جے تُسی بائبل دے معیاراں مطابق زندگی گزارن تے خدا نال اپنی دوستی نُوں مضبوط کرن دی کوشش کر رہے او تے فیر تُسی ضرور بپتسمہ لین بارے وی سوچ رہے ہووو گے۔ پر تُسی ایہہ کیویں جان سکدے او کہ تُسی ایہہ قدم چکن لئی تیار او یاں نئیں؟‏ a

ایس مضمون چ:‏

•  مینوں کِنّاں کجھ سکھن دی لوڑ اے؟‏

•  مینوں کیہہ کردے رہنا چاہی دا اے؟‏

•  دُوجے نوجواناں دی رائے

 بپتسمہ لین لئی توانوں بائبل دِیاں گلاں نُوں رٹن دی لوڑ نئیں جیویں سکول چ اِمتحان پاس کرن لئی کرنا پیندا اے۔ ایہدی بجائے توانوں اپنی سوچن سمجھن دی صلاحیت نُوں استمال کرن دی لوڑ اے تاکہ توانوں ایس گل دا یقین ہو جائے کہ بائبل چ جو کجھ وی دَسیا گیا اے، اوہ سچ اے۔ (‏رومیوں 12:‏1‏)‏ مثال لئی:‏

•   کیہہ توانوں پورا یقین اے کہ خدا ہے وے تے اوہ ساڈی عبادت دا حق‌دار اے؟‏

   بائبل چ لکھیا اے:‏ جیہڑا بندہ خدا دی عبادت کردا اے، اوہدے لئی ایہہ ایمان رکھنا ضروری اے کہ اوہ ہے وے تے اوہناں ساریاں نُوں اجر دَوے گا جیہڑے لگن نال اوہدی خدمت کردے نیں۔—‏عبرانیوں 11:‏6‏۔‏

   اپنے آپ کولوں پچھو:‏ ”‏مَیں خدا تے ایمان کیوں رکھنا واں؟“‏ (‏عبرانیوں 3:‏4‏)‏ ”‏مینوں اوہدی عبادت کیوں کرنی چاہی دی اے؟“‏—‏مکاشفہ 4:‏11‏۔‏

   ہور مدد لئی:‏ ایس ویڈیو نُوں ویکھو:‏ ‏”‏نوجواناں دی رائے—‏خدا دے وجود بارے۔“‏

•   کیہہ توانوں پورا یقین اے کہ بائبل خدا دا کلام اے؟‏

   بائبل چ لکھیا اے:‏ پاک صحیفیاں چ جو کجھ وی لکھیا اے، اوہ خدا دے الہام توں اے تے تلیم دین، درستی کرن، معاملیاں نُوں سدُھارن تے خدا دے معیاراں مطابق تربیت کرن لئی فائدےمند اے۔—‏2-‏تیمُتھیُس 3:‏16‏۔‏

   اپنے آپ کولوں پچھو:‏ ”‏مینوں ایس گل تے پورا یقین کیوں اے کہ بائبل چ انساناں دے خیال نئیں سگوں خدا دے خیال لکھے نیں؟“‏—‏یسعیاہ 46:‏10؛‏ 1-‏تھسلُنیکیوں 2:‏13‏۔‏

   ہور مدد لئی:‏ ایس مضمون نُوں ویکھو:‏ ”‏بائبل میری مدد کیویں کر سکدی اے؟—‏پہلا حصہ:‏ بائبل پڑھن دا شوق پیدا کرو۔‏‏“‏

•   کیہہ توانوں پورا یقین اے کہ یہوواہ اپنی مرضی پوری کرن لئی مسیحی کلیسیا نُوں استمال کر رہیا اے؟‏

   بائبل چ لکھیا اے:‏ کلیسیا تے مسیح یسوع دے ذریعے نسل در نسل تے ہمیشاں ہمیشاں تک اوہدی وڈیائی ہوئے۔—‏اِفِسیوں 3:‏21‏۔‏

   اپنے آپ کولوں پچھو:‏ ”‏جیہڑیاں گلاں عبادتاں تے سکھائیاں جاندیاں نیں، کیہہ میری نظر چ اوہ انساناں وَلّوں نیں یاں یہوواہ وَلّوں؟“‏ (‏متی 24:‏45‏)‏ جے تواڈے ماں پیو توانوں کلّے عبادت تے جان دی اجازت دیندے نیں تے فیر کیہہ تُسی اوہدوں وی جاندے او جدوں تواڈے ماں پیو کسے وجہ توں نئیں جا سکدے؟—‏عبرانیوں 10:‏24، 25‏۔‏

   ہور مدد لئی:‏ ایس مضمون نُوں ویکھو:‏ ”‏سانوں یہوواہ دے گواہواں دِیاں عبادتاں چ کیوں جانا چاہیدا اے۔‏‏“‏

 بپتسمہ لین لئی ایہہ ضروری نئیں اے کہ تواڈے کولوں کدی کوئی غلطی نہ ہوئے۔ پر ضروری ایہہ وے کہ تُسی دِلوں ظاہر کرو کہ تُسی بُرائی توں پچھے ہٹنا چاہندے او تے نیکی کرنا چاہندے او۔ (‏زبور 34:‏14‏)‏ مثال لئی:‏

•   کیہہ تُسی یہوواہ دے معیاراں مطابق زندگی گزار رہے او؟‏

   بائبل چ لکھیا اے:‏ اپنا ضمیر صاف رکھو۔—‏1-‏پطرس 3:‏16‏۔‏

   اپنے آپ کولوں پچھو:‏ ”‏مَیں ایہہ کیویں ظاہر کیتا اے کہ میری سوچن سمجھن دی صلاحیت اینی تیز ہے وے کہ مَیں چنگے تے بُرے چ فرق کر سکاں؟“‏ (‏عبرانیوں 5:‏14‏)‏ ”‏کیہہ کدی اِنج ہویا اے کہ مَیں اپنے دوستاں دے دباؤ دے باوجود کوئی غلط کم نئیں کیتا؟ کیہہ مَیں ایہو جہے لوکاں نال دوستی کیتی اے جیہڑے مینوں چنگے کم کرن دی ہلاشیری دیندے نیں؟“‏—‏اَمثال 13:‏20‏۔‏

   ہور مدد لئی:‏ اُردو زبان چ ایس مضمون نُوں ویکھو:‏ ”‏مَیں اپنے ضمیر کی تربیت کیسے کر سکتا ہوں؟‏‏“‏

•   کیہہ تُسی ایس گل نُوں سمجھدے او کہ تُسی اپنے کماں لئی یہوواہ دے سامنے جواب‌دہ او؟‏

   بائبل چ لکھیا اے:‏ سانوں ساریاں نُوں خدا دے سامنے حساب دینا پووے گا۔—‏رومیوں 14:‏12‏۔‏

   اپنے آپ کولوں پچھو:‏ ”‏کیہہ مَیں اپنے آپ نُوں یاں دُوجیاں نُوں دھوکھا دین دی کوشش کرنا واں یاں فیر مَیں ایمان‌دار آں؟“‏ (‏عبرانیوں 13:‏18‏)‏ ”‏کیہہ مَیں اپنی غلطی مننا واں یاں فیر مَیں ایہنوں چھپان یاں ایہنوں دُوجیاں تے پان دی کوشش کرنا واں؟“‏—‏اَمثال 28:‏13‏۔‏

   ہور مدد لئی:‏ کتاب ‏”‏نوجواناں دے 10 سوال تے ایہناں دے جواب“‏ چ ایس مضمون نُوں ویکھو:‏ ”‏مَیں اپنیاں غلطیاں کیویں سدُھار سکنا واں؟‏‏“‏

•   کیہہ تُسی یہوواہ نال اپنی دوستی نُوں مضبوط کر رہے او؟‏

   بائبل چ لکھیا اے:‏ خدا دے نیڑے جاؤ تے اوہ تواڈے نیڑے آئے گا۔—‏یعقوب 4:‏8‏۔‏

   اپنے آپ کولوں پچھو:‏ ”‏مَیں یہوواہ دے نیڑے جان لئی کیہہ کر رہیا واں؟“‏ مثال لئی، ”‏کیہہ مَیں باقاعدگی نال بائبل پڑھنا واں؟“‏ (‏زبور 1:‏1، 2‏)‏ ”‏کیہہ مَیں ہر روز دُعا کرنا واں؟“‏ (‏1-‏تھسلُنیکیوں 5:‏17‏)‏ ”‏کیہہ مَیں دُعا چ یہوواہ نُوں اپنے دل دی ہر گل دَسنا واں؟ کیہہ مَیں ایہو جہے لوکاں نال دوستی کیتی اے جیہڑے یہوواہ دے دوست نیں؟“‏—‏زبور 15:‏1،‏ 4‏۔‏

   ہور مدد لئی:‏ ایہناں مضموناں نُوں ویکھو:‏ ”‏بائبل میری مدد کیویں کر سکدی اے؟—‏دُوجا حصہ:‏ بائبل پڑھائی نُوں دلچسپ بناؤ‏“‏ تے ”‏مینوں دُعا کیوں کرنی چاہی دی اے؟‏‏“‏

 مشورہ:‏ جے تُسی بپتسمے لئی تیار ہونا چاہندے او تے فیر اُردو زبان چ کتاب ‏”‏نوجوانوں کے سوال اور اُن کے فائدہ‌مند جواب“‏ جلد 2 دے باب نمبر 37 نُوں پڑھو۔ خاص طور تے صفحہ نمبر 308 تے 309 تے دِتیاں مشقاں تے غور کرو۔‏