1-2. En waut fa Stekjen es een Christ soo aus een huaget Hus? (1. Korinta 15:58).

 AUNE 1978 buden se en Tokio, Jaupaun een 60-stockjet Hus. Wiels daut doa soo foaken Ieedbäben jeft, wundaden de Menschen, woo soon huaget Hus wudd kjennen stonen bliewen. De Bumeista hauden daut soo jebut, daut daut faust steit, oba sikj uk jäwen kaun, wan de Ieed schedren wudd. Christen sent een bät soo aus dit Hus. Waut meent daut?

² Een Christ mott utjejlikjt sennen. Dee mott fauststonen un sikj oba uk jäwen kjennen. Wan daut met Jehova siene Jesazen to doonen haft, dan mott dee fauststonen un sikj nich omschmieten loten (läs 1. Korinta 15:58). Dee “lat sikj sajen” un deit emma jehorchen. Oba noch mol jeft daut Loagen, wua dee mott “jelind”, ooda derchjedocht sennen; daut meent, daut dee sikj jäwen kaun (Jak. 3:17). Een Christ, waut daut jelieet haft, utjejlikjt to sennen, woat nich too strenj sennen, oba uk nich too endoontich. En disen Artikjel woa wie doavon räden, woo wie fauststonen kjennen. Wie woaren uk fief Sachen seenen, waut de Soton brukt, om ons daut schwoa to moaken un woo wie ons doafäa wäaren kjennen.

3. Waut vonne Jesazen jeft Jehova ons en Aposteljeschicht 15:28-29?

³ Jehova es dee, waut daut jratste Rajcht haft, Jesazen opptostalen. Un de Jesazen, waut hee sien Volkj jeft, sent emma leicht to vestonen (Jes. 33:22, NW). Biejlikj en de Aposteltiet räd de Väastaunt von dree Sachen, wua Christen musten fauststonen: Dee sullen (1) nuscht met Aufjettarie to doonen  haben un bloos Jehova deenen, (2) Jehova sien Jesaz jehorchen, daut daut Bloot heilich es, un (3) von Huararie wajchbliewen (läs Aposteljeschicht 15:28-29). Woo kjennen Christen vondoag dän Dach en dise dree Stekjen fauststonen?

4. Woo wies wie, daut wie bloos Jehova deenen? (Openboarunk 4:11).

⁴ Wie haben nuscht met Aufjettarie to doonen un deenen bloos Jehova. Hee säd to de Israeliten, daut see bloos am deenen sullen (5. Mo. 5:6-10). Un aus Jesus von dän Soton aufjeprooft wort, säd hee uk, daut wie eensich Jehova aunbäden sellen (Mat. 4:8-10). Doawäajen doo wie nich Aufjetta aunbäden. Un wie veieren uk nich Menschen; nich Jemeentenleidasch, Rejierungsmana un uk nich aundre huach aunjeseene Menschen, soo aus Sinja ooda Sportspäla. Wie stonen faust opp Jehova siene Sied, dee “aules jemoakt [haft]” (läs Openboarunk 4:11).

5. Wuarom jehorch wie Jehova sien Jesaz äwa daut Läwen un daut Bloot?

⁵ Wie jehorchen Jehova sien Jesaz, daut Läwen un Bloot heilich es. Wuarom? Daut Läwen es een Jeschenkj von Jehova un hee sajcht, daut em Bloot daut Läwen es (3. Mo. 17:14). Aus Jehova de Menschen toom ieeschte mol de Frieheit jeef, Tieren to äten, säd hee, daut see nich sullen daut Bloot äten (1. Mo. 9:4). Un aus hee de Israeliten daut Jesaz Moses jeef, dan säd hee noch mol dautselwje (3. Mo. 17:10). Derch dän Väastaunt enne Aposteltiet leet Jehova de Christen uk sajen, daut see sullen “wajch bliewen . . . von Bloot” (Apj. 15:28-29). Wie hoolen ons faust aun dit Jeboot, wan wie entscheiden, woo wie doktren woaren. b

6. Woo wies wie, daut wie reed sent, Jehova sien Jesaz äwa Huararie to jehorchen?

⁶ Wie bliewen von aules wajch, waut met Huararie to doonen haft (Heb. 13:4). De Apostel Paulus jeef dän Rot: “Moakt aules en junt doot waut von june sintliche Natua kjemt”. Doamet muak hee dietlich, daut wie aules doonen sellen, waut doa needich es, schlajchte Wenschen uttoroden. Doawäajen doo wie nuscht un wie kjikjen uk nuscht, waut ons bat doa brinjen kunn, Huararie to begonen (Kol. 3:5; Hiob 31:1). Un wan doa eene Vesieekjunk oppkjemt, waut orrajchtet to denkjen ooda to doonen, dan wies wie daut fuaz auf, wiels wie nich wellen, daut ons Frind sennen met Gott en Jefoa kjemt.

7. Waut well wie doonen, un wuarom?

⁷ Jehova well, daut wie am “von Hoaten jehuarsom” sent (Reem. 6:17). Wie kjennen nich utwälen, woone Jesazen wie hoolen wellen un woone nich. Oba wie motten doaraun denkjen, daut daut, waut hee von ons velangt, fa ons emma toom gooden es (Jes. 48:17-18; 1. Kor. 6:9-10). Wie strenjen ons aun, am to jefaulen un soo enjestalt to sennen aus de Psalmenschriewa dee doa säd: “Ekj hab mie em Hoat väajenomen, diene Jesazen emma un eewich to hoolen” (Psa. 119:112). Oba de Soton prooft, ons daut schwoa to moaken fausttostonen. Woo deit hee daut?

8. Woo brukt de Soton Vefoljunk, om ons daut schwoa to moaken?

⁸ Vefoljunk. De Soton deit ons hunjsch behaundlen un unja Druck saten, om ons daut schwoa to moaken. Hee well ons “verieten”, daut wie nich mea Frind met Jehova kjennen sennen (1. Pet. 5:8). De ieeschtemmasche Christen wort daut uk schwoa jemoakt. Väle  worden vekjielt un soogoa dootjemoakt, wiels dee faust opp Jehova siene Sied stonen wullen (Apj. 5:27-28, 40; 7:54-60). De Soton vefolcht Gott siene Deena noch emma. Daut es doaraun to seenen, woo ommenschlich onse Breeda un Sestren en Russlaunt un en aundre Lenda jekjwält woaren un woo de Jäajna sikj opp veschiedne Wäaj jäajen ons stalen.

9. Wuarom mott wie oppaussen, wan se ons hinjalestich unja Druck saten wellen? Jeff een Biespel.

⁹ Hee sat ons hinjalestich unja Druck. De Soton deit ons nich bloos jlikjtoo aunjriepen; hee brukt uk “lestje Aunschläaj”, ooda jript ons hinjalestich aun (Efs. 6:11, JHF). Denkj wie biejlikj mol aun daut, waut een Brooda beläwd, waut Bob heet. Am fäld een grootet Oppereeschen un hee säd to de Doktasch, daut am opp kjeene Wajch sull Bloot enjelakjt woaren. De Dokta, waut am opperieren wudd, wia doamet envestonen. Oba dee Nacht ver daut Oppereeschen kjeem de Dokta, waut am beteiben wudd, aus siene Famielje doa nich rom wia. Dee säd to Bob, daut am daut meist secha nich aun Bloot fälen wudd, oba see wudden daut doa bloos reed haben, wan daut doch sull needich sennen. Veleicht docht dis Dokta, daut Bob siene Meeninj endren wudd, wan hee doa auleen wia. Oba Bob bleef opp sien Stekj stonen un säd, daut am opp kjeene Wajch sull Bloot enjelakjt woaren.

10. Wuarom es daut sea jefäadlich, soo aus de Menschen enne Welt denkjen? (1. Korinta 3:19-20).

¹⁰ De Welt äa denkjen. Wan wie aun Sachen soo naunkjikjen aus de Menschen en dise Welt, dan kunn wie äwa Jehova siene Jesazen endoontich woaren (läs 1. Korinta 3:19-20). “Dise Welt äare Weisheit” brinjt Menschen jeweenlich bat doa, daut dee Gott ojjehuarsom woaren. Eenje Christen von Pergamon un Tiatira fungen aun, äwa Aufjettarie un Huararie soo to denkjen aus de Menschen doa. En dise Vesaumlungen wort Huararie begonen un dee deeden doa nuscht met. Doawäajen deed Jesus dee strenj vemonen (Opb. 2:14, 20). Vondoag dän Dach kjennen de Menschen ons uk bat doa brinjen, daut wie soo denkjen aus dee. Onse Famielje un Frind kunnen ons veleicht enbillen, daut wie too strenj sent un daut daut nich needich es, no Jehova siene Jesazen to läwen. Veleicht sajen see, daut doa nuscht met orrajcht es, onse schlajchte Wenschen notogonen, un daut daut nich mea jeltich es, waut de Bibel äwa Huararie sajcht.

11. Waut wudd wie nich sellen doonen?

¹¹ Eenjemol kaun sikj ons daut soo späaren, daut de Aunwiesungen von Jehova nich kloa jenuach sent. Veleicht well wie soogoa “wieda gonen . . . aus jeschräwen steit” (1. Kor. 4:6). De Jemeentenleidasch to Jesus siene Tiet deeden krakjt dit. Derch äare selfstjemoakte Jesazen läden see schwoare Lausten opp de Menschen (Mat. 23:4). Oba Jehova jeft ons kloare Aunwiesungen derch sien Wuat un siene Organisazion. Daut es nich needich, daut wie bie dise Aunwiesungen noch waut biedoonen (Spr. 3:5-7). Doawäajen go wie nich wieda aus daut, waut enne Bibel jeschräwen steit, un stalen uk nich Räajlen opp äwa Sachen, waut onse Breeda selfst entscheiden kjennen.

12. Woo brukt de Soton “Rädensoaten wua nuscht doarhinja es”?

¹² Hee well ons veleiden. De Soton brukt “Rädensoaten wua nuscht doarhinja es”, waut bloos vonne Welt staumen, om Spoolungen to veuasoaken un de Menschen to veleiden (Kol. 2:8). To de Aposteltiet wieren daut biejlikj menschelje Iedeeen, ooda de Juden äare Lieren, waut sikj nich oppe Schreft stetten, ooda de Lia, daut Christen sikj sullen aun daut Jesaz Moses hoolen. Aul dit veleid de Menschen, wiels see dan nich mea no Jehova horchten, von dän de woare Weisheit kjemt. Vondoag  dän Dach brukt de Soton daut Internet un Tellewizhen, om oppjemoakte Jeschichten un faulsche Norechten to vebreeden, dee von Menschen enne Politikj häastaumen. En de COVID-Tiet wia dit kloa to seenen. c Dee, waut sikj von dise faulsche Norechten veleiden leeten, hauden daut sea schwoa. Oba Jehova siene Zeijen, waut no de Organisazion horchten, kunnen daut aula utem Stich gonen (Mat. 24:45).

13. Wuarom mott wie oppaussen, daut wie ons nich auflenkjen loten?

¹³ Hee well ons auflenkjen. Wie sellen daut nich utem Uag velieren, “waut daut aulabaste es” (Filip. 1:9-10). Wan wie aufjelenkjt sent, dan doo wie väl Tiet un Krauft vekwosen. Mau rajcht gaunz jeweenelje Sachen, soo aus äten un drinkjen, vereiwen ooda schaufen, kjennen ons auflenkjen, wan daut en ons Läwen bloos doarom jeit (Luk. 21:34-35). Un dan mott wie uk noch meist jieda Dach doavon hieren ooda läsen, woo Rejierungsmana sikj strieden un woo de Menschen sikj jäajen de Rejierunk stalen. Wie kjennen ons nich loten von dise Sachen auflenkjen, sest woa wie ons en onse Jedanken opp eene Sied stalen. Aul dit, wua wie von jerät haben, brukt de Soton, om ons daut schwoa to moaken, daut rajchte to doonen. Nu well wie mol seenen, woo wie ons doafäa wäaren kjennen un fauststonen.

14. Waut es eenatlei, waut ons halpen kaun, faust opp Jehova siene Sied to bliewen?

¹⁴ Denkj äwa diene Hangow un Doop no. Du jeefst die Jehova han, wäajen du die opp siene Sied stalen wust. Waut holp die, die secha to sennen, daut du de Woarheit jefungen hautst? Du hast Jehova kjanen jelieet un jelieet, am aus dienen himlischen Voda to achten un to leewen. Dien Gloowen wort jrata un du hast uk een Leetsennen jekjräajen. Dan hast du oppjehieet, soont to doonen, waut Jehova nich jleicht, un du hast aunjefongen, soo to läwen, aus am daut jefelt. Du feelsd die leicht, aus du ieescht aules met Gott oppem kloaren jebrocht hautst (Psa. 32:1-2). Du wankst no de Toopkomes un fungst aun, met aundre  äwa de scheene Sachen to räden, waut du jelieet hautst. Dan jeefst du die Jehova han un leetst die deepen. Von dan aun best du opp dän Wajch, dee toom Läwen fieet, un du best die gaunz eenich, doabowen to bliewen (Mat. 7:13-14).

15. Wuarom es daut goot, wan wie studieren un doaräwa nodenkjen?

¹⁵ Studia Gott sien Wuat un denkj doaräwa no. Krakjt soo aus een Boom fauststonen kaun, wäajen dee deepe Wartlen haft, kjenn wie fauststonen, wan ons Gloowen deep en Gott sien Wuat vewartelt es. Je jrata de Boom waust, je deepa gonen dän siene Wartlen un je wieda spreeden dee sikj ut. Wan wie studieren un doaräwa nodenkjen, dan woat ons Gloowen stoakja un wie woaren ons gaunz eenich sennen, daut Gott siene Wäaj emma de baste sent (Kol. 2:6-7). Denkj doaräwa no, woo Jehova siene Deena von ieeschtemma siene Aunwiesungen, sien Rot un sien Schutz togood kjeem. Hesekiel paust biejlikj sea opp, aus een Enjel dän Tempel krakjt aufmäten deed. Dise Vision stoakjt Hesekiel sea. Un ut dee kjenn wie lieren, woo wie kjennen fa Jehova siene Jesazen fa de reine Aunbädunk enstonen (Hes. 40:1-4; 43:10-12). d Daut woat ons togood komen, wan wie ons de Tiet nämen, de deepe Sachen von Gott sien Wuat to studieren un doaräwa notodenkjen.

16. Woo holp Bob daut, daut hee en sien Hoat fauststunt? (Psalm 112:7).

¹⁶ Moak dien Hoat stoakj. De Kjennich David säd, daut hee kjeenmol opphieren wudd, Jehova to leewen. Un hee sunk en een Leet: “Faust es mien Hoat” (Psa. 57:8, JHF). Ons Hoat kaun uk faust sennen un wie kjennen gaunz opp Jehova vetruen (läs Psalm 112:7, JHF). See wie mol, woo Bob daut holp, von dän wie ea aul räden. Aus de Dokta to am säd, daut see daut Bloot doa reedlajen wudden, säd hee fuaz, daut wan se am wudden wäajen irjenteene Uasoak wellen Bloot enlakjen, dan wudd hee nu fuaz vom Hospitol veloten. Lota säd Bob: “Ekj wia mie hundat Prozent eenich un ekj twieweld nuscht.”

17. Waut lia wie von Bob siene Jeschicht? (See uk daut Bilt.)

 ¹⁷ Bob wia sikj eenich fausttostonen, wäajen hee sikj aul lang ea doaropp reedjemoakt haud, ea hee nom Hospitol kjeem. Waut holp am? Ieeschtens wull hee Jehova schaftich moaken. Tweedens deed hee sea de Schreft un onse Bieekja studieren un kunn vestonen, daut daut Läwen un Bloot heilich es. Dreddens wia hee sikj secha, daut Jehova am fa sien jehuarsom sennen beloonen wudd. Wie kjennen uk en ons Hoat fauststonen, krakjt endoont waut fa schwoaret wie derchmoaken.

18. Woo lieet Barak sien Biespel ons, opp Jehova to vetruen? (See daut Bilt oppe väaschte Sied.)

¹⁸ Vetru opp Jehova. See wie mol, woo Barak daut togood kjeem, daut hee opp Jehova siene Aunwiesungen vetrud. Wan de Israeliten to dee Tiet uk nich Kjrichsjereetschoft hauden, säd Jehova oba, see sullen jäajen dän kanaanitischen Väaschten Sisera un siene groote Armee kjamfen (Rech. 5:8). De Profeetin Debora säd to Barak, daut hee sull raufgonen no de jlikje Städ un doa jäajen Sisera kjamfen, waut met 900 Kjrichswoages aunkjeem. Opp eene jlikje Städ wudd daut fa de Israeliten noch väl schwanda sennen, jäajen Soldoten opp Kjrichswoages to kjamfen. Oba Barak jehorcht doawäajen. Aus de Israeliten von dän Tabor-Boajch raufjinjen, leet Jehova daut sea räajnen. Sisera siene Kjrichswoages bleewen em Blott stäakjen, un soo leet Jehova Barak jewennen (Rech. 4:1-7, 10, 13-16). Krakjt soo woat Jehova ons uk jewennen loten, wan wie opp am vetruen un opp de Aunwiesungen, waut hee ons derch siene Organisazion jeft (5. Mo. 31:6).

19. Wuarom best du die eenich, wieda fausttostonen?

¹⁹ Soo lang, aus wie en dise Welt läwen, mott wie wieda doano seenen, fausttostonen (1. Tim. 6:11-12; 2. Pet. 3:17). Well wie ons eenich sennen, ons von nuscht omschmieten to loten; nich wan se ons vefoljen ooda hinjalestich unja Druck saten, nich von daut, woo de Menschen enne Welt denkjen, uk nich von Sachen, waut ons veleiden ooda auflenkjen kunnen (Efs. 4:14). Well wie leewa fauststonen un Jehova emma leewen un siene Jebooten nokomen. To deeselwje Tiet well wie oba uk derchjedocht sennen. En dän näakjsten Artikjel woa wie seenen, daut Jehova un Jesus daut baste Biespel doarenn sent.