ہون والی اولاد غلام اے۔
25 ہاجرہ سینا دے پہاڑ وَل اشارہ کردی اے جیہڑا عرب چ وے۔ اوہ اَجکل دے یروشلم وانگوں اے کیونکہ اوہ اپنے بچیاں سمیت غلام اے۔
26 پر جیہڑا یروشلم اسمان تے وے، اوہ آزاد اے تے اوہ ساڈی ماں اے۔
27 پاک کلام چ لکھیا اے: ”اَے بانجھ عورت، تُوں جدے بچے پیدا نئیں ہوئے، خوشیاں منا۔ اَے عورت، تُوں جنہوں بچے دی پیدائش دِیاں درداں نئیں لگیاں، اُچی آواز چ خوشی منا کیونکہ چھڈی ہوئی عورت دے بچے، شوہر والی عورت دے بچیاں نالوں بوہتے ہون گے۔“
28 بھراوو، اِضحاق وانگوں تُسی وی وعدے مطابق پیدا ہون والے بچے او۔
29 پر جیویں قدرتی طور تے پیدا ہون والا پُتر، پاک روح دے ذریعے پیدا ہون والے پُتر نُوں ستان لگ پیا سی اونویں ای اَج وی ہوندا اے۔
30 پر پاک کلام چ کیہہ لکھیا گیا اے؟ ”غلام عورت تے اوہدے پُتر نُوں کڈھ دے کیونکہ غلام عورت دا پُتر آزاد عورت دے پُتر نال وارث نئیں ہوئے گا۔“
31 ایس لئی بھراوو، اَسی غلام عورت دے بچے نئیں سگوں آزاد عورت دے بچے آں۔
فٹ نوٹ
^ یاں، ”میرے تے تُھکیا نئیں۔“
