“Wie sent ons nich mol eenich doaräwa, aus Gott verheipts eenen Nomen haft, un wan jo, waut de Nomen kunn sennen.” (Professa David Cunningham, Theological Studies.)

Gott säd: “Ekj sie Jehova. Daut es mien Nomen” (Jesaja 42:8, NW). Jehova es een hebräischa Nomen, waut meent: “Hee lat woaren”.

Jehova well haben, daut wie sienen Nomen sellen brucken. De Schreft sajcht: “Roopt sienen Nomen aun, moakt siene Doten ver aule Velkja bekaunt!” Un dee sajcht uk: “Veharlicht sienen heiljen Nomen” (1. Chronik 16:8, 10, PB; von ons dunkel jemoakt).

Jesus brukt Gott sienen Nomen. Jesus säd en een Jebäd to Jehova: “Ekj hab an [Jesus siene Jinja] met dienen Nomen bekaunt jemoakt”. Wuarom muak Jesus siene Jinja met Gott sienen Nomen bekaunt? Hee säd wieda: “Daut dee Leew, met dee du [Gott] mie goot wieescht, en an sennen mucht, un ekj en an” (Johanes 17:26, PB).

Een Gloowesliera, waut Walter Lowrie heet, sajcht, daut een Mensch, waut Gott sienen Nomen nich kjant, dee kjant am nich werkjlich un kaun am uk nich leewen.

Een Maun, waut Victor heet, wankt jieda Wäakj no de Kjoakj, oba am späad sikj daut soo, daut hee Gott nich werkjlich kjand. Hee sajcht: “Lota wort ekj en, daut Gott sien Nomen Jehova es un mie späad sikj daut soo, daut ekj am toom ieeschte Mol werkjlich kjanen lieed”. Un hee sajcht uk noch: “Mie späad sikj daut uk soo, daut ekj entlich mol haud dän kjanen jelieet, von dän ekj aul soo väl jehieet haud. Ekj sach am dan werkjlich aus eene Persoon un kunn dan aunfangen, Frind met am to woaren.”

Jehova well dänjanjen toom Frint haben, waut sienen Nomen brukt un “sienen Nomen em Denkj helt”. Äwa aul dee sajcht hee: “Ekj woa mie äwa an erboarmen, aus een Voda sikj äwa eenen Sän erboarmt, dee am deent” (Maleachi 3:16-17, PB). Gott beloont dee uk, waut sienen Nomen aunroopen. De Schreft sajcht: “Wäaemma dän Harn en sien Nomen aunroopt, woat seelich woaren” (Reema 10:13, PB).