En Juli un August 2020 woat daut toom ieeschte Mol sennen, daut de Breeda äwa de gaunze Welt tojlikj woaren dän dreedoagschen Kongress kjikjen. Toom dit mäajlich moaken, es daut needich, dän gaunzen oppjeschnakten Kongress opp äwa 500 Sproaken to äwasaten. Jeweenlich wudd dit een Joa ooda lenja dieren, aul dise Räden un Videos opptoschnaken un to äwasaten. Oba wäajen de COVID-19-Krankheit sullen de Breeda un Sestren disen dreedoagschen Kongress 2020 “Freit junt emma”! en weinja aus vea Moonat foadich kjrieen.

 De Äwasatungs-Deensten un de Enkjeepaufdeelunk von de Hauptoffiz von Jehova siene Zeijen holpen bie dit groote Woakj met. De Äwasatungs-Deensten kunnen seenen, daut väle Äwasatungs-Gruppen daut aun mea Jereetschoft fäld toom dit doonen, besonda fäld dee daut aun feine Mikrofoons. De Enkjeepaufdeelunk sorjd doafäa, daut doa 1 000 Mikrofoons jekoft worden un daut dee dan no meist 200 Städen jeschekjt worden.

 Om Jelt to spoaren, koft de Enkjeepaufdeelunk een deel Mikrofoons opp eemol. Dee worden aula no eene Städ jeschekjt un von doa worden dee dan fresch enjepakt un dan no de Äwasata jeschekjt. Wäajen doa een deel opp eemol jekoft worden, kost jieda Mikrofoon met schekjen toop rom 170 stätsche Dolla. Dit wia 20 Prozent bilja, aus wan se dee eenselwies jekoft hauden.

 De Enkjeepaufdeelunk koft un veschekjt dise Mikrofoons en de Aprell- un Mei-Moonat von 2020. Dit wia en dee Tiet, wua väle Jeschafta wäajen de COVID-19-Krankheit nich soo väl schaufen kunnen aus jeweenlich. Un doch kjrieejen de mieeschte Äwasatungsoffizen, Betels un aundre Städen, wua äwasat wort, utgangs Mei daut Jereetschoft, waut dee fäld.

 Jay Swinney, de Oppsechta von de Enkjeepaufdeelunk, sajcht: “De Aufdeelungen em Betel un de Jeschafta schauften bie aul dit fein toop. Dit wia bloos derch Jehova sienen Jeist mäajlich, daut dit aula soo bosich jinkj un soo billich wia, daut wie onse Breeda un Sestren halpen kunnen.”

 Nicholas Ahladis, waut met de Äwasatungs-Deensten toopschauft, sajcht: “De Äwasata, waut wäajen de COVID-19-Krankheit musten tus bliewen, jeef daut eene groote Freid, dit Jereetschoft to kjrieen. Wan de Äwasata uk nich kunnen met de aundre Äwasata toop sennen, kunnen dee doawäajen opp eene Wajch toopschaufen. Dee kunnen de Räden, de lange Videos un de Leeda opp äwa 500 Sproaken äwasaten un oppschnaken.”

 De Mikrofoons kjeepen wia mau een kjlienet Poat von väle aundre Sachen, waut doa jedonen worden, toom dän dreedoagschen Kongress 2020 “Freit junt emma”! fa de Breeda oppe gaunze Welt foadich moaken. June friewelje Gowen, waut derch donate.jw.org un uk opp aundre Wäaj jejäft worden, muaken daut mäajlich, daut wie dit needje Jereetschoft kjeepen kunnen.