1-2. Waut mott eena doonen, ea eena sikj deepen loten kaun?

 EN DE latste fief Joa haben sikj mea aus eene Million Menschen aus eent von Jehowa siene Zeijen deepen loten. Väle von dee haben de Woarheit aul “von Kjint aun” kjanen jelieet, krakjt soo aus Timotäus ieeschtemma (2. Tim. 3:14-15). Aundre lieeden Jehowa kjanen, aus dee aul ella wieren. Een Stoot trigj leet eene Fru, waut de Bibel studieed, sikj deepen, aus see 97 Joa wia!

² Deist du de Bibel studieren ooda best du en eene Famielje von Jehowa siene Zeijen un jrebbelst äwa die deepen loten? Dauts sea goot, daut du die daut väajenomen hast! Oba daut du die kaust deepen loten, woascht du die motten Jehowa hanjäwen. Dis Artikjel woat ons wiesen, waut daut meent. Dee woat die uk wiesen, wuarom du die nich trigjhoolen saust, die Jehowa hantojäwen un deepen to loten, wan du ieescht reed best doatoo.

WAUT MEENT DAUT, SIKJ HANTOJÄWEN?

3. Woone Menschen en de Bibeltiet hauden sikj Jehowa hanjejäft?

³ Wan de Bibel doavon rät, daut sikj wäa hanjejäft haft, meent daut, daut dee sikj oppoat jesat haft toom waut besondret doonen. De Israeliten wieren Jehowa aus Volkj hanjejäft. Oba eenje von dee hauden sikj Jehowa opp eene gaunz besondre Wajch hanjejäft. Aaron biejlikj haud eene goldne Plot väaren aun siene Koppbinj. Opp dise Plot stunt: “Däm HARN jeweit”, ooda hanjejäft. Dise goldne Plot wees, daut hee oppoat jesat wia fa eenen gaunz besondren Deenst – hee wia de Israeliten äa Huaga Priesta (2. Mo. 28:36-37). De Nazara hauden sikj Jehowa uk opp eene besondre Wajch hanjejäft. Daut Wuat “Nazara” kjemt von daut hebräische Wuat nazirʹ, waut doa meent: “oppoat jesat” ooda “hanjejäft fa eene besondre Oabeit”. Daut Jesaz Moses haud uk Aunwiesungen  bloos fa de Nazara, un dee musten sikj doaraun hoolen (4. Mo. 6:2-8).

4. (a) Waut woat daut Wichtichste en dien Läwen sennen, wan du die Jehowa hanjejäft hast? (b) Waut meent daut, “nich mea fa sikj selfst läwen”? (See uk daut Bilt.)

⁴ Wan du die Jehowa hanjefst, dan bewiest du, daut du eent von Jesus Christus siene Jinja woaren west un daut doonen west, waut Gott haben well. Daut es daut Wichtichste en dien Läwen! Waut es doa aules met en? Jesus säd: “Wan irjentwäa mie nofoljen well, dan mott dee nich mea fa sikj selfst läwen” (Mat. 16:24). De griechische Wieed, waut met “nich mea fa sikj selfst läwen” äwasat sent, kjennen uk bedieden, “to eenem selfst nä sajen”. Wäajen wie ons Jehowa hanjejäft haben, mott wie to aules nä sajen, waut Jehowa nich jleicht (2. Kor. 5:14-15). Doa es met en, daut wie nä sajen to daut, “waut daut Fleesch fa Woakjen haft”, soo aus Huararie (Gal. 5:19-21; 1. Kor. 6:18). Woat dit dien Läwen schwoa moaken, wan du die doaraun helst? Nich wan du Jehowa leefst un die gaunz secha best, daut siene Jesazen die selfst toom gooden sent (Psa. 119:97; Jes. 48:17-18). Een Brooda, waut Nicholas heet, säd: “Du kaust Jehowa siene Jesazen soo seenen aus de Sproten von een Jefenkjnis, waut die nich doonen loten, waut du west ooda aus de Sproten von een Hock, wua Leiws bennen sent, daut du nich en Jefoa best.”

5. (a) Woo kaust du die Jehowa hanjäwen? (b) Waut es de Unjascheet tweschen die hanjäwen un die deepen loten? (See uk daut Bilt.)

⁵ Woo kaust du die Jehowa hanjäwen? Du vesprakjst en een Jebäd, daut du bloos am aunbäden un deenen west un daut sienen Wellen doonen fa die daut Ieeschte em Läwen komen woat. Dan vesprakjst du,  daut du Jehowa wieda leewen west “met dien gaunzet Hoat un met diene gaunze Seel un met dien gaunzet Vestaunt un met aul diene Krauft” (Mar. 12:30). Die hanjäwen deist du fa die auleen – daut es bloos tweschen die un Jehowa. Oba deepen loten deist du die ver aundre, wua dee seenen kjennen, daut du die Jehowa hanjejäft hast. Die hanjäwen es een iernstet Vespräakjen un du saust die doaraun hoolen; un Jehowa velangt daut uk von die (Liera 5:3-4).

WUAROM SAUST DU DIE JEHOWA HANJÄWEN?

6. Waut brinjt eenem bat doa, sikj Jehowa hantojäwen?

⁶ Diene Leew fa Jehowa es de wichtichste Uasoak, wuarom du die am hanjefst. Oba diene Leew stett sikj nich bloos opp een Jefeel. Enne Städ daut hast du “jeistliche Ensecht” jekjräajen un kaust krakjt vestonen, “waut sien Wellen … es”. Doaderch daut du dit jelieet hast, es diene Leew fa am jrata jeworden (Kol. 1:9). Wiels du de Schreft studieet hast, best du die secha, (1) daut et Jehowa jeft, (2) daut de Bibel sien Wuat es un (3) daut hee siene Organisazion brukt toom sienen Wellen derchfieren.

7. Waut mott eena doonen, ea eena sikj Gott hanjeft?

⁷ Soone, waut sikj Jehowa hanjäwen, sellen de Gruntlieren von Gott sien Wuat weeten un doano läwen. Dee doonen äa Bastet toom met aundre von äaren Gloowen räden (Mat. 28:19-20). Dee haben eene jratre Leew fa Jehowa jekjräajen un wellen bloos am aunbäden un deenen. Es daut bie die uk soo? Wan du Jehowa met  dien gaunzet Hoat leefst, dan woascht du die am nich bloos doawäajen hanjäwen un deepen loten, wiels du dienen Bibelliera ooda diene Elren west tofrädstalen ooda wäajen aul diene Frind daut uk doonen.

8. Woo woat de Dankboakjeit die halpen, die hantojäwen? (Psalm 116:12-14).

⁸ Wan du doaräwa nodenkjst, waut Jehowa aul aules fa die jedonen haft, dan woascht du dankboa sennen un die wellen am hanjäwen (läs Psalm 116:12-14). Daut sajcht je, von Jehowa komen “aule goode Sachen un aule volkomne Gowen” (Jak. 1:17). Daut jratste Jeschenkj, waut Jehowa ons jejäft haft, es daut Opfa von sienen Sän Jesus. Denkj mol han, derch dit Leesjelt kaust du een gooda Frint met Jehowa sennen. Doaderch hast du uk de Mäajlichkjeit, fa emma to läwen (1. Joh. 4:9-10, 19). Wan du die Jehowa hanjäwen deist, dan bewiest du, daut du dankboa best fa daut jratste Jeschenkj un fa aul de aundre Säajnungen, waut Jehowa die jejäft haft (5. Mo. 16:17; 2. Kor. 5:15). En daut Buak Een scheenet Läwen fa emma!, en daut 46. Kapitel Numma 4, woat dietlich jemoakt, wuarom wie am kjennen dankboa sennen. Doa es uk daut Video Waut wie Gott jäwen kjennen von dree Minuten met bie.

BEST DU REED, DIE HANTOJÄWEN UN DEEPEN TO LOTEN?

9. Wuarom sell wie ons nich bemott feelen, ons hantojäwen?

⁹ Veleicht feelst du die noch nich reed, die hantojäwen un deepen to loten. Ooda du motst noch eenje Sachen en dien Läwen endren, daut du kaust Jehowa siene Jesazen nokomen ooda die fält noch mea Tiet, die em Gloowen to stoakjen (Kol. 2:6-7). Nich aule komen jlikjen bosich veraun un nich aule junge Menschen sent en dautselwje Ella reed, sikj hantojäwen un deepen to loten. Proow to seenen, wua du die vebätren kaust, un doo daut. Proow die nich met aundre to vejlikjen (Gal. 6:4-5).

10. Waut kaust du doonen, wan du die noch nich reed feelst, die hantojäwen un deepen to loten? (See uk daut Hock “ Fa soone, waut en eene Famielje von Jehowa siene Zeijen oppwaussen”.)

¹⁰ Nemm die daut wieda väa, die Jehowa hantojäwen, wan du uk enwoascht, daut du noch nich doafäa reed best. Froag Jehowa doano, daut hee die halpt de Endrungen to moaken, waut doatoo needich sent (Filip. 2:13; 3:16, NW). Du kaust die secha sennen, daut hee no dien Jebäd horchen woat un daut beauntwuaten (1. Joh. 5:14).

WUAROM EENJE SIKJ TRIGJHOOLEN

11. Woo woat Jehowa ons halpen, am tru to bliewen?

¹¹ Eenje, waut sikj aul wudden kjennen hanjäwen un deepen loten, hoolen sikj noch trigj. Veleicht denkjen dee: “Waut, wan ekj lota eene groote Sind bego un utjeschloten woa?” Wan die daut Angst moakt, dan sie die secha, daut Jehowa die aules jäwen woat, waut die fält, daut du “Gott to jefaulen läwen” kaust (Kol. 1:10). Hee woat die uk de Krauft jäwen, daut Rajchte to doonen. Hee haft jewäsen, daut hee daut doonen kaun, wiels hee aul väle jeholpen haft, daut Rajchte to doonen (1. Kor. 10:13). Dauts eene Uasoak, wuarom mau weinich von de Christenvesaumlunk utjeschloten woaren. Jehowa halpt siene Deena, am tru to bliewen.

12. Waut woat ons halpen, nich eene groote Sind to begonen?

¹² Jieda onvolkomna Mensch woat aufjeprooft, waut Orrajchtet to doonen (Jak. 1:14, JHF). Oba daut es diene Entscheidunk, aus du daut doonen woascht ooda nich. De Woarheit es, daut du selfst  entscheiden kaust, woo du läwen woascht. Eenje sajen, daut wie daut nich kontrollen kjennen, waut wie feelen un doonen. Oba daut stemt nich. Du kaust daut lieren, diene schlajchte Wenschen unja Kontroll to hoolen. Mau rajcht wan dee en die oppkomen, kaust du entscheiden, nich daut Orrajchte to doonen. Doatoo motst du jieda Dach bäden. Du saust pinkjlich Gott sien Wuat studieren, no de Toopkomes wanken un met aundre von dienen Gloowen räden. Wan du dit pinkjlich deist, dan woascht du de Krauft haben, die aun dien Vespräakjen to hoolen. Un vejät uk nich, daut Jehowa die emma halpen woat, daut to doonen (Gal. 5:16).

13. Waut von goodet Biespel jeef Josef ons?

¹³ Die woat daut leichta sennen, Jehowa tru to bliewen, wan du die aul ea eenich best, waut du doonen west, wan du aufjeprooft woascht. De Bibel rät von väl Menschen, waut krakjt dit deeden, wan dee uk onvolkomen wieren. Potifar siene Fru biejlikj proowd, Josef mieremol bat doa to brinjen, met ar Huararie to driewen, oba hee wist krakjt, waut hee doonen wudd. De Bibel sajcht, “hee wäad ar auf” un säd: “Woo kunn ekj dan bloos soon schlajchtet doonen un jäajen Gott sindjen?” (1. Mo. 39:8-10). Dauts dietlich, daut Josef krakjt wist, waut hee doonen wudd, aul ea de Fru am aufproowd. Doaderch wia am daut leichta, daut Rajchte to doonen, aus hee vesocht wort.

14. Waut kaun ons halpen, daut Rajchte to doonen, wan wie aufjeprooft woaren?

¹⁴ Woo kaust du Josef nodoonen un Gott tru bliewen, wan du aufjeprooft woascht? Doatoo motst du die nu aul eenich woaren, waut du dan doonen woascht. Lia, daut fuaz auftowiesen, waut Jehowa haust, un denkjt doa nich wieda äwa no (Psa. 97:10; 119:165). Soo woascht du nich biejäwen, wan du aufjeprooft woascht. Du woascht dan krakjt weeten, waut du doonen saust.

15. Woo kaun eena wiesen, daut eena Jehowa iernstlich sieekjt? (Hebräa 11:6).

¹⁵ Veleicht weetst du daut, daut du de Woarheit hast, un du west Jehowa met dien gaunzet Hoat deenen. Oba veleicht es doa noch irjentwaut, waut die trigjhelt, die hantojäwen un deepen to loten. Dan kaust du aun daut Biespel von dän Kjennich David denkjen. Du kaust Jehowa uk doarom prachren: “Gott, see emol woo daut met  mie steit! Unjasieekj mien Hoat; proow mie ut un see, woo ekj daut meen. Un see emol auf ekj opp däm beesen Wajch sie, un leid mie opp däm eewjen Wajch!” (Psa. 139:23-24). Jehowa säajent aul deejanje, “dee am iernstlich sieekjen”. Wäajen du doa wieda opp schaufst, die hantojäwen un deepen to loten, wiest daut, daut du aul krakjt dit deist (läs Hebräa 11:6).

KOMM JEHOWA EMMA NODA

16-17. Woo trakjt Jehowa soone nosikj, waut en eene Famielje von Jehowa siene Zeijen oppwaussen? (Johanes 6:44).

¹⁶ Jesus säd, daut Jehowa siene Deena nosikj trakjt (läs Johanes 6:44). Denkj mol äwa no, woo besonda daut es un waut daut fa die bediet. Jehowa sitt bie jiedrem eenen, waut hee no sikj trakjt, waut Goodet. Hee räakjent jiedrem eenen sea väl un doawäajen sajcht hee to dee: “[Jie] woaren miene sennen” (Mal. 3:16-17). Un daut es uk bie die soo.

¹⁷ Kaun daut sennen, daut du een Jugentlicha best, waut en eene Famielje von Jehowa siene Zeijen oppwaust? Dan feelst du die veleicht soo, daut du Jehowa bloos doawäajen deenst, wiels diene Elren daut doonen un nich wäajen Jehowa die nosikj jetrocken haft. Oba de Bibel sajcht: “Nodat junt no Gott, dan woat hee uk dicht no junt komen” (Jak. 4:8; 1. Chr. 28:9). Wan du die aunstrenjst, Jehowa noda to komen, dan woat hee uk dicht no die komen. Jehowa sitt die nich bloos aus Poat von de Famielje. Hee trakjt jiedrem eenem nosikj; uk dee, waut en eene Famielje von Jehowa siene Zeijen oppwaussen. Wan soona sikj aunstrenjt un Jehowa noda kjemt, dan deit Jehowa daut, waut daut en Jakobus 4:8 sajcht (see uk 2. Tessalonicha 2:13).

18. Waut woa wie en dän näakjsten Artikjel seenen? (Psalm 40:9).

¹⁸ Wan du die Jehowa hanjefst un die deepen latst, dan hast du krakjt soone Enstalunk, aus Jesus haud. Hee säd to sienen Voda, daut hee reed wia, aules to doonen, wua hee am no fruach (läs Psalm 40:9; Heb. 10:7). En dän näakjsten Artikjel woa wie seenen, waut die halpen kaun, Jehowa no diene Doop wieda tru to deenen.