Jesaja 60:1 sajcht: “Jerusalem, sto opp, un lot dien Jesecht fa Freid strolen! Een Licht es fa die oppjedacht, un daut es äwa die oppjekomen, woo harlich de HAR es.” De Staut Jerusalem, waut eenjemol uk Zion jenant woat, wia de Hauptstaut von Juda un stald daut gaunze Volkj Israel väa (Jes. 60:14; 62:1-2). Derch daut, waut Jesaja säd, komen doa twee Froagen opp: Ieeschtens, woo un wanea stunt Jerusalem opp un deed jeisteljet Licht utstrolen? Tweedens, doonen Jesaja siene Wieed sikj en dise Tiet noch eemol erfellen?

Woo un wanea stunt Jerusalem opp un deed jeisteljet Licht utstrolen? Jerusalem un de Tempel wieren gaunz vekjeiwelt, aus de Juden fa 70 Joa en Babel jefangen wieren. Oba aus de Meeda un Persa Babel enneemen, kunnen de Israeliten, waut äwa daut gaunze babelonische Rikj wonden, trigj no äa Launt gonen un doano seenen, daut see Jehowa doa wada deenen kunnen (Esra 1:1-4). Von daut Joa 537 v.Chr. aun, jinjen eenje Israeliten trigj von aule 12 Stam, waut tru jebläwen wieren (Jes. 60:4). Dee fungen aun, Jehowa wada Opfa to brinjen, de Fasten to fieren un dän Tempel wada opptobuen (Esra 3:1-4, 7-11; 6:16-22). Jehowa siene Harlichkjeit strold wada äwa Jerusalem, aulsoo äwa Gott sien Volkj. Un de Israeliten worden dan selfst een Licht fa dee Velkja, waut em Jeisteljen em Diestren wieren.

Oba daut, waut Jesaja verutjesajcht haud, erfeld sikj to dee Tiet nich gaunz. Woo weet wie daut? Wiels de mieeschte Israeliten Gott nich jehuarsom bleewen (Neh. 13:27; Mal. 1:6-8; 2:13-14; Mat. 15:7-9). Lota weesen dee mau rajcht dän Messias, Jesus Christus, auf (Mat. 27:1-2). Un aune 70 n.Chr. wort Jerusalem un de Tempel noch eemol venicht.

Jehowa haud dise Sachen aul verutjesajcht (Dan. 9:24-27). Waut wiest ons daut? Daut hee sikj daut nich väajenomen haud, daut de ieeschtemmasche Staut Jerusalem aules erfeld, waut en Jesaja, Kapitel 60 verutjesajcht wia.

Doonen Jesaja siene Wieed sikj en dise Tiet noch eemol erfellen? Jo, oba daut haft met “daut Jerusalem, dort bowen” to doonen. De Apostel Paulus schreef von dee: “Daut es onse Mutta” (Gal. 4:26). Jerusalem doa bowen es daut himlische Poat von Gott siene Organisazion, waut true Jeistpersoonen sent. Äare Kjinja sent Jesus un de 144,000 jeistjesaulwde Christen, waut uk de himlische Hopninj haben soo aus Paulus. De jeistjesaulwde Christen sent “een utjewäldet Volkj” – “Gott sien Israel” (1. Pet. 2:9; Gal. 6:16).

Woo deed Jerusalem doa bowen oppstonen un Licht utstrolen? Dee deed daut derch äare jesaulwde Kjinja, waut oppe Ieed wieren. Kjikj mol, woo daut, waut de Jesaulwde beläwden, met daut tooppaust, waut en Jesaja, Kapitel 60 es.

De jesaulwde Christen musten oppstonen, wiels dee wieren soo to sajen em Diestren, wäajen de Aufjefolne faulsche Lieren vespreeden, nodäm de Apostel jestorwen wieren (Mat. 13:37-43). Doaderch kjeemen dee unja daut Groote Babel äare Macht, waut aule faulsche Gloowes oppe Welt väastalt. De Jesaulwde wieren unja daut Groote Babel äare Macht, bat “daut Enj von dise TIET”, waut aune 1914 aunfunk (Mat. 13:39-40). Een Stootje lota, aune 1919, worden dee  von daut Groote Babel friejemoakt un fungen fuaz aun, jeisteljet Licht uttostrolen. Woo deeden dee daut? Dee läden sikj gaunz doahinja, de goode Norecht bekaunt to moaken. a Met de Joaren kjeemen aule Sorten Menschen unja dit Licht. Doa sent uk de äwaje met en von Gott sien Israel – de “Kjennichs”, wua Jesaja 60:3 von rät (Opb. 5:9-10).

De jesaulwde Christen woaren lota noch mea Licht von Gott utstrolen. Woo krakjt? Wan dee hia oppe Ieed stoawen, dan woaren dee Poat von “daut niee Jerusalem”, ooda uk Christus siene Brut von 144,000 Kjennichs un Priestasch (Opb. 14:1; 21:1-2, 24; 22:3-5).

Daut niee Jerusalem woat een wichtjet Poat doatoo doonen, daut sikj daut erfelt, waut en Jesaja 60:1 es (Vejlikj uk Jesaja 60:1, 3, 5, 11, 19-20 met Openboarunk 21:2, 9-11, 22-26). Jerusalem wia ieeschtemma de Staut, wua de Kjennichs äwa daut Volkj Israel rejieren deeden. Krakjt soo woat daut niee Jerusalem met Jesus toop äwa de Welt rejieren. Waut bediet daut, daut daut niee Jerusalem “von Gott ut däm Himmel rauf komen” woat? Daut bediet, daut de Jesaulwde utem Himmel fa de Menschen oppe Ieed sorjen woaren un soo to sajen äa Licht äwa dee strolen. Dan woaren aule Sorten Menschen, waut Gott ferchten, mau rajcht von Sind un Doot friekomen (Opb. 21:3-4, 24). Doaderch woat “aules wada fresch” oppjestalt woaren, soo aus Jesaja un uk aundre Profeeten daut verutsäden (Apj. 3:21). De Tiet, aules wada fresch opptostalen, funk dan aun, aus Christus toom Kjennich jemoakt wort, un rieekjt bat aum Enj von daut Dusentjoasche Rikj.