پہلی غلطی:‏ کپڑیاں دے فیشن بارے میڈیا دے دباؤ چ آنا۔‏

 اِک کُڑی جدا ناں ٹریسا اے، کہندی اے:‏ ”‏کدی کدار مینوں کوئی فیشن ایس لئی چنگا لگدا اے کیونکہ اوہ بوہت ساریاں مشہوریاں چ وکھایا جاندا اے۔ جے توانوں پتہ ہوئے کہ اَج کل کپڑیاں دا فلاں فیشن چل رہیا اے تے فیر اوہ فیشن نہ کرنا تواڈے لئی بڑا مشکل ہو جاندا اے۔“‏

 مشہوریاں دا اثر صرف کُڑیاں تے ای نئیں ہوندا۔ اِک کتاب چ دَسیا گیا اے:‏ ”‏نویں نویں فیشناں دا اثر منڈُیاں تے وی ہوندا اے۔ فیشن دی مشہوری کرن والیاں کمپنیاں منڈُیاں نُوں وی اپنے وَل کھچن دی کوشش کردیاں نیں۔“‏

 پاک کلام دا اصول:‏ پاک کلام چ دَسیا گیا اے:‏ نادان ہر گل تے یقین کر لیندا اے پر ہوشیار آدمی ہر قدم سوچ سمجھ کے چُک دا اے۔ (‏امثال 14:‏15‏)‏ ایس اصول دے مطابق تُسی مشہوریاں چ جیہڑا وی فیشن ویکھدے او، اوہدے بارے سوچ وچار کرو۔ مثال لئی، جے تُسی کپڑیاں دی کوئی ایہو جہی مشہوری ویکھو جدے چ کہیا جاندا اے کہ اوہ کپڑے پا کے تواڈی ٹور ودھے گی تے سارے توانوں ویکھدے ای رہ جان گے، اوہدوں اپنے آپ کولوں ایہہ سوال پچھو:‏

•  ‏”‏جے مَیں ایس فیشن دے کپڑے پانواں گا تے ایہدے توں اصل چ کنہوں فائدہ ہوئے گا؟“‏

•  ‏”‏ایہو جہے کپڑے پان دی وجہ توں لوک میرے بارے کیہہ سوچن گے؟“‏

•  ‏”‏کیہہ میرا چال‌چلن واقعی اوہو جیہا اے جیہو جیہا ایس فیشن دے کپڑے پان توں ظاہر ہوئے گا؟“‏

 مشورہ:‏ اِک ہفتے تک کپڑیاں دِیاں مشہوریاں تے میڈیا تے وکھائے جان والے فیشن دا جائزہ لوو۔ سوچو کہ اوہ لوکاں چ کیہو جہی زندگی گزارن دی خواہش پیدا کر رہے نیں؟ کیہہ اوہ توانوں ایہہ احساس دَواندے نیں کہ توانوں اِک خاص قسم دا فیشن ضرور کرنا چاہی دا اے؟ کیرن ناں دی اِک نوجوان کُڑی کہندی اے:‏ ”‏ایس گل دا بڑا دباؤ ہوندا اے کہ تُسی بوہت خوب‌صورت نظر آؤ، تواڈے کپڑے وی سوہنے ہون تاکہ لوک تواڈے حسن دے عاشق ہو جان۔ تے مشہوریاں بنان والے ایسے گل دا فائدہ چُکدے ہوئیاں بڑی اسانی نال نوجواناں نُوں پھسا لیندے نیں۔“‏

دُوجی غلطی:‏ اِک فیشن ایس لئی کرنا تاکہ تُسی دُوجیاں ورگے نظر آؤ۔‏

 مینویل ناں دا اِک نوجوان کہندا اے:‏ ”‏جدوں کپڑیاں دا کوئی فیشن بڑا مشہور ہو جاندا اے تے ہر کوئی اوہ فیشن کرن لگ پیندا اے۔ جے تُسی اوہ فیشن نئیں کرو گے تے لوک تواڈے بارے گلاں کرن گے۔“‏ اِک نوجوان کُڑی اینا نے وی کہیا:‏ ”‏اصل چ گل فیشن دی نئیں ہوندی سگوں ایہہ ہوندی اے کہ کِتے اَسی دُوجیاں توں وَکھرے تے نئیں نظر آ رہے۔“‏

 پاک کلام دا اصول:‏ پاک کلام چ دَسیا گیا اے:‏ ایس زمانے دے طور طریقیاں دی نقل کرنا چھڈ دَوو۔ (‏رومیوں 12:‏2‏)‏ ایس مشورے نُوں ذہن چ رکھو تے اپنے آپ کولوں ایہہ سوال پچھو:‏

•  کپڑے پسند کردے ویلے میرے ذہن چ کیہڑیاں گلاں ہوندیاں نیں؟‏

•  میرے لئی کسے مشہور برانڈ دے کپڑے پانا کِنّاں اہم اے؟‏

•  کیہہ میں اپنے کپڑیاں توں دُوجیاں نُوں متاثر کرن دی کوشش کرنا واں؟‏

 مشورہ:‏ کپڑیاں بارے صرف ایہہ نہ سوچو کہ کپڑے نویں فیشن دے نیں یاں پرانے فیشن دے، سگوں ایس گل تے غور کرو کہ کیہہ ایہناں کپڑیاں نُوں پا کے تُسی محفوظ تے اپنے اندر اعتماد محسوس کردے او۔ جے توانوں اپنے آپ تے اعتماد ہووے گا تے فیر توانوں دُوجیاں ورگے نظر آن دی فکر نئیں ہوئے گی۔‏