جی نئیں۔ بائبل چ کِتے وی ایہہ تلیم نئیں دِتی گئی کہ مریم خدا دی ماں اے تے نہ ای مسیحیاں نُوں ایہہ دَسیا گیا اے کہ اوہناں نُوں مریم دی عبادت یاں تعظیم کرنی چاہی دی اے۔‏ a غور کرو:‏

•   مریم نے کدی ایہہ دعویٰ نئیں سی کیتا کہ اوہ خدا دی ماں اے۔ بائبل چ ایہہ دَسیا گیا اے کہ مریم نے خدا دے پُتر نُوں جنم دِتا سی خدا نُوں نئیں۔—‏مرقس 1:‏1؛‏ لُوقا 1:‏32‏۔‏

•   یسوع مسیح نے کدی وی ایہہ نئیں کہیا کہ مریم خدا دی ماں اے یاں اوہنوں حدوں ودھ عزت دِتی جانی چاہی دی اے۔ اِک موقعے تے یسوع نے اِک عورت دی اِصلاح کیتی جنہے مریم نُوں یسوع دی ماں ہون دی وجہ توں بوہت عزت دِتی سی۔ یسوع نے اوس عورت نُوں کہیا:‏ نئیں، سگوں اوہ انسان برکت والا اے جیہڑا خدا دے کلام نُوں سُن دا تے اوہدے تے عمل کردا اے۔—‏لُوقا 11:‏27، 28‏۔‏

•   اِصطلا‌ح”‏خدا دی ماں“‏ تے ”‏تھیوتوکوس“‏ (‏یعنی خدا نُوں جنم دین والی)‏ بائبل چ کِتے وی استمال نئیں ہوئی۔‏

•   بائبل چ اِصطلا‌ح ”‏اسمان دی ملکہ“‏ مریم لئی نئیں سگوں اوس دیوی لئی استمال ہوئی اے جنہوں خدا توں برگشتہ ہو جان والے‌اِسرائیلی پوجدے سن۔ (‏یرمیاہ 44:‏15-‏19‏)‏ ”‏اسمان دی ملکہ“‏ شاید شہر بابل دے لوکاں دی دیوی عشتار (‏عستارات)‏ سی۔‏

•   پہلی صدی دے مسیحی مریم دی عبادت نئیں کردے سن تے نہ ای اوہنوں حدوں ودھ تعظیم دیندے سن۔ اِک تریخ‌دان نے آکھیا:‏ ”‏پہلی صدی دے مسیحی دُوجے فرقیاں نالوں الگ ہو گئے سن۔ شاید اوہناں نُوں ایہہ ڈر سی کہ جے مریم نُوں بوہت زیادہ عزت دِتی تے کِتے لوک مریم نُوں اِک دیوی سمجھ کے اوہدی پوجا نہ کرن لگ پین۔“‏—‏کتاب ‏”‏اِن کوئسٹ آف دی جیوش میری۔“‏

•   بائبل چ دَسیا گیا اے کہ خدا ہمیشاں توں موجود اے۔ (‏زبور 90:‏1، 2؛‏ یسعیاہ 40:‏28‏)‏ کیونکہ خدا دی کوئی اِبتدا نئیں ایس لئی اوہدی کوئی ماں نئیں ہو سکدی۔ بائبل چ ایہہ وی دَسیا گیا اے کہ خدا تے اسماناں چ وی نئیں سما سکدا تے فیر اوہ مریم دے رحم چ کیویں سما سکدا سی۔—‏1-‏سلاطین 8:‏27‏۔‏

مریم خدا دی نئیں سگوں یسوع دی ماں سی

 مریم یہودی سی تے بادشاہ داؤد دی نسل چوں سی۔ (‏لُوقا 3:‏23-‏31‏)‏ اوہ خدا اُتے ایمان رکھدی سی تے اوہدی بندگی کردی سی ایس لئی خدا نے اوہنوں برکت دِتی۔ (‏لُوقا 1:‏28‏)‏ خدا نے اوہنوں یسوع دی ماں بنن لئی چُنیا۔ (‏لُوقا 1:‏31،‏ 35‏)‏ مریم تے اوہدے شوہر یوسف دے ہور وی بچے ہوئے سن۔—‏مرقس 6:‏3‏۔‏

 بھانویں کہ بائبل توں پتہ چلدا اے کہ مریم یسوع دی پیروکار بن گئی سی پر اوہدے بارے بوہت زیادہ معلومات نئیں دِتی گئی۔—‏اعمال 1:‏14‏۔‏