لُوقا دی اِنجیل 24:1-53
24 فیر ہفتے دے پہلے دن سویرے سویرے اوہ تیار کیتے ہوئے مصالحے لے کے قبر تے آئیاں۔
2 پر اوتھے پونچ کے اوہناں نے ویکھیا کہ کسے نے قبر دے مُونہہ توں پتھر ہٹا دِتا اے۔
3 جدوں اوہ قبر دے اندر گئیاں تے مالک یسوع دی لاش اوتھے نئیں سی۔
4 ایہہ ویکھ کے اوہ پریشان ہو گئیاں تے ویکھو! اوتھے دو آدمی کھلوتے ہوئے سن جنہاں دے کپڑے چمک رہے سن۔
5 اوہناں نُوں ویکھ کے اوہ عورتاں بوہت ڈر گئیاں تے اوہناں نے اپنے سِر جھکا لئے۔ ایس لئی اوہناں آدمیاں نے اوہناں نُوں کہیا: ”جیہڑا زندہ ہو گیا اے، تُسی اوہنوں مُردیاں چ کیوں لبھ رہیاں او؟
6 اوہ ایتھے نئیں اے سگوں اوہنوں زندہ کر دِتا گیا اے۔ یاد کرو کہ جدوں اوہ گلیل چ سی تے اوہنے توانوں کہیا سی
7 کہ انسان دے بیٹے نُوں گُناہگار لوکاں دے حوالے کیتا جائے گا تے اوہ اوہنوں سُولی تے چڑھا کے مار دین گے پر تیجے دن اوہ زندہ ہو جائے گا۔“
8 فیر اوہناں عورتاں نُوں یسوع دِیاں گلاں یاد آئیاں
9 تے اوہناں نے قبر توں واپس آ کے ایہہ ساریاں گلاں 11 رسولاں تے باقی شاگرداں نُوں دَسیاں۔
10 اوہناں عورتاں چ مریم مگدلینی، یوانہ تے یعقوب دی ماں مریم وی شامل سی۔ اوہناں دے نال ہور عورتاں وی سن جنہاں نے ایہہ گلاں رسولاں نُوں دَسیاں۔
11 پر اوہناں نُوں عورتاں دِیاں گلاں بےکار لگیاں تے اوہناں نے عورتاں دا یقین نہ کیتا۔
12 پر پطرس اُٹھیا تے بھج کے قبر تے گیا۔ جدوں اوہنے جُھک کے قبر دے اندر ویکھیا تے اوہنوں اوتھے صرف لیلن دِیاں پٹیاں نظر آئیاں۔ ایس لئی اوہ اوتھوں چلا گیا تے ایہناں گلاں بارے سوچدا رہیا۔
13 پر ویکھو، اوسے دن دو شاگرد اِماؤس وَل جا رہے سن۔ ایہہ پِنڈ یروشلم توں تقریباً 11 کلومیٹر* دُور اے۔
14 اوہ آپس چ اوہناں ساریاں گلاں بارے گل بات کر رہے سن جیہڑیاں ہوئیاں سن۔
15 اوہ حالے ایہہ گل بات کر ای رہے سن کہ یسوع آ کے اوہناں دے نال نال ٹُرن لگ پیا۔
16 شاگرداں نے اوہنوں ویکھیا، پر اوہنوں پچھان نہ سکے۔
17 اوہنے اوہناں نُوں کہیا: ”تُسی ٹُردے ٹُردے آپس چ کیہڑیاں گلاں کر رہے او؟“ اوہ رُک گئے۔ اوہ بوہت دُکھی لگ رہے سن۔
18 اوہناں وچوں اِک شاگرد جدا ناں کلیُپاس سی، اوہنے کہیا: ”کیہہ تُوں پردیسی ایں؟ کیہہ تُوں یروشلم چ نئیں رہندا جیہڑا تینوں نئیں پتہ کہ پچھلے دِناں چ اوتھے کیہہ کیہہ ہویا اے؟“
19 اوہنے اوہناں نُوں پچھیا: ”کیہہ ہویا اے؟“ اوہناں نے کہیا: ”بوہت کجھ ہویا، یسوع ناصری اِک بوہت وڈا نبی ثابت ہویا کیونکہ اوہنے خدا دے حضور تے لوکاں دے سامنے معجزے کیتے تے ودھیا تلیم دِتی۔
20 پر ساڈے وڈے کاہناں تے مذہبی رہنماواں نے اوہنوں موت دی سزا دَوان لئی پھڑوا دِتا تے اوہنوں سُولی تے کِلّاں نال ٹنگ دِتا گیا۔
21 پر سانوں امید سی کہ اوہ اِسرائیل نُوں نجات دَوائے گا تے اَج ایہناں گلاں نُوں تیجا دن اے۔
22 ایہدے علاوہ یسوع تے ایمان رکھن والیاں کجھ عورتاں دِیاں گلاں نے وی سانوں حیران کر دِتا اے کیونکہ جدوں اوہ سویرے سویرے یسوع دی قبر تے گئیاں
23 تے اوہناں نے ویکھیا کہ اوتھے اوہدی لاش نئیں اے۔ اوہناں نے واپس آ کے ایہہ وی دَسیا کہ اوہناں نُوں فرشتے نظر آئے نیں جنہاں نے کہیا کہ یسوع زندہ ہو گیا اے۔
24 فیر ساڈے کجھ ساتھی وی قبر تے گئے تے اوہناں نے ویکھیا کہ عورتاں نے بالکل صحی کہیا سی تے ساڈے ساتھیاں نُوں وی یسوع نظر نئیں آیا۔“
25 ایس لئی اوہنے اوہناں نُوں کہیا: ”کیہہ توانوں حالے تک سمجھ نئیں آئی؟ تُسی نبیاں دِیاں گلاں تے دِلوں یقین کرن چ دیر کیوں کر رہے او؟
26 کیہہ مسیح لئی ایہہ سب کجھ سہنا لازمی نئیں سی تاکہ اوہنوں شان ملے؟“
27 فیر اوہنے موسیٰ تے نبیاں دِیاں گلاں توں شروع کیتا تے اوہناں نُوں اپنے بارے پاک کلام چ لکھیاں ساریاں گلاں دا مطلب سمجھایا۔
28 فیر جدوں اوہ اوس پِنڈ دے نیڑے پونچے تے یسوع دِیاں گلاں توں اوہناں نُوں لگیا کہ اوہ اوس پِنڈ توں اَگے جا رہیا اے۔
29 پر اوہناں نے زور دے کے اوہنوں کہیا: ”اَج ساڈے نال ٹھہر جا کیونکہ دن ڈھل رہیا اے تے شام ہون والی اے۔“ ایس لئی اوہ اوہناں نال چلا گیا۔
30 جدوں اوہ کھانا کھان بیٹھے تے اوہنے روٹی لے کے دُعا کیتی تے توڑ کے اوہناں نُوں دِتی۔
31 اوس ویلے اوہناں دِیاں اَکھاں پوری طرحاں کُھل گئیاں تے اوہناں نے یسوع نُوں پچھان لیا۔ پر اوہ اوہناں دے سامنیوں غائب ہو گیا۔
32 اوہ اِک دُوجے نُوں کہن لگ پئے: ”جدوں اوہ سانوں راہ چ پاک کلام چ لکھیاں گلاں دا مطلب کھول کے سمجھا رہیا سی تے کیہہ ساڈے دل جوش نال بھر نئیں گئے سن؟“
33 اوہ اوسے ویلے اُٹھ کے یروشلم واپس چلے گئے۔ اوہناں نے ویکھیا کہ 11 رسول تے باقی شاگرد کٹھے نیں
34 جیہڑے آپس چ ایہہ گل کر رہے سن کہ ”مالک نُوں سچ مچ زندہ کر دِتا گیا اے تے اوہ شمعون پطرس تے ظاہر ہویا اے۔“
35 فیر اوہناں دونواں شاگرداں نے دَسیا کہ راہ چ کیہہ ہویا سی تے جدوں یسوع نے روٹی توڑی سی تے اوہناں نے اوہنوں پچھان لیا سی۔
36 اوہ ایہہ گلاں کر ای رہے سن کہ یسوع آ کے اوہناں دے وچکار کھلو گیا تے اوہناں نُوں کہیا: ”سلامت رہوو۔“
37 پر ڈر دے مارے اوہناں دے ساہ سُک گئے کیونکہ اوہناں نُوں لگیا کہ اوہناں دے سامنے کوئی فرشتہ آ گیا اے۔
38 ایس لئی یسوع نے اوہناں نُوں کہیا: ”تُسی ایناں گھبرا کیوں رہے او تے تواڈے دل چ شک کیوں آ رہے نیں؟
39 ایہہ ویکھو میرے ہتھ تے پیر۔ مَیں ای آں۔ ذرا مینوں چُھو کے ویکھو کیونکہ اِک فرشتے دِیاں ہڈیاں تے گوشت نئیں ہوندا جیویں کہ میرا اے۔“
40 ایہہ کہہ کے یسوع نے اوہناں نُوں اپنے ہتھ تے پیر وکھائے۔
41 پر اوہ اینے خوش تے حیران سن کہ اوہناں نُوں یقین نئیں آ رہیا سی۔ ایس لئی یسوع نے اوہناں نُوں کہیا: ”کیہہ تواڈے کول کھان لئی کجھ ہے وے؟“
42 اوہناں نے اوہنوں بُھنی ہوئی مچھی دِتی
43 تے یسوع نے مچھی لے کے اوہناں دے سامنے کھادی۔
44 فیر اوہنے کہیا: ”یاد کرو کہ جدوں مَیں تواڈے نال ساں تے مَیں توانوں دَسیا سی کہ موسیٰ دی شریعت، نبیاں دِیاں کتاباں تے زبوراں چ میرے بارے جو کجھ وی لکھیا اے، اوہ ضرور پورا ہوئے گا۔“
45 فیر اوہنے اوہناں دی مدد* کیتی تاکہ اوہ پاک کلام چ لکھیاں گلاں نُوں چنگی طرحاں سمجھ سکن
46 تے اوہناں نُوں کہیا: ”پاک کلام چ لکھیا اے کہ مسیح نُوں تکلیف سہنی پئے گی تے تیجے دن اوہنوں مُردیاں چوں زندہ کیتا جائے گا
47 تے یروشلم توں شروع کر کے ساریاں قوماں چ اوہدے ناں تے ایہہ پیغام سُنایا جائے گا کہ لوکاں نُوں گُناہواں دی معافی حاصل کرن لئی توبہ کرنی چاہی دی اے۔
48 تُسی ایہناں گلاں دی گواہی دینی اے۔
49 مَیں توانوں اوہ نعمت دَواں گا جدا میرے باپ نے وعدہ کیتا اے۔ پر تُسی اوہدوں تک شہر چ رہنا جدوں تک تُسی اسمانوں مِلن والی طاقت نال بھر نئیں جاندے۔“
50 فیر اوہ اوہناں نُوں بیتعنیاہ تک لے گیا تے اپنے ہتھ چُک کے اوہناں نُوں برکت دِتی۔
51 جدوں اوہ اوہناں نُوں برکت دے رہیا سی تے اوہ ہولی ہولی شاگرداں توں دُور ہوندا گیا تے اوہنوں اسمان تے چُک لیا گیا۔
52 شاگرداں نے اوہدے اَگے سِر جُھکائے تے فیر بڑی خوشی خوشی یروشلم واپس چلے گئے۔
53 اوتھے اوہ ہر روز ہیکل چ جا کے خدا دی وڈیائی کردے رہے۔
فٹ نوٹ
^ یونانی چ: ”60 ستادیون۔“ 1 ستادیون 185 میٹر (تقریباً 607 فٹ) دے برابر سی۔
^ یونانی چ: ”اوہناں دے ذہن کھول دِتے۔“
