کوئی وی ایہہ گل پوری طرحاں نئیں جان دا کہ یسوع دی شکل صورت کیہو جہی سی کیونکہ بائبل چ ایہدے بارے نئیں دَسیا گیا۔ایہدے توں پتہ چلدا اے کہ ایہہ جاننا ایناں ضروری نئیں کہ یسوع ویکھن چ کیہو جیہا سی۔ پر فیر وی بائبل چ دَسیاں گیاں گلاں دی مدد نال اَسی ایہدے بارے کجھ اندازہ لا سکنے آں‏۔‏

•   شکل صورت:‏ یسوع دی ماں اِک یہودی سی ایس لئی اپنی ماں وانگوں یسوع دے نین‌نقش وی یہودیاں ورگے ہون گے‏۔‏ (‏عبرانیوں 7:‏14‏)‏ اِک وار جدوں یسوع نے گلیل توں یروشلیم تک چھپ کے سفر کیتا اوہدوں لوک اوہنوں پچھان نئیں پائے سن‏۔‏ (‏یوحنا 7:‏10، 11‏)‏ ایہدے توں پتہ چلدا اے کہ اوہ دُوجیاں توں الگ نظر نئیں آندا سی۔ یسوع اپنے شاگرداں توں وی وکھرا نئیں دِسدا سی‏۔‏ یاد کرو جدوں یہوداہ اسکریوتی یسوع نُوں گرفتار کراؤن لئی بِھیڑ دے نال آیا تے اوہنے یسوع نُوں چمیا تاکہ سپاہی اوہنوں پچھان لین تے گرفتار کر لین‏۔—‏متی 26:‏47-‏49‏۔‏

•   وال:‏ یسوع لمے وال نئیں رکھدا ہووے گا کیونکہ خدا دے کلام چ لکھیا اے کہ لمے وال رکھنا اِک مرد لئی بے‌عزتی دی گل اے۔‏‏—‏1-‏کُرنتھیوں 11:‏14‏۔‏

•   داڑھی:‏ یسوع داڑھی رکھدا سی۔ اوہ شریعت نُوں من دا سی جدے چ مرداں نُوں داڑھی دے کونیاں نُوں وگاڑن توں منع کیتا گیا سی۔ ‏(‏احبار 19:‏27؛‏ گلتیوں 4:‏4‏)‏ ایہدے علاوہ بائبل دی اِک پیشین‌گوئی دے مطابق جدوں یسوع نُوں اذیت دِتی جانی سی اوہدوں اوہدی داڑھی نُوں وی پٹیا جانا سی‏۔—‏یسعیاہ 50:‏6‏۔‏

•   جسم:‏ بائبل توں پتہ چلدا اے کہ یسوع بڑا تندرست سی۔ اوہ اپنی خدمت دے دوران کئی کئی میل دا سفر پیدل ای کردا سی‏۔‏ (‏متی 9:‏35‏)‏ اوہنے دو وار ہیکل نُوں پاک صاف کیتا، اوتھے پیسیاں دا کاروبار کرن والیاں دِیاں میزاں نُوں اُلٹ دِتا نالے رسیاں دا کوڑا بنا کے ہیکل چوں جانوراں نُوں باہر کڈھ دِتا۔ (‏لُوقا 19:‏45، 46؛‏ یوحنا 2:‏14، 15‏)‏ اِک کتاب چ دَسیا گیا اے:‏ ‏”‏اِنجیلاں چ لکھیاں گلاں توں پتہ چلدا اے کہ یسوع جسمانی طور تے بڑے مضبوط تے صحت‌مند سن۔‏‏“‏—‏والیم چار، صفحہ 884۔‏

•   چہرے دے تاثرات:‏ یسوع مسیح بوہت محبت کرن والا تے بڑا نرم مزاج سی تے ایہہ اوہدے چہرے توں وی ظاہر ہوندا سی‏۔‏ (‏متی 11:‏28، 29‏)‏ ایس لئی ہر طرحاں دے لوک اوہدے کول مدد تے تسلی پان لئی آندے سن‏۔‏ (‏لُوقا 5:‏12، 13؛‏ 7:‏37، 38‏)‏ ایتھوں تک کے بچے وی اوہدے نال خوش رہندے سن۔‏‏—‏متی 19:‏13-‏15؛‏ مرقس 9:‏35-‏37‏۔‏

 غلط نظریہ‏:‏ یسوع ہمیشاں دُکھی تے اُداس رہندا سی۔‏

 سچائی:‏ یسوع نے ہمیشاں اپنے اسمانی باپ یہوواہ ورگیاں خوبیاں ظاہر کیتیاں جدے بارے بائبل چ لکھیا اے کہ اوہ خوش دل خدا اے۔ (‏1-‏تیمُتھیُس 1:‏11؛‏ یوحنا 14:‏9‏)‏ سچ ایہہ وے کہ یسوع نے دُوجیاں نُوں سکھایا کہ اوہ خوش کیویں رہ سکدے نیں‏۔‏ (‏متی 5:‏3-‏9؛‏ لُوقا 11:‏28‏)‏ ایہناں گلاں توں پتہ چلدا اے کہ یسوع دے چہرے توں وی خوشی جھلک دی سی۔‏