JESUS säd verut, daut siene Nofolja nu en de latste Tiet wudden eene groote Arnt beläwen (Mat. 9:37; 24:14). Well wie mol seenen, woo siene Wieed sikj en eene Jäajent en Transkarpatien en de Ukraine opp eene besondre Wajch erfelt haben. Doa jeft daut en dree Städa, waut dicht toop sent, 50 Vesaumlungen un äwa 5 400 Vekjindja. * Daut es werkjlich soo, daut en dise dree Städa 1 von jieda 4 Enwona eent von Jehova siene Zeijen es.

Woo sent de Menschen doa? Wasile, een Brooda von doa, sajcht: “Dee räakjnen de Bibel väl, de Jerajchtichkjeit es bie an huach aunjeseenen, de Famieljes sent sea veeent un de Menschen jleichen werkjlich, sikj unjarenaunda to halpen.” Hee sajcht uk noch: “Dee stemmen nich emma met ons, oba wan wie an waut ut de Schreft wiesen, dan horchen dee oppmoakjsom too.”

Wiels onse Breeda un Sestren en eene Jäajent prädjen, wua soo väl Vekjindja sent, motten dee met Schwierichkjeiten foadich woaren, waut et opp aundre Städen nich jeft. Biejlikj haft eene Vesaumlunk 134 Vekjindja, oba dee haben bloos 50 Hiesa, wua see kjennen prädjen. Woo doonen de Vekjindja daut dan?

Een deel Breeda un Sestren strenjen sikj aun, opp soone Städen to prädjen, wua mea Help fält. Jonasch, een 90joascha Brooda, sajcht: “Doa, wua onse Vesaumlunk prädicht, jeft daut jlikjderch mau twee Hiesa fa jieda Vekjindja.” Hee sajcht wieda: “Wäajen ekj nich mea soo goot auf sie, doo ekj en ons Darp prädjen, oba meist bat nu reisd ekj emma ojjefäa 160 Kilomeeta (100 Miel) no eene Jäajent, wua noch kjeene Vesaumlunk pinkjlich prädicht, toom doa opp Ungarisch prädjen.” Daut haft noch waut opp sikj, aundatwäajen mettohalpen. Jonasch sajcht: “Ekj stunt emma Klock 4:00 zemorjes opp toom met dän Zuach metfoaren un deed dan bat Klock 6:00 zeowes prädjen, wiels dan fua de Zuach trigj no Hus. Daut deed ekj twee- ooda dreemol de Wäakj.” Loond sikj daut? Hee sajcht: “De Deenst doa jeef mie groote Freid. Un ekj kunn doa uk eene Famielje halpen de Woarheit kjanen to lieren, waut wiet auf wond.”

Daut es to vestonen, daut nich aule Vekjindja von dise Vesaumlungen soo wiet reisen kjennen. Oba aule, mau rajcht de Elre, doonen äa bastet toom en äare Jäajent jrintlich prädjen. Doawäajen kjeemen aune 2017 en dise dree Städa meist dobbelt soo väl Menschen no daut Owentmol, aus doa Vekjindja wieren. Daut wia de Halft von de Enwona doa. Endoont wua wie wonen, daut jeft doa gaunz secha noch väl “Oabeit fa dän Harn” (1. Kor. 15:58).