1. Waut wia daut fa eene Norecht, waut de Profeet Jesaja de Israeliten säd?

 DE Profeet Jesaja säd, daut Jehowa de “Gott von de Woarheit” es. Daut Wuat, waut met “Woarheit” äwasat es, bediet “Amen” (Jes. 65:16, NW, Footnoot). Un “Amen” meent, “soo saul daut sennen” ooda “secha”. Enne Bibel kjemt daut Wuat “Amen” foaken väa, wan doa von Jehowa ooda Jesus jerät woat. Daut wiest, daut daut krakjt soo es, waut Jehowa un Jesus sajen. Waut wull Jesaja de Israeliten met dise Wieed sajen? Daut eena sikj doa gaunz opp veloten kaun, waut Jehowa verutsajcht. Jehowa haft bewäsen, daut wie ons opp am veloten kjennen, wäajen hee sikj aun aules jehoolen haft, waut hee vesproaken haft.

2. (a) Wuarom kjenn wie ons opp daut veloten, waut Jehowa fa lota vesproaken haft? (b) Waut vonne Froagen woa wie nu seenen?

² Kjenn wie ons uk opp daut veloten, waut Jehowa fa lota vesproaken haft? Ojjefäa 800 Joa no Jesaja siene Tiet säd de Apostel Paulus, wuarom wie ons kjennen secha sennen, daut sikj aules erfellen woat, waut Jehowa vesprakjt. Paulus säd: “Daut es ommäajlich, daut Gott lieejen woat” (Heb. 6:18). Wäajen Jehowa de Gott von de Woarheit es, kaun hee nich Läajes vetalen, krakjt soo aus ut eene Wotakjwal nich kaun seetet un soltet Wota komen. Doawäajen kjenn wie ons gaunz opp daut veloten, waut Jehowa fa lota verutjesajcht haft. En disen Artikjel woa wie dise Froagen derchgonen: Waut haft Jehowa fa lota vesproaken? Un woo haft Jehowa ons daut dietlich jemoakt, daut et soo romkomen woat?

3. (a) Waut von Vespräakjen jleichen Jehowa siene Deena? (Openboarunk 21:3-4). (b) Waut sajen eenje, wan wie dee dit Vespräakjen wiesen?

³ Daut Vespräakjen, waut wie nu seenen woaren, jleichen Jehowa siene Deena äwa de gaunze Welt (läs Openboarunk 21:3-4). Jehowa vesprakjt eene Tiet, wua daut “kjeen Doot ooda Trua ooda Hielen ooda Weedoag mea” jäwen woat. Väle läsen dise Varzhen em Prädichtdeenst toom de Menschen treesten un dee wiesen, woo daut Läwen em Paradies sennen woat. Waut doonen de Menschen, wan wie dee dit Vespräakjen wiesen? Eenje sajen: “Soon scheenet Läwen jeft daut nich mol!”

4. (a) Waut wist Jehowa? (b) Waut deed Jehowa noch, aus bloos een Vespräakjen moaken?

⁴ Aus Jehowa dän Apostel Johanes dit Vespräakjen äwa daut Paradies leet oppschriewen, wist hee secha aul, daut wie to de Menschen wudden äwa dise Hopninj räden, wan wie de goode Norecht bekauntmoaken wudden. Jehowa wist uk, daut väle daut meist nich wudden jleewen kjennen, daut et noch mol wudd soon scheenet jäwen (Jes. 42:9; 60:2; 2. Kor. 4:3-4). Woo kjenn wie aundre un ons selfst daut bewiesen, daut daut, waut en Openboarunk 21:3-4 steit, krakjt soo romkomen woat? Na, Jehowa haft ons nich bloos waut scheenet vesproaken, hee haft ons uk een deel Bewies jejäft, daut et krakjt soo utkomen woat. Wauts daut fa Bewies?

5. Wuarom kjenn wie opp Jehowa sien Vespräakjen vetruen, un wua finj wie dän Bewies?

⁵ En de näakjste Bibelvarzhen – aulsoo Openboarunk 21:5 un 6a – finj wie jenuach Bewies, wuarom wie opp Jehowa sien Vespräakjen von daut Paradies vetruen kjennen. Doa läs wie: “Dan säd dee, dee opp däm Troon saut: Kjikjt emol! Ekj moak aules nie. Un hee säd to mie: Schriew, wiels dise Wieed sent woarhauftich un opp to veloten! Un hee säd to mie: Daut es jeworden. Ekj sie daut A un daut Oo, de Aunfank un daut Enj”.

6. Wuarom woat ons Vetruen opp Gott sien Vespräakjen stoakja, wan wie aun Openboarunk 21:5-6 denkjen?

⁶ Wuarom halpen ons dise Wieed, noch dolla opp Gott siene Vespräakjungen to vetruen? Daut Offenbarungs-Buak sajcht äwa dise Bibelvarzhen: “Dauts soo, aus wudd Jehowa selfst een Papia unjaschriewen, aus eene Garantie, daut sien Vespräakjen fa lota sikj erfellen woat.” b Gott sien Vespräakjen es en Openboarunk 21:3-4 oppjeschräwen. Oba en Varsch 5 un 6 finj wie soo to sajen Jehowa siene Unjaschreft, waut ons vesechat, daut dit Vespräakjen uk soo utkomen woat. Well wie ons daut mol een bät neiwa unjastonen, waut vonne Wieed Jehowa brukt, om ons daut to vesechren.

7. Wäa rät daut ieeschte en Openboarunk 21:5, un wuarom es daut soo besonda?

⁷ Varsch 5 fangt soo aus dit aun: “Dan säd dee, dee opp däm Troon saut” (Opb. 21:5a). En daut Bibelbuak Openboarunk sent bloos dree Visionen, wua Jehowa selfst waut sajcht; un dits eene von dee. Doawäajen es daut soo besonda. Denkj mol han: dit Vespräakjen säd Jehowa selfst! Hee brukt doatoo nich eenen stoakjen Enjel ooda Jesus, waut vom Doot oppjestonen wia. Dit wiest, daut wie ons doa gaunz opp veloten kjennen, waut en Openboarunk 21:5-6 noch jesajcht woat. Wuarom kjenn wie ons soo secha sennen? Wiels Jehowa “nich lieejen kaun” (Tit. 1:2).

8. Waut säd Jehowa toom dietlich moaken, daut sien Vespräakjen soo romkomen wudd? (Jesaja 46:10).

⁸ Daut näakjste well wie von de Wieed räden: “Kjikjt emol!” (Opb. 21:5). Daut griechische Wuat fa “kjikjt emol” kjemt en daut Bibelbuak Openboarunk foaken väa. Een Buak toom nosieekjen sajcht, daut dit Wuat jebrukt woat toom dän Läsa opp daut oppmoakjsom moaken, waut doahinja jesajcht woat. Un waut sajcht Jehowa doahinja? Hee sajcht: “Ekj moak aules nie”. Daut stemt, Jehowa rät von Sachen, waut noch komen woaren, oba hee rät soo, aus wan hee daut aul deit. Soo secha es daut, daut hee sien Vespräakjen hoolen woat (läs Jesaja 46:10).

9. (a) Waut meent de Sauz: “Ekj moak aules nie”? (b) Waut woat met dän “Himmel” un de “Ieed” passieren, waut daut nu jeft?

⁹ Well wie ons nu dän näakjsten Sauz unjastonen en Openboarunk 21:5. Dän Sauz: “Ekj moak aules nie”. En dit Kapitel sent doa twee veschiedne Sachen met jemeent, waut Jehowa doonen woat. Ieeschtens woat Jehowa de oole Welt oppriemen un dan woat hee eene niee Welt moaken. En Openboarunk 21:1 sajcht daut, daut “de ieeschta Himmel un de ieeschte Ieed veschwungen”. “De ieeschta Himmel” sent de Rejierungen, waut en dän Soton un siene beese Jeista äare Macht sent (Mat. 4:8-9, NW; 1. Joh. 5:19). Un “de ieeschte Ieed” sent de beese Menschen, waut vondoag dän Dach läwen. Wan de Bibel von de “Ieed” ooda “Welt” rät, kjennen doa uk de Menschen met jemeent sennen (1. Mo. 11:1, JHF; Psa. 96:1). Dän “Himmel” un de “Ieed”, waut daut vondoag dän Dach jeft, woat Jehowa nich bloos fiksen; hee woat dee venichten. Dan woat hee eenen “nieen Himmel un eene niee Ieed” moaken – daut bediet, daut eene niee Rejierunk äwa jerajchte Menschen harschen woat.

10. Waut woat Jehowa niemoaken?

¹⁰ Jehowa woat uk opp eene aundre Wajch aules niemoaken (Openboarunk 21:5). Acht doaropp, daut hee nich säd: “Ekj moak aules niee Sachen”, oba hee säd: “Ekj moak . . . [aule Sachen] nie”. Jehowa woat de Ieed un de Menschen bat doa brinjen, daut dee volkomen sent. Doaderch woat hee dee soo to sajen niemoaken. Soo aus Jesaja daut uk verutsäd, woat de gaunze Ieed soo schmock sennen, aus de Goaden Eden. Un Jehowa woat uk jieda eenselnen Mensch niemoaken, doaderch, daut hee dee heelt. Kjeena woat mea lom, blint ooda doof sennen un dee, waut jestorwen sent, woaren vom Doot oppstonen (Jes. 25:8; 35:1-7).

11. Waut säd Jehowa to Johanes, un wuarom?

¹¹ Waut säd Gott noch en sien Vespräakjen? Jehowa säd to Johanes: “Schriew, wiels dise Wieed sent woarhauftich un opp to veloten!” (Opb. 21:5). Jehowa säd nich bloos, daut Johanes schriewen sull, oba hee säd uk, wuarom dee daut doonen sull. Hee säd: “Dise Wieed sent woarhauftich un opp to veloten!” Daut wiest, daut wie ons doaropp veloten kjennen, waut Gott sajcht. Sent wie nich dankboa, daut Johanes Jehowa jehorchen deed un daut oppschreef? Doaderch kjenn wie äwa Gott sien Vespräakjen von daut Paradies läsen un äwa de wundascheene Säajnungen nodenkjen, waut noch komen woaren.

12. Wuarom kunn Jehowa sajen: “Daut es jeworden”?

¹² Waut säd Gott dan noch? Hee säd: “Daut  es jeworden” (Opb. 21:6). Nu rät Jehowa soo, aus wan sien Vespräakjen äwa daut Paradies aul passieet es. Un hee kaun soont sajen, wiels doa es nuscht, waut am kaun doavon aufhoolen, sien Väanämen to volbrinjen. Waut sajcht Jehowa noch, waut ons de Sechaheit jäwen kaun?

13. Wuarom säd Jehowa: “Ekj sie daut A un daut Oo”?

¹³ Soo aus wie ea aul säden, sach Johanes dree Visionen, wua Jehowa selfst räden deed (Opb. 1:8; 21:5-6; 22:13). Jiedatsmol brukt Jehowa dän Sauz: “Ekj sie daut A [Alfa] un daut Oo [Omega]”. Daut griechische Aubeetsee fangt met de Lata Alfa aun un hieet met Omega opp. Aus Jehowa daut säd, daut hee daut Alfa un daut Omega wia, wees hee doamet, daut hee eene Sach foadich moakt, wan hee dee aunfangt.

14. (a) Wanea säd Jehowa soo to sajen “Alfa” un wanea woat hee “Omega” sajen? (b) Waut vesechat 1. Mose 2:1-3 ons?

¹⁴ Jehowa säd to Adam un Eva, waut hee sikj met de Menschen un de Ieed väajenomen haud. De Schreft sajcht: “Gott säajend dee un säd: Mucht jie Kjinja haben un junt äwa de gaunze Ieed vemieren, un äwa de Ieed rejieren” (1. Mo. 1:28). Aus Jehowa daut ieeschte mol säd, waut hee sikj väajenomen haud, säd hee soo to sajen “Alfa”. Wan de Ieed ieescht woat veendat woaren to een Paradies, un Adam un Eva äare volkomne Nokomen doabowen läwen woaren, woat sikj sien Väanämen erfelt haben. Dan woat Jehowa soo to sajen “Omega” sajen kjennen. Woo weet wie daut? Wäajen Jehowa eene Garantie jeef, aus hee dän “Himmel un de Ieed, un aul daut Läwen waut em Himmel un oppe Ieed es” jemoakt haud. Dee finj wie en 1. Mose 2:1-3 (läs). Jehowa säd, daut de säwenda Dach heilich wia.  Waut bediet daut? Daut bediet, daut hee dän säwenden Dach oppoat sad, uzhent toom sien Väanämen fa de Menschen un de Ieed erfellen. Daut hee dit deed, jeft ons de Sechaheit, daut sien Väanämen sikj aum Enj von dän säwenden Dach woat gaunz erfelt haben.

15. Wuarom docht de Soton veleicht, daut Jehowa daut nich wudd kjennen erfellen, waut hee sikj väajenomen haud?

¹⁵ Nodäm daut Adam un Eva sikj jäajen Gott stalden, wieren dee Sinda un jeewen de Sind un dän Doot aun äare Nokomen wieda (Reem. 5:12). Daut woat dan veleicht soo jeloten haben, daut et ommäajlich wia, daut de Welt noch mol wudd voll woaren met volkomne Menschen, waut Jehowa jehorchten. Daut leet uk soo, daut Jehowa kjeenmol wudd kjennen “Omega” sajen. De Soton docht veleicht uk, daut Jehowa nich wudd kjennen sien Vespräakjen hoolen. Hee docht veleicht, daut Jehowa Adam un Eva wudd motten dootmoaken un een freschet Poa Lied moaken, daut sien Väanämen sikj erfellen kunn. Oba wan Gott daut jedonen haud, dan wudd de Fient fuaz jesajcht haben, daut Gott een Läajna wia. Wuarom? Wäajen Jehowa jesajcht haud en 1. Mose 1:28, daut de Ieed wudd met Adam un Eva äare Nokomen voll woaren.

16. Wuarom docht de Soton noch, daut hee Jehowa wudd kjennen toosaten?

¹⁶ Waut docht de Soton veleicht, waut Gott noch doonen kunn? Veleicht docht de Soton, daut Jehowa wudd Adam un Eva loten onvolkomne Kjinja haben, waut kjeenmol wudden kjennen volkomen sennen (Liera 7:20; Reem. 3:23). Wan Jehowa dit jedonen haud, wudd de Soton am secha väajeschmäten haben, daut Jehowa nich kunn sien Väanämen volbrinjen. Wuarom wudd dee soont sajen? Wäajen Jehowa sikj daut väajenomen haud, daut de Ieed sull voll jehuarsome un volkomne Menschen woaren, waut Nokomen von Adam un Eva wieren.

17. (a) Met waut vonne Leesunk kjeem Jehowa opp, aus de Soton un Adam un Eva sikj jäajen am stalden? (b) Waut wia doaderch mäajlich? (See daut Bilt.)

¹⁷ De Soton woat sikj daut kjeenmol jedocht haben, waut Jehowa doonen wudd. Jehowa haud eene feine Leesunk, daut sien Väanämen sikj doawäajen erfellen kunn, wan de Soton un Adam un Eva sikj uk jäajen am jestalt hauden (Psa. 92:6). Jehowa leet daut too, daut Adam un Eva Kjinja hauden. Un soo erfeld sikj daut, waut Jehowa jesajcht haud. Hee wees, daut hee nich een Läajna wia. Un hee wees uk,  daut am nuscht doavon aufhoolen kaun, daut to volbrinjen, waut hee sikj väanemt. Daut sien Väanämen sikj doawäajen erfellen wudd, sach Jehowa doano, daut et eenen “Nokomen” jeef, wuaderch Adam un Eva äare jehuarsome Kjinja kunnen jerat woaren (1. Mo. 3:15; 22:18). Dis Nokomen wudd sien Läwen jäwen toom de Menschen looskjeepen. Doa haft de Soton bloos nich aun jedocht! Wuarom docht dee doa nich aun? Wäajen daut Leesjelt sikj opp Leew stett (Mat. 20:28, NW; Joh. 3:16, NW). Un de Soton vesteit nich mol, Leew to haben. Hee denkjt bloos aun sikj. Soo, waut woat derch daut Leesjelt mäajlich sennen? Doaderch woat sikj daut erfellen, waut Jehowa sikj väajenomen haft. Opp Enj von daut dusentjoasche Rikj, woat de Ieed voll sennen met Nokomen von Adam un Eva, waut jehuarsom un volkomen sent. Dan woat Jehowa soo to sajen “Omega” sajen.

18. Woone dree Sachen wiesen ons, daut Gott sien Vespräakjen sikj erfellen woat? (See uk daut Hock “ Dree Jrind, wuarom wie opp Jehowa sien Vespräakjen vetruen kjennen”.)

¹⁸ No daut no, waut wie bat nu jeseenen haben, woo kjenn wie de Menschen daut vesechren, daut Gott sien Vespräakjen äwa daut Paradies krakjt soo romkomen woat? Ieeschtens: Jehowa muak daut Vespräakjen selfst. Daut Buak Openboarunk sajcht: “Dan säd dee, dee opp däm Troon saut: Kjikjt emol! Ekj moak aules nie.” Jehowa haft de Weisheit, de Krauft un dän Wunsch, sien Vespräakjen to erfellen. Tweedens: Fa Jehowa woat sikj daut soo secha erfellen, daut et fa am mau rajcht aul soo romjekomen es. Doawäajen sajcht hee: “Dise Wieed sent woarhauftich un opp to veloten” un “daut es jeworden”. Dreddens: Wan Jehowa met eene Sach aunfangt, woat hee dee uk to Enj brinjen; soo aus doa jeschräwen steit: “Ekj sie daut A [Alfa] un daut Oo [Omega]”. Jehowa woat daut bewiesen, daut de Soton am doa nich von aufhoolen woat, sien Väanämen to erfellen un daut de Soton een Läajna es.

19. Waut kjenn wie doonen, wan de Menschen daut Vespräakjen von daut Paradies nich jleewen kjennen?

¹⁹ Denkj doaraun: Jiedatsmol wan du aundre von Gott sien Vespräakjen vetalst, dan stoakjst du dien ieejnet Vetruen noch dolla. Waut woascht du doonen, wan du näakjstet mol wäm dit scheene Vespräakjen wiesen deist ut Openboarunk 21:4 un dee sajcht: “Soon scheenet Läwen jeft daut nich mol!”? Dan kaust du dänjanjen Varsch 5 un 6 wiesen, wua Jehowa dit Vespräakjen vesechren deit un soo to sajen selfst unjaschriewen deit (Jes. 65:16, NW).