رومیوں دے ناں خط 5:1-21
5 ہُن سانوں ساڈے ایمان دی وجہ توں نیک ٹھہرا دِتا گیا اے۔ ایہہ ساڈے لئی بڑی خوشی دی گل اے کہ ساڈے مالک یسوع مسیح دے ذریعے خدا نال ساڈی صلح ہو گئی اے۔
2 یسوع تے ایمان رکھن دی وجہ توں اَسی خدا دے نیڑے جا سکنے آں تے ساڈے اُتے خدا دی عظیم رحمت ہوئی اے۔ ایس لئی آؤ، اَسی خوشی منائیے کیونکہ سانوں امید اے کہ خدا سانوں شاندار رُتبہ دَوے گا۔
3 نالے آؤ، اَسی اوہدوں وی خوش ہوئیے جدوں ساڈے تے مصیبتاں آندیاں نیں کیونکہ اَسی جاننے آں کہ مصیبتاں برداشت کرن دی وجہ توں صبر پیدا ہوندا اے،
4 صبر کرن والیاں توں خدا خوش ہوندا اے تے جدوں خدا ساڈے توں خوش ہوندا اے تے ساڈی امید پکی ہوندی اے
5 تے ایہہ امید ہر حال چ پوری ہوئے گی کیونکہ خدا نے سانوں پاک روح دے کے ساڈے دِلاں نُوں اپنی محبت نال بھر دِتا اے۔
6 جدوں اَسی بےسہارا* ساں تے مسیح نے طے کیتے ہوئے ویلے تے گُناہگاراں لئی اپنی جان دِتی۔
7 اِک نیک بندے لئی شاید ای کوئی اپنی جان دَوے۔ پر ہو سکدا اے کہ کوئی کسے ایہو جہے بندے لئی جان دین لئی تیار ہو جائے جیہڑا دِلوں چنگا اے۔*
8 پر خدا نے ساڈے لئی محبت اوہدوں ظاہر کیتی جدوں اَسی حالے گُناہگار ای ساں۔ ہاں، مسیح نے ساڈے لئی جان دِتی۔
9 مسیح دے خون دے ذریعے ای سانوں نیک ٹھہرایا گیا اے۔ ایس لئی ساڈا ایہہ یقین ہور وی پکا ہو گیا اے کہ اوہدے ذریعے اَسی خدا دے قہر توں بچ جاواں گے۔
10 جے خدا نے اپنے پُتر دی موت دے ذریعے ساڈے نال اوہدوں صلح کیتی جدوں اَسی اوہدے دُشمن ساں تے فیر ایہدے چ کوئی شک نئیں کہ خدا اپنے پُتر دی زندگی دے ذریعے سانوں نجات ضرور دَوے گا کیونکہ ہُن تے اَسی اوہدے دوست بن گئے آں۔
11 خدا نے ساڈے مالک یسوع مسیح دے ذریعے ساڈے لئی جو کجھ کیتا اے، اوہدی وجہ توں اَسی بوہت خوش آں کیونکہ ہُن خدا نال ساڈی صلح ہو گئی اے۔
12 اِک آدمی دے ذریعے گُناہ دُنیا چ آیا تے گُناہ دے ذریعے موت آئی تے موت سارے انساناں چ پھیل گئی کیونکہ ساریاں نے گُناہ کیتا۔
13 گُناہ شریعت توں پہلاں دُنیا چ آیا سی۔ پر جے شریعت نہ ہوندی تے کسے نُوں وی گُناہگار نہ سمجھیا جاندا۔
14 فیر وی موت نے آدم توں لے کے موسیٰ تک ساریاں تے حکمرانی کیتی۔ اوہناں تے وی جنہاں نے آدم ورگا وڈا گُناہ نئیں کیتا سی۔ آدم اِک لحاظ نال اوہدے ورگا سی جنہے بعد چوں آنا سی۔
15 پر خدا دی نعمت آدم دے گُناہ توں فرق اے کیونکہ اوہدے گُناہ دی وجہ توں بوہت سارے لوک مرے۔ پر خدا نے اِک ہور آدمی یعنی یسوع مسیح دے ذریعے بوہت سارے لوکاں تے عظیم رحمت کیتی تے اوہناں نُوں نعمت بخشی۔ اِنج یسوع مسیح دی رحمت دے ذریعے لوکاں نُوں بےشمار برکتاں ملیاں۔
16 نالے خدا دی نعمت آدم دے گُناہ توں ایس طرحاں وی فرق اے کہ گُناہ دی وجہ توں سارے انساناں نُوں قصوروار ٹھہرایا گیا۔ پر خدا دی نعمت دی وجہ توں انساناں نُوں نیک ٹھہرایا گیا بھانویں کہ اوہناں نے بوہت سارے گُناہ کیتے۔
17 جے اِک آدمی دے گُناہ دی وجہ توں موت نے حکمرانی کیتی تے اَسی ہور وی بھروسا رکھ سکنے آں کہ اِک آدمی یعنی یسوع مسیح دے ذریعے اوہ لوک ضرور زندگی پان گے تے حکمرانی کرن گے جنہاں تے خدا نے دل کھول کے عظیم رحمت کیتی اے تے ایہہ نعمت وی دِتی اے کہ اوہ اوہدیاں نظراں چ نیک ٹھہرن۔
18 جیویں اِک گُناہ دی وجہ توں ہر طرحاں دے لوکاں نُوں قصوروار ٹھہرایا گیا اوسے طرحاں اِک صحی کم دی وجہ توں ہر طرحاں دے لوکاں نُوں نیک ٹھہرایا گیا تاکہ اوہناں نُوں زندگی ملے۔
19 جیویں اِک آدمی دی نافرمانی دی وجہ توں بوہت سارے لوک گُناہگار بن گئے اوسے طرحاں اِک آدمی دی فرمانبرداری دی وجہ توں بوہت سارے لوک نیک ٹھہرائے جان گے۔
20 شریعت ایس لئی دِتی گئی سی تاکہ ایہہ ظاہر ہوئے کہ انسان کِنّے گُناہگار نیں۔ پر جیویں جیویں گُناہ ودھدا گیا، خدا دی عظیم رحمت ہور وی ودھدی گئی
21 تاکہ جیویں گُناہ تے موت نے حکمرانی کیتی اوسے طرحاں خدا دی عظیم رحمت وی* حکمرانی کرے۔ ایہدی وجہ توں ساڈے مالک یسوع مسیح دے ذریعے سانوں نیک ٹھہرایا جائے گا تے سانوں ہمیشاں دی زندگی ملے گی۔
فٹ نوٹ
^ یونانی چ: ”کمزور۔“
^ ایس ایت چ لفظ ”نیک“ دا اشارہ اِک ایہو جہے بندے وَل اے جیہڑا صحی کم کردا اے تے اپنے فرض پورے کردا اے۔ پر ”چنگا“ انسان دُوجیاں دے بھلے لئی ایس توں وی ودھ کے کردا اے۔
^ یونانی چ: ”عظیم رحمت وی نیکی دے ذریعے۔“
