1. Waut säden Jesus siene Jinja, waut de Menschen doonen sullen?

EEN deel Mana un Frues von veschiedne Lenda un waut veschiedne Sproaken räden, wieren no Jerusalem jekomen. Doa beläwden dee gaunz waut besondret. Met eenst kunnen eenje jeweenelje Juden opp dee äare Sproaken räden! Oba noch besondra wia daut, waut dise Juden to de Menschen säden un waut de Apostel Petrus säd. De Menschen lieeden biejlikj, daut see kunnen jerat woaren, wan see aun Jesus Christus jleewden. Dee jinkj daut soo sea to Hoaten, daut dee mau rajcht säden: “Waut sell wie doonen?” Petrus säd to dee: “Lot junt aula . . . deepen” (Apj. 2:37-38).

2. Waut woa wie en disen Artikjel unjasieekjen? (See daut Bilt oppe väaschte Sied.)

² No daut wort waut butajeweeneljet. Ojjefäa 3 000 Menschen worden Jesus siene Jinja un leeten sikj dän Dach noch deepen. Soo funk daut groote Liawoakj aun, waut Jesus siene Nofolja oppjeef, un dee doonen daut bat vondoag dän Dach noch. En onse Tiet dieet daut lenja aus een poa Stund, bat sikj doa wäa deepen lat. Daut kaun Moonaten dieren ooda mau rajcht een Joa ooda lenja. Daut es een deel Oabeit, wäm to halpen Jesus notofoljen. Un wan du nu jroz een Bibelstudium hast, dan hast du daut selfst beläft. En disen Artikjel woa wie unjasieekjen, woo wie eenen Bibelschiela halpen kjennen, daut dee sikj kaun deepen loten.

3. Waut mott een Bibelstudium doonen, daut dee veraunkjemt un sikj deepen lat, soo aus Matäus 28:19-20 wiest?

³ Een Bibelstudium mott daut nokomen, waut dee ut de Schreft lieet, daut dee sikj kaun deepen loten (läs Matäus  28:19-20). Wan dee daut nokjemt, dan woat dee soo sennen aus de “vestendja Maun” en Jesus sien Jlikjnis, waut deep growen deed, om sien Hus opp Steengrunt to buen (Mat. 7:24-25; Luk. 6:47-48). Woo kjenn wie een Bibelstudium halpen, daut to doonen? See wie mol dreeatlei.

4. Woo kjenn wie eenen Bibelschiela halpen, no de Doop to sträwen? (See uk dän Kausten “ Halp dienen Bibelschiela, sikj waut väatonämen un daut uk to volbrinjen”.)

⁴ Halp dienen Bibelschiela no jeisteljet to sträwen. Wuarom? See wie mol een Jlikjnis: Wan eena eene lange Reis moakt, dan helt eena emma wada mol bie eene schmocke Städ stell, daut eenem de Wajch nich soo lank väakjemt. Krakjt soo woat eenen Bibelschiela daut nich soo schwierich schienen, no de Doop to sträwen, wan dee sikj em jeisteljen emma wada mol waut väanemt, waut hee em korten doonen well, un daut uk nokjemt. Du kaust daut Poat “Nemm die dit väa” en daut Buak Een scheenet Läwen fa emma! brucken, om dän to halpen verauntokomen. Opp Enj von jieda Kapitel kjenn jie doaräwa räden, waut daut, waut hee sikj väanämen saul, met daut to doonen haft, waut hee jroz jelieet haft. Wan du wurscht jleichen, daut dien Bibelschiela noch no waut aundret sträwen sull, dan schriew daut doa bie “Noch aundret” nenn. Räd bie dit Poat von daut Studium emma wada mol doaräwa, waut dee sikj em korten un fa lota väajenomen haft.

5. Waut säd Jesus no Markus 10:17-22 no to eenen rikjen Maun, un wuarom?

⁵ Halp dienen Bibelschiela sikj to endren (läs Markus 10:17-22). Jesus wist, daut et fa dän rikjen Maun schwoa sennen wudd, aul siene Sachen to vekjeepen (Mar. 10:23). Oba hee säd doawäajen to dän, daut hee sikj endren sull. Wuarom? Wiels Jesus dän väl räakjend. Eenjemol rod wie eenen Bibelschiela veleicht nich too, daut notokomen,  waut dee lieet, wiels wie denkjen, daut dee noch goanich reed es sikj to endren. Daut brukt Tiet, daut een Mensch siene oole Jewanheiten tochlat un eene niee Natua aunnemt (Kol. 3:9-10). Oba je ea wie gaunz op met dän Bibelschiela doaräwa räden, je ea kaun dee aunfangen, sikj to endren. Wan wie daut doonen, dan wiest daut, daut wie om dän bekjemmat sent (Psa. 141:5; Spr. 27:17).

6. Wuarom sell wie dän Bibelschiela froagen, woo hee äwa eene jewesse Sach denkjt?

⁶ Daut es wichtich, daut wie dän Bibelschiela froagen, woo hee äwa eene jewesse Sach denkjt. Derch soone Froagen woa wie en, waut dee aul vestonen kaun un waut dee jleeft. Wan wie dän pinkjlich Froagen stalen, dan woat daut lota leichta sennen, met dän äwa soont to räden, waut dän schwoa felt. En daut Buak Een scheenet Läwen fa emma! sent een deel soone Froagen bennen. En daut 4. Kapitel sajcht daut biejlikj: “Woo denkjt Jehova doaräwa, wan wie sienen Nomen brucken?” Un en daut 9. Kapitel sajcht daut: “Om waut wurscht du jleichen to bäden?” Aum Aunfank felt dän daut veleicht schwoa, soone Froagen to beauntwuaten. Dan kaust du dän doaderch halpen, daut du dän lieescht, äwa de Bibelvarzhen un äwa de Bilda en dit Buak notodenkjen.

7. Woo kjenn wie Erfoarungen brucken toom onse Bibelschiela halpen?

⁷ Wan dien Bibelschiela enwoat, waut hee doonen saul, dan bruck Erfoarungen, om dän doabie to halpen. Wan dän daut biejlikj schwoa es, no de Toopkomes to wanken, wurscht du dän kjennen daut Video wiesen Jehova kjemmad sikj om mie, wua daut Poat “Mea nosieekjen” en daut 14. Kapitel von rät. En väl Kapitels von daut Buak Een scheenet Läwen fa emma! kaust du en daut Poat “Dolla unjastonen” ooda “Mea nosieekjen” Erfoarungen finjen. * Pauss opp, daut du dienen Bibelschiela nich met aundre vejlikjst un biejlikj to dän sajchst: “Wan jana daut doonen kunn, dan kaust du daut uk.” Lot dän daut selfst enwoaren. Räd leewa doavon, waut de Persoon en daut Video jeholpen haft, daut to doonen, waut de Schreft sajcht. Veleicht kaust du von eenen Bibelvarsch räden ooda von sestwaut, waut deejanja jedonen haft. Moak emma wada dietlich, woo Jehova dänjanjen jeholpen haft, wan daut sest paussent es.

8. Woo kjenn wie onse Bibelschiela halpen, Jehova to leewen?

⁸ Halp dienen Bibelschiela Jehova to leewen. Woo kaust du daut doonen? Sieekj no Jeläajenheiten, von Jehova siene goode Ieejenschoften to räden. Halp dänjanjen to vestonen, daut Jehova een schaftja Gott es, waut deejanje biesteit, dee am leewen (1. Tim. 1:11, NW; Heb. 11:6). Wies dän Bibelschiela, daut dän daut togood komen woat, wan dee daut nokjemt, waut dee lieet, un daut Jehova siene Jebooten bewiesen, daut hee am leeft (Jes. 48:17-18). Je jrata dän Bibelschiela siene Leew fa Jehova woat, je ea woat dee sikj wellen endren (1. Joh. 5:3).

9. Waut kaun eenen Bibelschiela no Markus 10:29-30 no halpen, jewesset opptojäwen un sikj deepen to loten?

⁹ Daut een Bibelschiela veraunkomen un sikj deepen loten kaun, mott dee jewesset oppjäwen. Eenje Bibelschiela motten woomäajlich tietelje Sachen oppjäwen, soo  aus de rikja Maun, wua wie ea von räden. Wan dee eene Oabeit haben, waut jäajen biblische Gruntsauzen es, dan motten dee dee woomäajlich aufsajen. Väle motten Frind tochloten, waut Jehova nich leewen. Ooda de Famielje es jäajen an, wiels dee Jehova siene Zeijen nich jleichen. Jesus wist, daut daut fa eenje schwoa sennen wudd, jewesset opptojäwen. Oba hee vespruak, daut siene Nofolja sikj nich wudden aunschmäaren. Jehova wudd dee met eene leeftolje jeistelje Famielje beloonen (läs Markus 10:29-30). Woo kaust du dienen Bibelschiela halpen, daut dän daut togood kjemt?

10. Waut kjenn wie von daut lieren, waut Manuel säd?

¹⁰ Moak die dienen Bibelschiela toom Frint. Daut es wichtich, daut dien Bibelschiela enwoat, daut du om dän bekjemmat best. Wuarom? Manuel, waut en Mexiko wont, denkjt daut noch, woo daut wia, aus hee de Bibel studieed. Hee sajcht: “Ea wie aunfungen to studieren, fruach mien Bibelliera mie emma, woo mie daut jinkj. Hee holp mie, daut ekj mie kunn loosjeloten feelen un met am äwa aules räden. Ekj wort en, daut hee werkjlich om mie todoonen wia.”

11. Woo kaun onse Bibelschiela daut togood komen, wan wie ons fa dee Tiet nämen?

¹¹ Nemm die fa diene Bibelschiela Tiet, soo aus Jesus daut fa siene Nofolja deed (Joh. 3:22). Wan dien Bibelschiela fein veraunkjemt un daut paussent es, dan kroag dän mol no die toom Koffe drinkjen ooda waut äten ooda een Moonatsprogram kjikjen. Woomäajlich woat dee daut besonda väl räakjnen, wan du am aun soone Doag hankroachst, wan de Menschen Heljedoag haben, daut hee sikj nich soo auleen feelt. Kazibwe, waut en Uganda wont, sajcht: “Ekj jleew, ekj hab krakjt soo väl äwa Jehova jelieet, wan ekj met mienen Liera toop wia aus bie daut Bibelstudium. Ekj kunn seenen, woo Jehova fa siene Deena sorjd un woo schaftich dee wieren. Un krakjt daut wull ekj uk beläwen.”

12. Wuarom sell wie veschiedne Vekjindja met no een Bibelstudium nämen?

 ¹² Nemm veschiedne Vekjindja met no dien Bibelstudium. Veleicht späat sikj ons daut soo, daut daut leichta es, doa auleen hantogonen ooda jiedatsmol dänselwjen Vekjindja mettonämen. Oba onsen Bibelschiela woat daut toom gooden sennen, wan wie emma wada mol aundre metnämen. Dmitrii, waut en Moldawien wont, sajcht: “Jieda Vekjindja, waut met no daut Studium kjeem, haud eene aundre Wajch, woo dee Sachen utläd. Daut holp mie, mie de Teemasch von veschiedne Kaunten to beseenen. Un ekj wia nich soo bleed, aus ekj toom ieeschte Mol no de Toopkomes wankt, wiels ekj aul väl Breeda un Sestren kjand.”

13. Wuarom sell wie onsen Bibelschiela halpen no de Toopkomes to wanken?

¹³ Halp dienen Bibelschiela no de Toopkomes to wanken. Wuarom? Wiels Jehova daut haben well, daut siene Deena sikj vesaumlen. Un daut jehieet to onsen Gottesdeenst (Heb. 10:24-25). Un de Breeda un Sestren sent je uk onse jeistelje Famielje. Wan wie met dee toop bie de Toopkomes sent, dan es daut biejlikj soo, aus wan wie toop eene scheene Moltiet haben. Wan dien Bibelschiela no de Toopkomes kjemt, dan hast du dän aul een langet Enj utjeholpen, daut dee sikj kaun deepen loten. Oba veleicht es dän daut schwoa, doamet auntofangen. Woo kaun daut Buak Een scheenet Läwen fa emma! dienen Bibelschiela halpen, daut dee daut doawäajen deit?

14. Woo kjenn wie onsen Bibelschiela daut enjankren, no de Toopkomes to komen?

¹⁴ Bruck daut 10. Kapitel von daut Buak Een scheenet Läwen fa emma!, om dienen Bibelschiela daut entojankren, daut dee no de Toopkomes komen well. Erfoarne Vekjindja, waut dit Kapitel testen deeden, ea daut Buak rutkjeem, säden, daut et sea fein jeschauft haud. Oba wacht nich bat daut 10. Kapitel, ea du dienen Bibelschiela no de Toopkomes kroachst. Doo daut soo schwind aus mäajlich un emma wada. Daut jeft veschiednet, wuarom de Bibelschiela daut schwoa felt, no de Toopkomes to komen. Doawäajen kjikj doano, waut dienen Bibelschiela fält un woo du dän doamet halpen kaust. Woa nich mootloos, wan dee doa nich fuaz hankjemt. Sie jeduldich un kroag dän doa emma wada han.

15. Fa waut haft ons Bibelschiela woomäajlich Angst?

¹⁵ Hautst du Angst doafäa, eent von Jehova siene Zeijen to woaren? Veleicht dochst du, du wurscht daut kjeenmol kjennen, prädjen gonen. Ooda du dochst, daut diene Famielje ooda diene Frind wudden jäajen die sennen. Dan kaust du die secha väastalen, woo dienen Bibelschiela daut jeit. Jesus säd, daut eenje soone Angst haben wudden. Oba hee muak uk dietlich, daut siene Nofolja nich ut Angst opphieren sullen Jehova to deenen (Mat. 10:16-17, 27-28). Woo holp Jesus dee met äare Angst foadich to woaren? Un woo kaust du dän nodoonen?

16. Woo kjenn wie onsen Bibelschiela lieren, met aundre äwa sienen Gloowen to räden?

¹⁶ Lia dienen Bibelschiela soo bie sacht, met aundre äwa sienen Gloowen to räden. Secha wieren de Jinja oppjeräacht, aus Jesus an utschekjt toom prädjen. Oba Jesus holp dee un säd to dee, wäm see prädjen kunnen un waut see sajen kunnen (Mat. 10:5-7). Woo kaust du Jesus nodoonen? Moak dienen Bibelschiela dietlich, wäm hee prädjen kaun. Du wurscht dän biejlikj froagen kjennen, aus dee wäm kjant, waut eene  jewesse biblische Lia wudd halpen kjennen. Dan wies dän, woo dee sikj een bät waut reedmoaken kaun, waut hee to dän sajen well. Wan daut paussent es, wurscht du uk de Poats “Waut eenje sajen” un “Waut eenje weeten wellen” von daut Buak Een scheenet Läwen fa emma! toom eewen brucken kjennen. Lia dienen Bibelschiela, woo dee aundre äare Froagen eefach un leeftolich met de Schreft beauntwuaten kaun.

17. Woo kjenn wie Matäus 10:19-20, 29-31 brucken, om onsen Bibelschiela to halpen, sikj opp Jehova to veloten?

¹⁷ Halp dienen Bibelschiela sikj opp Jehova to veloten. Jesus säd to siene Nofolja, daut Jehova an halpen wudd, wiels hee dee leewd (läs Matäus 10:19-20, 29-31). Moak dän Bibelschiela dietlich, daut Jehova am uk halpen woat. Du kaust am halpen sikj opp Jehova to veloten, wan du met am toop äwa daut bätst, waut dee sikj väajenomen haft. Franciszek, waut en Poolen wont, sajcht: “Mien Bibelliera räd en siene Jebäda foaken von daut, waut ekj mie väajenomen haud. Aus ekj sach, woo Jehova dän siene Jebäda beauntwuad, funk ekj uk fuaz aun met bäden. Ekj kunn späaren, woo Jehova mie holp, aus ekj bie miene niee Oabeit fruach, aus ekj kunn frie haben fa de Toopkomes un dän Kongress.”

18. Woo denkjt Jehova äwa ons, wan wie aundre lieren?

¹⁸ Jehova es sea om onse Bibelstudiums bekjemmat. Hee weet, woo sea wie ons aunstrenjen, om de Menschen to halpen, daut see am noda komen – un wäajen daut leeft hee ons (Jes. 52:7). Wan du nu jroz nich een Bibelstudium hast, dan kaust du doawäajen aundre äare Bibelschiela halpen verauntokomen un sikj deepen to loten, wan du bie dee äa Studium met bie best.