1-2. No Aposteljeschicht 8:27-31, 35-36, 38 no, waut brocht dän ätiopischen Beaumten bat doa, sikj deepen to loten?

WEST du die aus eent von Christus siene Nofolja deepen loten? Väle sent sikj ut Leew un Dankboakjeit doatoo eenich jeworden. Soo wia daut mol bie eenen Maun, waut fa de Kjennichsche en Ätiopien aus Beaumta deend.

² Soo schwind aus dis Beaumta en de Schreft lieed, daut hee sikj wudd sellen deepen loten, deed hee daut (läs Aposteljeschicht 8:27-31, 35-36, 38). Wuarom? Hee räakjend Gott sien Wuat väl. Daut weet wie, wiels hee waut ut Jesaja läsd, aus hee opp dän Woagen saut. Un aus Filippus met am jerät haud, wia hee dankboa fa daut, waut Jesus fa am jedonen haud. Oba wuarom haud dis Beaumta de Reis no Jerusalem jemoakt? Wäajen hee aul ea eene Leew fa Jehova jekjräajen haud, fua hee nom Tempel toom Jehova aunbäden. Daut meent, hee wia nich bie dän Gloowen jebläwen, waut hee von kjlien aun jelieet haud, oba wia bie krakjt daut Volkj biejegonen, waut dän woaren Gott deend. Un ut Leew fa Jehova muak hee noch eene aundre wichtje Entscheidunk. Hee leet sikj deepen un wort Christus sien Nofolja (Mat. 28:19).

3. Waut wudd eenem doavon aufhoolen kjennen, sikj deepen to loten? (See dän Kausten “ Woo steit daut met dien Hoat?”)

³ Diene Leew fa Jehova kaun die bat doa brinjen, daut du die west deepen loten. Oba aundret, waut du sea jleichst, kaun die uk doavon aufhoolen. Biejlikj waut? Daut kaun, daut du diene Frind un Frintschoft sea väl räakjenst, waut Jehova nich deenen. Un veleicht hast du Angst, daut dee  jäajen die sent, wan du die deepen latst (Mat. 10:37). Ooda du jleichst jewesse Aunjewanheiten, waut Jehova nich lieden kaun. Dan es die daut veleicht schwoa, doamet opptohieren (Psa. 97:10). Ooda du best daut von kjlien aun jewant, de faulsche Gloowes äare Sitten un Heljedoag to fieren. Un du denkjst noch jieren trigj, woo scheen die daut jinkj, doa mettomoaken. Doawäajen es die daut veleicht schwoa, soont tochtoloten, waut Jehova nich jefelt (1. Kor. 10:20-21). Tolatst motst du die eenich woaren, wäm ooda waut du daut dolste leefst.

4. Waut saul eenem bat doa brinjen, sikj deepen to loten?

⁴ Daut jeft väl, waut du leewen kaust un wuafäa du kaust dankboa sennen. Veleicht hautst du biejlikj aul eene Leew fa Jesus un räakjensd de Schreft väl, ea du Jehova siene Zeijen kjanen lieezhd un met dee studieezhd. Un nu jleichst du daut, met dee toop to sennen. Oba aul daut rieekjt nich too, daut du die west Jehova hanjäwen un die deepen loten. Waut die opp iernst bat doa brinjt, es diene Leew fa Jehova. Wan du am dolla leefst aus irjentwaut aundret, dan woat die nuscht un kjeen Mensch doavon aufhoolen kjennen, Jehova to deenen. Diene Leew fa am woat die halpen, die deepen to loten, un am dan uk wieda tru to deenen.

5. Äwa waut vonne Froagen woa wie räden?

⁵ Jesus säd, daut wie Jehova met ons gaunzet Hoat, gaunze Seel, aul onse Jedanken un aul onse Krauft leewen sellen (Mar. 12:30). Waut kjenn wie doonen, daut wie Jehova soo sea leewen un respakjten? Wan wie äwa de Leew nodenkjen, waut hee fa ons haft, dan woa wie am uk leewen (1. Joh. 4:19). Waut deit daut noch aun ons, wan wie Leew fa Jehova jekjräajen haben? Un waut woa wie dan doonen? *

6. Woo kjenn wie mea äwa Jehova lieren, soo aus Reema 1:20 sajcht?

⁶ Lia mea äwa Jehova derch daut, waut hee jemoakt haft (läs Reema 1:20; Opb. 4:11). Denkj mol han, met woo väl Weisheit de Plaunten un Tieren jemoakt sent. Lia uk mea doaräwa, woo wundascheen dien Kjarpa jemoakt es (Psa. 139:14). Denkj uk doaraun, woo väl Krauft Jehova de Sonn jejäft haft – un dee es je mau eent von dusende Millionen Stierns, waut et jeft (Jes. 40:26). * Wan du daut deist, dan woascht du Jehova emma mea respakjten un siene Weisheit un Macht emma dolla bewundren. Oba om sien gooda Frint to sennen, es noch mea needich. Du motst am bäta kjanen lieren, daut du eene groote Leew fa am kjrichst.

7. Äwa waut motst du die secha sennen, daut du Jehova noch dolla leewen kaust?

⁷ Du motst die uk secha sennen, daut Jehova om die perseenlich bekjemmat es. Felt die daut schwoa to jleewen, daut deejanja, waut Himmel un Ieed jemoakt haft, om die omweet un fa die sorcht? Dan denkj doaraun, daut Jehova “von ons aula nich wiet auf” es (Apj. 17:26-28). Hee “forscht jieda Hoat ut”. Un soo aus David to Salomo säd, vesprakjt Jehova die uk: “Wan du am sieekjen woascht, woascht du am finjen” (1. Chr. 28:9). Jehova sajcht: “[Ekj] kroag . . . die met truhoatje Leew” (Jer. 31:3). Daut es je, wuarom du nu de Schreft studieescht. Je bäta du vesteist, waut Jehova  aules fa die jedonen haft, je dolla woascht du am leewen.

8. Woo kaust du wiesen, daut du Jehova leefst?

⁸ Wan du to Jehova bätst, kaust du wiesen, daut du am leefst. Diene Leew fa am woat jrata, wan du am von diene Sorjen vetalst un am fa daut danken deist, waut hee aules fa die deit. Un wan du sitst, woo Jehova diene Jebäda erhieet, dan feelst du die noch dolla met am vebungen (Psa. 116:1). Un dan twiewelst du doa uk nich aun, daut hee die vestonen kaun. Oba daut du Jehova noch noda komen kaust, motst du vestonen, woo hee denkjt un waut hee von die velangt. Un daut kaust du bloos, wan du de Schreft studieescht.

9. Woo kaust du wiesen, daut du de Schreft väl räakjenst?

⁹ Lia, de Schreft väl to räakjnen. Bloos doa bennen kaust du de Woarheit äwa Jehova finjen un waut hee sikj väajenomen haft. Woo kaust du wiesen, daut du de Schreft väl räakjenst? Na, wan du doa jieda Dach bennen läsen deist un die fa dien Bibelstudium reedmoakst un daut nokjemst, waut du doa lieescht (Psa. 119:97, 99; Joh. 17:17). Hast du eenen Plon fa dien Bibelläsen, un helst du die uk jieda Dach doaraun?

10. Wuarom es de Schreft soo besonda?

¹⁰ Wuarom jeit kjeen aundret Buak met de Schreft to vejlikjen? Daut, waut doa bennen von Jesus sien Läwen jeschräwen es, es foaken von soone, waut daut selfst jeseenen haben. Bloos de Schreft sajcht ons krakjt, waut Jesus fa ons jedonen haft. Un je mea du äwa Jesus lieescht, je dolla woascht du uk wellen sien Frint sennen.

11. Waut woat die halpen, Jehova to leewen?

¹¹ Lia, Jesus to leewen, un diene Leew fa Jehova woat jrata woaren. Woosoo? Wiels Jesus daut krakjt soo haft aus sien Voda (Joh. 14:9). Je mea du äwa Jesus lieescht, je dolla woascht du uk Jehova kjanen lieren un leewen. Denkj mol han, woo metfeelent Jesus to soone wia, waut fa läach aunjeseenen worden – biejlikj de Oame, de Kranke un dee, waut daut sea schwoa hauden. Ooda denkj uk doaraun, woo sikj  dien Läwen aul vebätat haft derch daut, waut du von Jesus jelieet hast (Mat. 5:1-11; 7:24-27).

12. Waut woascht du wellen doonen, wan du mea äwa Jesus lieescht?

¹² Woat diene Leew fa Jesus nich noch jrata, wan du doaräwa nodenkjst, daut die derch sienen Doot kjennen de Sinden vejäft woaren? (Mat. 20:28). Waut woascht du doonen, wan du vestonen kaust, daut Jesus wellich reed wia, fa die to stoawen? Secha woascht du dan een Leetsennen haben un Jehova om Vejäwunk bäden (Apj. 3:19-20; 1. Joh. 1:9). Un du woascht uk jleichen met dee toop to sennen, waut Jehova un Jesus krakjt soo sea leewen aus du.

13. Derch waut halpt Jehova die?

¹³ Lia, deejanje to leewen, waut Jehova leewen. Diene Frind un Frintschoft, waut Jehova nich deenen, kjennen daut woomäajlich nich vestonen, wuarom du die Jehova hanjäwen west. Veleicht sent dee soogoa jäajen die. Woo woat Jehova die dan halpen? Hee woat doafäa sorjen, daut du derch de Vesaumlunk eene jeistelje Famielje kjrichst. Wan du die faust aun dee helst, dan woascht du de Leew un de Help kjrieen, waut die fält (Mar. 10:29-30; Heb. 10:24-25). Un met de Tiet kaun dien Frintschoft dan uk aunfangen fa Jehova to läwen (1. Pet. 2:12).

14. Waut hast du beläft, wäajen du daut nokjemst, waut 1. Johanes 5:3 sajcht?

¹⁴ Lia, Jehova siene Gruntsauzen väl to räakjnen, un läw doano. Ea du Jehova kjanen lieezhd, deetst du veleicht selfst entscheiden, woo du läwen wust. Oba nu hast du jeseenen, daut et väl bäta es, daut to doonen, waut Jehova haben well (Psa. 1:1-3; läs 1. Johanes 5:3). Denkj biejlikj mol aun dän Rot, waut de Schreft de Ehemana, Ehefrues, Elren un Kjinja jeft (Efs. 5:22–6:4). Es diene Famielje nich väl schaftja, wiels du disen Rot nokjemst? Best du nich uk een bätra Mensch jeworden, wiels du die soone Frind jesocht hast, waut Jehova fa rajcht talt? Best du nu nich väl schaftja? (Spr. 13:20; 1. Kor. 15:33). Secha hast du daut aules beläft.

15. Waut kaust du doonen, wan die daut nich leicht es, daut notokomen, waut de Schreft lieet?

¹⁵ Daut kaun, daut die daut mol nich leicht es, to weeten, woo du daut nokomen kaust, waut du ut de Schreft lieescht. Doawäajen haft Jehova derch siene Organisazion fa Bieekja jesorcht, waut de Schreft utlajen. Dee halpen ons, daut wie seenen kjennen, waut goot un schlajcht es (Heb. 5:13-14). Wan du en dise Bieekja läst un studieescht, dan woascht du enwoaren, daut dee krakjt von daut räden, waut die fält. Daut kaun die bat doa brinjen, daut du west Poat sennen von Jehova siene Organisazion.

16. Woo haft Jehova daut met siene Deena enjerecht?

¹⁶ Lia, Jehova siene Organisazion to leewen, un unjastett dee. Jehova haft daut soo enjerecht, daut et Vesaumlungen jeft un daut sien Sän Jesus daut Haupt äwa dee es (Efs. 1:22; 5:23). Jesus haft en onse Tiet eene kjliene Grupp jesaulwde Mana aunjestalt toom doano seenen, daut sien Woakj veraunkjemt. Jesus nand dise Grupp dän truen, weisen Kjnajcht. Dee nämen äare Oppgow sea iernst un jäwen ons jeisteljet Äten un halpen ons, em jeisteljen stoakj to bliewen (Mat. 24:45-47). Dis trua Kjnajcht sitt biejlikj doano, daut doa feine Eltestasch aunjestalt woaren, waut aus Hoads fa ons sorjen (Jes. 32:1-2; Heb. 13:17; 1. Pet. 5:2-3). De Eltestasch jäwen wellich äa bastet, om die to treesten un die to halpen,  Jehova noch noda to komen. Oba waut es eent von daut wichtichste, waut dee fa die doonen kjennen? Die halpen, aundre von Jehova to lieren (Efs. 4:11-13).

17. Wuarom räd wie to aundre von Jehova, soo aus Reema 10:10, 13-14 sajcht?

¹⁷ Halp aundre, Jehova to leewen. Jesus jeef siene Nofolja daut Jeboot, aundre von Jehova to lieren (Mat. 28:19-20). Daut kaun, daut eena dit Jeboot bloos doawäajen nokjemt, wiels eena jleeft, daut daut von eenem velangt woat. Oba wan diene Leew fa Jehova jrata woat, dan woat die daut krakjt soo gonen aus de Apostel Petrus un Johanes. Dee säden: “Wie kjennen nich aundasch, aus doavon räden, waut wie jehieet un jeseenen haben” (Apj. 4:20). Daut woat ons sea schaftich moaken, wan wie wäm halpen kjennen, Jehova to leewen. Stal die mol väa, woo schaftich de Evangeliumsvekjindja Filippus wia! Hee kunn dän ätiopischen Beaumten halpen, de Woarheit ut de Schreft kjanen to lieren un sikj deepen to loten. Wan du soo aus Filippus Jesus sien Jeboot nokjemst un prädichst, dan wiest du, daut du eent von Jehova siene Zeijen sennen west (läs Reema 10:10, NW *; 10:13-14). Dan woascht du woomäajlich krakjt soo denkjen aus de ätiopischa Beaumta. Dee säd: “Wuarom sull ekj mie nich deepen loten?” (Apj. 8:36).

18. Waut woa wie en dän näakjsten Artikjel derchnämen?

¹⁸ Die deepen to loten es de wichtichste Entscheidunk en dien gaunzet Läwen. Doawäajen motst du doa goot äwa nodenkjen, waut de Doop bediet. Waut motst du dan äwa de Doop weeten? Un waut mott eena ver de Doop doonen un uk nodäm? Dise Froagen woa wie en dän näakjsten Artikjel beauntwuaten.