Daut Betel en de Ukraine kjemmat sikj wieda sea om de Breeda un Sestren en äa Launt, waut haben must äare Hiesa veloten. Daut jeft doa uk 27 Nootfaulkommitees, waut methalpen. Von dan, waut de Kjrich aunjefongen haft, haben dee von Poolen äwa 250 Tonnen needje Sachen loten brinjen, soo waut aus Ätwoa, Kjleedie un Sachen toom sikj reinhoolen. Uk Breeda, waut opp sechre Städen en de Ukraine wonen, haben mea aus 80 Tonnen Ätwoa no soone Städen jeschekjt, wua daut fält.

Eene Sesta von Kiew, waut Valentyna heet, kjrieech Help von een Nootfaulkommitee, un see schreef: “Aus daut aules aunfunk met dän Kjrich, wort daut sea jefäadlich enne Staut, wua ekj wond. Doawäajen veleet ekj von doa. Ekj kjeem no eene kjliene Staut en de Jäajent von Tscherkassy. Nu sie ekj hia aul fa äwa twee Moonat un de Breeda hia en dise Vesaumlunk sent sea om mie bekjemmat. Un dee haben mie miere Doosen Ätwoa un uk aundre needje Sachen jebrocht. Aus ekj sach, woo dee mie holpen, kunn ekj daut schia nich jleewen. Mie jinkj daut sea to Hoaten. En eene Doos wia uk waut jemoldet von een 4-joaschet Mejalkje, waut Blanca heet, un uk een Koatje met Wotafoawen jemolt . . . Ekj woa dise Bilda emma oppbewoaren. Ekj kaun nich aundasch aus grulich sea dankscheen sajen to aul miene Breeda un Sestren un gaunz besonda to Jehova.”

Eene 83-joasche, kranke Sesta von de Staut Sjewjerodonezk, waut uk Valentyna heet, schrift: “Aus de Kjrich aunfunk, wond ekj auleen. Mien eensja Sän storf, ea de Kjrich aunfunk. Aus doa jieda Dach en de Staut jebomt wort, wia daut sea toom grulen. Wie hauden kjeen Wota, kjeen Fia, kjeene Gess un doa wia sea schwak Internet. De Breeda saden äa Läwen en Jefoa toom mie halpen un doafäa sie ekj sea dankboa.”

See sajcht wieda: “Lota brochten de Breeda mie un twee aundre Sestren, waut krank sent, no de Staut Dnipro, wua daut sechra es. Un de Breeda en Dnipro holpen mie, eene Städ to finjen, wua ekj bliewen kunn. Nu won ekj met eene Famielje toop, waut sikj sea om mie kjemren, waut uk Gloowesbreeda sent. Wie sent soo aus eene Famielje. Dee holpen mie mau rajcht, daut ekj een Fon kjrieech toom bie de Toopkomes metmoaken. Ekj woa daut kjeenmol vejäten, waut aul dise leeftolje Breeda aules jedonen haben.”

Wie sent onsen leeftoljen Voda Jehova soo dankboa un wie freien ons sea, daut hee sikj wieda om onse Breeda un Sestren en de Ukraine kjemmat, soo daut dee daut aun “nuscht goodet fälen” deit (Psalm 34:10, PB).

Bat dän 7. Juni 2022 hab wie de Zolen, waut unjen aunjejäft sent, ut de Ukraine jekjräajen. Dee stetten sikj opp woarhauftje Berechten von Breeda, waut doa wonen. Daut kaun doawäajen sennen, daut de Zolen en Werkjlichkjeit hecha sent, wiels eena nich en aule Jäajenden em Launt met de Breeda räden kaun.

• 42 Vekjindja sent jestorwen

• 82 Vekjindja worden velazt

• 46 145 Vekjindja haben must äare Hiesa veloten

• 469 Hiesa worden gaunz vestieet

• 540 Hiesa haben väl Schoden jekjräajen

• 1 405 Hiesa haben een bät Schoden jekjräajen

• 5 Vesaumlungshiesa worden gaunz vestieet

• 8 Vesaumlungshiesa haben väl Schoden jekjräajen

• 33 Vesaumlungshiesa haben een bät Schoden jekjräajen

• 27 Nootfaulkommitees sent en de Ukraine aunjestalt

• 50 663 Vekjindja kjrieejen Help von de Nootfaulkommitees, om Städen to finjen, waut sechra sent

• 22 995 Vekjindja sent no aundre Lenda jeflicht un kjrieen doa Help von äare Gloowesbreeda