طِطُس دے ناں خط 1:1-16
1 خدا دے غلام تے یسوع مسیح دے رسول پولُس وَلّوں خط۔ خدا دے چُنے ہوئے لوکاں وانگوں میرا ایمان وی سچائی دے صحی علم مطابق اے جدے ذریعے خدا دی بندگی* کیتی جاندی اے
2 تے ایہدی بنیاد اوہ ہمیشاں دی زندگی اے جدا وعدہ خدا نے بوہت چِر پہلاں کیتا سی تے خدا جھوٹھ نئیں بول سکدا۔
3 اوہنے اپنے طے کیتے ہوئے ویلے تے مُنادی دے کم دے ذریعے اپنے کلام نُوں ظاہر کیتا۔ مینوں ایہہ کم ساڈے نجات دین والے خدا دے حکم نال ملیا اے۔
4 مَیں ایہہ خط اپنے چنگے* پُتر طِطُس نُوں لکھ رہیا واں جیہڑا میرے وانگوں ایمان دی راہ تے چل رہیا اے۔
میری دُعا اے کہ ساڈا باپ خدا تے ساڈا نجاتدہندہ مسیح یسوع تینوں عظیم رحمت تے سلامتی بخشن۔
5 مَیں تینوں کرِیٹ دے جزیرے تے ایس لئی چھڈیا سی تاکہ تُوں اوتھے وِگڑے ہوئے معاملیاں نُوں سدھاریں تے میری ہدیت مطابق شہرشہر جا کے بھراواں نُوں بزرگ مقرر کریں۔
6 اوس بھرا نُوں بزرگ مقرر کیتا جا سکدا اے جیہڑا اِلزام توں پاک ہووے، اِک بیوی دا شوہر ہووے، جدے بچے ایمان رکھن والے ہون تے اوہناں اُتے عیاشی یاں بغاوت کرن دا اِلزام نہ ہووے۔
7 اِک نگہبان خدا دا ذمےدار خادم ہوندا اے، ایس لئی اوہنوں اِلزام توں پاک ہونا چاہی دا اے۔ اوہنوں ضدی، گرم مزاج، شرابی تے ظالم نئیں ہونا چاہی دا تے نہ ای اوہنوں ناجائز فائدہ حاصل کرن دا لالچ رکھنا چاہی دا اے
8 سگوں اوہنوں مہماننواز، بھلائی نُوں پیار کرن والا، سمجھدار، نیک، وفادار تے اپنے آپ تے قابو رکھن والا ہونا چاہی دا اے۔
9 نالے اوہنوں بڑی مہارت نال خدا دے کلام دے عین مطابق تلیم دینی چاہی دی اے۔ اِنج اوہ صحی* تلیم دے کے دُوجیاں نُوں حوصلہ* دین دے قابل ہوئے گا تے جیہڑے ایس تلیم دے خلاف بولدے نیں اوہناں دی درستی وی کر سکے گا۔
10 کیونکہ بتھیرے ایہو جہے لوک نیں جیہڑے باغی تے دھوکھےباز نیں تے فضول گلاں کردے نیں۔ خاص طور تے اوہ جیہڑے ختنے دی رویت تے چلدے نیں۔
11 اوہناں دا مُونہہ بند کرنا ضروری اے کیونکہ اوہ اپنے ناجائز فائدے لئی لوکاں نُوں غلط تلیم دے رہے نیں تے اِنج اوہ پورے دے پورے خانداناں نُوں گمراہ کر رہے نیں۔
12 کرِیٹ دے رہن والے اِک نبی نے اپنے ای لوکاں بارے کہیا سی: ”کرِیٹ دے لوک ہمیشاں جھوٹھ بولدے نیں۔ اوہ خطرناک جنگلی جانور، نکمّے تے پیٹو ہوندے نیں۔“
13 ایہہ گل بالکل سچی اے۔ ایس لئی تُوں سختی نال اوہناں دی درستی کردا رہ تاکہ اوہناں دا ایمان مضبوط ہووے
14 تے اوہ یہودیاں دے قصے کہانیاں تے اوہناں لوکاں دے حکماں تے دھیان نہ دین جنہاں نے سچائی توں مُونہہ موڑ لیا اے۔
15 پاک لوکاں لئی ساریاں چیزاں پاک ہوندیاں نیں۔ پر ناپاک تے ایمان توں خالی لوکاں لئی کوئی وی چیز پاک نئیں ہوندی کیونکہ اوہناں دے ذہن تے ضمیر دونویں ناپاک ہوندے نیں۔
16 اوہ لوکاں دے سامنے خدا نُوں جانن دا دعویٰ تے کردے نیں، پر اوہناں دے کماں توں پتہ لگدا اے کہ اوہناں نے خدا توں مُونہہ موڑ لیا اے کیونکہ اوہ گھٹیا تے نافرمان نیں تے اوہ کوئی وی چنگا کم کرن دے لائق نئیں۔
فٹ نوٹ
^ یاں، ”پورے دل نال عبادت۔“
^ یونانی چ: ”سچے پُتر۔“
^ یاں، ”فائدےمند۔“
^ یاں، ”نصیحت۔“
