رومیوں دے ناں خط 7:1-25
7 ہُن مَیں اوہناں بھراواں نال گل کرنا چاہنا واں جیہڑے موسیٰ دی شریعت نُوں جان دے نیں۔ کیہہ توانوں نئیں پتہ کہ اِک بندہ اوہدوں تک شریعت دا پابند ہوندا اے جدوں تک اوہ زندہ اے؟
2 مثال لئی، اِک بیوی دا اپنے شوہر نال قانونی رشتہ اوہدوں تک قائم رہندا اے* جدوں تک اوہدا شوہر زندہ اے۔ پر جے اوہ مر جائے تے بیوی اپنے شوہر دی شریعت* توں آزاد ہو جاندی اے۔
3 ایس لئی جے اِک بیوی اپنے شوہر دے جیوندے جی کسے ہور آدمی نال شادی کردی اے تے اوہنوں بدچلن کہیا جاندا اے۔ پر جے اوہدا شوہر مر جاندا اے تے اوہ اوہدی شریعت توں آزاد ہو جاندی اے۔ ایس لئی جے اوہ کسے ہور آدمی نال شادی کردی اے تے اوہ بدچلن نئیں ہوندی۔
4 ایسے طرحاں میرے بھراوو، مسیح دی قربانی دی وجہ توں تُسی موسیٰ دی شریعت توں آزاد ہو گئے او۔* ہُن تُسی کسے ہور دے ہو گئے او یعنی اوہدے جنہوں مُردیاں چوں زندہ کیتا گیا تاکہ اَسی سارے خدا دی خدمت کر سکئے۔*
5 جدوں اَسی اپنے جسم دِیاں خواہشاں دے مطابق چلنے ساں تے شریعت نے ظاہر کیتا کہ ساڈیاں غلط خواہشاں ساڈے جسم توں گُناہ کراندیاں نیں تے گُناہ دا انجام موت اے۔
6 شریعت نے سانوں قید کر کے رکھیا ہویا سی۔ پر ہُن اَسی شریعت توں آزاد ہو گئے آں تے اوہدے لحاظ نال مر گئے آں۔ ہُن اَسی خدا دی غلامی پرانے طریقے یعنی شریعت دے مطابق نئیں کردے سگوں نویں طریقے یعنی پاک روح دی رہنمائی مطابق کرنے آں۔
7 فیر کیہہ شریعت چ کوئی کمی اے؟* بالکل نئیں! جے شریعت نہ ہوندی تے مینوں پتہ ای نہ چلدا کہ گُناہ کیہہ اے۔ مثال لئی، جے شریعت چ ایہہ حکم ای نہ ہوندا کہ ”لالچ نہ کرِیں،“ تے مینوں پتہ ای نہ ہوندا کہ لالچ کیہہ اے۔
8 ایس حکم دے بغیر گُناہ مُردہ سی۔ پر شریعت دی وجہ توں گُناہ نے میرے اندر ہر طرحاں دا لالچ پیدا کر دِتا۔
9 اصل چ اِک وقت سی جدوں مَیں شریعت دے بغیر زندہ ساں۔ پر جدوں شریعت آئی تے گُناہ زندہ ہو گیا تے مَیں ”مر گیا۔“*
10 جیس شریعت دے ذریعے مینوں زندگی ملنی چاہی دی سی، اوہدے ذریعے مینوں موت ملی۔
11 ایس شریعت دی وجہ توں گُناہ نے مینوں غلط کم کرن تے اُکسایا تے مینوں مار دِتا۔
12 پر اصل چ شریعت پاک اے تے اوہدے حکم وی پاک، نیک تے چنگے نیں۔
13 فیر کیہہ ایہدا مطلب ایہہ وے کہ اِک چنگی چیز نے مینوں جانوں مار دِتا؟ بالکل نئیں! اصل چ گُناہ نے مینوں ماریا۔ شریعت تے چنگی اے پر ایہدے توں ظاہر ہویا کہ گُناہ کِنّاں بھیڑا اے کیونکہ ایہدا انجام موت اے۔
14 اَسی جاننے آں کہ شریعت خدا وَلّوں اے۔ پر مسئلہ ایہہ وے کہ میری سوچ جسمانی اے تے مینوں گُناہ دا غلام بنن لئی ویچ دِتا گیا اے۔
15 مینوں سمجھ نئیں آندی کہ مَیں جو کرنا واں، کیوں کرنا واں۔ مَیں جیہڑا کم کرنا چاہنا واں، اوہ نئیں کردا سگوں اوہ کم کرنا واں جدے توں مینوں نفرت اے۔
16 مینوں پتہ اے کہ شریعت چنگی اے۔ پر فیر وی مَیں اوہ کم کرنا واں جیہڑے مَیں نئیں کرنا چاہندا۔
17 اصل چ غلط کم کرن والا مَیں نئیں آں سگوں میرے اندر وَسیا ہویا گُناہ اے۔
18 مَیں جاننا واں کہ میرے اندر یعنی میرے گُناہگار جسم چ کوئی چنگی چیز نئیں اے۔ میرے اندر چنگے کم کرن دی خواہش تے ہے وے پر مَیں کر نئیں پاندا۔
19 مَیں اوہ چنگے کم نئیں کردا جیہڑے مَیں کرنا چاہنا واں سگوں اوہ بھیڑے کم کرنا واں جیہڑے مَیں نئیں کرنا چاہندا۔
20 ہُن جے مَیں اوہ کم کرنا واں جیہڑے نئیں کرنا چاہندا تے اوہ کم مَیں آپ نئیں کردا سگوں میرے اندر وَسیا ہویا گُناہ میرے کولوں کراندا اے۔
21 مَیں اپنے بارے ایس نتیجے تے پونچیا واں: مَیں صحی کم کرنا تے چاہنا واں پر میرے اندر گُناہ وَسیا ہویا اے۔
22 مَیں خدا دی شریعت* دی دِلوں قدر کرنا واں۔*
23 پر میرے اندر اِک لڑائی چل رہی اے۔ میری سوچ اُتے خدا دی شریعت دا اثر اے پر میرے جسم اُتے اِک ہور شریعت دا اثر اے یعنی گُناہ دی شریعت جیہڑی مینوں اپنا غلام بنا لیندی اے۔
24 مَیں کِنّاں بےبس آں! کون مینوں ایس جسم توں بچائے گا جیہڑا مینوں موت وَل لجا رہیا اے؟
25 مَیں خدا دا شکر کرنا واں کہ اوہ مینوں ساڈے مالک یسوع مسیح دے ذریعے بچائے گا۔ مَیں خدا دی شریعت دا غلام آں پر میرا جسم گُناہ دی شریعت دا غلام اے۔
فٹ نوٹ
^ یاں، ”اوہدوں تک اوہدے تابع رہندی اے۔“
^ یاں، ”اِختیار۔“
^ یونانی چ: ”مسیح دے جسم دے ذریعے تُسی شریعت دے لحاظ نال مر گئے۔“
^ یونانی چ: ”خدا لئی پھل لیائیے۔“
^ یونانی چ: ”کیہہ شریعت گُناہ اے؟“
^ ایس لحاظ نال مر گیا کیونکہ گُناہ دا انجام موت اے۔
^ یعنی خدا دے سارے قانون۔
^ یونانی چ: ”مینوں خدا دے حکماں توں دِلوں خوشی مِلدی اے۔“
