1-2. Waut fa een besondret Toopkomen woa wie haben, un wuarom veeent ons daut soo sea? (See daut Bilt aum Aunfank.)

DÄN 31. Moaz 2018, wan de Sonn unjajeit, woaren Gott siene Deena un väl Intressieede daut Owentmol fieren, waut eemol daut Joa es. Aun disen Dach woaren millionende Menschen toopkomen, om aun Christus sienen Doot to denkjen. Dit es waut sea besondret, wiels kjeen aundret Toopkomen oppe Ieed veeent de Menschen jieda Joa soo sea aus daut Owentmol.

² Woo schaftich motten Jehova un Jesus nich sennen, wan dee seenen, woo millionende Menschen bie dit besondre Toopkomen sent, waut opp eene Städ no de aundre jehoolen woat, ea dis Dach äwa es! De Bibel säd verut, daut “von aule Raussen, Volkjsstam, Sproaken un Menschen, eene Häad, dee kjeena talen kunn”, met lude Stemm sajen wudd: “Onse Radunk kjemt von onsen Gott, dee opp däm Troon sett, un von daut Laum!” (Opb. 7:9-10). Es daut nich scheen, daut Jehova un Jesus derch daut Owentmol jieda Joa jeieet woaren?

3. Äwa waut fa Froagen woa wie en disen Artikjel räden?

 ³ En disen Artikjel woa wie äwa eenje Froagen räden, waut doa oppjekomen sent: (1) Woo kaun jieda eena sikj fa daut Owentmol reedmoaken, un wuarom loont sikj daut, doa to sennen? (2) Woo halpt daut Owentmol Gott siene Deena, daut dee veeent bliewen? (3) Woo kaun jieda eena sien Poat to dise Eenichkjeit biedroagen? (4) Woa wie irjentwanea nich mea daut Owentmol fieren? Wan jo, wanea?

4. Wuarom sell wie daut soo iernst nämen, no daut Owentmol to wanken, wan daut sest mäajlich es?

⁴ Denkj doaräwa no, woo wichtich daut es, biem Owentmol to sennen. De Toopkomes jehieren je to onsen Deenst fa Gott. Secha beoobachten Jehova un Jesus daut, wan wie ons bemieejen, no daut wichtichste Toopkomen von daut gaunze Joa to wanken. Un wie wellen je uk, daut dee ons bie daut Owentmol seenen, buta daut jeft Omstend, waut daut ommäajlich moaken. Wan wie daut met de Toopkomes iernst nämen, dan haft Jehova noch mea Uasoak, onse Nomes nich ut daut Läwesbuak to strikjen, wua aul dee oppjeschräwen sent, waut daut eewje Läwen kjrieen woaren (Mal. 3:16; Opb. 20:15).

5. Woo kjenn wie ver daut Owentmol unjasieekjen, aus wie “em Gloowen stonen”?

⁵ Ea daut Owentmol bat naun es, kjenn wie ons aul mea Tiet nämen toom bäden un iernstlich doaräwa nodenkjen, woo wie ons met Jehova stonen (läs 2. Korinta 13:5). Woo kjenn wie daut doonen? Wan wie ons selfst unjasieekjen, aus wie “em Gloowen stonen”. Wie kunnen doaräwa nodenkjen: “Sie ekj mie werkjlich secha, daut ekj to dee Organisazion jehia, waut Jehova jewält haft toom sienen Wellen doonen? Jäw ekj mien bastet toom de goode Norecht von Gott sien Rikj prädjen un lieren? Es aun mien Läwen to seenen, daut ekj werkjlich jleew, daut wie en de latste Tiet läwen un daut de Soton nich mea lang harschen woat? Vetru ekj opp Jehova un Jesus noch krakjt soo sea aus don, aus ekj mie Jehova Gott hanjeef?” (Mat. 24:14; 2. Tim. 3:1; Heb. 3:14). Wan wie äwa dise Froagen nodenkjen, dan kjenn wie seenen, woo daut met ons steit.

6. (a) Waut mott wie doonen, daut wie daut eewje Läwen kjrieen? (b) Woo moakt een Eltesta sikj jieda Joa fa daut Owentmol reed, un woo wudd wie daut biejlikj soo doonen kjennen?

⁶ Wie kjennen uk Artikjels läsen, waut utlajen, waut daut Owentmol bediet, un doaräwa nodenkjen (läs Johanes 3:16; 17:3). Daut wie kjennen eewich läwen, mott wie Jehova “kjanen lieren” un Gloowen bewiesen aun sienen eensjen Sän Jesus. Wan wie ons fa daut Owentmol reedmoaken, wudd wie dan kjennen eenjet studieren, waut ons halpt, Jehova un Jesus noda to komen? Soo haft een Brooda daut jedonen, waut aul lang Eltesta es. Hee haft aul Joaren emma Artikjels von dän Woaktorm toopjesaumelt, waut äwa daut Owentmol räden un woo Jehova un Jesus ons äare Leew jewäsen haben. De Wäakjen ver daut Owentmol läst hee sikj dee wada derch un denkjt doaräwa no, woo wichtich daut Owentmol es. Eenjemol deit dee doa uk fresche Artikjels bie. Dis Eltesta haft utjefungen, daut hee jieda Joa nieet lieet, wan hee de Artikjels läst un uk äwa daut Bibelläsen fa daut Owentmol nodenkjt. Un waut noch wichtja es: Siene Leew fa Jehova un Jesus woat doaderch uk jieda Joa noch jrata. Wan wie uk soo studieren, dan kaun onse Leew un Dankboakjeit fa Jehova un Jesus uk jrata woaren, soo daut wie mea von daut Owentmol haben.

7. (a) Fa waut bäd Jesus dän Zeowes, aus hee daut Owentmol enfieed? (b) Aun waut es to seenen, daut Jehova Jesus sien Jebäd aunneem?

⁷ Dän Zeowes, aus Jesus daut Owentmol enfieed, bäd hee doafäa, daut siene Nofolja sullen veeent sennen, soo aus hee un sien Voda veeent wieren (läs Johanes 17:20-21). Jehova haft daut Jebäd von sienen leewen Sän aunjenomen. Bie kjeen aundret Toopkomen es de Eenichkjeit von Jehova siene Zeijen soo kloa to seenen aus bie daut Owentmol. Oppe gaunze Welt komen doa millionende Menschen von väl veschiedne Velkja un Raussen toop un wiesen, daut see jleewen, daut Jehova sienen Sän jeschekjt haft. Daut Menschen von veschiedne Raussen toopkomen toom Gott aunbäden, es opp väl Städen framd ooda de Menschen talen daut fa schlajcht. Oba Jehova un Jesus freien sikj sea doaräwa!

8. Waut fa eene Norecht jeef Jehova Hesekiel?

⁸ Wie aus Jehova siene Deena sent nich vewundat äwa de Eenichkjeit, waut wie haben, wiels Jehova haft daut verutjesajcht. Hee säd to Hesekiel, hee sull twee Stekja Holt toopbrinjen, eent “fa Juda” un eent “fa Josef” (läs Hesekiel 37:15-17). Em Wachtturm von Juli 2016 sajcht daut bie de “Fragen von Lesern”: “Jehova jeef Hesekiel eene Norecht, waut Hopninj jeef. Hee vespruak, daut daut Volkj Israel wada wudd veeent sennen, wan dee ieescht trigj en daut vesproakne Launt wieren. Dise Norecht wiest uk, daut Gott sien Volkj en de latste Tiet wudd veeent sennen.”

9. Woo es jieda Joa bie daut Owentmol to seenen, daut Hesekiel siene Profezeiunk sikj erfelt haft?

⁹ Von 1919 aun deed Jehova soo bie sacht de Jesaulwde wada veeenjen un veschiednet trajchtstalen. Dee wieren soo aus daut Stekj Holt “fa Juda”. Met de Tiet schauften dan emma mea von soone, waut de Hopninj hauden, oppe Ieed to läwen, met de Jesaulwde toop. Dee wieren soo aus daut Stekj Holt “fa Josef”. Dise twee Gruppen worden dan to “eene Häad” (Joh. 10:16; Sach. 8:23). Jehova vespruak, daut hee dise beid Stekja Holt wudd toopbrinjen un en siene Haunt to eent moaken (Hes. 37:19). Nu deenen beid Gruppen veeent Jehova. Dee haben uk dänselwjen Kjennich – Jesus Christus. Jehova nant dän en Hesekiel siene Profezeiunk “David, dee mie deent” (Hes. 37:24-25). De besondre Eenichkjeit, wua Hesekiel von räd, es jieda Joa kloa to seenen, wan de äwajebläwne Jesaulwde un de “aundre Schop” sikj vesaumlen, om aun Jesus sienen Doot to denkjen. Oba waut kaun jieda eena doatoo doonen, daut dise Eenichkjeit blift un noch mea woat?

10. Woo kjenn wie methalpen, daut mank Gott sien Volkj Eenichkjeit es?

¹⁰ Eent, woo wie methalpen kjennen, daut Gott sien Volkj veeent blift, es, wan wie ons sea bemieejen deemootich to sennen. Aus Jesus oppe Ieed wia, säd hee to siene Jinja, daut see sikj selfst sullen kjlien moaken (Mat. 23:12). Wan wie von Hoaten deemootich sent, dan woa wie ons nich selfst huach häwen, soo aus de Welt. Wie woaren reed sennen, de Breeda unjadon to sennen, waut de Vesaumlunk väastonen. Bloos soo kaun doa Eenichkjeit sennen. Un daut baste es, daut Gott sikj doaräwa freit, wan wie deemootich sent, wiels hee “es jäajen de stolte, oba de deemootje schenkjt hee to rajchte Tiet Jnod” (1. Pet. 5:5).

11. Woo stoakjt daut de Eenichkjeit, wan wie doaräwa nodenkjen, waut daut Broot un de Wien bedieden?

¹¹ Waut es daut tweede, waut wie doonen kjennen, daut doa Eenichkjeit es? Wie kjennen  iernstlich doaräwa nodenkjen, waut daut Broot un de Wien bedieden, waut bie daut Owentmol jebrukt woaren. Daut sull wie aul ver disen besondren Dach doonen un besonda aun dän Owent (1. Kor. 11:23-25). Daut ojjesuade Broot bediet Jesus sienen volkomnen Kjarpa, waut hee aus Opfa jeef, un de rooda Wien bediet dän sien vegotnet Bloot. Oba daut es nich jenuach, bloos to weeten, waut daut bediet. Wie motten uk doaraun denkjen, woo väl Leew Jehova ons doaderch wees, daut hee sienen Sän fa ons jeef, un uk woo väl Leew Jesus ons wees, wiels hee reed wia, sien Läwen fa ons to jäwen. Daut sent de beid jratste Bewies fa Leew, waut et jeft. Wan wie doaräwa nodenkjen, dan woa wie Jehova un Jesus uk leewen. Un de Leew, waut wie un uk onse Gloowesbreeda fa Jehova haben, es soo aus een Strank, waut ons toophelt un onse Eenichkjeit stoakjt.

12. Woo wees Jesus derch daut Jlikjnis von dän Kjennich, waut veräakjnen wull, daut Jehova well, daut wie vejäwen sellen?

¹² Waut es daut dredde, waut wie doonen kjennen, daut doa Eenichkjeit es? Wan wie wellich sent, aundre to vejäwen. Doaderch wies wie, woo dankboa wie sent, daut ons de Sinden derch Christus sien Opfa kjennen vejäft woaren. Läs mol Jesus sien Jlikjnis en Matäus 18:23-34 un äwalaj dan: “Well ekj daut doonen, waut Jesus lieed? Sie ekj jeduldich met miene Breeda un hab ekj Vestentnis fa dee? Sie ekj reed, deejanje to vejäwen, waut mie schlajcht behaundelt haben?” Daut jeft groote Sinden uk kjlandre. Un wäajen wie onvolkomen sent, felt ons daut bie eenje Sinden sea schwoa, dee to vejäwen. Oba Jesus sien Jlikjnis wiest ons, waut Jehova haben well (läs Matäus 18:35). Jesus muak dietlich, daut Jehova ons nich vejäwen woat, wan wie onse Breeda nich vejäwen, wan doa een gooda Grunt fäa es. Daut es eene iernste Sach! Wan wie aundre togood hoolen, soo aus Jesus daut lieed, dan woat onse wieetvolle Eenichkjeit nich veloaren gonen.

13. Wuarom woat doa mea Eenichkjeit sennen, wan wie no Fräd sträwen?

¹³ Wan wie aundre togood hoolen, dan bewies wie, daut wie no Fräd sträwen. De Apostel Paulus säd, wie sullen ons aunstrenjen, ons eenich to bliewen un unjarenaunda  Fräd to haben (Efs. 4:3, NW). Denkj wie en de Tiet von daut Owentmol un besonda dän Zeowes goot doaräwa no, woo wie aundre behaundlen. Wie kunnen biejlikj äwalajen: “Es daut bie mie to seenen, daut ekj nich doll bliew met aundre? Sie ekj doafäa bekaunt, daut ekj mie aunstrenj, no Fräd un Eenichkjeit to trachten?” Daut es goot, wan wie en dise Tiet äwa soone iernste Froagen nodenkjen.

14. Woo kjenn wie wiesen, daut wie ons unjarenaunda ut Leew vedroagen?

¹⁴ Daut vieede, waut wie doonen kjennen, daut doa Eenichkjeit es, es aundre krakjt soo Leew wiesen, aus Jehova deit. Hee es je Leew (1. Joh. 4:8). Wie wudden kjeenmol wellen äwa onse Breeda sajen: “Ekj mott dee veleicht leewen, oba ekj jleich dee doawäajen nich.” Soo to denkjen wudd gaunz jäajen Paulus sienen Rot sennen. Hee säd: “Habt soo väl Leew, daut jie junt unjarenaunda vedroagen” (Efs. 4:2). Hee säd nich bloos, daut wie ons sullen “unjarenaunda vedroagen”. Hee säd, wie sullen daut ut Leew doonen. Daut es noch gaunz waut aundret. En onse Vesaumlungen jeft daut veschiedne Sorten Menschen, waut Jehova no sikj jetrocken haft (Joh. 6:44). Secha haft hee daut jedonen, wiels hee dee leeft. Woo wudd wie dan sajen kjennen, daut wäa von onse Gloowesbreeda daut nich wieet es, daut wie dän leewen? Wie motten onse Gloowesbreeda soo leewen, aus Jehova daut haben well (1. Joh. 4:20-21).

15. Woo weet wie, daut wie eenen Dach nich mea Owentmol haben woaren?

¹⁵ Eenen Dach woa wie nich mea Owentmol haben. Woo weet wie daut? Derch daut, waut Gott Paulus en sienen ieeschten Breef aun de jesaulwde Christen en Korint oppschriewen leet. Doa sajcht et, daut dee jieda Joa, wan dee daut Owentmol haben, bekaunt moaken, “daut de Har jestorwen es, un daut, soo lang bat hee wada kjemt” (1. Kor. 11:26). Wan daut hia sajcht, daut Jesus “kjemt”, dan es doamet dautselwje jemeent aus met daut “komen” en Jesus siene Profezeiunk äwa de Enjtiet. Hee säd je äwa de groote Triebsaul, waut meist bat hia es: “Dan woat dän Menschensän sien Tieekjen aum Himmel to seenen sennen. Dan woaren aule Velkja oppe Ieed jaumarieren, un see woaren dän Menschensän opp de Himmelswolkjen met Krauft un Harlichkjeit komen seenen. Un hee [Jesus] woat siene Enjel schekjen, lud met de Trompeeten to blosen, un dee woaren siene utjewälde ut aule vea Wintrechtungen saumlen, von een Enj Himmel bat däm aundren” (Mat. 24:29-31). Daut Jesus de Utjewälde saumelt, bediet, daut hee de Jesaulwde, waut noch oppe Ieed sent, nom Himmel nämen woat. Daut woat dan sennen, wan de groote Triebsaul ieescht aunjefongen haft, oba noch ea de Kjrich von Harmagedon es. Dan woat Jesus met aul de 144 000 toop jäajen de Kjennichs von de Ieed kjamfen un dee jewennen (Opb. 17:12-14). Daut Owentmol, waut wie haben woaren ea Jesus “kjemt”, om de Jesaulwde met nom Himmel to nämen, woat daut latste sennen.

16. Wuarom best du die eenich, dit Joa biem Owentmol to sennen?

¹⁶ Näm wie ons daut faust väa, dän 31. Moaz 2018 biem Owentmol to sennen. Un froag wie Jehova no Help, daut wie wieda ons Poat doonen kjennen, daut mank siene Deena Eenichkjeit es! (Läs Psalm 133:1.) Denkj doaraun, eenen Dach woa wie nich mea daut Owentmol fieren. Oba soo lang, aus daut noch nich bat doa es, well wie ons sea aunstrenjen, emma doa to sennen, un uk wiesen, daut ons de Eenichkjeit sea väl wieet es, waut wie doa haben.