1. Äwa waut denkj wie veleicht no?

MOAKST du die eenjemol Sorjen, wan du aun daut denkjst, waut doa noch kjemt, soo aus de Venichtunk von de faulsche Gloowes, daut Gog von Magog jäajen Gott siene Deena komen woat un de Kjrich von Harmagedon? Denkjst du veleicht: “Woa ekj aul dit schwoare äwastonen kjennen un tru bliewen?” Dan kaun die daut sea halpen, wan wie Jesus siene Wieed unjasieekjen, waut en onsen Teemavarsch sent. Jesus säd to siene Jinja: “Lot junt nich daut Hoat beorrujen! Jleeft” (Joh. 14:1). Een stoakja Gloowen woat ons halpen mootich to sennen, endoont waut doa noch kjemt.

2. Woo kjenn wie ons em Gloowen stoakjen, un waut woa wie en disen Artikjel seenen?

² Woo kjenn wie ons reedmoaken, daut wie lota kjennen tru bliewen? Wie kjennen mol unjasieekjen, waut wie nu doonen, wan wie aufjeprooft woaren. Dan woa wie seenen, en waut fa Stekjen wie ons noch em Gloowen stoakjen motten. Met jieda Proow, waut wie derchstonen, woat ons Gloowen stoakja. Daut halpt ons met de Trubbels foadich to woaren, waut doa lota noch komen. En disen Artikjel woa wie veatlei seenen, wua Jesus siene Jinja daut noch aun Gloowen fäld. Dan woa wie seenen, woo wie vondoag dän Dach biejlikj soo kjennen aufjeprooft woaren un woo ons daut reedmoaken kaun fa lota.

3. Waut läd Jesus en Matäus 6:30, 33 äwa dän Gloowen ut?

³ Jeweenlich well een Maun doafäa sorjen, daut siene Fru un Kjinja jenuach Äten un Kjleeda haben un eene feine Städ toom wonen. Daut haft en dise schwieeje Tieden noch waut opp sikj. Eenje von onse Gloowesbreeda haben biejlikj äare Oabeit veloaren un kunnen nich eene fresche finjen, wan dee sikj uk sea bemieejden. Aundre musten eene Oabeit aufsajen,  waut fa Christen nich paussent wia. En soone Loagen mott wie faust doaraun jleewen, daut Jehova doano seenen woat, daut onse Famielje daut needichste haft. Daut wees Jesus siene Jinja en siene bekaunde Räd opp dän Boajch (läs Matäus 6:30, 33). Wan wie ons gaunz secha sent, daut Jehova ons nich em Stäakj loten woat, woa wie wieda daut ieeschte doano sträwen kjennen, Jehova to deenen. Un wan wie seenen, woo hee ons em tieteljen halpt, woa wie am noch noda komen un ons Gloowen woat stoakja woaren.

4-5. Waut holp eene Famielje, waut daut em tieteljen sea schwoa haud?

⁴ See wie mol, woo Jehova eene Lied en Venezuela halpt, waut daut em tieteljen sea schwoa haben. Ea haud de Famielje Castro eenen Foarm, wuamet dee äa Läwen moaken kunnen. Dan kjeemen eene Grupp Mana met Jewäaren un juagen an von äa Launt fuat. Miguel, de Voda, sajcht: “Nu schauf wie opp een kjlienet Biet Launt, waut aundre äat es. Ekj bäd Jehova jieda Zemorjes doarom, daut hee ons daut jeft, waut wie fa disen Dach brucken.” Dise Famielje haft nich een leichtet Läwen, oba dee veloten sikj gaunz doaropp, daut ons leeftolja himlischa Voda fa daut sorjen woat, waut an jieda Dach fält, un sent pinkjlich bie de Toopkomes un em Deenst. En dee äa Läwen es Gott sien Kjennichrikj daut ieeschte un Jehova sorcht fa daut, waut dee fält.

⁵ En dise schwoare Tiet denkjen Miguel un siene Fru Yurai emma doaraun, woo Jehova an aul jeholpen haft. Eenjemol haft hee an derch Gloowesbreeda biejestonen, waut an een bät waut jeewen ooda waut Miguel holpen eene Oabeit to finjen. Opp aundatsmol holp Jehova an doaderch, daut daut Betel an waut schekjt. Jehova haft dee kjeenmol veloten. Doaderch es dee äare Famielje em Gloowen stoakja jeworden. Äare elste Dochta Yoselin vetald, woo Jehova an mol jeholpen haud, un säd dan: “Mie jeit daut sea to Hoaten, woo Jehova fa ons jesorcht haft. Hee es mien Frint un woat mie kjeenmol em Stäakj loten.” See säd uk: “Daut, waut onse Famielje derchjemoakt haft, haft ons reedjemoakt fa jratre Proowen, waut lota noch komen.”

6. Woo kjenn jie junt em Gloowen stoakjen, wan daut em tieteljen schwoa dreit?

⁶ Dreit daut bie junt schwoa em tieteljen? Soont es nich leicht. Oba jie kjennen dise Omstend brucken, om junt em Gloowen to stoakjen. Bät un läst Jesus siene Wieed en Matäus 6:25-34 un denkjt doaräwa no. Denkjt uk äwa Biespels von de vondoagsche Tiet no, waut bewiesen, daut Jehova fa deejanje sorcht, waut am flietich deenen (1. Kor. 15:58). Wan jie seenen, woo Jehova aundre jeholpen haft, waut daut em tieteljen schwoa hauden, dan woa jie junt noch sechra sennen, daut hee junt uk halpen woat. Hee weet, waut junt fält un woo hee junt doamet halpen kaun. Wan jie  beläwen, woo Jehova junt halpt, dan woat jun Gloowen stoakja woaren un jie woaren lota noch met jratre Trubbels foadich woaren kjennen (Hab. 3:17-18).

7. Woo worden de Jinja aufjeprooft, aus doa een jewaultja Storm oppkjeem, soo aus Matäus 8:23-26 sajcht?

⁷ Aus Jesus un siene Jinja en een Boot wieren un doa een groota Storm oppkjeem, muak hee dee dietlich, en woone Stekjen see em Gloowen noch stoakja woaren musten (läs Matäus 8:23-26). De Storm wia soo hunjsch, daut doa Wota em Boot nenkjeem, oba Jesus schleep gaunz ruich. De Jinja hauden groote Angst un wuaken am opp un prachaden am, an to raden. Oba Jesus wees dee leeftolich trajcht un säd: “Wuarom es junt soo angst? Woo es jun Gloowen soo kjlien?” De Jinja hauden sult weeten, daut Jehova Jesus beschitzen kunn un an uk. Waut kjenn wie doavon lieren? Een stoakja Gloowen kaun ons halpen uttohoolen, endoont aus doa een “jewaultja Storm” oppkjemt ooda sest een groota Trubbel.

8-9. Waut muak Anel derch, un waut holp ar?

⁸ Anel, eene onbefriede Sesta von Puerto Rico, kjrieech eenen stoakjren Gloowen, wiels see groote Trubbels derchmuak. Aune 2017 vestieed een groota Uarkaun Anel äa Hus. Un wäajen disen Uarkaun velua see uk äare Oabeit. Anel sajcht: “En dise schwoare Tiet muak ekj mie Sorjen, oba ekj lieed mie opp Jehova to veloten, wiels ekj bäden deed un mie nich von miene Angst unjakjrieen leet.”

⁹ Waut holp Anel noch, met äare groote Trubbels foadich to woaren? Jehuarsom sennen. See sajcht: “Ekj kunn ruich bliewen, wiels ekj de Aunwiesungen von Jehova siene Organisazion nokjeem. Jehova holp mie derch de Breeda un Sestren, waut mie Moot toospruaken un mie em tieteljen utholpen.” See sajcht uk: “Jehova jeef mie väl mea, aus wua ekj no jefroacht haud, un mien Gloowen wort väl stoakja.”

10. Waut kaust du doonen, wan du groote Trubbels hast?

¹⁰ Hast du Trubbels, waut soo sent aus een “jewaultja Storm”? Veleicht motst du wäajen een Owwada lieden ooda du hast soone groote Trubbels met de Jesuntheit, daut du gaunz mootloos best un nich weetst, waut du doonen saust. Secha woascht du die bieaun Sorjen moaken, oba lot die doavon nich aufhoolen, opp Jehova to vetruen. Bäd opprechtich un komm am doaderch noda. Stoakj dienen Gloowen doaderch, daut du doaräwa nodenkjst, woo Jehova die ea jeholpen haft (Psa. 77:12-13). Du kaust die gaunz secha sennen, daut hee die kjeenmol nich veloten woat!

11. Wuarom sell wie ons eenich sennen, no deejanje to horchen, waut äwa ons aunjestalt sent?

¹¹ Waut kaun ons noch halpen met groote  Trubbels foadich to woaren? Jehuarsom sennen, soo aus Anel säd. Lia, die opp deejanje to veloten, wua Jehova un Jesus sikj opp veloten. Eenjemol kjenn wie nich vestonen, wuarom deejanje, waut äwa ons aunjestalt sent, ons jewesse Aunwiesungen jäwen. Oba Jehova säajent daut, wan wie jehuarsom sent. Von sien Wuat un von de Biespels von Gott siene true Deena kjenn wie lieren, daut jehuarsom sennen Läwes rat (2. Mo. 14:1-4; 2. Chr. 20:17). Denkj äwa dise Biespels no. Dan woascht du die noch eenja sennen, nu un uk lota de Aunwiesungen von Jehova siene Organisazion notokomen (Heb. 13:17). Un du woascht nich brucken Angst haben fa de groote Triebsaul, waut boolt kjemt (Spr. 3:25, NW).

12. Woo halpt de Gloowen ons, met Ojjerajchtichkjeit foadich to woaren, soo aus Lukas 18:1-8 wiest?

¹² Jesus wist, daut siene Jinja eenjemol derch Ojjerajchtichkjeit wudden aufjeprooft woaren. Om dee to halpen, vetald hee dee daut Jlikjnis, waut wie en daut Bibelbuak Lukas finjen. Daut haundelt sikj von eene Wätfru, waut emma wada no eenen ojjerajchten Rechta jinkj, daut dee ar halpen sull. See wia sikj secha, daut dee daut doonen wudd, wan see wudd aunhoolent bliewen. Un tolatst deed de Rechta daut. Waut lia wie doavon? Jehova es nich ojjerajcht. Doawäajen säd Jesus: “Sull Gott nich siene utjewälde to äa Rajcht vehalpen, dee am Dach un Nacht doarom aunhoolen?” (Läs Lukas 18:1-8.) Dan säd Jesus noch: “Wan de Menschensän komen woat, woat hee opp de Ieed . . . Gloowen finjen?” Wan wie ojjerajcht behaundelt woaren, dan mott wie jeduldich un aunhoolent sennen un soonen stoakjen Gloowen haben aus dise Wätfru. Wan wie soonen stoakjen Gloowen haben, dan kjenn wie ons secha sennen, daut Jehova ons irjentwanea halpen woat. Wie motten ons uk secha sennen, daut bäden väl doonen kaun. Eenjemol kaun daut mau rajcht soont doonen, wua eena nich aun jedocht haft.

13. Woo holp daut Jebäd eene Famielje, waut ojjerajcht behaundelt wort?

¹³ Vero es eene Sesta, waut en de Demokratische Republikj Kongo wont. See un äa Maun, waut Jehova nich deent, un äare 15-joasche Dochta musten sikj fuatbrinjen, aus eene Grupp Soldoten no äare Jäajent kjeemen. Hinjawäajes hilden de Soldoten an opp un säden, daut see an ombrinjen wudden. Aus Vero aunfunk to roaren, wull äare Dochta ar treesten un bäd opp ludes un brukt emma wada dän Nomen Jehova. Aus see verecht haud, fruach de Väaschta von de Soldoten: “Mejal, wäa haft die bäden jelieet?” See säd: “Miene Mame lieed mie, un dee deed daut soo, aus Matäus 6:9-13 sajcht.” De Väaschta säd: “Mejal, go  met diene Elren toop en Fräd un mucht jun Gott Jehova junt beschitzen!”

14. Waut kaun onsen Gloowen oppe Proow stalen, un waut woat ons halpen tru uttohoolen?

¹⁴ Soone Erfoarungen halpen ons, daut wie kjeenmol vejäten, woo väl daut Jebäd doonen kaun. Oba waut, wan diene Jebäda nich soo haustich ooda nich opp soone besondre Wajch beauntwuat woaren? Dan doo de Wätfru von Jesus sien Jlikjnis no. Bäd aunhoolent un velot die doaropp, daut Gott die nich em Stäakj loten woat un daut hee to de rajchte Tiet opp irjenteene Wajch diene Jebäda beauntwuaten woat. Pracha Jehova wieda om sienen heiljen Jeist (Filip. 4:13, JHF). Denkj doaraun, daut Jehova die boolt soo sea säajnen woat, daut du von aul daut schwoare vejäten woascht, waut du nu derchmoaken motst. Wan du nu met Jehova siene Help diene Trubbels derchsteist, dan woascht du lota väl bäta reed sennen fa de Trubbels, waut doa noch oppkomen (1. Pet. 1:6-7).

15. Waut fa eene Schwierichkjeit hauden Jesus siene Jinja no Matäus 17:19-20 no?

¹⁵ Jesus lieed siene Jinja, daut de Gloowen an halpen wudd met Schwierichkjeiten foadich to woaren (läs Matäus 17:19-20). Opp eene Sauz kunnen dee eenen beesen Jeist nich utdriewen, wan dee soont ea uk ieremol jedonen hauden. Wuarom schauft daut nich? Jesus säd, daut an daut aun Gloowen fäld. Hee säd to an, daut see wudden met Schwierichkjeiten foadich woaren kjennen, waut soo groot wieren aus een Boajch, wan see jenuach Gloowen hauden. Vondoag dän Dach hab wie veleicht uk soone Schwierichkjeiten, wua wie nich jleewen met foadich to woaren.

16. Woo haft de Gloowen Geydi jeholpen, met waut sea schwoaret foadich to woaren?

¹⁶ Geydi es eene Sesta, waut en Guatemala wont. Äa Maun Edi wort dootjemoakt, aus dee beid von een Toopkomen no Hus wankten. Woo haft de Gloowen Geydi jeholpen, met dit schwoare foadich to woaren? See sajcht: “Bäden halpt mie, miene Laust opp Jehova to lajen un mie ennalich ruich to feelen. Ekj kunn seenen, woo Jehova derch miene Famielje un derch miene Frind von de Vesaumlunk fa mie sorjd. Wan ekj em Deenst fa Jehova drock bliew, dan hab ekj daut nich soo schwoa un kaun eenen Dach opp eemol nämen, onen mie too sea äwa dän näakjsten Dach to sorjen. Dit schwoare haft mie jewäsen, daut ekj met de Help von Jehova, Jesus un von de Organisazion met jieda Proow woa foadich woaren kjennen, endoont waut daut es.”

17. Waut kjenn wie doonen, wan onse Schwierichkjeiten soo sent aus een groota Boajch?

¹⁷ Es doa wäa jestorwen, waut du väl jeräakjent hast? Dan nemm die Tiet un studia de biblische Jeschichten von deejanje, waut vom Doot oppjewakjt worden.  Daut woat die halpen, daut dien Gloowen aun daut oppstonen vom Doot noch stoakja woat. Best du truarich, wiels doa wäa von diene Famielje utjeschloten wort? Dan studia un moak die daut secha, daut daut emma daut baste es, wan Jehova wäm trajchtwiest. Bruck jieda Schwierichkjeit, waut du hast, aus eene Jeläajenheit, om die em Gloowen to stoakjen. Schedd die to Jehova ut. Sie met diene Breeda un Sestren toop un hool die nich von aundre oppoat (Spr. 18:1). Sie drock met soont, waut die halpt uttohoolen, wan du veleicht uk roaren motst (Psa. 126:5-6). Hia nich opp, pinkjlich no de Toopkomes to wanken, to prädjen un de Schreft to läsen. Un denkj emma aun daut wundascheene, waut Jehova ons vesproaken haft. Wan du beläfst, woo Jehova die halpt, dan woat dien Gloowen emma stoakja woaren.

18. Waut kjenn wie doonen, wan wie enwoaren, daut ons Gloowen noch nich stoakj jenuach es?

¹⁸ Woa nich mootloos, wan du en schwoare Tieden enwoascht, daut dien Gloowen noch nich stoakj jenuach es. Schauf doaropp, dienen Gloowen to stoakjen, un doo daut, waut Jesus siene Apostel deeden. Dee säden: “Stoakj ons dän Gloowen!” (Luk. 17:5). Denkj uk äwa de Biespels no, waut wie en disen Artikjel jeseenen haben. Hool aul daut em Denkj, wua Jehova die aul jeholpen haft, soo aus Miguel un Yurai. Bäd soo aus Vero äare Dochta un Anel aunhoolent to Jehova, besonda wan du daut sea schwoa hast. Un denkj soo aus Geydi emma doaraun, daut Jehova die derch diene Famielje ooda Frind halpen kaun. Wan du die nu bie diene Schwierichkjeiten von Jehova halpen latst, dan woascht du die noch sechra sennen, daut hee die lota uk halpen woat, met aule Trubbels foadich to woaren.

19. Äwa waut wia Jesus sikj secha, un äwa waut kjenn wie ons secha sennen?

¹⁹ Jesus muak siene Jinja dietlich, en waut vonne Stekjen an daut noch aun Gloowen fäld. Oba hee twieweld kjeenmol doaraun, daut dee met Jehova siene Help tru bliewen wudden, wan dee lota wudden aufjeprooft woaren (Joh. 14:1; 16:33). Hee wia sikj uk secha, daut eene groote Häad “de groote Vefoljunk”, ooda groote Triebsaul, äwaläwen wudden, wiels dee eenen stoakjen Gloowen haben wudden (Opb. 7:9, 14). Woascht du mank dee sennen? Met Jehova siene Help woascht du kjennen, wan du nu aules deist, waut du kaust, om die em Gloowen to stoakjen! (Heb. 10:39).