Hast du daut jewist?
Waut wort no Jona siene Tiet met Ninive?
ROM daut Joa 670 v. Chr. wia Assierien daut jratste Rikj oppe Welt jeworden. Soo aus daut opp eene Websied von daut British Museum säd, rieekjt dit Rikj “em Wasten bat Ziepern un em Oosten bat Iran un to eene Tiet wia doa uk noch Ägipten met en.” Dee äare Hauptstaut Ninive wia de jratste oppe Welt. Doa jeef daut väl wundaschmocke Goades, groote Paulausten un groote Bibliotäkjen. Oppe Wenj von daut ieeschtemmasche Ninive stunt uk bowen, daut de Kjennich Assurbanipal sikj selfst fa dän “Kjennich vonne Welt” tald, soo aus väl aundre assierische Kjennichs daut uk deeden. To dee Tiet späad sikj daut soo, daut Assierien un Ninive kjeena wudd jewennen kjennen.
To jane Tiet wia de stoakje Weltmacht Assierien daut jratste Rikj oppe Welt
Oba aus Assierien ieescht aum stoakjsten wia, säd Jehova sien Profeet Zefanja: “De HAR woat . . . Assur [ooda Assierien] ombrinjen. Ninive woat hee to eene Wiltnis moaken.” Un Jehova sien Profeet Nahum säd noch verut: “Nämt äa Selwa un Golt; . . . hia es aules vedorwen, vebroaken, un bestreept. . . . Aul dee waut die seenen, woaren von die wajchranen un sajen: Ninive es enne Grunt jebrocht” (Zef. 2:13; Nah. 2:10-11; 3:7). Aus de Menschen dise Profezeiungen hieeden, haben dee veleicht jewundat: “Kaun daut soont werkjlich jäwen? Kaun daut stoakje Assierien jeemols enjenomen woaren?” Soont motten de Menschen sikj nich haben kunt väastalen.
Ninive wort eene velotne Wiltnis!
Un doch kjeem et krakjt soo rom! Een Stootje ver daut Joa 600 v. Chr. hauden de Babelonia un de Meeda Assierien enjenomen. Met de Tiet wia Ninive gaunz veloten un kjeena docht mea aun dee Staut. En eenen Artikjel von daut Metropolitan Museum of Art en New York sajcht daut, daut de Staut schlieslich unjajeschett wia, un de Menschen kjanden Ninive bloos noch, wäajen daut en de Bibel stunt. De Biblical Archaeology Society säd, “daut kjeena mea neiw wist, aus daut dise besondre assierische Hauptstaut mol jejäft haud.” Oba aune 1845 funk de Jeschichtsforscha Austen Henry Layard aun, de Staut Ninive väatogrowen. Daut, waut hee funk, wiest, daut Ninive eene sea schmocke, stoakje Staut wia.
De Profezeiungen äwa Ninive erfelden sikj krakjt. Daut jeft ons de Sechaheit, daut daut, waut äwa daut Enj von de menschelje Rejierungen verutjesajcht es, sikj uk erfellen woat (Dan. 2:44; Opb. 19:15, 19-21).
