مرقس دی اِنجیل 16:1-8
-
یسوع نُوں زندہ کر دِتا جاندا اے (1-8)
16 جدوں سبت دا دن لنگھ گیا تے مریم مگدلینی، یعقوب دی ماں مریم تے سلومی نے یسوع دی لاش تے لان لئی کجھ مصالحے خریدے۔
2 ہفتے دے پہلے دن* اوہ سویرے سویرے ٹُر پئیاں تے سورج نِکلن تک قبر تے پونچ گئیاں۔
3 راہ چ اوہ اِک دُوجے نُوں کہہ رہیاں سن: ”ساڈے لئی قبر دے مُونہہ توں پتھر کون ہٹائے گا؟“
4 پر جدوں اوہ اوتھے پونچیاں تے اوہناں نے ویکھیا کہ پتھر تے پہلاں ای ہٹیا ہویا اے بھانویں کہ اوہ بڑا وڈا پتھر سی۔
5 جدوں اوہ قبر دے اندر گئیاں تے اوہناں نے ویکھیا کہ سجے پاسے اِک جوان آدمی بیٹھا ہویا اے جنہے چِٹا چوغہ پایا ہویا اے۔ اوہنوں ویکھ کے اوہ بوہت ای حیران ہوئیاں۔
6 اوہنے اوہناں نُوں کہیا: ”حیران نہ ہووو۔ تُسی یسوع ناصری نُوں لبھ رہیاں او نا جنہوں سُولی* تے چڑھایا گیا سی۔ اوہنوں زندہ کر دِتا گیا اے۔ اوہ ایتھے نئیں اے۔ ویکھو اوہ جگہ جِتھے اوہنوں رکھیا گیا سی۔
7 جا کے اوہدے شاگرداں تے پطرس نُوں کہوو کہ ”یسوع تواڈے توں پہلاں گلیل پونچے گا۔ اوہ توانوں اوتھے ملے گا جیویں اوہنے کہیا سی۔““
8 فیر اوہ قبر توں باہر نکلیاں تے بھج گئیاں کیونکہ اوہ بوہت حیران تے گھبرائیاں ہوئیاں سن۔ اوہ اینیاں ڈریاں ہوئیاں سن کہ اوہناں نے کسے نُوں کجھ وی نہ دَسیا۔*
فٹ نوٹ
^ متی 28:1 دے فٹنوٹ نُوں ویکھو۔
^ ”لفظاں دی وضاحت“ نُوں ویکھو۔
^ مرقس دی اِنجیل دے بھروسےمند پُرانے نسخیاں دے مطابق ایہہ اِنجیل 8 ایت چ لکھی گل نال ختم ہو جاندی اے۔
