No de Schreft no sent aule Menschen Sinda, wiels wie de Sind von dän ieeschten Mensch Adam metjeorwen haben. Doawäajen doo wie eenjemol waut orrajchtet, waut wie dan lota veleicht beschoden. Gott sien Sän, Jesus Christus, haft fa onse Sinden betolt, doaderch daut hee fa ons storf. Derch sienen Doot haft hee ons erleest ooda von de Sind loosjekoft, un doaderch kaun Gott ons vejäwen. Daut es een Jeschekj von Gott (läs Reema 3:23-24).

Eenje haben groffe Sinden begonen un twiewlen, aus Gott an vejäwen kaun. Gott sien Wuat moakt ons Moot, wiels daut sajcht doa: “Daut Bloot von sien Sän Jesus Christus moakt ons rein von aule Sind” (1. Johanes 1:7). Jehova Gott es reed ons mau rajcht growe Sinden to vejäwen, wan wie de rajchte Enstalunk haben un omkjieren (läs Jesaja 1:18).

Wan wie wellen, daut Jehova ons vejeft, dan mott wie am kjanen lieren. Daut bediet, wie motten vestonen, woo hee denkjt, sienen Rot kjanen lieren un waut hee von ons velangt (Johanes 17:3). Jehova woat deejanje wellich vejäwen, waut daut leet es, waut see jedonen haben, un sikj aunstrenjen sikj to endren (läs Aposteljeschicht 3:19, NTR *).

Gott to jefaulen un am schaftich to moaken es nich too schwoa fa ons. Jehova vesteit, daut wie schwak sent, hee erboarmt sikj äwa ons un es leeftolich. Wurscht du soon leeftoljen Gott nich wellen bäta kjanen lieren un seenen, woo du am jefaulen kaust? (läs Psalm 103:13-14).