Waut wiest daut Läwen ons?
Waut moakt de Ieed soo sea schmock? Daut sent de läwendje Sachen rom ons, waut waussen, sikj bewäajen un vemieren. Un von dee weet wie vondoag dän Dach mea aus jeemols ea. Waut sajcht daut Läwen ons doaräwa, woo daut aunfunk? See mol dit:
Daut lat soo, daut Läwen wort jemoakt. Aule läwendje Sachen sent von Zellen jemoakt. Om daut et Läwen jeft un sikj vemieren kaun, mott jieda Zell dusende besondre Kjlienichkjeiten doonen. Daut es mau rajcht soo bie gaunz eefache Läwenwäsent. Näm wie toom Biespel Häw toom baken: Häw es rajcht jesajcht eene kjliene läwendje Sach. Em Vejlikj met eene Menschen-Zell lat eene Häw-Zell eefach. Oba waut dee nich aules doonen kaun! Enne Medd haft de Häw-Zell de DNA, waut de Zell sajcht, waut see doonen saul. Dee kaun sikj uk “Noarunk” moaken toom aum läwen bliewen, von Sachen en sikj selfst. Un wan dee nich mea Noarunk haft, dan jeit dee soo to sajen schlopen. Soo blift de Häw läwendich un wakjt dan wada opp, wan se dän ieescht brucken toom baken.
Wissenschoftla haben aul fa väl Joaren de Häw-Zellen studieet toom de Menschen-Zellen bäta vestonen. Oba dee haben noch lang nich aules utjefungen. De Professa Ross King von de Chalmers University of Technology en Schweeden sajcht: “Daut jeft bloos nich jenuach Forscha toom aules utfinjen, woo daut met de Häw-Zellen soo rajcht schauft.”
Waut jleefst du? Wan eene eefache Häw-Zell aul soo schwoa to vestonen es, wudd dee dan nich von wäm jemoakt sennen?
Läwen kaun bloos von Läwen häakomen. DNA es von gaunz kjliene Sachen jemoakt, waut Nukleotide jenant woaren. Jieda Menschen-Zell haft 3 200 Millionen von dise Nukleotide, waut sea krakjt toopjestalt sent. Doaderch kaun eene Zell wada aundre Sachen moaken, waut Enzyme un Proteine heeten.
Daut es meist ommäajlich, daut dise Nukleotide sikj wudden kjennen jrodsoo von veselfst soo krakjt toopstalen. Wissenschoftla sajen, daut et mau wudd 1 Mol en 10150 Mol (eene 1 met 150 Nullen doahinja) mäajlich sennen. Soont es schia gaunz ommäajlich.
Veleicht vesto wie doavon nich väl, oba de Sach es: De Wissenschoftla haben noch derch nuscht kunt bewiesen, daut Läwen kaun von waut häakomen, waut nich läft.
Daut Menschenläwen es besonda. Wie Menschen kjennen väl Freid aum Läwen haben. Kjeen aundret Läwenwäsent kaun opp dee Wajch Jefeelen wiesen aus wie, uk nich soo met aundre omgonen un nich soo schmocke Sachen moaken aus wie. Wie haben Freid aun schmakjen, rikjen, hieren, seenen un uk aun de Kalieren. Wie plonen ons Läwen un sieekjen no eenen Senn em Läwen.
Waut jleefst du? Kjenn wie aul dit doonen, bloos toom läwen bliewen un ons vemieren? Ooda diet dit doano han, daut daut Läwen een Jeschenkj von eenen leeftoljen Schepfa es?
