“Wan de gottloose uk jreenen aus Graus, un de Sinda aula blieejen, . . . woaren [dee] opp emma äwatsied jebrocht woaren” (PSALM 92:8)

Soo aus wie ea jeseenen haben, woat daut met daut schlajchte bloos emma schlemma. En 2. Timotäus 3:1-5 sajcht daut aul, daut de Menschen wudden sea schlajcht sennen. Daut sull ons uk nich wundren, wäajen de Bibel säd verut, daut et en “de latste Doag” wudd soo aus daut sennen. Oba de latste Doag von waut? Daut sent de latste Doag fa dee Menschen, waut Gott nich jehorchen wellen. Gott woat dee oppriemen, waut met daut schlajchte nich wellen opphieren. Un dan woaren bloos noch soone Menschen hia oppe Ieed läwen, waut Gott jehorchen. De Schreft sajcht je: “De jerajchte woaren daut Launt oawen un eewich doabennen bliewen” (Psalm 37:29).

“De Frädensgott woat dän Soton boolt toopkjnedren” (REEMA 16:20)

Wan Soton, de beese Jeista un de schlajchte Menschen ieescht nich mea woaren sennen, dan woat daut Fräd oppe Ieed jäwen. Dit es, waut ons Schepfa ons vesprakjt: “Kjeena woat . . . [die] doa enjsten” (Micha 4:4).

“Nu es Gott siene Woninj manke Menschen! . . . Un Gott woat an aule Tronen von de Uagen weschen. Doa woat kjeen Doot ooda Trua ooda Hielen ooda Weedoag mea sennen” (OPENBOARUNK 21:3-4)

Doa woat et kjeen Lieden un kjeene Krankheit mea jäwen. Wiels Gott woat aul dän Schoden wada goot moaken, waut derch Soton, Adam un Eva un onse ieejne Onvolkomenheit kjeem. Un dan woat mau rajcht kjeena mea stoawen motten. Oba dee, waut dän Schepfa jehuarsom sent, woaren dan fa emma läwen. Oba wua woat daut dan sennen?

“De Wiltnis un daut Drieechlaunt woaren sikj freien; daut drieeje Ollaunt woat jlekjlich sennen un met Bloomen dachen” (JESAJA 35:1)

Wan Gott ieescht aul daut schlajchte oppjeriemt haft, dan woat de Ieed een Paradies woaren. Doa woaren sea schmocke Parks un Goades sennen. Un uk äwajenuach toom äten (Psalm 72:16, JHF). Daut Wota von daut Mäa, de Likjen un de Riefasch woat dan gaunz rein sennen un voll von Tieren un Plaunten. Un daut woat mau rajcht vejäten woaren, daut de Welt mol es schwiensch jewast. Dan woaren de Menschen äare Hiesa buen un doabennen wonen. Un daut woat dan kjeenen Mensch jäwen, waut doa woat oppe Gaussen läwen ooda hungrich ooda oam sennen (Jesaja 65:21-22).

De Menschen woaren “vom Doot oppstonen” (APOSTELJESCHICHT 24:15)

Wurscht du dee wada jleichen to seenen, waut du väl jeräakjent hast un waut jestorwen sent? De aulmajchtja Gott woat de Doodes wada oppwakjen hia oppe Ieed. Du woascht dee kjanen un dee woaren die uk wada kjanen. Denkj mol han, woo schaftich du woascht sennen un uk dee! Wuarom kjenn wie ons gaunz secha sennen, daut et soo komen woat? Wäajen en de Bibel kjenn wie seenen, daut Groote un uk Kjinja oppjewoakt worden un daut dee wada kunnen met äare Famielje toop sennen. Un uk Jesus wuak Menschen vom Doot opp un daut haben väl Menschen jeseenen (Lukas 8:49-56; Johanes 11:11-14, 38-44).