متی دی اِنجیل 10:1-42
10 فیر یسوع نے اپنے 12 شاگرداں نُوں سّدیا تے اوہناں نُوں لوکاں چوں باغی فرشتیاں نُوں کڈھن دا اِختیار دِتا تے ہر طرحاں دی بیماری تے معذوری نُوں ٹھیک کرن دی طاقت وی دِتی۔
2 ایہناں 12 رسولاں دے ناں ایہہ نیں: شمعون جنہوں پطرس* وی کہیا جاندا اے تے اوہدا بھرا اندریاس؛ یعقوب تے یوحنا جیہڑے زبدی دے پُتر سن؛
3 فِلپّس تے برتُلمائی،* توما تے متی* جیہڑا ٹیکس لیندا سی؛ یعقوب جیہڑا حلفئی دا پُتر سی تے تدی؛*
4 شمعون قنانی* تے یہوداہ اسکریوتی جنہے بعد چ دھوکھے نال یسوع نُوں دُشمناں دے حوالے کر دِتا۔
5 یسوع نے ایہناں 12 رسولاں نُوں ایہہ ہدیتاں دے کے لوکاں کول گھلیا:”تُسی غیریہودیاں دے کسے علاقے چ نہ جانا تے نہ ای سامریاں دے کسے شہر چ جانا۔
6 تُسی صرف اِسرائیل دے گھرانے دِیاں گواچیاں ہوئیاں بھیڈاں کول جانا۔
7 راہ چ جاندے جاندے تُسی ایہہ مُنادی کرنا: ”اسمان دی بادشاہی نیڑے آ گئی اے۔“
8 بیماراں تے کوڑھیاں نُوں ٹھیک کرنا، مُردیاں نُوں زندہ کرنا تے لوکاں چوں باغی فرشتیاں نُوں کڈھنا۔ توانوں مُفت ملیا اے، تُسی وی مُفت دینا۔
9 تُسی اپنے لئی* سونے، چاندی یاں تانبے دے سِکّے جمع نہ کرنا
10 تے نہ ای اپنے نال سفر چ دو کُرتے،* جُتی، ڈانگ یاں کھانے دا تھیلا لے کے جانا کیونکہ مزدور کھانے دا حقدار ہوندا اے۔
11 جدوں وی تُسی کسے شہر یاں پِنڈ چ جاؤ تے اوتھے اوس انسان نُوں لبھو جیہڑا توانوں تے تواڈے پیغام نُوں قبول کرے* تے اوہدے نال اوہدوں تک رہوو جدوں تک تُسی اوتھوں چلے نئیں جاندے۔
12 جدوں تُسی کسے گھر جاؤ تے گھر دے جیاں نُوں سلام کرو۔
13 جے اوس گھر دے جی تواڈے پیغام نُوں قبول کرن گے تے اوہناں نُوں اوہ سلامتی ملے گی جیہڑی تُسی اوہناں لئی چاہندے او۔ پر جے اوہ قبول نئیں کرن گے تے جیہڑی سلامتی تُسی اوہناں لئی چاہندے سو، اوہ تواڈے کول ای رہوے گی۔
14 جیہڑے گھر یاں شہر دے لوک توانوں یاں تواڈے پیغام نُوں قبول نہ کرن، اوتھوں جاندے ویلے اپنے پیراں توں مٹی جھاڑ دیو۔
15 مَیں توانوں سچ کہنا واں کہ عدالت دے دن اوہ شہر سدوم تے عمورہ نالوں بوہتا سزا دے لائق ہوئے گا۔
16 ویکھو! تُسی بھیڈاں وانگوں او تے مَیں توانوں بھیڑیاں دے وچ بھیج رہیا واں۔ ایس لئی سَپاں وانگوں ہوشیار تے کبوتراں وانگوں بھولے بنو۔
17 لوکاں توں خبردار رہوو کیونکہ اوہ توانوں عدالتاں وچ گھسیٹن گے تے عبادتگاہواں وچ کُٹن گے۔*
18 میری وجہ توں توانوں حاکماں تے بادشاہواں دے سامنے پیش کیتا جائے گا تاکہ اوہناں نُوں تے قوماں نُوں گواہی ملے۔
19 پر جدوں اوہ توانوں پھڑوان تے فکر نہ کرنا کہ تُسی کیہہ کہوو گے تے کیویں کہوو گے کیونکہ توانوں اوس ویلے ہدیت مِل جائے گی کہ تُسی کیہہ کہنا اے
20 کیونکہ بولن والے صرف تُسی نئیں ہووو گے سگوں تواڈے اسمانی باپ دی روح تواڈے ذریعے گل کرے گی۔
21 نالے بھرا بھرا نُوں تے پیو پُتر نُوں پھڑوائے گا تاکہ اوہ ماریا جائے تے بچے اپنے ماں پیو دے خلاف ہو جان گے تے اوہناں نُوں مروان گے۔
22 میرے ناں دی وجہ توں سارے لوک تواڈے توں نفرت کرن گے۔ پر جیہڑا آخر تک اپنے ایمان تے ڈٹیا رہوے گا، اوہ نجات پائے گا۔
23 جدوں اوہ اِک شہر چ تواڈے تے ظلم کرن تے تُسی دُوجے شہر بھج جانا کیونکہ مَیں توانوں سچ کہنا واں کہ تُسی اِسرائیل دے سارے شہراں چ حالے مُنادی دا کم پورا وی نئیں کیتا ہوئے گا کہ انسان دا بیٹا* آ جائے گا۔
24 شاگرد اپنے اُستاد توں وڈا نئیں ہوندا تے نہ غلام اپنے مالک توں وڈا ہوندا اے۔
25 ایناں ای بوہت اے کہ شاگرد اپنے اُستاد ورگا تے غلام اپنے مالک ورگا بنے۔ جے لوکاں نے گھر دے مالک نُوں بعلزبُول* کہیا اے تے سوچو کہ اوہ گھر دے جیاں نُوں کیہہ کہن گے؟*
26 ایس لئی لوکاں توں نہ ڈرو کیونکہ جیہڑی وی چیز تے پردہ پیا ہویا اے، اوہنوں بےپردہ کیتا جائے گا تے جیہڑی وی گل راز چ وے، اوہنوں ظاہر کیتا جائے گا۔
27 جیہڑی وی گل مَیں توانوں نھیرے چ دَسنا واں اوہنوں چانن چ دَسو تے جیہڑی وی گل مَیں توانوں کن چ کہنا واں اوہدا کوٹھے تے چڑھ کے چرچا* کرو۔
28 اوہناں لوکاں توں نہ ڈرو جیہڑے توانوں جانوں تے مار سکدے نیں پر تواڈے کولوں مستقبل چ مِلن والی زندگی نئیں کھو سکدے* سگوں اوہدے کولوں ڈرو جیہڑا توانوں ہنوم دی وادی* چ پا کے پوری طرحاں تباہ کر سکدا اے۔
29 کیہہ دو چڑیاں اِک پیسے دِیاں نئیں وِک دِیاں؟ پر فیر وی اِنج کدی نئیں ہو سکدا کہ اوہناں وچوں اِک چڑی زمین تے ڈِگے تے تواڈے اسمانی باپ نُوں پتہ نہ لگے
30 سگوں اوہنوں تے ایہہ وی پتہ اے کہ تواڈے سِر تے کِنّے وال نیں۔
31 ایس لئی ڈرو نہ، تُسی تے بوہت ساریاں چڑیاں نالوں زیادہ قیمتی* او۔
32 تے فیر جیہڑا بندہ انساناں دے سامنے مینوں قبول کردا اے، اوہ میرا شاگرد اے تے مَیں وی اپنے اسمانی باپ دے سامنے اوہنوں قبول کراں گا۔
33 پر جیہڑا انساناں دے سامنے میرا شاگرد ہون توں انکار کردا اے، مَیں وی اپنے اسمانی باپ دے سامنے اوہنوں قبول کرن توں انکار کراں گا۔
34 ایہہ نہ سوچو کہ مَیں زمین تے امن قائم کرن لئی آیا واں، مَیں امن نئیں سگوں تلوار لے کے آیا واں۔
35 مَیں پیو پُتر وچ، ماں دھی وچ تے نُونہہ سّس وچ پُھٹ پان لئی آیا واں۔
36 اصل چ اِک بندے دے دُشمن اوہدے اپنے ای گھر دے جی ہون گے۔
37 جیہڑا انسان اپنی ماں یاں اپنے پیو نُوں میرے نالوں بوہتا پیار کردا اے، اوہ میرے لائق نئیں تے جیہڑا انسان اپنے پُتر یاں اپنی دھی نُوں میرے نالوں بوہتا پیار کردا اے، اوہ میرے لائق نئیں۔*
38 نالے جیہڑا اپنی سُولی* چُک کے میرے پچھے پچھے نئیں چلدا، اوہ میرے لائق نئیں۔
39 جیہڑا انسان اپنی جان بچان دی کوشش کردا اے، اوہ ایہنوں گنوا بیٹھے گا۔ پر جیہڑا انسان میری خاطر اپنی جان گنواندا اے، اوہ ایہنوں بچا لوَے گا۔
40 جیہڑا توانوں قبول کردا اے، اوہ مینوں وی قبول کردا اے تے جیہڑا مینوں قبول کردا اے، اوہ اوہنوں وی قبول کردا اے جنہے مینوں گھلیا اے۔
41 جیہڑا اِک نبی نُوں نبی ہون دی وجہ توں قبول کردا اے، اوہنوں نبی ورگا اَجر ملے گا۔ تے جیہڑا اِک نیک انسان نُوں نیک ہون دی وجہ توں قبول کردا اے، اوہنوں نیک انسان ورگا اَجر ملے گا۔
42 مَیں توانوں سچ کہنا واں کہ جیہڑا بندہ میرے ایہناں شاگرداں* وچوں کسے اِک نُوں بس اِک پیالہ ٹھنڈا پانی ایس لئی پیاندا اے کیونکہ اوہ میرا شاگرد اے تے اوہنوں اوہدا اَجر ضرور ملے گا۔“
فٹ نوٹ
^ بائبل چ پطرس نُوں ایہناں فرق فرق ناواں نال بلایا گیا اے: شمعون،کیفا، پطرس تے شمعون پطرس۔
^ برتُلمائی نُوں نتنایل وی کہیا جاندا اے۔
^ متی نُوں لاوی وی کہیا جاندا اے۔
^ تدی نُوں ”یعقوب دا پُتر یہوداہ“ وی کہیا جاندا اے۔
^ یاں، ”جوشیلا۔“
^ یاں، ”اپنی تھیلی چ۔“
^ یاں، ”اِک ہور کُرتا۔“
^ یونانی چ: ”جیہڑا لائق ہووے۔“
^ یاں، ”کوڑے مارن گے۔“
^ ”لفظاں دی وضاحت“ نُوں ویکھو۔
^ ایہہ باغی فرشتیاں دے سردار یعنی شیطان دا اِک لقب اے۔
^ یاں، ”اوہدے گھر دے جیاں نُوں وی ایہی کہن گے۔“
^ یاں، ”مُنادی کرو۔“
^ یونانی چ: ”جیہڑے جسم نُوں تے مار سکدے نیں پر جان نُوں تباہ نئیں کر سکدے۔“
^ ”لفظاں دی وضاحت“ نُوں ویکھو۔
^ یاں، ”اہم۔“
^ یاں، ”میرا شاگرد بنن دے لائق نئیں۔“
^ ”لفظاں دی وضاحت“ نُوں ویکھو۔
^ یونانی چ:” چھوٹیاں۔“
