DE Vewaultasch en de Bibeltiet kjemmaden sikj om aundre äa Hus, äaren Hoff ooda äa Launt. De hebräische un griechische Wieed, waut met “Vewaulta” äwasat woaren, kjennen uk bedieden, daut eena een Oppsechta es ooda daut eena äwa een Hus aunjestalt es.

Aus Jakob sien Sän Josef een Sklow en Ägipten wia, wort hee de Vewaulta von sienen Wieet sien Hus. Un sien ägiptischa Wieet leet “aules waut hee haud, . . . en Josef siene Macht” (1. Mo. 39:2-6). Lota wort Josef een majchtja Harscha en Ägipten un stald selfst eenen Vewaulta äwa sien Hus aun (1. Mo. 44:4, NW).

En Jesus siene Tiet wonden de Menschen, waut väl Launt hauden, foaken en de Staut, wiet auf von äare Stapen. Doawäajen stalden see Vewaultasch aun, waut emma no de Oabeida sagen, waut opp äare Stapen schauften.

Wäa kunn een Vewaulta woaren? De reemischa Schriewa Columella, waut en de Aposteltiet läwd, säd, daut een Sklow, waut aus een Oppsechta ooda Vewaulta aunjestalt wort, “eena sennen sull, waut Erfoarunk [haud]” met Foarmoabeit. Daut sull uk eena sennen, waut “doano sach, daut de Oabeida schauften, oba waut nich hunjsch wia.” Hee säd uk: “Daut wichtichste es, daut dee nich jleeft, daut hee aules weet, oba daut hee noch emma mea lieren well.”

Gott sien Wuat brukt eenen Vewaulta aus Jlikjnis, om eenjet to wiesen, waut en de Christenvesaumlunk jedonen woat. De Apostel Petrus biejlikj rot de Christen too, daut see daut, waut Gott an jejäft haft, brucken sellen, om “dän näakjsten toom gooden to deenen, aus een Vewaulta, dee met Gott siene Jnodengowen tru omjeit” (1. Pet. 4:10).

Mau rajcht Jesus räd en sien Jlikjnis en Lukas 16:1-8 von eenen Vewaulta. Un aus Jesus to siene Nofolja säd, waut daut Tieekjen sennen wudd, daut hee aus Kjennich harschen wudd, säd hee uk, daut hee eenen truen, weisen Kjnajcht, ooda truen “Hüsvewaulta” aunstalen wudd. De wichtichste Oppgow von disen Vewaulta wudd sennen, daut hee Christus siene Nofolja en de latste Tiet daut jeistelje Äten jäwen wudd, waut an wudd fälen (Luk. 12:42, Friesenbibel; Mat. 24:45-47). Wie sent sea dankboa, daut de trua Vewaulta de Bieekja un de aundre Sachen reedmoakt, waut ons em Gloowen stoakjen un oppe gaunze Welt to haben sent.