1. Wuarom hab wie eenjemol Angst?

 WIE aula haben noch mol Angst. Daut Bibelstudium haft ons von välet friejemoakt soo aus, daut wie nich brucken Angst haben, waut met de Doodes es ooda fa beese Jeista ooda waut lota noch mol komen woat. Oba doa sent doawäajen noch “Sachen, . . . waut toom grulen sent”, soo aus Kjrich, Vebräakjen un Krankheiten (Luk. 21:11). Wie haben veleicht uk Angst fa Menschen, soo aus fa de Rejierungen, waut ons schlajcht behaundlen ooda fa de Famielje, waut jäajen de Woarheit sent. Eenje moaken sikj veleicht Sorjen, daut see nich woaren kjennen tru bliewen, wäajen de Trubbels, waut see nu jroz haben ooda waut lota kunnen oppkomen.

2. Wuarom wia David en Gat un waut beläwd hee doa?

² David haud bieaun mol Angst. Biejlikj aus de Kjennich Saul am dootmoaken wull, wort David sikj eenich, en de Filista äare Staut Gat to flichten. De Kjennich Achisch von Gat, wort daut boolt en, daut David de stoakja Kjrichsmaun wia, wua se en een Leet von sungen, daut hee “tieendusende” Filista dootjemoakt haud. David “wia Angst” (1. Sam. 21:11-13). Hee sorjd sikj doaräwa, waut Achisch met am doonen wudd. Woo wort David met siene Angst foadich?

3. Woo kunn David met siene Angst foadich woaren? (Psalm 56:2-4, 12).

³ En Psalm 56 räd David doavon, woo hee sikj feeld, aus hee en Gat wia. En disen Psalm muak David daut kloa, wuarom hee Angst haud un räd uk doaräwa, waut am holp, daut hee nich mea Angst haud. Wan David Angst haud, vetrud hee opp Jehowa  (läs Psalm 56:2-4, 12). David haud goode Uasoak, opp Jehowa to vetruen. Met Jehowa siene Help kunn David sikj waut utdenkjen. Hee deed sikj soo, aus wan hee nich gaunz kluak wia! Un daut kjeem goot ut, uk wan daut fonnich wia. Enne Städ daut Achisch David dootmoaken wull, wull hee nu bloos, daut hee von doa fuatgonen sull. Soo kunn David sikj fuatbrinjen (1. Sam. 21:14 – 22:1).

4. Woo kjenn wie ons Vetruen opp Jehowa stoakjen? Met waut jeit daut to vejlikjen?

⁴ Wan wie opp Jehowa vetruen, dan kjenn wie ruich bliewen, uk wan wie Angst haben. Oba woo kjenn wie ons Vetruen opp Jehowa stoakjen, besonda wan wie Angst haben? Well wie daut mol vejlikjen: Wan du wurscht enwoaren, daut du eene Krankheit hautst, dan wurscht du veleicht fuaz Angst haben. Oba wan du opp dän Dokta vetrust, kaust du ruja sennen. Hee haft veleicht aul väle jeholpen, waut uk soone Krankheit hauden aus du. Hee horcht die goot too un sajcht, daut hee daut vestonen kaun, woo du die feelst. Hee rot die eene Doktarie too, waut aundre aul jeholpen haft. Krakjt soo kjenn wie ons Vetruen opp Jehowa stoakjen, wan wie doaräwa nodenkjen, waut hee aul aules jedonen haft, waut hee nu deit un waut hee lota fa ons doonen woat. Dauts, waut David deed. Wan wie nu eenje von siene Wieed en Psalm 56 unjasieekjen, denkj doaräwa no, woo du dien Vetruen opp Jehowa stoakjen kaust un diene Angst äwakomen.

WAUT HAFT JEHOWA AUL JEDONEN?

5. Äwa waut docht David no, daut hee nich soo Angst haud? (Psalm 56:13-14).

⁵ Aus David sien Läwen noch en Jefoa wia, docht hee doaräwa no, waut Jehowa aul jedonen haud (läs Psalm 56:13-14). Äwa dit docht hee sien Läwen lank no. Biejlikj docht David äwa daut no, waut Jehowa jemoakt haud. Dit holp am denkjen, woo stoakj Jehowa es un woo sea hee de Menschen leeft (Psa. 65:7-10). David docht uk doaräwa no, waut Jehowa fa aundre jedonen haud (Psa. 31:20; 37:25-26). Un hee docht besonda doaräwa no, waut Jehowa fa am perseenlich aul jedonen haud. Von Kjint aun haud Jehowa David  beschizt un jeholpen (Psa. 22:10-11). Äwa soont notodenkjen, mott David sien Vetruen opp Jehowa sea jestoakjt haben!

6. Waut woat ons halpen, opp Jehowa to vetruen, wan wie Angst haben?

⁶ Wan du Angst hast, dan denkj äwa dit no: “Waut haft Jehowa aul aules jedonen?” Denkj äwa daut no, waut Jehowa jemoakt haft. Du kaust biejlikj krakjt beoobachten, woo Jehowa sikj om de Väajel un om de Bloomen kjemmat, dee nich soone Ieejenschoften haben aus hee un am uk nich deenen kjennen. Daut woat die halpen, noch dolla opp am to vetruen (Mat. 6:25-32). Denkj uk doaräwa no, woo Jehowa siene Deena aul jeholpen haft. Du kaust enne Bibel von soone läsen, dee grooten Gloowen weesen; ooda du kaust uk eene Erfoarunk läsen von wäm en onse Tiet. a Un denkj uk doaräwa no, woo Jehowa fa die jesorcht haft. Woo haft hee die no de Woarheit jetrocken? (Joh. 6:44). Woo haft hee diene Jebäda beauntwuat? (1. Joh. 5:14). Woo kjemt die Jesus sien Opfa jieda Dach togood? (Efs. 1:7-8; Heb. 4:14-16).

7. Woo holp Vanessa de Erfoarunk von dän Profeet Daniel toom met äare Angst foadich woaren?

⁷ Vanessa, b eene Sesta en Haiti, beläwd mol waut schwoaret. Een Maun von äare Staut fond ar un schreef ar jieda Dach toom ar beräden, daut hee met ar wull. Vanessa säd daut fuaz auf. Oba de Maun wort noch driesta un dreiwd ar Schoden auntodoonen. See sajcht: “Ekj haud Angst.” Waut deed Vanessa? See deed aules, waut see kunn, om sikj to beschitzen. Een Eltesta holp ar, daut aun de Poliezen to malden. Oba see docht uk doaräwa no, woo Jehowa siene Deena ieeschtemma beschitzen deed. Vanessa sajcht: “Daut ieeschte docht ekj aun dän Profeet Daniel. Hee wort en een Loch jeschmäten, wua hungaje Leiws bennen wieren, wan hee uk nuscht orrajchtet jedonen haud. Oba Jehowa beschizt am. Ekj bäd Jehowa doarom, daut hee mie fa disen Maun beschitzen sull. Un nodäm haud ekj nich mea Angst” (Dan. 6:13-23).

WAUT DEIT JEHOWA NU?

8. Äwa waut wia David sikj gaunz secha? (Psalm 56:9).

⁸ Wan David en de Staut Gat uk en Läwesjefoa wia, docht hee oba nich too sea doaräwa no, waut am Angst muak. Enne Städ daut docht hee dolla doaräwa no, waut Jehowa dan jroz fa am deed. David wort en, daut Jehowa am leiden un beschitzen deed un krakjt vestunt, woo hee sikj feeld (läs Psalm 56:9). David haud uk soone Frind aus Jonatan un dän Huagen Priesta Ahimelech, waut am tru biestonen un halpen deeden (1. Sam. 20:41-42; 21:7, 9-10). Wan de Kjennich Saul David uk dootmoaken wull, kjeem hee oba met sien Läwen doavon. Hee wia sikj secha, daut Jehowa krakjt wist, waut met am aunjinkj un woo hee sikj wäajen daut feeld.

9. Waut woat Jehowa von jiedrem eenen en?

⁹ Wan du mol schwoaret beläfst, waut die Angst moakt, dan denkj doaraun, daut Jehowa daut krakjt sitt un krakjt weet, woo du die wäajen daut schwoare feelst. Aus de Israeliten biejlikj en Ägipten wieren, sach Jehowa daut nich bloos, daut dee schlajcht behaundelt worden, oba hee wist uk “daut see . . . lieden” musten (2. Mo. 3:7). David sunk en een Leet, daut Jehowa siene “Trubbels” sach un uk, “woo grulich sea schwoa” am daut wia (Psa. 31:7, NW). Un wan Jehowa siene Deena lieden musten, mau rajcht wan dee sikj daut selfst enjerieet hauden, “[jaumad] am daut äwa an” un am sad daut uk too (Jes. 63:9).  Jehowa kaun daut krakjt vestonen, woo du die feelst, un hee es wellich reed, die to halpen, met diene Angst foadich to woaren.

10. Wuarom best du die gaunz secha, daut Jehowa die sitt, un daut hee die halpen woat, met jieda Trubbel foadich to woaren?

¹⁰ Wan du waut schwoaret beläfst, dan sitst du veleicht nich krakjt, woo Jehowa die halpt. Waut kaust du dan doonen? Froag Jehowa, daut hee die halpt to seenen, woo hee die unjastett (2. Kjen. 6:15-17). Dan denkj doaräwa no: Haft eene Räd ooda eene Auntwuat enne Vesaumlunk mie Moot jejäft? Haft een Buak ooda een Video ooda een besondret Leet mie jeholpen? Haft doa wäa waut to mie jesajcht ooda mie eenen feinen Bibelvarsch jewäsen, waut mie Krauft jeef? Wie kjennen daut leicht vejäten, woo väl Leew un Moot onse Breeda un Sestren ons jejäft haben un woo sea ons Gott sien Wuat aul jeholpen haft. Oba aul dit es een wieetvollet Jeschenkj von Jehowa (Jes. 65:13; Mar. 10:29-30). Daut bewiest, daut hee om ons todoonen es (Jes. 49:14-16). Un daut bewiest uk, daut wie werkjlich opp am vetruen kjennen.

11. Waut holp Aida, äare Angst to äwakomen?

¹¹ Aida, waut en Senegal wont, wort en, woo Jehowa ar en schwoare Tieden holp. Wäajen see daut elste Kjint wia, velangden de Elren, daut see fa sikj selfst un fa äant sorjen sull. Oba aus see äa Läwen eefacha muak toom Pionia sennen, jinkj ar daut sea knaup. Äare Famielje wia doll un räden schlajcht äwa ar. See sajcht: “Ekj haud Angst, daut ekj miene Elren nich wudd halpen kjennen un daut aule mie wudden aufwiesen. Ekj jeef uk Jehowa de Schult, wäajen daut soo schwoa dreid.” Dan hieed see eene Räd enne Vesaumlunk. See sajcht: “Deejanja, waut de Räd hilt, holp ons doaraun denkjen, daut Jehowa krakjt weet, waut ons Angst moakt. Derch dän Rot von de Eltestasch un von aundre kunn ekj soo bie sacht vestonen, daut Jehowa mie leewd. Wan ekj to Jehowa bäden deed, dan haud ekj wada daut Vetruen, daut hee mie halpen wudd. Un wan ekj sach, daut Jehowa miene Jebäda beauntwuaten deed, dan kjrieech ekj Fräd.” Met de Tiet funk Aida eene Oabeit, waut ar holp fa dän Pioniadeenst un daut see äare Elren un uk aundre met Jelt unjastetten kunn. See  sajcht: “Ekj hab jelieet, gaunz opp Jehowa to vetruen. Wan ekj nu bäden doo, dan jeit miene Angst foaken wajch.”

WAUT WOAT JEHOWA NOCH DOONEN?

12. Äwa waut wia David sikj no Psalm 56:10 no gaunz secha?

¹² Läs Psalm 56:10. En disen Varsch rät daut noch von waut aundret, waut David holp, wan hee Angst haud. Wan sien Läwen uk en Jefoa wia, docht hee doaräwa no, waut Jehowa noch fa am doonen wudd. David wist, daut Jehowa am to de rajchte Tiet raden wudd. Un Jehowa haud je daut uk jesajcht, daut David de näakjsta Kjennich en Israel wudd sennen (1. Sam. 16:1, 13). Fa David wieren Jehowa siene Vespräakjungen soo secha, aus wan dee sikj aul erfelt hauden.

13. Waut woat Jehowa boolt doonen?

¹³ Waut sajcht Jehowa, waut hee noch fa ons doonen woat? Wie räakjnen nich doamet, daut Jehowa aule Trubbels von ons aufhelt. c Krakjt endoont waut vonne Trubbels wie en dise Welt derchgonen, wie wellen em Denkj hoolen, daut Jehowa dee enne niee Welt aula äwatsied schaufen woat (Jes. 25:7-9). Ons Schepfa haft de Macht, de Doodes opptowakjen, ons gaunz jesunt to moaken un aule Jäajna äwatsied to schaufen (1. Joh. 4:4).

14. Äwa waut kjenn wie nodenkjen?

¹⁴ Wan du Angst hast, dan denkj doaräwa no, waut Jehowa noch doonen woat. Denkj doaräwa no, woo du die feelen woascht, wan de Soton nich mea doa es un wan aul de schlajchte Menschen venicht sent un doa bloos jerajchte Menschen sent un wan de Onvolkomenheit soo bie sacht emma dolla wajchgonen woat. En eene Väafierunk opp dän dreedoagschen Kongress aune 2014 wort jewäsen, woo wie äwa onse Hopninj nodenkjen kjennen. Een Voda räd met siene Famielje, woo daut wudd en 2. Timotäus 3:1-5 stonen, wan daut äwa daut Paradies räden wudd. Hee säd: “En de niee Welt woat daut soo scheen sennen, aus noch kjeenmol ea. De Menschen woaren aundre leewen, no jeisteljet hinjaraun sennen, aundre fa hecha talen, deemootich sennen, Gott lowen, de Elren jehorchen, dankboa sennen, tru sennen, äare Famielje väl räakjnen, no Fräd sträwen, von aundre emma goot räden, sikj beharschen, saunftmootich sennen, daut goode väl räakjnen, to vetruen sennen, nich ieejenkoppich un stolt sennen, Gott dolla leewen aus daut Vejnieejen un opp iernst gottesferchtich sennen. Met soone Menschen hool toop.” Deist du met diene Famielje ooda met Breeda un Sestren doaräwa räden, woo daut Läwen enne niee Welt woat sennen?

15. Waut holp Tanja, aus see sea Angst haud?

¹⁵ Well wie mol seenen, waut eene Sesta von Nuad-Mazedonien, waut Tanja heet, beläwd. Äare Elren wieren sea doajäajen, daut see de Bibel studieed. Oba wiels see doaräwa nodocht, waut Jehowa noch doonen wudd, holp ar daut, daut see kunn tru bliewen, wan see uk Angst haud. See sajcht: “Eenje Sachen, wuafäa ekj Angst haud, kjeemen krakjt soo rom. Miene Mame vekjield mie no jieda Toopkomen. Miene Elren säden, daut see mie wudden dootmoaken, wan ekj wudd eent von Jehowa siene Zeijen woaren.” Met de Tiet schekjten äare Elren ar von tus. Waut deed see? See sajcht: “Ekj docht doaräwa no, daut ekj fa emma wudd schaftich sennen, wan ekj nu tru bleef. Ekj docht uk doaraun, daut Jehowa mie aules trigjjäwen wudd, waut ekj en dise Welt veloaren haud, un daut ekj nich mea aun daut schlajchte denkjen wudd.” Tanja bleef tru, un met Jehowa siene Help funk  see uk eene Städ toom wonen. Nu es Tanja met eenen Brooda befriet, waut Jehowa deent, un see deenen schaftich em Voltietdeenst.

STOAKJ NU DIEN VETRUEN

16. Waut woat ons halpen, wieda mootich to sennen, wan Lukas 21:26-28 sikj erfellen woat?

¹⁶ En de groote Liedenstiet woaren de Menschen “ut Angst beschwiemen”. Oba Gott siene Deena woaren staunthauft bliewen un Moot hoolen (läs Lukas 21:26-28). Wuarom woa wie ons nich loten von de Angst unjakjrieen? Wäajen wie daut aul jelieet haben, opp Jehowa to vetruen. Tanja, von dee wie ea aul räden, sajcht, daut see nu bäta kaun met schwoare Loagen foadich woaren, wäajen daut, waut see ea beläwd. See sajcht: “Ekj hab jelieet, daut doa kjeene Loag es, wua Jehowa ons nich säajnen kaun un ons halpen, staunthauft to bliewen. Eenjemol lat daut veleicht soo, daut aundre aules en äare Macht haben, oba de Woarheit es, daut dee bloos soo väl doonen kjennen, aus Jehowa äant toolat. Krakjt endoont woo schwoa eene Proow es, dee woat een Enj nämen.”

17. Woo woat de Varsch fa daut Joa 2024 ons halpen? (See daut Bilt oppe väaschte Sied.)

¹⁷ Angst haben es nu gaunz jeweenlich. Oba soo aus David brukst du die nich loten von de Angst unjakjrieen. Ons Varsch fa daut Joa 2024 es een Jebäd von David to Jehowa: “Wan mie angst woat, velot ekj mie opp die” (Psa. 56:4). Een Bibeljelieeda säd äwa disen Bibelvarsch: “David denkjt nich äwa siene Trubbels no ooda äwa daut, waut am Angst moakt. Enne Städ daut velat hee sikj opp dän, dee am raden woat.” Denkj en de näakjste Moonaten besonda dan äwa onsen Varsch fa daut Joa no, wan du derch schwoaret jeist. Nemm die de Tiet, äwa daut notodenkjen, waut Jehowa ieeschtemma deed, waut hee nu deit un waut hee noch doonen woat. Dan woascht du dautselwje sajen kjennen, waut David: “En Gott hab ekj mien vetruen, un woa mie nich ferchten” (Psa. 56:5).