1-2. Woo weet wie, daut Jehowa sien Nomen fa Jesus wichtich es?

 Fa Jesus es Jehowa sien Nomen daut gaunz wichtichste. Kjeena haft mea jedonen, om sienen Voda sienen Nomen bekaunttomoaken aus hee. Soo aus wie en dän väajen Artikjel jeseenen haben, wia Jesus wellich reed, fa Jehowa sienen Nomen to stoawen; uk fa aul daut, waut doa met en wia (Mar. 14:36; Heb. 10:​7-9). No daut Dusentjoasche Rikj woat Jesus wellich reed sennen, sienen Voda aul siene Macht trigjtojäwen, daut Jehowa sien Nomen kaun jeheilicht woaren (1. Kor. 15:​26-28). Aules, waut Jesus fa Jehowa deed, wees, woo sea hee sienen Voda leewd.

² Jesus kjeem en sienen Voda sienen Nomen no de Ieed (Joh. 5:43; 12:13). Hee muak siene Nofolja met sienen Voda sienen Nomen bekaunt (Joh. 17:​6, 26). Aules, waut Jesus lieed, wia en Jehowa sienen Nomen; uk de Wunda, waut hee muak (Joh. 10:25). Jesus fruach Jehowa mau rajcht doano, daut dee sull no siene Nofolja oppaussen “wäajen sienen ieejnen Nomen sient haulwen” (Joh. 17:11). Dauts kloa, daut Gott sien Nomen fa Jesus daut wichtichste wia. Wudd wie sajen kjennen, daut wie Jesus siene woare Nofolja wieren, wan wie Jehowa sienen Nomen nich mol kjanden ooda brukten?

3. Waut woa wie ons en disen Artikjel unjastonen?

³ Aus woare Christen proow wie, en Jesus siene Footspoaren to gonen, un doawäajen räakjen wie Jehowa sienen Nomen uk sea väl (1. Pet. 2:21). En disen Artikjel woa wie ons unjastonen, wuarom Jehowa deejanje sienen Nomen jejäft haft, waut “de goode Norecht von daut Kjennichrikj” prädjen (Mat. 24:14). Wie woaren uk doavon räden, woo wichtich Jehowa sien Nomen fa jieda eenen von ons sennen saul.

 “EEN VOLKJ FA SIENEN NOMEN”

4. (a) Waut säd Jesus to siene Jinja, jroz ea hee trigj nom Himmel fua? (b) Waut vonne Froag kjemt doaderch opp?

⁴ Jroz ea Jesus trigj nom Himmel fua, säd hee to siene Jinja: “Jie woaren Krauft kjrieen, wan de heilja Jeist ieescht woat opp junt komen, un jie woaren miene Zeijen sennen en Jeru̱salem un äwaraul en Judä̱a un en Sama̱ria un bat de hinjaschte Akj oppe Welt” (Apj. 1:8). Soo de goode Norecht wudd aulawäajen jeprädicht woaren – nich bloos en Israel. Met de Tiet wudden aule Sorten Menschen de Jeläajenheit haben, Jesus siene Nofolja to woaren (Mat. 28:​19-20). Oba waut meend Jesus, aus hee säd: “Jie woaren miene Zeijen sennen”? Wudden dise niee Jinja motten Jehowa sienen Nomen kjanen ooda wudden dee bloos Jesus siene Zeijen sennen? Aposteljeschicht, Kapitel 15 halpt ons, dise Froag to beauntwuaten.

5. Woo muaken de Apostel un Eltestasch en Jerusalem dietlich, daut aulemaun Jehowa sienen Nomen kjanen saul? (See uk daut Bilt.)

⁵ Aune 49 n. Chr. troffen de Apostel un Eltestasch sikj en Jerusalem, om doaräwa to räden, waut de onbeschnädne Nichjuden doonen musten, om Christen to woaren. Opp Enj von dit Toopkomen säd Jakobus, Jesus sien Haulfbrooda: “[Petrus] haft ons aules krakjt vetalt, woo Gott sikj daut ieeschte Mol no de aundre Sorten Menschen jedreit haft, om een Volkj fa sienen Nomen to saumlen von mank dee Menschen”. Wäm sienen Nomen haud Jakobus em Senn? Jakobus docht aun daut, waut de Profeet Amos mol jeschräwen haud. Doawäajen säd Jakobus wieda: “‘Soo daut deejanje, waut noch jebläwen sent, Jehowa iernstlich sieekjen muchten toop met aul de aundre Sorten Menschen. Daut sent Menschen, waut no mienen Nomen jenant woaren.’ Dit sajcht Jehowa” (Apj. 15:​14-18). Aulsoo de niee Jinja wudden Jehowa sienen Nomen nich bloos kjanen, oba uk “no [disen] Nomen jenant woaren.” Dit bediet, dee wudden doafäa bekaunt sennen, daut dee to aundre von disen Nomen räden deeden.

6-7. (a) Wuarom kjeem Jesus no de Ieed? (b) Waut wia noch eene wichtjere Uasoak, wuarom hee no de Ieed kjeem?

⁶ Jesus sien Nomen bediet: “Jehowa es  Radunk”. Un Jehowa brukt dän krakjt doatoo – derch Jesus kjennen dee jerat woaren, waut Gloowen wiesen. Jesus kjeem no de Ieed, om sien Läwen fa de Menschen hantojäwen (Mat. 20:28). Doaderch, daut hee daut Leesjelt betold, muak hee daut mäajlich, daut de Menschen kunnen jerat woaren un eewjet Läwen kjrieen (Joh. 3:16).

⁷ Oba wuarom fäld de Menschen daut verheipts aun daut Leesjelt? Wäajen daut, waut em Goaden Eden passieed. Soo aus wie en dän väajen Artikjel jeseenen haben, stalden de ieeschte Menschen, Adam un Eva, sikj jäajen Jehowa un veluaren doaderch de Mäajlichkjeit, fa emma to läwen (1. Mo. 3:​6, 24). Oba Jesus kjeem no de Ieed fa waut Wichtjeret, aus bloos de sindje Menschen to raden (1. Mo. 3:​4-5). Soo aus wie weeten, vetald de Soton schlemme Läajes äwa Jehowa sienen Nomen. Soo de Menschen musten daut weeten, daut Jehowa nuscht Orrajchtet jedonen haud un daut sien Nomen heilich wia. Jesus wia de baste Persoon, waut dit bewiesen kunn, wiels hee Jehowa sien Veträda wia un dän sienen Nomen druach.

8. Waut mott jieda eena von Jesus siene Nofolja aunerkjanen?

⁸ Jieda eena von Jesus siene Nofolja mott aunerkjanen, daut de Radunk von Jesus sienen Voda kjemt, aulsoo Jehowa Gott (Joh. 17:3). Krakjt soo aus Jesus woat deejanje uk no Jehowa sienen Nomen jenant woaren. Dee motten uk vestonen, wuarom daut soo wichtich es, daut Jehowa sienen Nomen jeheilicht woat – wiels äare Radunk doavon aufhenjich es (Apj. 2:​21-22). Soo jieda eena von Jesus siene Nofolja mott uk äwa Jehowa lieren un nich bloos äwa Jesus. Doawäajen wundat ons daut nich, waut Jesus daut latste en sien Jebäd en Johanes, Kapitel 17 säd: “Ekj hab dienen Nomen bekauntjemoakt un ekj woa dän wieda bekauntmoaken, soo daut dee Leew, met dee du mie jeleeft hast, en dee es un daut ekj met dee veeent sie” (Joh. 17:26).

“JIE SENT MIENE ZEIJEN”

9. Om waut mott wie todoonen sennen krakjt soo aus Jesus?

⁹ Soo aus wie aul jeseenen haben, motten Jesus siene woare Nofolja doarom todoonen sennen, daut Jehowa sien Nomen jeheilicht woat (Mat. 6:​9-10). Fa ons mott Jehowa sien Nomen daut gaunz wichtichste sennen un wie motten daut uk bewiesen. Waut mott wie dan doonen toom Jehowa sienen Nomen heiljen un toom bewiesen, daut et jeloagen wia, waut de Soton äwa am säd?

10. Von waut rät daut en Jesaja, Kapitel 42 bat 44? (Jesaja 43:9; 44:​7-9). (See uk daut Bilt.)

¹⁰ En Jesaja, Kapitel 42 bat 44 lia wie, woo wie methalpen kjennen, Jehowa sienen Nomen to heiljen. En dise Kapitels sajcht Jehowa to de Menschen, waut am nich deenen, daut dee bewiesen sellen, daut äare Gotts werkjlich Gotts sent. Krakjt soo aus bie een Jerecht frajcht Jehowa, aus doa Zeijen sent, waut daut bewiesen kjennen. Oba doa sent kjeene! (Läs Jesaja 43:9; 44:​7-9.)

11. Waut sajcht Jehowa to siene Deena en Jesaja 43:​10-12; un waut es doa met en?

¹¹ Läs Jesaja 43:​10-12, NW. Jehowa sajcht to siene Deena: “Jie sent miene Zeijen  … un ekj sie Gott.” Doawäajen well Jehowa, daut siene Deena dise Froag beauntwuaten: “Es irjentwua noch een Gott?” (Jes. 44:8). Wie haben de Iea, dise Froag to beauntwuaten. Derch daut, waut wie sajen un doonen, kjenn wie bewiesen, daut doa kjeen aundra Gott es aus bloos Jehowa un daut sien Nomen äwa aule aundre steit. Doaderch, woo wie läwen, wies wie, daut wie Jehowa werkjlich leewen un am tru sent, krakjt endoont woo schwoa de Soton ons daut moakt. Opp dise Wajch halp wie met, daut sien Nomen jeheilicht woat.

12. Woo erfelden sikj de Profezeiungen en Jesaja 40:​3, 5?

¹² De Profeet Jesaja säd uk verut, daut doa wäa Jehowa sienen Wajch reedmoaken wudd (Jes. 40:​3, JHF). Woo erfeld sikj daut? Johanes de Deepa muak dän Wajch reed fa Jesus. Oba wäajen Jesus en Jehowa sienen Nomen kjeem un fa am räd, muak Johanes en Werkjlichkjeit dän Wajch  fa Jehowa reed (Mat. 3:3; Mar. 1:​2-4; Luk. 3:​3-6). Jesaja säd uk noch verut: “De Harlichkjeit Gottes woat sikj openboaren” (Jes. 40:​5, JHF). Woo erfeld sikj daut? Aus Jesus no de Ieed kjeem, deed hee Jehowa soo krakjt no, daut et soo wia, aus wudd Jehowa selfst no de Ieed jekomen sennen (Joh. 12:45).

13. Woo kjenn wie Jesus nodoonen?

¹³ Krakjt soo aus Jesus sent wie uk Jehowa siene Zeijen. Wie droagen Jehowa sienen Nomen un vetalen soo väl Menschen aus mäajlich von siene butajeweenelje Woakjen. Oba een gooda Zeij von Jehowa vetalt aundre uk doavon, waut Jesus aules deed, om Jehowa sienen Nomen to heiljen (Apj. 1:8). Doa haft kjeena soon goodet Zeichnis äwa Jehowa jejäft aus Jesus, un wie proowen, am notodoonen (Opb. 1:5). Woo kjenn wie noch wiesen, daut Jehowa sien Nomen fa ons wichtich es?

WOO KJENN WIE NOCH WIESEN, DAUT JEHOWA SIEN NOMEN FA ONS WICHTICH ES?

14. Woo denkj wie äwa Jehowa sienen Nomen no 1. Korinta 1:31 no?

¹⁴ Wie sent brow met Jehowa sienen Nomen (läs 1. Korinta 1:31). Jehowa freit sikj sea, daut wie ons met sienen Nomen brow doonen (Psa. 105:3; 2. Kor. 10:17). Fa ons es daut eene Iea, daut wie to aundre von Jehowa sienen heiljen Nomen räden kjennen un fa dän enstonen kjennen. Wie motten ons kjeenmol schämen, onse Oabeitspoatna, Schoolpoatna, Nobasch un aundre Menschen daut to sajen, daut wie Jehowa siene Zeijen sent! De Soton well, daut wie opphieren, to aundre von Jehowa sienen Nomen to räden (Jer. 11:21; Opb. 12:​17, NW). En Werkjlichkjeit wellen de Soton un soone, waut siene Läajes vebreeden, daut de Menschen Jehowa sienen Nomen vejäten (Jer. 23:​26-27). Oba wiels wie Jehowa sienen Nomen leewen, preis wie am “aule Dach” (Psa. 5:12; 89:17).

15. Waut es doa aules met en, Jehowa sienen Nomen auntoroopen?

¹⁵ Wie roopen wieda Jehowa sienen Nomen aun (Joel 3:5; Reem. 10:​13-14). Bie Jehowa sienen Nomen aunroopen es mea met en, aus bloos dän Nomen to weeten – wie brucken dän uk. Wie weeten, wäa Gott werkjlich es, un vetruen opp am un sieekjen bie am no Help un Aunleidunk (Psa. 20:8; 99:6; 116:4; 145:18). Wie vetalen aundre uk von sienen Nomen un siene Ieejenschoften. Wie muntren dee opp, sikj to endren, soo daut dee Jehowa jefaulen kjennen (Jes. 12:4; Apj. 2:​21, 38).

16. Woo kjenn wie bewiesen, daut de Soton een Läajna es?

¹⁶ Wie sent reed, fa Jehowa sienen Nomen to lieden (Jak. 5:​10-11). Wan wie Jehowa en schwoare Tieden tru bliewen, dan bewies wie, daut de Soton een Läajna es. To Hiob siene Tiet säd de Soton von deejanje, waut Jehowa deenden: “Aules, waut de Mensch haft, jeft hee fa sien Läwen” (Hiob 2:​4, JHF). De Soton behaupt, daut de Menschen Jehowa bloos en goode Tieden deenen wudden un daut dee sikj von am wajchdreien wudden, wan dee Schwoaret beläwen wudden. Oba de trua Hiob bewees, daut et nich soo wia. Dauts een Väarajcht, daut wie uk bewiesen kjennen, daut wie Jehowa kjeenmol veloten, krakjt endoont woo sea de Soton ons toosat. Wie kjennen gaunz doaropp vetruen, daut Jehowa no ons oppaussen woat wäajen sienen Nomen (Joh. 17:11).

17. Woo kjenn wie Jehowa sienen Nomen noch veharlichen, soo aus 1. Petrus 2:12 wiest?

¹⁷ Wie wiesen Respakjt fa Jehowa sienen Nomen (Spr. 30:9; Jer. 7:​8-11). Wäajen wie aus Jehowa siene Zeijen bekaunt sent,  kjenn wie Iea ooda Schaund opp sienen Nomen brinjen (läs 1. Petrus 2:12). Doawäajen well wie aules doonen, waut wie kjennen, om dän sienen Nomen to preisen derch daut, waut wie sajen un doonen. Opp dee Wajch kjenn wie Jehowa sienen Nomen veharlichen, wan wie uk onvolkomen sent.

18. Woo kjenn wie noch opp eene aundre Wajch bewiesen, daut Jehowa sien Nomen fa ons wichtich es? (See uk de Footnoot.)

¹⁸ Wie sent dolla om Jehowa sienen Nomen todoonen aus om onsen ieejnen (Psa. 138:2). Wuarom es dit soo wichtich? Wiels wan wie daut doonen, waut Jehowa jefelt, kjrie wie bie de Menschen veleicht eenen schlajchten Nomen. a Waut wia Jesus biejlikj reed to doonen, om Jehowa sienen Nomen to veharlichen? Hee wort aus een Merda jetalt un wort opp soone Wajch omjebrocht, waut toom schämen wia. Oba Jesus “acht nich opp de Schaund”. Waut bediet daut? Daut bediet, daut Jesus sikj daut nich too schwoa doamet muak, waut de Aundre äwa am dochten (Heb. 12:​2-4). Hee wia bloos doano ut, Gott sienen Wellen to doonen (Mat. 26:39).

19. Woo denkjst du äwa Jehowa sienen Nomen; un wuarom?

¹⁹ Wie sent brow met Jehowa sienen Nomen un feelen ons jeieet, daut wie kjennen siene Zeijen jenant woaren. Doawäajen sent wie wellich reed, daut auntonämen, wan aundre opp ons raufkjikjen. Jehowa sien Nomen es fa ons wichtja aus daut, woo de Menschen äwa ons denkjen. Doawäajen well wie ons eenich sennen, wieda Jehowa sienen Nomen to preisen, krakjt endoont woo sea de Soton ons uk toosat. Doaderch bewies wie, daut Jehowa sien Nomen fa ons daut gaunz wichtichste es – krakjt soo aus daut bie Jesus Christus wia.