مرقس دی اِنجیل 1:1-45
-
یوحنا بپتسمہ دین والا مُنادی کردا اے (1-8)
-
یسوع دا بپتسمہ (9-11)
-
شیطان یسوع نُوں اَزماندا اے (12، 13)
-
یسوع گلیل چ مُنادی شروع کردا اے (14، 15)
-
یسوع اپنے پہلے شاگرداں نُوں بلاندا اے (16-20 )
-
یسوع اِک باغی فرشتے نُوں کڈھدا اے (21-28)
-
یسوع کفرنحوم چ بیماراں نُوں شفا دیندا اے (29-34)
-
یسوع اِک ویران جگہ تے دُعا کرن جاندا اے (35-39)
-
اِک کوڑھی نُوں شفا (40-45)
1 خدا دے پُتر یسوع مسیح بارے خوشخبری* ایہہ وے:
2 یسعیاہ نبی نے لکھیا: ”(ویکھ، مَیں اپنا پیغمبر تیرے اَگے اَگے بھیج رہیا واں جیہڑا تیرے لئی راہ تیار کرے گا۔ )
3 ویرانے چ کوئی اُچی آواز چ کہہ رہیا اے: ”یہوواہ* دا رستہ تیار کرو۔ اوہدیاں راہواں نُوں پدھرا کرو۔““
4 ایسے گل دے مطابق یوحنا بپتسمہ دین والا ویرانے چ آیا۔ اوہ ایہہ مُنادی کردا سی کہ لوکاں نُوں بپتسمہ لے کے ثابت کرنا چاہی دا اے کہ اوہناں نے گُناہواں توں توبہ کر لئی اے تاکہ اوہناں نُوں معافی ملے۔
5 ایس لئی یہودیہ دے پورے علاقے تے یروشلم دے سارے لوک یوحنا کول آن لگ پئے تے اوہناں نے ساریاں دے سامنے اپنے گُناہواں دا اِقرار کیتا تے یوحنا کولوں دریائےیردن چ بپتسمہ* لیا۔
6 یوحنا اُونٹھ دے والاں دے بنے ہوئے کپڑے پاندا سی تے کمر تے چمڑے دی پیٹی بنھدا سی۔ اوہ ٹڈیاں تے جنگلی شہد کھاندا سی۔
7 اوہ ایہہ مُنادی کر رہیا سی: ”جیہڑا میرے بعد آ رہیا اے، اوہدے کول میرے نالوں بوہتا اِختیار اے۔ مَیں تے جُھک کے اوہدی جُتی دے تسمے کھولن دے لائق وی نئیں۔
8 مَیں توانوں پانی نال بپتسمہ دینا واں۔ پر اوہ توانوں پاک روح نال بپتسمہ دَوے گا۔“
9 اوہناں دِناں چ یسوع گلیل دے شہر ناصرت توں آیا تے دریائےیردن چ یوحنا کولوں بپتسمہ لیا۔
10 تے جیویں ای اوہ پانی چوں باہر آیا، اوہنے اسمان نُوں کُھل دے تے خدا دی روح نُوں کبوتر دی شکل چ اپنے اُتے آندے ویکھیا۔
11 تے اسمان توں ایہہ آواز آئی: ”تُوں میرا پیارا پُتر ایں۔ مَیں تیرے توں خوش آں۔“
12 ایہدے فوراً بعد پاک روح یسوع نُوں اِک ویران جگہ تے لے گئی۔
13 یسوع 40 دن تک ویرانے چ رہیا جِتھے جنگلی جانور سن۔ اوتھے شیطان نے اوہنوں اَزمایا۔ پر فرشتیاں نے اوہدی خدمت کیتی۔
14 جدوں یوحنا نُوں گِرفتار کیتا گیا تے یسوع گلیل چلا گیا تے خدا دی خوشخبری دی مُنادی کردے ہوئیاں
15 ایہہ کہن لگ پیا: ”طے کیتا ہویا ویلا آگیا اے تے خدا دی بادشاہی نیڑے آ گئی اے۔ توبہ کرو تے خوشخبری تے ایمان لیاؤ۔“
16 گلیل دی جھیل دے کنارے ٹُردے ہوئیاں اوہنے شمعون* تے اوہدے بھرا اندریاس نُوں ویکھیا جیہڑے مچھیرے سن تے جھیل چ جال سُٹ رہے سن۔
17 یسوع نے اوہناں نُوں کہیا: ”میرے پچھے آؤ۔ مَیں توانوں مچھیاں دی بجائے انساناں نُوں جمع کرنا سکھانواں گا۔“
18 اوہ فوراً اپنے جال چھڈ کے اوہدے پچھے پچھے ٹُر پئے۔
19 تھوڑا اَگے جاکے اوہنے زبدی دے پُتراں یعقوب تے یوحنا نُوں ویکھیا۔ اوہ دونویں بھرا کشتی چ بیٹھے اپنے پیو نال جالاں دی مرمت کر رہے سن۔
20 اوہنے اوسے ویلے اوہناں نُوں بلایا۔ ایس لئی اوہ کشتی تے اپنے پیو زبدی نُوں ملازماں نال چھڈ کے یسوع دے پچھے پچھے ٹُر پئے۔
21 تے اوہ اوہدے نال کفرنحوم چلے گئے۔
جیویں ای سبت دا دن شروع ہویا یسوع عبادتگاہ چ جا کے تلیم دین لگ پیا۔
22 لوک اوہدے تلیم دین دے طریقے توں حیران رہ گئے کیونکہ اوہ شریعت دے عالماں وانگوں نئیں سگوں پورے اِختیار نال تلیم دے رہیا سی۔
23 عبادتگاہ چ اِک بندہ وی سی جنہوں اِک باغی فرشتہ چِمبڑیا ہویا سی۔ اوہنے اُچی ساری کہیا:
24 ”یسوع ناصری، تیرا ساڈے نال کیہہ واسطہ؟ کیہہ تُوں سانوں تباہ کرن آیا ایں؟ مینوں چنگی طرحاں پتہ اے کہ تُوں کون ایں۔ تُوں خدا دا پاک خادم ایں۔“
25 پر یسوع نے باغی فرشتے نُوں جِھڑکیا تے کہیا: ”چپ کر تے ایہدے چوں نکل جا۔“
26 فیر باغی فرشتے نے اوس بندے نُوں مروڑیا تے اُچی ساری چیکاں ماردا ہویا اوہدے چوں نکل گیا۔
27 ایہہ ویکھ کے لوک اینے حیران ہوئے کہ اوہ آپس چ کہن لگ پئے: ”ایہہ تے بڑی عجیب گل اے۔ ایس بندے دا تلیم دین دا طریقہ تے بالکل نواں اے۔ ایہہ تے بڑے اِختیار نال باغی فرشتیاں نُوں وی حکم دیندا اے تے اوہ ایہدی گل من دے نیں۔“
28 چھیتی ای گلیل دے سارے علاقے چ یسوع بارے چرچا ہون لگ پیا۔
29 فیر اوہ عبادتگاہ چوں نکلے تے شمعون تے اندریاس دے گھر گئے۔ یعقوب تے یوحنا وی اوہناں دے نال سن۔
30 شمعون دی سّس منجی تے لیٹی ہوئی سی کیونکہ اوہنوں بخار چڑھیا ہویا سی۔ اوہناں نے فوراً یسوع نُوں اوہدے بارے دَسیا۔
31 یسوع اوہدے کول گیا تے اوہدا ہتھ پھڑ کے اوہنوں بیٹھایا تے اوہدا بخار اُتر گیا۔ تے اوہ اوہناں دی خدمت کرن لگ پئی۔
32 شام نُوں سورج ڈُبن دے بعد لوک سارے بیماراں تے اوہناں لوکاں نُوں یسوع کول لے کے آئے جنہاں نُوں باغی فرشتے چِمبڑے ہوئے سن۔
33 ایتھوں تک کہ سارا شہر دروازے تے جمع ہو گیا۔
34 اوہنے طرحاں طرحاں دے بیماراں نُوں ٹھیک کیتا تے بوہت سارے لوکاں چوں باغی فرشتیاں نُوں کڈھیا۔ باغی فرشتیاں نُوں پتہ سی کہ اوہ مسیح اے۔* ایس لئی یسوع نے اوہناں نُوں بولن نہ دِتا۔
35 سویرے سویرے جدوں حالے نھیرا ای سی، یسوع اُٹھ کے باہر اِک سنسان جگہ تے چلا گیا تے دُعا کرن لگ پیا۔
36 پر شمعون تے اوہدے ساتھی اوہنوں لبھدے لبھدے آئے
37 تے جدوں یسوع اوہناں نُوں مِل گیا تے اوہناں نے کہیا: ”سارے تینوں لبھ رہے نیں۔“
38 پر یسوع نے اوہناں نُوں کہیا: ”آؤ، اَسی آلے دَوالے دے پِنڈاں چ چلئے تاکہ مَیں اوتھے وی مُنادی کر سکاں کیونکہ مَیں ایسے لئی آیا واں۔“
39 فیر اوہنے گلیل دِیاں ساریاں عبادتگاہواں چ جاکے مُنادی کیتی تے لوکاں وچوں باغی فرشتے کڈھے۔
40 فیر اِک کوڑھی اوہدے کول آیا تے اوہنے گوڈے ٹیک کے اوہدے اَگے مِنت کیتی: ”جے تُوں چاہویں تے تُوں مینوں ٹھیک کر سکنا ایں۔“
41 یسوع نُوں اوہدے تے بڑا ترس آیا تے اوہنے اپنا ہتھ ودھا کے اوہنوں چُھویا تے کہیا: ”ہاں، مَیں چاہنا واں۔ تُوں ٹھیک ہو جا۔“
42 اوسے ویلے اوہدا کوڑھ غائب ہو گیا تے اوہ ایس بیماری توں پاک ہو گیا۔
43 فیر یسوع نے اوہنوں گھلن توں پہلاں سختی نال ہدیت کیتی
44 تے کہیا: ”سُن، کسے نُوں ایہہ گل نہ دَسیں سگوں جا کے اپنے آپ نُوں کاہن نُوں وکھا تے پاک ہون دی وجہ توں موسیٰ دی شریعت دے مطابق نذرانہ پیش کر تاکہ کاہناں نُوں پتہ چل جائے کہ تُوں ٹھیک ہو گیا ایں۔“
45 پر اوہنے جاکے ساریاں نُوں ایہہ گل دَس دِتی۔ تے ایہہ گل اینی پھیلا دِتی کہ یسوع لئی کُھلے عام کسے شہر چ جانا مشکل ہو گیا۔ ایس لئی اوہ ویران تھانواں چ ای رہیا۔ پر لوک فیر وی سارے پاسیوں اوہدے کول آندے رہے۔
فٹ نوٹ
^ یونانی چ: ”خوشخبری دی شروعات۔“
^ ”لفظاں دی وضاحت“ نُوں ویکھو۔
^ یاں، ”ڈُبکی لئی۔“
^ پطرس رسول دا اِک ہور ناں۔
^ یاں شاید، ”اوہناں نُوں پتہ سی کہ اوہ کون اے۔“
